“Himoa ... ang Imong Kaugalingon nga Panig-ingnan sa mga Magtutuo”
Imahe
Ward Building Photowalk
Dili tingale sayon ang magpuyo sa ebanghelyo ni Jesukristo sa usa ka dautan nga dapit sama sa Efeso. Segurado kadtong sama ni Timoteo, kinsa mipili nga modumala og usa ka matarong nga kinabuhi, mipatigbabaw gikan sa ilang mga kauban. Apan si Pablo nidasig ni Timoteo nga magmalig-on gikan sa pagpanaway sa uban kabahin sa iyang pagkabatan-on o sa iyang hugot nga pagtuo ug “[mahimong] ... panig-ingnan sa mga magtutuo” (1 Timoteo 4:12). Kini nga leksiyon gituyo aron matabangan ka nga maningkamot nga mahimong ehemplo sa pagkadisipulo ni Jesukristo diha sa imong kabatan-on.
Paggamit og mga listahan o mga tsart. Tabangi ang mga estudyante nga makat-on unsaon sa pagtuon sa mga kasulatan sa mas epektibo nga paagi pinaagi sa pagpakita kanila unsaon pagmugna og mga listahan o mga tsart. Kini makatabang kanila sa paghan-ay ug pagsabot sa mga detalye sa mga kasulatan, ingon man usab ang mga impresyon nga ilang nadawat gikan sa Espiritu Santo. Kini nga leksiyon maghatag og kahigayonan sa mga estudyante aron mabansay kini nga kahanas.
Pagpangandam sa estudyante: Dapita ang mga estudyante sa paghunahuna mahitungod sa mosunod nga pangutana ug pag-andam sa pagpaambit sa ilang mga hunahuna: Kon ang usa ka tawo magsunod-sunod nimo sulod sa usa ka semana, unsa nga ebidensiya ang iyang makita nga ikaw nagtinguha nga mosunod kang Jesukristo?
Posible nga mga Kalihokan sa Pagkat-on
Ang mosunod nga leksiyon makatabang sa mga estudyante nga matun-an ang mga pagtulun-an ni Pablo mahitungod sa pagka ehemplo ngadto sa mga magtutuo. Aron matabangan ang mga estudyante nga mas makatuon sa mga pagtulun-an ni Pablo, mahimong bahinon ang klase ngadto sa tulo ka mga grupo. Ang usa ka grupo mahimong magtuon sa 1 Timoteo 4:12–16 gamit kini nga leksiyon, ug ang laing duha pa ka grupo mahimong magtuon sa 1 Timoteo 6:7–12 ug 2 Timoteo 1:1–8 gamit ang impormasyon diha sa “Dugang nga mga Kalihokan sa Pagkat-on” nga bahin. Ang mga estudyante mahimo dayong mopaambit unsa ang ilang nakat-onan.
Unsay gisulti niini mahitungod kanimo?
Kon ang usa ka tawo mag-obserbar kanimo sulod sa usa ka semana, unsa nga ebidensiya ang iyang makita nga ikaw naningkamot sa pagsunod kang Jesukristo?
Unsa lagmit ang iyang makita sa imong kinabuhi nga mahimong gamitan og pipila ka mga pagpalambo diha sa imong pagpaningkamot sa pagsunod kang Kristo?
Mahimong dapiton ang pipila ka mga estudyante nga mopaambit sa ilang mga hunahuna.
Nganong importante man nga ikonsiderar unsa nga ehemplo ang atong gipakita alang sa uban?
Paghunahuna mahitungod kon unsa kakomportable ang imong gibati mahitungod sa imong pagka-ehemplo sa pagkasumusunod ni Jesukristo alang sa kadtong anaa sa imong palibot ug ngano.
Sa imong pagtuon niini nga leksiyon, tinguhaa ang giya sa Espiritu Santo aron maila giunsa nimo pagpakita nga ikaw usa ka ehemplo nga nakatabang sa uban ug naggiya kanila ngadto sa Manluluwas. Kon dili ka komportable nga mahimong ehemplo ngadto sa uban, pangita og mga kamatuoran nga mahimong makatabang kanimo ug magdasig kanimo.
Ang Pagdasig ni Pablo ngadto ni Timoteo
Ang Bag-ong Tugon naglakip og duha ka mga sulat ni Pablo ngadto sa usa sa iyang mga labing sinaligan nga mga higala, si Timoteo (tan-awa ang 1 Mga Taga-Corinto 4:17). Diha sa imong pagbasa sa mosunod nga impormasyon mahitungod kang Timoteo, paghunahuna og nganong ang iyang ehemplo makahimo og kalahian ngadto sa uban. Makakonektar ka ba kaniya sa bisan unsang paagi?
Ang inahan ug apohang babaye ni Timoteo mga matarong nga ehemplo, apan ang iyang amahan usa ka Griyego nga Hentil kinsa tingale dili usa ka magtutuo (tan-awa sa Mga Buhat 16:1 ; 2 Timoteo 1:5 ; 3:14–15).
Si Timoteo nag-alagad isip usa ka lider sa Simbahan sa Efeso (tan-awa ang 1 Timoteo 1:3), usa ka dakong lungsod diin ang pagsimba og dios-dios ug imoralidad grabeng mikatap (tan-awa ang Mga Buhat 19:35).
Ingon og gilakbitan ni Pablo nga ang mga miyembro nagduhaduha sa abilidad ni Timoteo sa pagpangulo kay batan-on pa man siya (tan-awa sa 1 Timoteo 4:12).
Basaha ang 1 Timoteo 4:12–16 , nga mangita kon unsa ang gitambag ni Pablo kang Timoteo nga iyang buhaton.
Unsa ang imong nakaplagan nga makahuluganon dinha kanimo?
Sa unsang paagi nimo mapamubo ang pagdapit ni Pablo gikan sa bersikulo 12 ug ang saad sa bersikulo 16 ngadto sa usa ka hiniusang pamahayag sa kamatuoran?
Tugoti ang mga estudyante sa paggamit sa ilang kaugalingong mga pulong, apan tabangi sila sa pag-ila sa mosunod nga kamatuoran.
Gitudlo ni Pablo sa 1 Timoteo 4:12, 16 nga kon kita mga ehemplo sa mga magtutuo ni Jesukristo, kita mahimong makatabang sa pagdala og kaluwasan sa atong kaugalingon ug sa uban.
Ang pag-ila sa mga lista diha sa mga kasulatan mahimong makatabang kanato sa pagkakita og daghang mga paagi sa paggamit sa kamatuoran sa ebanghelyo sa atong mga kinabuhi. Sa bersikulo 12 , naglista si Pablo og mga dapit nga makahimo pa kanato nga mas Kristohanon aron mahimong maayong mga ehemplo niadtong anaa sa atong palibot.
Basaha og balik ang bersikulo 12 ug markahi ang mga pulong nga naghulagway sa matag dapit nga gidapit ni Pablo nga atong tutokan. Ikonsiderar ang pagkopya niini nga lista diha sa imong journal sa pagtuon.
Ikonsiderar ang pagsulat sa lista sa mga dapit nga naila sa mga estudyante diha sa pisara. Paggahin og luna diha sa pisara aron masulatan og pipila ka mga ideya ubos sa matag dapit unya panahon sa leksiyon.
Unsaon nimo pagpasabot unsa ang kahulogan sa matag usa niini nga mga pulong? (Kon mahimo, paggamit og mga tool sa pagtuon sa kasulatan [scripture study tools] o usa ka diksyonaryo aron makatabang nimo sa paghatag og kahulogan nila.)
Mahimong makatabang ang pagkahibalo nga ang pulong nga batasan dinhi niini nga bersikulo nagpasabot sa atong pamatasan og kinaiya.
Kinsa ang imong nailhan nga usa ka maayong ehemplo dinhing dapita? Sa unsa nga paagi nga ang ilang mga ehemplo nakatabang kanimo ug sa ubang tawo?
Samtang ang mga estudyante namalandong niini nga pangutana, dapita sila sa pagkonsiderar sa mga miyembro sa ilang klase. Dapita ang pipila ka mga estudyante nga mopaambit. Mahimo usab nga magsulat ang mga estudyante og mga mugbong sulat [notes] ngadto sa laing mga miyembro sa klase mahitungod kon giunsa nila pagka-maayong mga ehemplo ngadto kanila. Ang pag-ila ug pagdayeg sa maayong mga ehemplo sa uban makatukod og panaghiusa diha sa klase.
Sa unsang paagi nga si Jesukristo mao ang hingpit nga ehemplo alang niining mga dapita? Sa unsang paagi nga ang Iyang mga ehemplo nakapanalangin kanimo ug sa uban?
Sa imong hunahuna ngano kaha nga ang Ginoo gusto nga mahimo kang ehemplo ngadto sa uban niini nga mga dapita?
Sa unsang paagi ka mahimong usa ka ehemplo?
Paghimo og lista sa pipila ka mga paagi diin mahimo kang usa ka ehemplo sa mga dapit nga imong gipili. Pananglitan, aron mahimong ehemplo “sa pinulongan,” mahimo nimong ilista ang pipila sa mosunod nga mga ideya:
kanunay nga pagpadayag og pasalamat
paghatag sa mga tawo og sinsero nga mga pagdayeg
pagsulti sa kamatuoran
paglikay sa paggamit sa pulong pagpasipala
kanunay nga pagpahayag sa imong gugma
matinahurong pagtimbaya sa mga tawo
paglikay sa pagpanglibak
mas kinasingkasing nga pag-ampo
Kon ang ilang mga ideya dili kaayo personal, dapita ang mga estudyante sa pagpaambit niini pinaagi sa pagsulat niini ubos sa mga ulohan sa pisara.
Paggahin og higayon sa pagpamalandong unsaon kaha sa Ginoo pagpanalangin kanimo ug sa uban kon ikaw maningkamot nga mahimong usa ka ehemplo niini nga mga paagi.
Unsa ang imong nakat-onan o gibati karon nga mahimong makatabang kanimo aron mahimong mas maayong ehemplo sa pagkadisipulo ni Jesukristo?
Unsa man ang imong buhaton aron mahimong ingon niana nga ehemplo ngadto sa uban?
Unsa ang imong gilaoman nga matudlo sa imong ehemplo ngadto sa uban mahitungod kang Jesukristo ug sa Iyang gipahiuli nga Simbahan? Ngano man?
Pagpamatuod sa gahom nga mahimo sa maayong ehemplo alang niadtong kinsa makakita niini. Mahimong mopaambit og usa ka personal nga sugilanon diin napanalanginan ka pinaagi sa Kristohanong ehemplo sa usa ka tawo, ug dapita ang mga estudyante sa pagbuhat sa (mga) pagbag-o nga ilang naila niini nga leksiyon.
Komentaryo ug Background nga Impormasyon
Unsaon man nako nga mahimong mas maayo nga ehemplo?
Mahimong tan-awon ang mosunod nga bidyo, anaa sa ChurchofJesusChrist.org, nga nagpakita og lainlaing mga paagi nga ang mga batan-on nahimong ehemplo alang sa kadtong anaa nagpalibot kanila. Samtang nagtan-aw ka, paghuna-huna og mga paagi nga ikaw mahimong usa ka ehemplo ngadto sa uban.
“Pagpakigbahin sa Inyong Kahayag” (2:56)
Ang ako bang ehemplo isip usa ka tinedyer importante gayod?
Si Sister Bonnie H. Cordon, Kinatibuk-ang Presidente sa Young Women, mitudlo mahitungod sa importansiya sa imong ehemplo:
Imahe
Former Official Portrait of Sister Bonnie H. Cordon, Photographed October 2016. Replaced October 2018.
Minahal kong mga higala, nganong ang pagpadan-ag sa atong kahayag importante? Ang Ginoo misulti kanato nga “aduna pay daghan sa ibabaw sa yuta … kinsa natago gikan sa kamatuoran tungod kay sila wala masayod asa kini pangitaa.” [ Doktrina ug mga Pakigsaad 123:12]. Kita makatabang. Mahimo natong tuyoon ang pagdan-ag sa atong kahayag aron ang uban makakita. Kita makadapit. Kita mahimong molakaw sa panaw uban niadtong nagbuhat og lakang padulong sa Manluluwas, bisan pa og dili komportable. …
Ako mopamatuod ang Ginoo mopadako sa matag gagmay nga paningkamot. Ang Espiritu Santo moaghat nato sa pagkahibalo unsa ang atong isulti ug buhaton. Kana nga mga pagsulay mahimong magkinahanglan sa atong pagbuhat og mga butang nga dili komportable, apan kanunay kitang makasiguro nga ang Ginoo motabang sa atong kahayag nga modan-ag.
Si Presidente Thomas S. Monson (1927–2018) mitudlo mahitungod sa pagka-ehemplo:
Imahe
Official portrait of President Thomas S. Monson, 2008.
Pagpakita og ehemplo …. Ang atong mga kahigayonan anaa sa atong atubangan dinhi ug karon. Apan kini mahanaw. Malagmit kini makita sa atong kaugalingon nga mga panimalay ug diha sa matag adlaw nga mga lihok sa atong mga kinabuhi. Ang atong Ginoo ug Magtutudlo mibutang og timaan sa agianan: “[Siya] naglibot sa paghimo og mga kaayohan.” ( Mga Buhat 10:38 .) Siya gayod sa binuhatan maoy usa ka panig-ingnan nga pagasundon—gani usa ka ehemplo sa mga nanagtuo.
1 Timoteo 4:16. Unsa ang gipasabot ni Pablo sa Iyang pag-ingon nga, “Maluwas mo ang imong kaugalingon”?
Samtang si Pablo migamit sa mga pulong nga “maluwas mo ang imong kaugalingon ug ang mamati kanimo” ( 1 Timoteo 4:16), siya mipamatuod usab nga kita maluwas lamang pinaagi ni Jesukristo (tan-awa ang 1 Timoteo 1:15–16 ; 2:5–6). Mabansay nato ang hugot nga pagtuo diha kang Jesukristo pinaagi sa atong mga paningkamot ug tugotan Siya nga moluwas kanato.
Pagpakita og gamay nga kantidad sa salapi, ug dapita ang mga estudyante sa pagpaambit og pipila ka mga paagi nga kini mahimong magamit alang sa maayo.
Dapita ang mga estudyante nga mobasa sa 1 Timoteo 6:7–12 ug ipasabot nganong sa ilang hunahuna si Pablo mohatag niini nga pasidaan ug pagdapit sanglit siya nahibalo man nga ang salapi mahimong magamit alang sa maayo. Pangutana sa unsang paagi nga ang mga kamatuoran niining mga bersikulo mahimong magamit sa mga adunahan ug sa mga kabos.
Isulat sa pisara ang pulong nga Kahadlok ug hangyoa ang mga estudyante sa pagkonsiderar sa unsang paagi ang kahadlok makaimpluwensiya kanato. Dapita ang mga estudyante sa pagbasa sa 2 Timoteo 1: 1–8 , nga mangita sa usa ka baroganan nga makatabang kanila sa pagbuntog sa kahadlok. Hisgoti ang baroganan nga samtang kita kinasingkasing nga nagtinguha nga makabaton sa Espiritu uban kanato, kita makabuntog sa kahadlok ug dili maulaw sa atong pagpamatuod ni Jesukristo. Ang mga pangutana sama sa mosunod mahimong makatabang sa mga estudyante nga makasabot niini nga baroganan:
Sa unsang paagi ang balaang gahom, gugma, ug maayong panghukom nga atong nadawat pinaagi sa Espiritu makatabang nato sa pagbuntog sa kahadlok?
Unsa ang mga paagi diin atong ikapakita nga wala nato ikaulaw ang atong pagpamatuod kang Jesukristo?
Kanus-a kamo natabangan sa Espiritu nga mabuntog ang inyong kahadlok o nahatagan kamo og kaisog sa pagbarog nga lig-on sa inyong pagpamatuod kang Jesukristo?
