1 Timoteo 3:1–7; Tito 1:6–9

Ang Bishop: Usa ka Tawo nga “Maayog Dungog ”

Nakahibalo ka ba nga ang mga bishop mialagad sa Simbahan sa panahon ni Pablo? Sa unsang paagi nga ang mga bishop ug ang mga branch president makapanalangin sa imong kinabuhi? Sa mga sulat ni Pablo ngadto kang Timoteo ug Tito, iyang gilatid ang mga kwalipikasyon sa mga tawo nga gitawag og mga bishop. Kini nga leksiyon makatabang kanimo aron mas makasabot sa mga hiyas sa mga bishop ug sa mga branch president ug sa unsang paagi nga kining mga sulugoon sa Ginoo mahimong makatabang nimo sa imong kinabuhi.

Paghatag og Pagtagad. Hatagig pagtagad ang mga estudyante ug kon unsa ang ilang reaksyon panahon sa leksiyon. Kon ang mga estudyante naglibog sa imong tan-aw, dapita sila nga mangutana og mga pangutana. Kon ang mga estudyante daw adunay usa ka butang nga ikapaambit, dapita sila nga mopakigbahin.

Pagpangandam sa estudyante: Dapita ang mga estudyante sa pagkonsiderar sa mosunod nga pangutana ug motambong sa klase nga andam mopaambit sa ilang mga ideya: Sa unsang paagi nga ang Langitnong Amahan ug si Jesukristo nakapanalangin kanimo o sa imong pamilya pinaagi sa usa ka bishop o branch president?

Posible nga mga Kalihokan sa Pagkat-on

Kang kinsa ka modangop?

Handurawa nga ikaw nakigbisog sa usa ka importanteng isyu sa imong kinabuhi. Tingali usa kini ka desisyon mahitungod sa imong kaugmaon, usa ka hagit nga imong giatubang, o usa ka bati nga kinaiya nga imong gipaningkamotang bag-ohon.

Asa ka modangop kon ikaw nakigbisog og importanteng mga isyu?
Kang kinsa ka makigsulti ug ngano?

Basaha ang mosunod nga pamahayag ni Elder Quentin L. Cook sa Korum sa Napulog Duha ka Apostoles:

Kaninyo bililhong kabatan-onan … anaa kamo sa ngilit sa pinakaimportanteng mga desisyon nga inyo unyang pagahimoon sa inyong kinabuhi. Palihog pakigtambag sa inyong mga ginikanan ug sa inyong bishop kabahin sa importanteng mga pagpili nga nagpaabot kaninyo. Tugoti ang bishop nga mahimo ninyong higala ug tigtambag.

(Quentin L. Cook, “Mga Bishop—Mga Magbalantay sa Panon sa Ginoo,” Liahona, Mayo 2021, 60)

Paggahin og higayon sa pagpamalandong sa mosunod nga mga pangutana:

Imo bang gihunahuna ang imong bishop o branch president isip usa ka higala ug magtatambag?
Kon mag-atubang ka og usa ka importanteng desisyon, o kon nagkinahanglan ka og espirituwal nga tabang, unsa kadako ang posibilidad nga mangayo ka ug tambag gikan sa imong bishop? Ngano man?
Sa unsang paagi nga ang pagdangop sa imong bishop o branch president alang sa paggiya nakatabang kanimo?

Sa imong pagtuon niini nga leksiyon, pangita og mga paagi nga ang usa ka bishop o branch president mahimong makasuporta kanimo sa imong mga hagit, mga desisyon, ug hugot nga pagtuo diha kang Jesukristo.

Sa tibuok nga leksiyon, kon adunay bisan unsang indikasyon sa negatibong mga pagbati o paghukom gikan sa usa ka estudyante mahitungod sa ilang bishop, mahimong ipaambit ang pamahayag ni Elder Jeffrey R. Holland diha sa “Komentaryo ug Background nga Impormasyon” nga bahin.

Si Pablo nagtudlo mahitungod sa kwalipikasyon sa usa ka bishop

Ang mga sulat ni Pablo nga nailhan isip 1 Timoteo, 2 Timoteo, ug Tito sa kasagaran gitawag og pastoral nga mga sulat kay naglakip kini sa mga tambag ni Pablo ngadto sa mga pastor, o mga lider, sa Simbahan (ang pastor nagagikan sa Latin nga pulong alang sa “magbalantay sa karnero”). Sila si Timoteo ug Tito mga sinaligang kauban ni Pablo nga mialagad uban kaniya sa lainlaing mga panahon sa tibuok niya nga misyonaryong mga pagpanaw. Niadtong panahona, si Timoteo nag-alagad isip usa ka lider sa Simbahan sa Efeso, ug si Tito anaa sa isla nga Gresyanhon sa Creta.

Taliwala sa daghang mga kamatuoran nga gitudlo ni Pablo niining dinasig nga mga epistola, siya milista og daghang mga kwalipikasyon alang sa mga tawo kinsa gitawag isip mga bishop. Ang bishop mao ang usa ka tawo nga gi-ordin ug gi-set apart isip tigdumala nga high priest alang sa usa ka ward, o kongregasyon. Siya adunay kinatibuk-ang responsibilidad sa pagdumala sa temporal ug espirituwal nga mga kalihokan sa kongregasyon. Ang branch president adunay susamang tahas. Ang Ginoo nagpili og usa ka bishop pinaagi sa usa ka kapangulohan sa stake, kinsa nagtinguha og pagpadayag. Sa dili pa tawgon, ang bishop giaprobahan sa Unang Kapangulohan isip parehas nga takos ug makahimo sa pag-alagad.

Basaha ang 1 Timoteo 3:1–7 ug Tito 1:6–9 , nga mangita sa mga kwalipikasyon alang sa mga bishop. Pangita og tulo niini nga mga kinaiya nga mahimong makatabang sa usa ka bishop o branch president nga magiyahan ug mapanalanginan ang imong kinabuhi.

Human maila sa mga estudyante ang mga kalidad sa usa ka bishop, mahimong buhaton ang mosunod nga kalihokan. Gamit ang usa ka humok nga bola nga sayon saloon sa mga estudyante, paghangyo og usa ka boluntaryo ug dayon iitsa ang bola ngadto kaniya. Sa higayon nga ang estudyante makasalo sa bola, mahimo siyang mopili og usa sa mga kalidad sa usa ka bishop ug ipasabot sa unsang paagi nga ang pagkaaduna niana nga kalidad mahimong makatabang sa bishop nga makagiya ug makapanalangin sa mga tawo nga iyang gipangalagaran. Human ang estudyante mopasabot, mahimo niyang iitsa og hinay ang bola ngadto sa lain nga estudyante, kinsa mosubli sa proseso. Ipadayon ang kalihokan hangtod daghang mga estudyante ang adunay kahigayonan sa pagsalo sa bola ug daghang lainlaing mga kalidad ang nahisgotan.

Giunsa ni Jesukristo sa pagpakita og ehemplo niini nga mga hiyas? (Mahimong mag-cross-reference niini nga mga bersikulo ngadto sa 1 Pedro 2:25 , diin si Pedro nipasabot sa Manluluwas isip “ang Magbalantay ug Magdudumala [Bishop] sa [atong] mga kalag.”)
Sa unsang paagi kaha nga ang pagbaton niini nga mga hiyas magtugot sa bishop o sa branch president sa pagtabang kanimo sama sa mahimo sa Manluluwas?
Unsaon man nimo pagsummarize kon unsa ang imong nakat-onan mahitungod sa mga bishop ug mga branch president?

Unsa nga Kristohanong mga hiyas ang imong namatikdan sa imong bishop o branch president? Sa unsang paagi nga kining mga hiyas mitugot kaniya aron mahimong usa ka instrumento sa mga kamot sa Ginoo?
Giunsa o sa unsang paagi ang bishop makatabang kanimo nga mas mapaduol kang Jesukristo ug mapalig-on ang imong hugot nga pagtuo Kaniya?

Usa ka magbalantay sa panon sa Ginoo

Mahimong markahan ang bisan unsang mga pulong o hugpong sa mga pulong diha sa 1 Timoteo 3:2 o sa Tito 1:7–9 nga nagpaila sa responsibilidad sa usa ka bishop sa pagtudlo.

Ang bishop o branch president makatudlo sa lainlaing mga paagi, lakip diha sa mga miting, mga klase, ug sa personal nga mga interbyo, ug pinaagi sa iyang ehemplo.

Sa unsang paagi nga ang tambag o panudlo sa usa ka bishop o branch president nahimong usa ka panalangin nganha kanimo o sa imong kaila?
Sa unsa pang uban nga mga paagi nga ang Ginoo miamuma ug mitabang kanato pinaagi sa mga bishop ug sa mga branch president?

Ang usa ka bishop makatabang kanato nga maghinulsol

Ang Ginoo mitawag usab sa mga bishop ug mga branch president aron motabang ug mogiya kanato latas sa proseso sa paghinulsol, ilabi na kon kita nakabuhat og seryoso nga mga sala.

Si Elder C. Scott Grow sa Seventy mitudlo:

Pinaagi sa ordinasyon ug matarong nga pagpuyo, ang bishop adunay katungod sa pagpadayag gikan sa Espiritu Santo kabahin sa mga miyembro sa iyang ward, lakip nimo.

Ang bishop makatabang nimo sa proseso sa paghinulsol sa mga paagi nga dili mahatag sa imong mga ginikanan o ubang mga lider. …

… Isip usa ka sulugoon sa Ginoo, siya mabination ug masinaboton samtang siya naminaw kanimo. Dayon motabang siya ninyo sa proseso sa paghinulsol. Siya ang mensahero sa Ginoo alang sa kalooy sa pagtabang nimo nga mahimong limpyo pinaagi sa pag-ula ni Jesukristo.

(C. Scott Grow, “Ngano ug Unsay Angay Nakong Ikompisal ngadto sa Akong Bishop?” Liahona, Okt. 2013, 58-59)

Paggahin og pipila ka panahon aron magsulat og mubo nga sulat, email, o text ngadto sa imong bishop o branch president. Mahimong pasalamatan siya sa iyang serbisyo, pagtudlo, ug ehemplo. Ilakip ang bisan unsang mga pihong paagi nga siya nakatabang kanimo. Mahimong hisgotan ang bisan unsa sa iyang Kristohanong mga ehemplo nga imong namatikdan ug gipasalamatan. Kon magamit, mahimo usab nimong hangyoon nga makigkita kaniya alang sa iyang tambag sa lisod nga desisyon, sa usa ka kabalaka nga lagmit aduna ka, o alang sa tabang sa proseso sa paghinulsol.

Mahimong magpamatuod sa panalangin sa bishop o branch president diha sa kinabuhi sa mga estudyante.

Komentaryo ug Background nga Impormasyon

1 Timoteo 3:1. Asa naggikan ang titulo nga bishop diha sa Bag-ong Tugon?

Ang titulo nga “bishop” gikuha gikan sa Gresyanhon nga pulong nga episcopos—epi, nga nagpasabot nga “ibabaw” , ug scopos, nga nagpasabot nga “tan-aw” o “magbantay.” Busa, ang usa ka episcopos, o bishop, mao ang usa ka tawo kinsa magbalantay ibabaw sa panon isip tiggiya o tig-amuma.

Nganong gikinahanglan ko moadto sa akong bishop aron mangompisal sa mga sala?

Si Elder Richard G. Scott (1928–2015) sa Korum sa Napulog Duha ka Apostoles mitudlo:

Ang seryosong kalapasan sama sa imoralidad nagkinahanglan sa panabang sa usa ka tawo kinsa naghupot og mga yawe sa pagka may awtoridad, sama sa usa ka bishop o stake president, sa hilom nagtabang sa proseso sa paghinulsol aron masiguro nga kini kompleto ug tarong nga pagkahimo.

(Richard G. Scott, “The Power of Righteousness,” Ensign, Nob 1998, 69-70)

1 Timoteo 3:1. Unsa ang “maayong buhat” sa usa ka bishop?

Si Elder Quentin L. Cook sa Korum sa Napulog Duha ka Apostoles nitudlo mahitungod sa nag-unang mga responsibilidad sa usa ka bishop:

Ang bishop adunay lima ka dagkong mga responsibilidad sa pagdumala sa usa ka ward:

1. Siya mao ang tigdumalang high priest diha sa ward.2. Siya ang presidente sa Aaronic nga Pagkapari.3. Siya ang maghuhukom sa kadaghanan.4. Siya mohan-ay sa buhat sa kaluwasan ug kahimayaan, lakip na sa pag-amuma alang niadtong nanginahanglan.5. Ug siya modumala sa mga rekord, mga panalapi, ug sa paggamit sa meetinghouse.

Sa iyang tahas isip ang tigdumalang high priest, ang bishop mao ang “espiritwal nga lider” sa ward. Siya usa ka “matinud-anon nga disipulo ni Jesukristo.” …

Ang bishop adunay hilabihan kaayo kaimportante nga tahas sa pagpangalagad isip magbalantay aron sa paggiya sa bag-o nga kaliwatan, lakip na sa mga young single adult, paingon ngadto ni Jesukristo.

(Quentin L. Cook, “Mga Bishop—Mga Magbalantay sa Panon sa Ginoo,” Liahona Mayo 2021, 58)

Tito 1:7. Unsay gipasabot ni Pablo sa dihang miingon siya nga “[ang usa ka bishop] kinahanglang dili siya salawayon”?

Ang usa ka bishop gipili sa Ginoo ug kinahanglan usa ka tawo nga adunay taas nga moral sa kinaiya ug katakos. Bisan pa niana, ang tanang mga bishop dili perpekto ug may mga panahon nga makahimo og mga kasipyatan panahon sa ilang pagserbisyo.

Si Elder Jeffrey R. Holland sa Korum sa Napulog Duha ka Apostoles mitudlo:

14:43

Pagmapailobon kabahin sa tawhanon nga kahuyang—ang inyong kaugalingon ingon man usab niadtong nagserbisyo uban ninyo niini nga Simbahan gipangulohan sa mga boluntaryo, mortal nga mga lalaki ug babaye. Gawas lang sa Iyang bugtong hingpit nga Anak, ang dili hingpit nga mga tawo mao ang gikatambayayong sa Dios. Tingali makasagmuyo kaayo kini Kaniya, apan Iya kining gisagubang. Mao usab kita. Ug kon inyong makita ang pagkadili hingpit, hinumdumi nga ang limitasyon dili diha sa kabalaan niini nga buhat. … Mao nga pagmapailubon ug pagmabination.

(Jeffrey R. Holland, “Nagatuo Ako,” Liahona, Mayo 2013, 94)

Dugang nga mga Kalihokan sa Pagkat-on

Unsa man ang usa ka bishop?

Mahimong sugdan ang klase sa mosunod nga senaryo: Handurawa nga sa dihang nigawas ka kauban sa imong mga higala, imong nakit-an ang imong bishop o branch president ug nangumusta. Ang imong higala, kinsa dili miyembro sa Simbahan, nangutana nimo, “Kinsa kadto? Unsa ang bishop [o branch president]? Unsa ang iyang buluhaton?” Dapita ang mga estudyante sa paghunahuna mahitungod kon unsaon nila pagtubag sa paagi nga mahimong makatabang sa ilang higala nga makasabot ug hinaot nga mosalig sa usa ka bishop.

Mga Ehemplo sa Manluluwas

Human maila sa mga estudyante ang mga kalidad sa usa ka bishop diha sa 1 Timoteo 3:1–7 ug Tito 1:6–9 , mahimong mopili og upat o lima ka mga kalidad ug dapita ang mga estudyante nga mangita og mga ehemplo diha sa mga kasulatan diin ang Manluluwas mipakita niadtong mga kalidad. Pananglitan, ang asoy ni Jesus nga naghimo sa tubig ngadto sa bino alang sa Iyang inahan didto sa kumbira sa kasal (tan-awa ang Juan 2:1–11) mahimong usa ka ehemplo sa Iyang “pagkamaabiabihon” ( 1 Timoteo 3:2).