Ang pagpuyo sa ebanghelyo ni Jesukristo nagpanalangin kanato sa daghang mga paagi. Bisan tuod og kita mag-atubang og mga pagsulay ug paglutos, pinaagi sa hugot nga pagtuo diha kang Jesukristo, kita makahimo sa pagpabiling maisogon hangtod sa kataposan. Human sa mga dekada sa pagpaningkamot nga mosunod sa Manluluwas, si Pablo nasayod nga siya hapit nang patyon. Sa iyang kataposang sulat kang Timoteo, iyang gipadayag nganong ang pagpabiling matinud-anon bililhon man alang kaniya ug alang sa tanan kinsa nagpili nga molahutay diha sa hugot nga pagtuo. Kini nga leksiyon gituyo aron matabangan ka nga mahimo o magpabiling masaligon sa tibuok kinabuhi nga pagkadisipulo ni Jesukristo.
Pagtabang sa mga estudyante sa pag-ila sa “pangitaa ang” nga mga imbitasyon. Duol sa sinugdanan sa usa ka leksiyon, kasagaran adunay usa ka imbitasyon alang sa mga estudyante nga mangita og doktrina, mga kamatuoran, o mga baroganan nga mogawas gikan sa unod [content] sa kasulatan. Mahimong makatabang ang pagpakita unsa ang imong gusto nga pangitaon sa mga estudyante. Ang pagbuhat sa ingon makatabang sa mga estudyante nga mahinumdom sa impormasyon nga kinahanglan nilang pangitaon samtang magtuon sila sa tudling sa kasulatan.
Pagpangandam sa estudyante: Dapita ang mga estudyante nga mangita og tudling sa kasulatan nga lagmit nilang mapaambit sa usa ka tawo nga mibati nga nawad-an og kadasig sa ilang mga pagpaningkamot nga mosunod kang Jesukristo.
Posible nga mga Kalihokan sa Pagkat-on
Paglahutay nga matinud-anon
Panahon sa mosunod nga kalihokan, pagpakasensitibo ngadto sa mga estudyante kinsa lagmit nagsakit og maayo o adunay usa ka higala o miyembro sa pamilya nga bag-o lang mipanaw.
Handurawa unsa kaha kon ikaw mahibalo nga ikaw hapit nang mamatay.
Ikonsiderar ang pagdapit sa mga estudyante sa pagsulat sa ilang mga tubag sa mosunod nga mga pangutana diha sa ilang mga journal sa pagtuon. Dayon ikonsiderar ang pagdapit og pipila ka mga estudyante nga mopakigbahin sa klase sa ilang mga tubag sa kataposang pangutana.
Unsa man ang imong gilaoman nga unta imong ikasulti mahitungod sa imong kinabuhi kon moabot na kanang adlawa?
Unsa man ang importante kanimo nianang adlawa? Unsa man ang dili importante?
Sa unsang paagi kaha ang imong mga paningkamot sa pagsunod sa Manluluwas sa tibuok mong kinabuhi makaapekto nimo nianang panahona?
Human sa mga dekada sa maisugong pagpangalagad isip usa ka disipulo ni Jesukristo, si Pablo nisulat ngadto kang Timoteo gikan sa usa ka Romanhong prisohan nga nasayod nga siya hapit nang silotan. Kini lagmit ang ulahing sulat ni Pablo nga nalakip sa Bag-ong Tugon. Gipanalanginan kita nga makabasa sa pipila sa kataposang mga hunahuna niining bantogan nga tawo dihang iyang gipamalandongan ang iyang kinabuhi ug ang iyang nahiduol nga kamatayon.
Gitandi ni Pablo ang iyang mga paningkamot sa pagpabiling matinud-anon sa duha ka lainlaing mga lihok. Basaha ang 2 Timoteo 4:6–7 , ug pangitaa ang mga pagtandi ni Pablo.
Imahe
Two men in a park boxing in a boxing ring with a man acting as Referee.
Imahe
Two young men are outside. They are running on a track. This is in Lisbon, Portugal.
Ikonsiderar ang pagpakita niining duha ka mga hulagway samtang ang mga estudyante naghisgot sa mosunod nga pangutana.
Ngano kaha nga ang pagpakig-away og maayong away ug pagtapos sa usa ka lumba mahimong epektibo nga pagtandi sa paghupot sa atong hugot nga pagtuo diha ni Jesukristo sa tibuok natong kinabuhi?
Pamalandong sa usa ka minuto kon kumusta man ang imong gipangbuhat niini nga punto sa imong kinabuhi karon diha sa imong lumba o sa imong away sa pagpabiling matinud-anon kang Kristo. Mibati ka ba og pagkakapoy, gibunalan, o nasamdan? Nasuwayan ba nimo nga natintal ka sa pag-undang? Giunsa man sa Manluluwas pagtabang kanimo niini nga mga sitwasyon? Sa imong pagtuon karon, paghunahuna kon nganong bililhon man alang kanimo ang pagpadayon sa pagdagan sa lumba o pagpakig-away sa away sa pagkadisipulo.
Unsa ang gitanyag sa Manluluwas ngadto sa matinud-anon
Basaha ang 2 Timoteo 4:8 , nga mangita sa mga panalangin nga giandam sa Manluluwas alang kang Pablo ug sa tanang milahutay nga matinud-anon.
Kini nga purongpurong [crown] mao ang usa ka simbolo sa kinabuhing dayon kauban ang Langitnong Amahan ug ni Jesukristo, nga giila usab isip kahimayaan.
Ngano sa imong hunahuna nga si Pablo naghulagway niini nga panalangin nga gitanyag ni Jesukristo kanato isip “purongpurong sa pagkamatarong”?
Usa ka kamatuoran nga atong makat-onan gikan niining asoy mao nga: Tungod ni Jesukristo, ang tanan kinsa matinud-anon nga milahutay sa kataposan makadawat og kinabuhing dayon.
Unsa ang kahulogan sa hugpong sa mga pulong “molahutay hangtod sa kataposan” nganha kanimo? Sa unsang mga paagi nga kinahanglan kang molahutay karon? Unsay nakapahimong mahagiton sa paglahutay hangtod sa kataposan?
Sa unsang mga paagi nga ang Manluluwas nahimong perpekto nga ehemplo sa paglahutay hangtod sa kataposan? (tan-awa sa Doktrina ug mga Pakigsaad 19:16–19).
Sa unsang paagi nga ang paglahutay sa Manluluwas hangtod sa kataposan nakaapekto kanato?
Paggahin og panahon sa paghunahuna kon si kinsa ang lagmit maapektohan sa imong pagpili sa paglahutay hangtod sa kataposan.
Mahimong hatagan ang matag estudyante og gagmayng papel. Dapita ang matag estudyante sa dili pagpaila nga mosulat ug mohatag og usa ka mubo nga senaryo diin ang usa ka tawo lagmit mobati og katintal sa paghunong sa pagpaningkamot nga mosunod ni Jesukristo. (Kini mahimo usab nga usa ka tinuod nga rason nga ang usa ka minahal modesisyon nga mohunong sa pagsunod kang Jesukristo.) Kini nga mga papel mahimong ibalik og panghatag unya sa leksiyon o basahon ug gamiton sa laing mga paagi aron matabangan ang mga estudyante nga makonektar ang leksiyon ngadto sa ilang mga kinabuhi.
Ang atong paglaom anaa diha kang Jesukristo
Si Elder L. Tom Perry (1922–2015) sa Korum sa Napulog Duha ka Apostoles mipasabot nga tungod sa pagkamahagiton sa paglahutay hangtod sa kataposan, dili kita magmalamposon nga mag-inusara. Mitudlo siya:
Imahe
Final official portrait of Elder L. Tom Perry of the Quorum of the Twelve Apostles, 2004. Passed away 30 May 2015.
Ang paglahutay hangtod sa kataposan dili gayod proyekto sa kaugalingon lamang. … Nagkinahanglan kini sa matubsanong gahom sa Manluluwas.
(L. Tom Perry, “Ang Ebanghelyo ni Jesukristo,” Liahona, Mayo 2008, 46)
Sama ni Pablo, daghang uban nga nakalahutay hangtod sa kataposan inubanan sa panabang sa Manluluwas. Basaha ang labing menos sa duha sa mosunod nga mga tudling sa Basahon ni Mormon. Pangitaa kon sa unsang paagi nga ang usa ka relasyon sa Manluluwas nakaimpluwensiya sa matag usa niini nga mga propeta dihang matinud-anon nilang gilahutay ug giatubang ang ilang mga kamatayon.
Ang mga estudyante mahimo usab nga dapiton sa pagpaambit sa mga ehemplo gikan sa ilang kaugalingong pamilya sa kalinaw nga mahimong mabati sa usa ka tawo nga naduol na sa kamatayon human sa kinabuhi nga naningkamot pagsunod ni Jesukristo.
Giunsa niini nga mga disipulo paghulagway ang ilang relasyon ni Jesukristo?
Sa unsang paagi nga ang maong relasyon nakaapekto sa unsa ang ilang gibati mahitungod sa ilang kamatayon?
Unsa nga tambag ang imong mahatag?
Mahimong ihatag og balik ngadto sa lainlaing mga estudyante ang mga papel nga gipasa sa mga estudyante nga adunay mga sitwasyon nga mahimong makatintal sa usa ka tawo nga moundang pagpaningkamot og sunod ni Jesukristo.
Ipakita ang mosunod nga mga pangutana, ug hatagi ang mga estudyante og panahon aron pamalandongan sila kauban sa mga sitwasyon nga ilang nadawat diha sa hunahuna. Dayon pagdapit og mga boluntaryo sa pagpaambit unsa lagmit ang ilang isulti ngadto sa usa ka tawo niana nga sitwasyon, bisan kon kini dili direkta nga makatubag sa mga pangutana. Dapita ang mga estudyante nga nakakompleto sa pagpangandam sa estudyante nga kalihokan nga mopaambit usab sa kasulatan nga ilang nakit-an.
Unsa nga tambag ang imong ihatag ngadto sa usa ka matinud-anon nga tawo kinsa nabalaka nga siya walay igong kusog nga molahutay?
Unsa kaha ang imong masulti ngadto sa usa ka tawo kinsa miundang na sa pagsunod sa Manluluwas ug karon mibati nga ulahi na kaayo ang magsugod og balik? Unsaon kaha nimo paggamit ang ehemplo sa kinabuhi ni Pablo aron matabangan sila nga makita nga ang Manluluwas makatabang kanato nga magbag-o ug magsugod pag-usab?
Unsa nga mga lakang ang ilang mabuhat aron makadangop og tabang sa Manluluwas?
Unsa ang mensahe alang kanimo?
Balik ngadto sa 2 Timoteo 4 ug basaha ang mga bersikulo 6–8, 18. Handurawa ang imong kaugalingon sa umaabot, nga makasulti sama sa gisulti ni Pablo diha nga nagkaduol ka sa kataposan sa imong kinabuhi. Dayon tubaga ang mosunod nga mga pangutana:
Unsa sa imong pamati ang mensahe sa Langitnong Amahan nganha kanimo?
Sa unsang paagi nga ang unsa ang imong nakat-onan ug nabati karon nakatabang kanimo nga mas makasabot sa imong panginahanglan ni Jesukristo?
Unsa ang gibati nimong pag-aghat nga buhaton?
Komentaryo ug Background nga Impormasyon
Unsaon nato sa paglahutay hangtod sa kataposan?
Si Elder L. Tom Perry (1922–2015) sa Korum sa Napulog Duha ka Apostoles mipasabot:
Imahe
Final official portrait of Elder L. Tom Perry of the Quorum of the Twelve Apostles, 2004. Passed away 30 May 2015.
Ang paglahutay sa kataposan nagkinahanglan og pagkamatinud-anon hangtod sa kataposan, sama sa bahin ni Pablo, kinsa misulti kang Timoteo, “gibugno ko na ang maayong pakigbugnoay, natapos ko na ang akong pagdagan sa lumba, gibantayan ko ang pagtuo” ( 2 Timoteo 4:7). Klaro, kini dili usa ka sayon nga tahas. Gituyo kini nga malisod, mahagiton, ug makahashas samtang kita mangandam sa pagbalik og puyo uban sa atong Amahan sa Langit ug modawat sa mahangtorong mga panalangin.
(L. Tom Perry, “Ang Ebanghelyo ni Jesukristo,” Liahona, Mayo 2008, 46)
Unsa kaha kon adunay panahon nga lisod nga makita ang mga panalangin sa pagpabiling matinud-anon?
Si Elder Jeffrey R. Holland sa Korum sa Napulog Duha ka Apostoles miingon:
Imahe
Official Portrait of Elder Jeffrey R. Holland. Photographed January 2018.
Ayaw paghunong. Padayon sa paglakaw. Padayon sa pagpaningkamot. Adunay tabang ug kalipay sa unahan. … Mamaayo ra ang tanan sa kataposan. Salig sa Dios ug tuohi nga moabot ra ang maayong mga butang.
… Ang ubang panalangin moabot diha dayon, ang uban dugay, ug ang uban dili moabot hangtod didto sa langit; apan para niadtong mohangop sa ebanghelyo ni Jesukristo, moabot kini.
(Jeffrey R. Holland, “An High Priest of Good Things to Come,” Ensign, Nob. 1999, 38)
Dugang nga mga Kalihokan sa Pagkat-on
Ang basahon ni Filemon makatudlo kanato mahitungod sa Manluluwas
Dapita ang usa ka estudyante sa pagbasa og kusog sa mosunod nga impormasyon mahitungod sa usa ka sitwasyon nga gipahayag ni Pablo niini nga sulat:
Si Filemon dunay sulugoon, o ulipon, ang ngalan si Onesimo nga milayas ug tingali nakapanghilabot og butang gikan ni Filemon (tan-awa sa Filemon 1:18). Ang pagpangulipon wala ikonsiderar nga dautan diha sa Judio-Kristiyano nga kultura sa panahon ni Pablo ug suportado sa balaod sa Roma. Ang mga silot alang sa milayas nga mga ulipon naglakip sa grabe nga paglatos, pagbutang og simbolo sa agtang sa ulipon, o gani pagpatay. Human milayas, nahimamat ni Onesimo si Apostol Pablo ug nakabig ngadto sa ebanghelyo ni Jesukristo. Giawhag ni Pablo si Onesimo nga mobalik ngadto kang Filemon.
Dapita ang usa ka estudyante sa pagbasa og kusog sa Filemon 1:8–12. Hangyoa ang klase sa pagsunod, nga mangita kon unsay gitambag o gihangyo ni Pablo nga buhaton ni Filemon.
Dayon dapita ang mga estudyante nga mobasa sa Filemon 1:15–19 ug ikomparar unsa ang gisulti ni Pablo ug unsa ang iyang gitanyag nga buhaton alang-alang kang Onesimo ngadto sa unsa ang gibuhat sa Manluluwas alang sa matag usa kanato.
2 Timoteo 4:8. Si Jesukristo naghatag kanato og paglaom alang sa atong kaugmaon bisan pa sa atong miaging mga kasaypanan
Tabangi ang mga estudyante nga makasabot nga ang kasegurohan ni Pablo sa usa ka mahangtorong ganti (tan-awa ang 2 Timoteo 4:8) wala miabot tungod kay wala siya makahimo og mga kasaypanan. Sa pagkatinuod, diha sa unang bahin sa iyang kinabuhi, kaniadtong naila pa siya nga si Saulo, siya nakig-away batok sa Simbahan sa Manluluwas (tan-awa ang Mga Buhat 8:3 ; 9:1–2). Sa paghinumdom sa iyang kinabuhi, gihulagway ni Pablo ang iyang pagkabatan-on isip ang “labaw” sa mga makasasala (tan-awa ang 1 Timoteo 1:15). Lagmit makatintal kang Pablo ang pag-undang tungod sa iyang miaging mga sala ug mga kahuyang.
Dapita ang mga estudyante sa pagbasa sa 1 Timoteo 1:12–17 ug markahan ang usa ka butang sa matag bersikulo nga nagpakita sa pagsalig ni Pablo ngadto kang Jesukristo nga luwason siya, kaysa sa iyang kaugalingong kusog.
Hangyoa ang mga estudyante sa pagpakigbahin unsa niining mga bersikulo ang labing makahuluganon alang kanila ug ngano.
Dapita sila sa pagpamubo [summary] sa mensahe ni Pablo ngadto sa usa ka tawo kinsa mibati og kaundangon [giving-up] tungod sa iyang miaging mga kasaypanan o kasamtangang mga kahuyang.
