2 Timoteo 3

Ang Balaan nga mga Kasulatan

Mibati ka ba sukad nga nabug-atan o gikulbaan bahin sa espirituhanong kahimtang sa kalibotan karon? Sa usa ka epistola ngadto kang Timoteo, gitagna ni Pablo nga ang kataposang mga adlaw maglakip sa “mga malisod nga panahon” (2 Timoteo 3:1), apan siya usab nitudlo nga ang Ginoo naghatag kanimo og gasa sa balaan nga mga kasulatan aron matabangan ka sa mga malisod nga panahon (tan-awa ang 2 Timoteo 3:14–17). Kini nga leksiyon gituyo aron matabangan ka nga mobati og tinguha sa pagtuon sa mga kasulatan, nga makatabang pagprotektar kanimo gikan sa mga dautan sa atong panahon.

Pagmatuod sa mga panalangin sa pagtuon sa kasulatan adlaw-adlaw. Pagpamatuod kanunay sa mga panalangin nga moabot gikan sa pagtuon sa mga kasulatan adlaw-adlaw, ug dapita ang mga estudyante sa pagpamatuod sa mga panalangin nga ilang nadawat gikan sa pagtuon sa kasulatan.

Pagpangandam sa estudyante: Ipaambit ang mosunod nga pamahayag ni Presidente Thomas S. Monson (1927–2018): “Ang paggahin og panahon matag adlaw sa pagtuon sa kasulatan, walay duda, makapalig-on sa atong mga pundasyon sa hugot nga pagtuo ug sa atong mga pagpamatuod sa kamatuoran” (“Unsa Kalig-on ang Tukuranan,” Liahona, Nob. 2006, 68). Dapita ang mga estudyante sa pagpamalandong niini nga pamahayag ug sa paghunahuna og personal nga mga kasinatian nga nagpakita nga kini tinuod.

Posible nga mga Kalihokan sa Pagkat-on

Ang kataposang mga adlaw

Ikonsiderar ang pag-awhag sa mga estudyante nga motindog. Sultihi sila nga maghanduraw nga ang usa ka bongbong sa kwarto nagrepresentar sa pagbati og dakong pasalamat sa pagkabuhi niining panahona sa kasaysayan sa kalibotan ug ang atbang nga bongbong nagrepresentar sa pagbati og kakulba mahitungod niini. Dapita sila sa pagbalhin sa usa sa mga bongbong o sa pagtindog bisan asa sa taliwala sa duha nga labing nagrepresentar sa ilang mga pagbati. Dapita ang pipila ka estudyante sa pagpasabot kon nganong mibati sila og sama niana.

Basaha ang mosunod nga pamahayag ni Elder Neil L. Andersen sa Korum sa Napulog Duha ka Apostoles, ug pamalandong kon nganong ang pagkabuhi niining panahona nakahimo nimong mobati og dakong pasalamat, kakulba, o parehas.

Kita nagpuyo sa makaikag kaayo nga mga panahon, apan kahibulongan nga mga panahon. …

Nasayod kita nga samtang kita nagkaduol sa Ikaduhang Pag-anhi sa Manluluwas nga ang atong kalibotan mapuno sa kaguliyang ug kalibog. Daghan sa katilingban ang dili magtagad sa mga sugo sa Dios. Ako sagad mikutlo niini nga pamahayag ni Presidente Thomas S. Monson: “Diin ang mga sumbanan sa Simbahan ug mga sumbanan sa katilingban sa kasagaran nahiangay, karon adunay lapad nga kal-ang taliwala kanato, ug kini mas nagkadako pa.”

(Neil L. Andersen, “A Compensatory Spiritual Power for the Righteous” [debosyonal sa Education Week sa Brigham Young University, Ago. 18, 2015], speeches.byu.edu)

Sa unsang mga paagi nga ang mga panahon diin kita nabuhi kahibulongan?
Unsa kaha ang makapakulba nimo mahitungod sa pagpuyo sa kalibotan nga gihulagway ni Elder Andersen?

Samtang magtuon ka niini nga leksiyon, pangitaa ang mga paagi nga ang Dios mahigugmaong naghatag og tabang alang sa kalibog, espirituhanong mga kapeligrohan, o kabalaka nga imong mabati gikan sa mga kondisyon sa kalibotan.

Basaha ang 2 Timoteo 3:1–7, 12–13 ; 4:3–4 , nga mangita sa mga paghulagway ni Pablo sa mga kapeligrohan sa kataposang mga adlaw.

Unsa nga mga pananglitan sa mga kondisyon nga gihulagway ni Pablo ang imong nakita sa kalibotan karon?

Usa ka gasa gikan sa Dios

Ang Langitnong Amahan wala mibiya kanato nga moatubang sa mga peligro sa kataposang mga adlaw sa atong kaugalingon. Sa Iyang kaluoy ug gugma, Siya naghatag kanato og daghang mga makahibulongang mga gasa.

Si Elder Andersen mipadayon:

Samtang atong makit-an ang atong kaugalingon nga nagpuyo sa kalibotan nga dili kaayo mopatalinghog sa mga sugo sa Dios, siguradong magmainampoon kita, apan dili kita kinahanglang mabalaka pag-ayo. Ang Ginoo mopanalangin sa Iyang mga Santos og dugang nga espirituhanong gahom aron mahinagbo ang mga hagit sa atong panahon.

(Neil L. Andersen, “A Compensatory Spiritual Power for the Righteous” [debosyonal sa Education Week sa Brigham Young University, Ago. 18, 2015], speeches.byu.edu)

Basaha ang 2 Timoteo 3:14–17 , nga mangita og usa sa mga gasa nga gihatag sa Dios aron matabangan kita diha sa mga peligro sa atong panahon.

Dapita ang mga estudyante sa pagpakigbahin sa unsay ilang nakaplagan.

Unsa ang pipila sa mga panalangin nga atong madawat gikan sa pagtuon sa kasulatan nga imong namatikdan niini nga mga bersikulo?

Mahimong makatabang ang paglista sa mga panalangin nga naila sa mga estudyante ngadto sa pisara. Kon ang mga estudyante naglisod sa pag-ila sa mga panalangin, ang pipila sa mosunod mahimong idugang ngadto sa lista.

Ang pagtuon sa kasulatan makatabang kanimo nga:

Mapalawom ang imong hugot nga pagtuo diha kang Jesukristo.
Makadawat og kaalam ug panudlo sa mga sitwasyon nga imong giatubang.
Makasabot sa doktrina o mga kamatuoran sa ebanghelyo.
Magtul-id sa sayop nga mga ideya o dili maayo nga mga batasan.
Mahimong mas sama ni Jesukristo.

Unsaon man nimo pagpamubo [summarize] sa unsay gitudlo ni Pablo mahitungod sa pagtuon sa kasulatan?

Usa ka paagi sa pagpamubo [summarize] sa mga estudyante sa mga pagtulun-an ni Pablo mao kini: samtang kita magtuon sa mga kasulatan, kita makaangkon og kaalam nga mogiya kanato ngadto sa kaluwasan pinaagi sa hugot nga pagtuo diha ni Jesukristo. Mahimong mosulat og pipila ka pagpamubo sa mga estudyante ngadto sa pisara.

Diha sa imong journal sa pagtuon, pagsulat mahitungod sa panahon diin ang mga kasulatan nakatabang kanimo sa usa sa mga paagi nga gihulagway ni Pablo. Kon wala kay mahunahunaan nga kasinatian, isulat nganong sa imong hunahuna ang mga kasulatan mahimong makatabang kanimo sa usa sa mga paagi nga gihulagway ni Pablo.

Ikonsiderar ang pagdapit og pipila ka mga boluntaryo sa pagpakigbahin o pagpamubo sa unsay ilang gisulat.

Unsa ang lain pang mga paagi nga ang Ginoo makapanalangin kanimo diha sa imong pagtuon sa mga kasulatan?
Ang Ginoo naghatag kanimo sa gasa sa mga kasulatan aron makatabang kanimo sa kataposang mga adlaw. Unsa ang gitudlo niini kanimo mahitungod Kaniya?

Paggamit sa mga kasulatan

Mahimong tugotan ang mga estudyante sa pagbuhat diha sa gagmay nga mga grupo aron kompletohon ang mosunod nga kalihokan.

Aron mabansay ang paggamit sa mga kasulatan sa pagpalig-on sa imong hugot nga pagtuo kang Jesukristo, pagpili og duha ka mga hagit sa ulahing mga adlaw nga gitagna ni Pablo sa 2 Timoteo 3:1–7, 12–13 ; 4:3–4 , o pagpili og laing mga hagit nga may kalabotan sa imong kinabuhi. Pangita og mga tudling sa kasulatan nga mahimong makatabang sa usa ka tawo kinsa nahiatubang niini nga mga hagit. Mahimong makatabang ang pagpangita og mahinungdanong mga pulong diha sa Giya ngadto sa mga Kasulatan, nga anaa sa ChurchofJesusChrist.org. O mahimo nimong unahon pagpili ang pipila sa imong paborito nga mga kasulatan ug dayon pagdesisyon kon hain nga mga hagit sa ulahing mga adlaw kini makatabang kanimo.

Unsa nga mga tudling sa kasulatan ang imong nakit-an nga makatabang sa tawo nga nahiatubang sa pihong mga hagit? Ipasabot kon unsaon niini nila pagtabang.

Ang imong tumong sa pagtuon sa kasulatan

Hatagi ang mga estudyante og kahigayonan sa pagpamalandong sa ilang mga tumong sa inadlaw nga pagtuon sa kasulatan. Ang ubang mga estudyante lagmit naglisod sa pagpadayon sa tumong nga ilang gitakda. Ang kasinatian sa pagkat-on sa leksiyon sa “Doktrinal nga Kahanas: 2 Timoteo 3:15–17” maghatag sa mga estudyante og kahigayonan sa pagkonsiderar unsaon pagbuntog sa mga babag nga ilang lagmit giatubang sa inadlaw nga pagtuon sa kasulatan.

Gipahinumdoman ni Pablo si Timoteo nga si Timoteo gipanalanginan nga mahibalo sa mga kasulatan gikan sa panahon nga siya bata pa (tan-awa sa 2 Timoteo 3:15). Sa samang paagi, ang Langitnong Amahan mopanalangin kanimo tungod sa pagtuon sa mga kasulatan sa imong kabatan-on. Paggahin og pipila ka minuto sa mainampoong paagi sa paghimo og tumong o sa pagkonsiderar sa imong tumong karon alang sa personal nga inadlaw nga pagtuon sa kasulatan. Pamalandongi ang mosunod nga mga pangutana:

Kumusta man ka sa imong tumong?
Sa unsang paagi nga ang imong tumong nagtabang kanimo nga mapalambo ang imong hugot nga pagtuo kang Jesukristo ug mabuntog ang mga hagit sa atong panahon?
Unsa nga mga pagpahiangay, kon adunay bisan unsa, sa imong tumong ang nabati nimo nga kinahanglan nimong buhaton?

Mahimong dapiton ang mga estudyante sa pagpaambit sa ilang tubag sa ikaduhang pangutana sa ibabaw.

Dapita ang mga estudyante sa pagpasa sa ilang tumong kon gibati nila nga kini mahimong makatabang kanila nga makab-ot kini.

Mahimong sultihan ang imong magtutudlo, usa ka ginikanan, o usa ka tawo nga imong gisaligan mahitungod sa imong tumong sa pagtuon sa kasulatan ug dapita sila nga magfollow up kanimo.

Komentaryo ug Background nga Impormasyon

Unsaon man nako pagkasabot sa mga peligro nga nalista sa 2 Timoteo 3:1–7 ?

Ang mosunod nga mga paghatag og kahulogan mahimong magamit:

“Walay pagbati sa paghigugma” ( 2 Timoteo 3:3) mahimong maglakip sa mga batasang may koneksiyon sa pagkawalay pagbati o walay pagpakabana, mga pagbati sa pagdumot ug pagtamay, o kauban sa malaw-ay nga mga tinguha nga mosangpot sa sekswal nga imoralidad
“Mapatuyangon” ( 2 Timoteo 3:3) nagpasabot nga walay pagpugong sa kaugalingon
“Madalidalion” ( 2 Timoteo 3:4) nagpasabot nga dali-dali, walay pagtagad
“Garboso kaayo” ( 2 Timoteo 3:4) nagpasabot nga mapahitaas, mapahitas-on

Sa unsang paagi ako mas makasabot sa 2 Timoteo 3:16–17 ?

Mahimong basahon ang artikulo nga “Line upon Line: 2 Timothy 3:16–17” (New Era, Abr. 2012, 19), nga naglangkob og mga tabang sa pulong, propetikanhong komentaryo, ug mga pagpasabot nga mahimong makatabang kanimo nga makasabot og dugang niini nga mga bersikulo.

Sa unsa nga paagi nga makatabang kanako ang pagtuon sa mga kasulatan sa akong kinabuhi?

Si Elder Richard G. Scott (1928–2015) sa Korum sa Napulog Duha ka Apostoles miingon:

15:5

Makigsulti kita sa Dios pinaagi sa pag-ampo. Siya sa kasagaran makigsulti ngari nato pinaagi sa Iyang nasulat nga pulong. Aron masayod unsay tono ug pamati sa Balaang tingog, basaha ang Iyang mga pulong, tun-i ang kasulatan, ug pamalandonga kini. Himoa kining importante nga bahin sa matag adlaw nga kinabuhi. …

Pinaagi sa inadlaw, padayon nga pagtuon sa kasulatan, duna moy kalinaw diha sa kagubot sa inyong palibot ug kalig-on sa pagbuntog sa mga tintasyon. Makapalambo mo og lig-ong pagtuo sa grasya sa Dios ug masayod nga pinaagi sa Pag-ula ni Jesukristo ang tanan mamaayo sumala sa kaugalingong panahon sa Dios.

(Richard G. Scott, “Himoa ang Paggamit sa Pagtuo nga Inyong Unang Prayoridad,” Liahona, Nob. 2014, 93–94)

Unsaon nako nga mobati nga malaomon mahitungod sa umaabot kon ang direksiyon sa katilingban daw supak sa mga sugo sa Dios?

2:3

Unsa ang pipila ka mga paagi nga ako epektibong makatuon sa mga kasulatan?

2:3

Dugang nga mga Kalihokan sa Pagkat-on

Ang ehemplo sa Manluluwas

Irebyo ang Mateo 4:1–11 kauban ang mga estudyante aron makita giunsa sa Manluluwas paggamit ang mga kasulatan sa pagbuntog sa mga kakuyaw ug mga tintasyon nga Iyang giatubang.

Lainlaing mga paagi sa pagkat-on gikan sa mga kasulatan

Sa dili pa dapiton ang mga estudyante sa pagkonsiderar sa ilang personal nga tumong sa pagtuon sa kasulatan, ipakita ang mosunod nga pamahayag ni Elder David A. Bednar sa Korum sa Napulog Duha ka Apostoles. Dapita ang mga estudyante sa pag-ila sa matag pulong nga naghulagway sa mga paagi nga atong magamit ang atong mga kasulatan.

“Kamo ug ako kinahanglang motan-aw ug moduol kang Kristo, kinsa mao ‘ang tuburan sa buhi nga tubig’ ( 1 Nephi 11:25 ; itandi sa Ether 8:26 ; 12:28), pinaagi sa pagbasa (tan-awa sa Mosiah 1:5), pagtuon (tan-awa sa [ Doktrina ug mga Pakigsaad 26:1 ]), pagsiksik (tan-awa sa Juan 5:39 ; Alma 17:2), ug pagbusog (tan-awa sa 2 Nephi 32:3) sa mga pulong ni Kristo nga anaa sa balaang mga kasulatan. Pinaagi sa pagbuhat niini, madawat nato ang espirituhanong giya ug proteksiyon sa panahon sa atong mortal nga panaw” (David A. Bednar, “A Reservoir of Living Water” [Church Educational System fireside alang sa mga young adult, Peb. 4, 2007], 2, broadcasts.ChurchofJesusChrist.org).

Hangyoa ang mga estudyante sa paghulagway unsaon nila paggamit diha sa ilang personal nga pagtuon sa kasulatan ang matag pulong nga ilang naila.