Mga Hebreohanon 1–6

Kinatibuk-ang Pagpasabot

Tungod sa kabug-at sa nagkalainlaing mga pagpanglutos, daghan sa mga Judio nga mga Kristiyano ang dayag nga mibiya gikan sa Simbahan ug mibalik sa gikonsiderar nga kasegurohan sa Judio nga pagsimba sa sinagoga. Gustong ipakita ni Pablo niining mga Judio nga Kristiyanos nga si Jesus mas labaw kay ni Moises ug nga ang Iyang pagpangalagad nagdala og bag-ong pakigsaad nga mas labaw kay sa daang pakigsaad ubos sa balaod ni Moises. Si Pablo nitudlo nga si Jesukristo mikanaog gikan sa Iyang langitnong trono aron magpakabuhi isip usa ka mortal nga tawo sa kalibotan ug mobuhat og usa ka walay kinutuban nga Pag-ula alang kanato. Pinaagi sa pagdasig sa mga Santos sa pagwagtang sa mga kinaiya sa pagkawalay pagtuo, si Pablo misulay sa pagtabang kanila nga mobalik ngadto sa mga pakigsaad nga ilang gihimo.

Pangandam sa Pagtudlo

Ang mosunod nga impormasyon maghatag sa mga magtutudlo og mga ideya kon unsa ang lagmit nga gikinahanglang andamon daan para sa kada leksiyon.

Mga Hebreohanon 1-10

Katuyoan sa leksiyon: Kini nga leksiyon makatabang sa mga estudyante nga mapalig-on ang ilang hugot nga pagtuo sa Manluluwas samtang ilang kat-onan ang Iyang gahom ibabaw sa tanang mga butang pinaagi sa pag-ila ug pagtuon sa pipila sa Iyang mga titulo ug mga tahas.

Pagpangandam sa estudyante: Dapita ang mga estudyante sa pagpangita sa mga pangalan ni Jesukristo panahon sa ilang personal o pamilya nga pagtuon sa kasulatan ug motambong sa klase nga andam mopaambit sa mga pangalan nga ilang napalgan.

Sugyot sa pagtudlo pinaagi sa videoconference Mahimong ipakita ang usa ka larawan ni Jesukristo ug gamit ang chat nga feature tugoti ang mga estudyante sa paglista sa mga titulo ug mga tahas ni Kristo nga ilang nadiskobrehan diha sa Mga Hebreohanon. Ang mga estudyante mahimo usab nga magpost sa titulo o tahas nga ilang napili nga tun-an. Kini mahimong makatabang nga mailhan ang titulo o tahas nga gitun-an sa kadaghanan sa mga estudyante. Ang mga estudyante mahimong mopaambit nganong sa ilang hunahuna kana nga titulo o tahas mao ang labing gitun-an o nganong kini lagmit mahinungdanon ngadto sa mga tinedyer.

Mga Hebreohanon 2–4

Katuyoan sa leksiyon: Kini nga leksiyon gituyo aron madugangan ang pagsalig sa mga estudyante nga si Jesukristo makatabang kanila sa panahon sa panginahanglan.

Pagpangandam sa estudyante: Dapita ang mga estudyante sa pagrebyo sa tudling sa doktrinal nga kahanas Alma 7:11–13 ug motambong sa klase nga andam mopaambit nganong ilang gibati nga kini usa ka bililhon nga tudling nga masabtan.

Content nga ipakita: Ang tsart nga tubagan sa mga estudyante

Sugyot sa pagtudlo pinaagi sa videoconference: Alang sa tsart nga kalihokan, mahimong gamiton ang whiteboard nga feature o usa ka online nga spreadsheet aron pagmugna sa tsart ug i-share kini sa klase. Dapita ang mga estudyante sa pagtubag sa tsart diha sa screen kon unsa ang ilang nakit-an, agig dugang sa pagkompoleto niini diha sa ilang mga journal sa pagtuon.

Mga Hebreohanon 3–4

Katuyoan sa leksiyon: Kini nga leksiyon gituyo aron matabangan ang mga estudyante nga mabuntog ang pagkawalay pagtuo aron sila makadawat sa mga panalangin nga gisaad sa Manluluwas.

Pagpangandam sa estudyante: Dapita ang mga estudyante sa paghunahuna mahitungod sa mga rason nga sila nagtuo kang Jesukristo ug sa unsang paagi sila gipanalanginan tungod sa pagtuo Kaniya.

Sugyot sa pagtudlo pinaagi sa videoconference: Kon mopaambit og kontekstuwal nga impormasyon mahitungod sa mga anak sa Israel, lagmit makatabang ang pagshare og screen sa mga hulagway ni Moises ug sa mga anak sa Israel diha sa kamingawan.

Mga Hebreohanon 7–10

Katuyoan sa leksiyon: Kini nga leksiyon gituyo aron matabangan nga mapalig-on ang hugot nga pagtuo sa mga estudyante ngadto kang Jesukristo isip ilang Manluluwas ug Manunubos pinaagi sa pagtabang kanila nga makasabot sa karaang mga simbolo sa balaod ni Moises.

Timan-i: Kini nga leksiyon naghisgot og content nga wala nalakip sa hugna niining semanaha alang sa Dali, Sunod Kanako. Aron makahatag og kahigayonan sa paghisgot sa doktrinal nga kahanas ug uban pang may kalabotan nga content sa sunod nga semana sa Dali, Sunod Kanako, kini nga leksiyon gibalhin dinhi. Ang mga estudyante mahimong magtuon niini nga content sa leksiyon sa bisan asa nga semana.

Pagpangandam sa estudyante: Dapita ang mga estudyante sa pagdala og usa ka butang ngadto sa klase ug ipasabot sa unsang paagi kini nagpamatuod o nagpahinumdom kanila kang Jesukristo. Pananglitan, ang usa ka estudyante mahimong magdala og usa ka papas ug mopasabot nga kini nagpahinumdom kanila kang Jesukristo tungod kay Siya makapapas, o makapasaylo, sa atong mga sala.

Sugyot sa pagtudlo pinaagi sa videoconference: Mahimong magmugna og usa ka PowerPoint o uban pang biswal nga presentasyon diin ang mga hulagway ug mga kahulogan sa mga pulong mahimong ikapakita sa tukma nga mga panahon sa leksiyon.

Pagrebyo sa Doktrinal nga Kahanas 22

Katuyoan sa leksiyon: Kini nga leksiyon gituyo aron matabangan ang mga estudyante sa pagsag-ulo sa mga pakisayran sa kasulatan ug sa mahinungdanong hugpong sa mga pulong sa kasulatan gikan sa mga tudling sa doktrinal nga kahanas sa Bag-ong Tugon.

Pagpangandam sa estudyante: Dapita ang mga estudyante sa pakig-istorya kauban sa usa ka miyembro sa pamilya o higala mahitungod sa unsang paagi nga ang pagsag-ulo sa mga kasulatan nakapadasig niana nga miyembro sa pamilya o higala o nagtabang kanila aron mapaduol sa Manluluwas.

Mga Materyales: Usa ka piraso sa papel ug usa ka pangsulat nga himan alang sa matag estudyante

Sugyot sa pagtudlo pinaagi sa videoconference: Mahimong tugotan ang mga estudyante sa pagdrowing og mga hulagway gamit ang annotate function. Ang mga estudyante mahimong magpuli-puli sa pagdrowing og mga timaan ug pagtagna sa tudling sa doktrinal nga kahanas.