1–2 Timoteo; Tito; Filemon

Kinatibuk-ang Pagpasabot

Ang pagtuon sa mga pulong ni Pablo sa leksiyon niining semanaha mahimong makatabang pagtubag sa daghang mga pangutana, sama sa “Unsa ang tahas sa usa ka bishop?” “Unsa ang espesyal nga gasa nga gihatag sa Dios kanato aron matabangan kita nga mabuntog ang mga hagit sa kataposang mga adlaw?” “Unsaon nato paglahutay hangtod sa kataposan?” Sa nangagi, imong natun-an ang mga sulat ni Pablo ngadto sa mga miyembro sa pagtuo sa lainlaing mga lungsod. Karong semanaha, imong tun-an ang makatabang nga mga kamatuoran nga gisulat ni Pablo ngadto sa tulo ka mga indibidwal: Timoteo, Tito, ug Filemon.

Pangandam sa Pagtudlo

Ang mosunod nga impormasyon naghatag sa mga magtutudlo og mga ideya kon unsa ang mahimong kinahanglan nga andamon nang daan para sa kada leksiyon:

1 Timoteo 3:1–7; Tito 1:6–9

Katuyoan sa leksiyon: Kini nga leksiyon gituyo aron matabangan ang mga estudyante nga mas makasabot sa mga hiyas sa mga bishop ug mga branch president ug sa unsang paagi nga kining mga sulugoon sa Ginoo mahimong makatabang kanila sa ilang mga kinabuhi.

Pagpangandam sa estudyante: Dapita ang mga estudyante sa pagkonsiderar sa mosunod nga pangutana ug sa pagtambong sa klase nga andam mopaambit sa ilang mga ideya. Sa unsang paagi ang Langitnong Amahan ug si Jesukristo mipanalangin kanimo o sa imong pamilya pinaagi sa usa ka bishop o sa branch president?

Mga materyal alang sa mga estudyante: Mga materyal sa pagsulat og usa ka mubong sulat [note] o sulat ngadto sa ilang bishop
Butang: Usa ka bola

Sugyot sa pagtudlo pinaagi sa videoconference: Kon mahimo, ikonsiderar ang pagdapit sa usa ka kasamtangan o kanhi bishop nga motambong sa klase ug mopamatuod sa importanteng tahas sa mga bishop diha sa pagpahiuli sa Simbahan. Hinumdomi nga mangayo og pagtugot gikan sa imong koordinitor o tigdumala sa programa sa dili pa dapiton ang mga bisita nga mamumulong ngadto sa klase. Kon imong dapiton ang kanhi bishop kaysa sa kasamtangan, seguroha nga mangayo og pagtugot gikan sa lokal nga lider sa pagkapari sa maong indibidwal.

1 Timoteo 4:12–16

Katuyoan sa leksiyon: Kini nga leksiyon gitumong aron matabangan ang mga estudyante nga magtinguha nga mahimong ehemplo sa usa ka disipulo ni Jesukristo sa ilang kabatan-on.

Pagpangandam sa estudyante: Dapita ang mga estudyante sa paghunahuna mahitungod sa mosunod nga pangutana ug pag-andam sa pagpaambit sa ilang mga hunahuna: Kon ang usa ka tawo magsunod-sunod nimo sulod sa usa ka semana, unsa nga ebidensiya ang iyang makita nga ikaw nagtinguha nga mosunod kang Jesukristo?

Sugyot sa pagtudlo pinaagi sa videoconference: Kon ang mga estudyante maghunahuna mahitungod sa mga tawo nga nahimong ehemplo kanila sa lainlaing mga paagi nga gihulagway ni Pablo, dapita ang mga estudyante sa pagsulat sa chat feature sa mga ngalan sa usa o duha ka mga tawo nga ilang gihunahuna. Kini nga mga ngalan mahimong maglakip sa uban nga anaa sa klase. Dayon pagtawag og pipila ka mga estudyante aron mopasabot nganong ilang gisulat ang usa sa mga ngalan ug aron mopaambit giunsa nianang tawhana pagkahimong ehemplo alang kanila. Dapita ang mga estudyante sa paghunahuna og mga tawo nga ilang nailhan karon ug mga tawo gikan sa milabay nga panahon, ilabina ang Manluluwas.

2 Timoteo 3

Katuyoan sa leksiyon: Kini nga leksiyon gituyo aron matabangan ang mga estudyante nga mobati og tinguha sa pagtuon sa mga kasulatan, nga mahimong makatabang pagprotekta kanila gikan sa mga dautan sa atong panahon.

Pagpangandam sa estudyante: Ipaambit ang mosunod nga pamahayag ni Presidente Thomas S. Monson (1927–2018) ngadto sa mga estudyante: “Ang paggahin og panahon matag adlaw sa pagtuon sa kasulatan, walay duda, makapalig-on sa atong mga pundasyon sa hugot nga pagtuo ug sa atong mga pagpamatuod sa kamatuoran” (“Unsa Kalig-on ang Tukuranan,” Liahona, Nob. 2006, 68). Dapita ang mga estudyante sa pagpamalandong niini nga pamahayag ug sa paghunahuna og personal nga mga kasinatian nga nagpakita nga kini tinuod.

Sugyot sa pagtudlo pinaagi sa videoconference: Aron sugdan ang leksiyon, mahimong hangyoon ang mga estudyante sa pagpost og pipila ka mga emoji sa chat feature nga nagrepresentar unsa ang ilang gibati mahitungod sa pagpakabuhi panahon sa kataposang mga adlaw. (Pananglitan, mahimo silang mobati nga mapasalamaton, mabalak-on, o ang duha.)

Doktrinal nga Kahanas: 2 Timoteo 3:15–17

Katuyoan sa leksiyon: Kini nga leksiyon makatabang sa mga estudyante nga makamemorya sa pakisayran sa doktrinal nga kahanas ug sa mahinungdanong hugpong sa pulong sa kasulatan alang sa 2 Timoteo 3:15–17 , makapasabot sa doktrina, ug makagamit sa mga baroganan sa pag-angkon og espirituhanong kahibalo sa tinuod nga kahimtang sa kinabuhi.

Pagpangandam sa estudyante: Dapita ang mga estudyante nga maghunahuna mahitungod sa bisan unsang mga hagit nga nagpugong kanila sa pagtuon sa mga kasulatan sa adlaw-adlaw. Dasiga sila nga maghunahuna og mga paagi nga ang mga baroganan sa pag-angkon og espirituhanong kahibalo mahimong makatabang kanila aron mabuntog ang ilang mga babag.

Sugyot sa pagtudlo pinaagi sa videoconference: Imbes dapiton ang mga estudyante sa pagsulat sa pakisayran sa doktrinal nga kahanas ug sa mahinungdanong hugpong sa pulong sa kasulatan sa usa ka drowing nga libro, dapita ang mga estudyante sa pag-type sa pakisayran ug mahinungdanong hugpong sa pulong sa kasulatan mga tulo o upat ka higayon diha sa chat nga feature. Seguroha ang pagsulti kanila nga i-type ang matag pulong ug dili i-cut ug i-paste. Mamahimong epektibo ang pagsuta kon pila ka higayon ang mga estudyante maka-type sa pakisayran ug sa mahinungdanong hugpong sa pulong sulod sa gitagal nga oras (pananglitan, 90 ka segundo).

2 Timoteo 4

Katuyoan sa leksiyon: Kini nga leksiyon gitumong aron matabangan ang mga estudyante nga mahimo o magpabilin sa pasalig sa tibuok kinabuhing pagkadisipulo ngadto ni Jesukristo.

Pagpangandam sa estudyante: Dapita ang mga estudyante nga mangita og tudling sa kasulatan nga lagmit nilang ipaambit ngadto sa usa ka tawo kinsa mibati og kawalay kadasig sa iyang mga paningkamot nga mosunod kang Jesukristo.

Hulagway nga ipakita: Hulagway sa usa ka away ug hulagway sa usa ka lumba
Mga materyal alang sa mga estudyante: Usa ka piraso sa papel alang sa matag estudyante

Sugyot sa pagtudlo pinaagi sa videoconference: Kon anaa, mahimong mogamit sa anonymous survey tool aron tugotan ang mga estudyante nga mopaambit og usa ka senaryo diin ang usa ka tawo lagmit mobati og katintal sa pag-undang sa pagpaningkamot sa pagsunod kang Jesukristo. Sultihi ang mga estudyante nga sila mahimong mopili nga mopaambit sa tinuod nga rason nga ang usa ka minahal nidesisyon nga moundang pagsunod kang Jesukristo.