Doktrinal nga Kahanas: 2 Mga Taga-Tesalonica 2:1–3

“Ang Adlaw ni Kristo … Dili Pa Moabot, Hangtod nga Mahitabo Una ang Pagsupil”

Imahe

Image of man at a desk writing on parchment

Sa miaging leksiyon, imong nakat-onan nga gitagna sa karaan nga sa dili pa ang Ikaduhang Pag-anhi ni Jesukristo, mahitabo ang usa ka Apostasiya gikan sa Iyang Simbahan (tan-awa ang “2 Mga Taga-Tesalonica 2”). Kini nga leksiyon makatabang nimo sa pagmemorya sa pakisayran sa doktrinal nga kahanas ug sa mahinungdanon nga hugpong sa pulong sa kasulatan alang sa 2 Mga Taga-Tesalonica 2:1–3 , pagpasabot sa doktrina sa Apostasiya, ug paggamit sa mga baroganan sa pag-angkon og espirituhanong kahibalo sa tinuod nga sitwasyon sa kinabuhi.

Pagtabang sa mga estudyante sa pagtinguha sa tubag sa pangutana nga may hugot nga pagtuo. “Daghan sa atong mga estudyante napanalanginan sa gasa sa matuohon nga kasingkasing. Ang kinabag-an sa atong mga estudyante adunay mga pangutana, dili mga pagduha-duha. Ang pamaagi sa atong paggamit sa Doktrinal nga Kahanas kinahanglang mopanghimatuod sa pagtuo ug makatabang sa mga estudyante nga matubag ang mga pangutana alang sa ilang kaugalingon ug makaandam sila sa pagtabang sa uban. Apan kinahanglan nga dili gayod kini himoon sa paagi nga makahimo og pagduha-duha o pagkunhod sa hugot nga pagtuo” (Chad H Webb, “Doktrinal nga Kahanas” [pakigpulong nga gihatag sa Seminaries and Institutes of Religion annual training broadcast, Hunyo 14, 2016]).

Pagpangandam sa estudyante: Dapita ang mga estudyante sa pagpamalandong sa mosunod nga pangutana ug motambong nga andam sa pagpasabot unsaon nila pagtubag niini: “Nganong gikinahanglan man sa Dios magpakita ngadto kang Joseph Smith aron mapahiuli ang Iyang Simbahan kon ang Kristiyanismo natukod na ug daghang mga tawo ang mituo na sa Biblia?”

Posible nga mga Kalihokan sa Pagkat-on

Gidisenyo kini nga leksiyon aron itudlo human sa leksiyon sa “2 Mga Taga-Tesalonica 2,” nga mao ang pangkontekstong leksiyon para sa tudling sa doktrinal nga kahanas sa 2 Mga Taga-Tesalonica 2: 1–3. Kon gikinahanglang ibalhin kini nga leksiyon sa laing semana aron motukma sa mga eskedyul sa eskuwelahan, seguroha nga ibalhin usab ang pangkontekstong leksiyon.

Imemorya ug ipasabot

Ipakita lamang ang pakisayran sa kasulatan 2 Mga Taga-Tesalonica 2:1–3, ug dapita ang mga estudyante sa pagtubag sa mosunod nga pangutana.

Unsa ang imong nahinumdoman mahitungod sa unsa ang gitudlo sa 2 Mga Taga-Tesalonica 2:1–3 ?

Sag-uloha ang pakisayran sa kasulatan ug ang mahinungdanong hugpong sa pulong sa kasulatan alang sa 2 Mga Taga-Tesalonica 2:1–3. Usa ka paagi sa pagbuhat niini mao ang pagkompleto sa mosunod nga mga kalihokan (o ang usa ka parehas niana gamit ang Doktrinal nga Kahanas nga mobile app):

Ang mga estudyante mahimong mokompleto sa mosunod nga kalihokan diha sa ilang kaugalingon, o kini mahimong buhaton diha sa pisara isip usa ka klase.

Isulat ang 2 Mga Taga-Tesalonica 2:1–3: “Ang adlaw ni Kristo … dili pa moabot, hangtod nga mahitabo una ang pagsupil”” diha sa imong journal sa pagtuon o sa imong digital nga device.

Balika og sulti sa makusog ang pakisayran ug ang mahinungdanong hugpong sa mga pulong sa kasulatan o diha sa imong hunahuna sulod sa pipila ka higayon.

Papasa o tangtanga ang usa ka hugpong sa pulong, sama sa “mahitabo una ang pagsupil,” ug sulayi paglitok og balik ang kompleto nga pakisayran ug mahinungdanong hugpong sa pulong sa kasulatan.

Padayona pagpapas o pagtangtang ang dugang mga hugpong sa mga pulong hangtod nga imong malitok og balik ang tibuok pakisayran ug ang mahinungdanong hugpong sa pulong sa kasulatan gikan sa panumdoman.

Lagmit imong mahinumdoman nga dihang gitun-an nimo ang 2 Mga Taga-Tesalonica 2 , imong nakat-onan nga gipanagna na sa karaan nga sa dili pa ang Ikaduhang Pag-anhi ni Jesukristo, usa ka apostasiya gikan sa Iyang Simbahan ang mahitabo.

Imbes pasulaton ang mga estudyante og usa ka pagpasabot sa Dakong Apostasiya isip kabahin sa mosunod nga kalihokan, mahimong ibutang sila nga managpares ug dapita sila sa pagpuli-puli sa pagpasabot sa Dakong Apostasiya ngadto sa usag usa. Kon ang mga estudyante gikinahanglan nga mas makasabot pa sa doktrina sa Apostasiya ug Pagpahiuli sa dili pa kompletohon kini nga kalihokan, mahimong maggahin og pipila ka minuto sa pagrebyo sa mga materyal gikan sa miaging leksiyon.

Pagsulat og usa ka pagpasabot kon unsa ang Dakong Apostasiya ug nganong nahitabo kini. Isulat nga ingon og imong gipasabot ang Apostasiya ngadto sa usa ka bata. Gamita ang mga kamatuoran gikan sa 2 Mga Taga-Tesalonica 2:1–3 isip kabahin sa imong pagpasabot, ug ilakip ang mga panabot kon nganong ang usa ka kompleto nga Pagpahiuli sa Simbahan ni Kristo gikinahanglan.

Bansaya ang paggamit

Kon gikinahanglan, paghatag og kahigayonan alang sa mga estudyante sa pagrebyo sa mga baroganan sa pag-angkon og espirituhanong kahibalo. Ang usa ka paagi sa pagbuhat niini mao ang pagpakita sa mosunod nga pagtukma nga pasulit alang kanila aron kompletohon sa ilang kaugalingon o magkapares o sa gagmay nga mga grupo. Isip alternatibo, ang pasulit mahimong ihatag electronically pinaagi sa usa ka online nga dula kon ang mga estudyante adunay access sa makahimo nga mga device. Ang eksaktong mga tubag mao ang (1) c; (2) a; (3) b.

Diha sa imong pagpadayon niini nga leksiyon, aduna kay kahigayonan sa pagtabang sa usa ka tawo nga mogamit sa mga baroganan sa pag-angkon og espirituhanong kahibalo. Aron makita unsa kamaayo ang imong paghinumdom niini nga mga baroganan, sulayi pagtukma ang mosunod nga mga pamahayag ngadto sa mga baroganan sa pag-angkon og espirituhanong kahibalo nga gihulagway sa matag pamahayag.

“Ang sinserong mga tigpangita sa kamatuoran kinahanglang magmabinantayon sa dili kasaligang mga tinubdan sa impormasyon.”
“[Salig] sa Dios ug Siya ang unahon pinaagi sa sinserong pag-ampo, ang pagtuon sa Iyang mga pagtulon-an, ug pagsunod sa Iyang mga sugo.”
“Ikonsiderar [ang mga pangutana] sa kinatibuk-ang kahulogan sa plano sa kaluwasan ug sa mga pagtulun-an sa Manluluwas.”

a. Molihok inubanan sa hugot nga pagtuo.b. Susihon ang mga konsepto ug mga pangutana inubanan sa mahangtorong panglantaw. c. Tinguhaa ang dugang nga panabot pinaagi sa balaanong gitudlo nga mga tinubdan.

Kon gikinahanglan pa gayod nimo ang pagrebyo niini nga mga baroganan, basaha ang mga parapo 5–12 diha sa “Pag-angkon og Espirituhanong Kahibalo” nga seksiyon sa Mahinungdanon nga Dokumento sa Doktrinal nga Kahanas (2022).

Dapita ang mga estudyante sa pagpamalandong sa ilang pagpangandam alang sa klase samtang ilang kompletohon ang mosunod nga pagbansay sa paggamit nga kalihokan.

Handurawa nga ikaw nag-text sa imong higala nga si Keyshawn, kinsa usa ka miyembro sa usa ka lahi nga Kristiyanong simbahan. Siya deboto kaayo kang Jesukristo ug kanunay nga nagtuon sa Biblia. Sa usa ka mensahe sa text nganha kanimo, miingon si Keyshawn, “Karong adlawa ang akong pastor mitudlo nga ang mga miyembro sa inyong simbahan nagtuo nga ang inyo mao lamang ang tinuod nga simbahan ug ang uban nga simbahan bakak. Tinuod ba kana? Akong gibati nga mas duol ko sa Dios tungod sa akong simbahan. Giunsa nga kini dili gikan sa Dios?”

Ngano kaha nga natural sa mga miyembro sa laing mga simbahan ang adunay mga pangutana nga sama niini?
Unsaon kaha nimo pagtubag kang Keyshawn sa Kristohanon nga paagi?

Imong gibawsan og text si Keyshawn, nagpasalamat ka niya sa iyang mahunahunaon nga pangutana. Nangutana ka kon mahimo ka bang mopaambit sa tubag kaniya sa sunod nga adlaw, ug siya miuyon.

Gamita ang mga baroganan sa pag-angkon og espirituhanong kahibalo sa pag-andam og tubag alang kang Keyshawn. Seguroha nga gamiton ang tanang tulo ka mga baroganan. Gamita ang mosunod nga mga pangutana ug mga kalihokan aron makatabang kanimo sa pag-andam sa imong tubag.

Ang mga estudyante mahimong maghisgot sa mosunod nga mga pangutana nga magkapares o diha sa gagmayng grupo sa dili pa nila isulat ang ilang mga tubag nga sila ra.

Mahimong makatabang alang sa mga estudyante ang pagpasa og usa ka kopya sa ilang mga tubag alang sa pagrebyo. Seguroha nga ang mga estudyante igo nga nakasabot sa doktrina sa Apostasiya ug Pagpahiuli ug sa mga baroganan sa pag-angkon og espirituhanon nga kahibalo.

Tinguhaa ang dugang nga panabot pinaagi sa balaanong gitudlo nga mga tinubdan

Unsaon man nimo paggamit sa mga kamatuoran nga gitudlo diha sa 2 Mga Taga-Tesalonica 2:1–3 aron matabangan si Keyshawn?

Pangita og labing menos sa tulo ka dugang nga mga kasulatan, mga pakigpulong, o mga artikulo nga sa imong hunahuna mahimong makatabang niini nga sitwasyon. Ikonsiderar ang paggamit sa mosunod nga mga kapanguhaan:

Basaha ang mga entry alang sa “ Apostasiya ” ug “ Pagpahiuli sa Ebanghelyo ” diha sa Giya ngadto sa mga Kasulatan. Kini nga mga entry anaa makita sa scriptures.ChurchofJesusChrist.org.
Tan-awa ngadto sa mga kasulatan ug mga pamahayag gikan sa “2 Mga Taga-Tesalonica 2” nga leksiyon o gikan sa “Leksiyon 1: Ang Mensahe sa Pagpahiuli sa Ebanghelyo ni Jesukristo” sa Isangyaw ang Akong Ebanghelyo (2018), 31–46.

Unsa nga mga tudling sa kasulatan o lain pang mga tinubdan ang imong nakit-an nga mahimong makatabang kanimo nga matubag si Keyshawn?

Susiha ang mga konsepto ug mga pangutana inubanan sa mahangtorong panglantaw

Unsa nga mga kamatuoran mahitungod sa Langitnong Amahan ug kang Jesukristo ang gusto nimong ipaambit kang Keyshawn nga mahimong makatabang kaniya nga makasabot sa pagkinahanglan sa Pagpahiuli?

Lihokon inubanan sa hugot nga pagtuo

Unsa nga pihong mga buhat ang imong idapit nga buhaton ni Keyshawn aron siya makakat-on sa iyang kaugalingon nganong ang usa ka Pagpahiuli sa Simbahan ni Kristo gikinahanglan?
Unsang klaseha sa mga kasinatian ang mahimong malaoman ni Keyshawn nga masinati kon iya kining pambuhaton nga mga buhat?
Sa unsang paagi nga ang pagdapit kaniya nga mobuhat sa usa ka lihok sa hugot nga pagtuo sa imong bahin?

Dapita ang mga estudyante nga andam mopaambit sa klase sa ilang mga tubag, lakip ang bisan unsang makatabang nga mga tudling sa kasulatan, mga pakigpulong, o mga artikulo nga ilang nakit-an. Kon aduna pay panahon, ikonsiderar ang pagdapit og pipila ka boluntaryo nga mopaambit giunsa nila pagkakuha sa ilang pagpamatuod sa Pagpahiuli.

Rebyo sa doktrinal nga kahanas

Sa sinugdanan o sa kataposang bahin sa umaabot nga leksiyon, paggahin og dili molapas sa tulo hangtod sa lima ka minuto sa pagrebyo sa pakisayran sa kasulatan ug sa mahinungdanong hugpong sa mga pulong sa kasulatan alang niining tudling sa doktrinal nga kahanas. Gamita ang susama nga pagsag-ulo nga kalihokan nga nakompleto sa mga estudyante sa unahan niining leksiyon.