Ang Manluluwas Makatabang Kanato diha sa Panahon sa Atong Panginahanglan
Imahe
Naghunahuna ka ba kon aduna pay si bisan kinsa nga tinuod nga nakasabot unsa ang imong giagian sa kinabuhi? Ang basahon sa Mga Hebreohanon nagtudlo nga si Jesukristo mikanaog gikan sa Iyang langitnong trono aron magkinabuhi isip usa ka mortal nga tawo sa kalibotan ug mobuhat og usa ka walay kinutobang Pag-ula alang kanato. Tungod niini, Siya nakaila kanato sa hingpit ug hingpit nga nasayod kon unsaon pagtabang kanato. Kini nga leksiyon makadugang sa imong kompyansa nga si Jesukristo makatabang kanimo sa panahon sa panginahanglan.
Paggamit sa musika aron pagdapit sa Espiritu. Ang musika, ilabi na ang mga himno sa Simbahan, makahimo og importante nga tahas sa pagtabang sa mga estudyante nga mobati sa impluwensiya sa Espiritu Santo sa ilang kasinatian sa pagkat-on sa ebanghelyo. Ang pagkanta og usa o daghan pang mga bersikulo sa usa ka himno nga direktang may kalabotan sa leksiyon mahimong makatabang sa mga estudyante nga makapangandam sa pagtuon sa mga baroganan sa ebanghelyo o marebyo ang mga baroganan nga ilang nakat-onan.
Pagpangandam sa estudyante: Dapita ang mga estudyante sa pagrebyo sa tudling sa doktrinal nga kahanas sa Alma 7:11–13 ug motambong sa klase nga andam mopaambit kon nganong ila kini nga gibati nga usa ka importante nga tudling nga masabtan.
Posible nga mga Kalihokan sa Pagkat-on
Ang Manluluwas makasabot
Mahimong mokanta og usa ka himno nga naghisgot mahitungod sa abilidad sa Manluluwas sa paghatag kanato og kahupay ug kalinaw aron pagsugod sa klase. Mahimong hangyoon ang mga estudyante sa pagpaminaw alang sa mga panabot mahitungod kang Jesukristo samtang nagdungan sila pag-awit.
Mahimo usab nimong tan-awon ang bidyo nga “Where Can I Turn for Peace? [Ang Kalinaw Asa ko Pangitaa?]” (4:03) sa ChurchofJesusChrist.org.
Unsaon nimo sa pagpasabot sa mensahe niini nga himno sa imong kaugalingong mga pulong?
Sa imong journal sa pagtuon, pagsulat mahitungod sa usa ka butang sa imong kinabuhi diin ikaw nagkinahanglan kaayo og tabang.
Sa iyang epistola ngadto sa Mga Hebreohanon, si Pablo mitudlo sa mga Santos mahitungod kang Jesukristo ug sa unsang paagi Siya makahatag kanila og kalig-on sa mga kahimtang nga ilang giatubang (tan-awa ang Mga Hebreohanon 4:16). Sa imong pagtuon, pangita kon sa unsang paagi nga si Jesukristo makatabang kanimo.
Mahimong magmugna sa gisugyot nga mga kolum sa ubos ngadto sa pisara. Diha sa pagsiksik sa mga estudyante sa mga kasulatan alang sa mga tubag, dapita sila sa pagsulat sa ilang mga nadiskobrehan diha sa tukma nga mga kolum.
Sa imong journal sa pagtuon, pagmugna og usa ka tsart sama sa mosunod:
Nganong si Jesukristo nakahimo sa pagsabot kanako?
Unsa nga mga panalangin ang mahimong mahatag ni Jesukristo kanako tungod kay Siya nakasabot nako?
Basaha ang Mga Hebreohanon 2:9–10, 13–18 , ug 4:12–16 , nga mangita sa mga tubag sa pangutana diha sa tsart. Isulat ang mga tubag ubos sa tukma nga mga ulohan. Timan-i nga ang Mga Hebreohanon 2:9 ug 16 nagpasabot kang Jesukristo nga mibiya sa Iyang langitnong trono aron mabuhi isip usa ka mortal nga tawo sa kalibotan.
Unsa ang imong nakat-onan mahitungod kang Jesukristo nga nabati nimong makatabang kanimo o sa uban?
Pamati og maayo ug pag-obserbar samtang ang mga estudyante mopaambit ngadto sa klase. Tinguhaa ang paggiya gikan sa Espiritu Santo aron makaila sa mga panginahanglanon sa mga estudyante. Ipangutana ang mosunod nga mga pangutana o lain pang mga pangutana, kon gikinahanglan, aron sa paghisgot sa mga hugpong sa mga pulong gikan sa mga kasulatan sa mas detalyado nga paagi.
Nganong makahupay kaha ang pagkahibalo nga si Jesukristo makaila sa “mga hunahuna ug katuyoan sa kasingkasing”? ( Mga Hebreohanon 4:12).
Unsa ang imong nasabtan gikan sa hugpong sa pulong nga “siya makahimo sa pagtabang kanila nga gitintal”? ( Mga Hebreohanon 2:18). Timan-i nga ang pulong nga gihubad isip “gitintal” mahimo usab nga hubaron isip “gisulayan” o “ipaubos sa pagsulay.” Ang pulong nga pagtabang nagpasabot nga andam nga motabang sa usa ka tawo.
Usa ka kamatuoran nga mahimo nimong madiskobrehan mao nga tungod kay si Jesukristo miantos ug gitintal sa tanang mga butang, Siya nakasabot kanato ug mahimong makatabang kanato sa panahon sa panginahanglanon. Ang propeta nga si Alma sa Basahon ni Mormon mitudlo usab niini nga kamatuoran. Mahimong mag-cross-reference sa tudling sa doktrinal nga kahanas nga Alma 7:11–13 ngadto sa Mga Hebreohanon 2:18 .
Dapita ang mga estudyante nga mopakigbahin sa ilang mga panabot gikan sa pagpangandam sa estudyante.
Si Elder David A. Bednar sa Korum sa Napulog Duha ka Apostoles mipasabot kon unsaon pagbaton og mas maayong panabot sa abilidad sa Manluluwas sa pagsabot ug pagtabang kanimo. Mahimo kang motan-aw sa bidyo nga “Makadaog sa Ilang mga Alantoson uban sa Kasayon” (16:23),nga anaa sa ChurchofJesusChrist.org, gikan sa time code nga 12:15 hangtod sa 13:21, o basaha ang mosunod nga pamahayag.
Imahe
Elder David A. Bednar, Quorum of the Twelve Apostles official portrait. 2020.
Walay pisikal nga sakit, walay espirituwal nga samad, walay kasakit sa kalag o kaguol, walay balatian o kahuyang nga kamo o ako sukad nakasugat niini nga mortalidad nga wala masinati og una sa Manluluwas. Diha sa higayon sa kahuyang mahimong mosinggit kita, “Walay nahibalo sama sa unsa kini. Walay usa nga nakasabot.” Apan ang Anak sa Dios hingpit nga nakahibalo ug nakasabot, kay Iyang nabati ug napas-an ang atong indibidwal nga mga alantoson. Ug tungod sa Iyang walay kataposan ug mahangtorong sakripisyo (tan-awa sa Alma 34:14), Siya adunay hingpit nga pagsabot ug makalugway ngari kanato sa Iyang bukton sa kalooy. Siya makakab-ot, makatandog, makaabag, makaayo, ug makalig-on kanato nga mahimong mas labaw kay sa atong mismo nga mahimo ug makatabang kanato sa pagbuhat niana nga kita dili gayod makahimo nga nagsalig lamang diha sa atong kaugalingong gahom.
Sa unsang paagi nga ang Alma 7:11–13 o ang pamahayag ni Elder Bednar makatabang kanimo nga mas makasabot sa abilidad sa Manluluwas nga motabang kanimo?
Paghunahuna og usa ka pananglitan—gikan sa imong kinabuhi, sa mga kinabuhi sa uban, o sa mga kasulatan—nga naghulagway sa hingpit nga pagsabot sa Manluluwas sa atong mga kasinatian ug sa atong mga panginahanglan. Kon nagkinahanglan ka og tabang sa paghunahuna og pananglitan, mahimong tun-an ang Juan 11:21–27, 32–36 ; Mosiah 24:11–15 ; o Doktrina ug mga Pakigsaad 122:5–9 .
Sa unsang paagi kini nga pananglitan makatabang kanimo nga mosalig kang Jesukristo?
Dapita ang mga estudyante sa pagpaambit sa mga pananglitan nga ilang nailhan. Kon ang mga estudyante nagduhaduha sa pagpaambit, mahimong mopaambit og usa ka personal nga kasinatian o paghisgot og usa sa gisugyot nga mga tudling sa kasulatan.
Masaligon nga moduol sa trono sa grasya
Basaha ang Mga Hebreohanon 4:16 , nga mangita unsa ang gidapit ni Pablo nga buhaton nato aron makadawat sa tabang nga atong gikinahanglan. Ikonsiderar ang pagmarka sa unsay imong nakit-an.
Alang sa pipila ka mga ehemplo kon unsaon nato pagduol sa trono sa grasya, tan-awa ang video “Reach Up to Him in Faith [Pagkab-ot Ngadto Kaniya diha sa Hugot nga Pagtuo]” (3:54), anaa sa ChurchofJesusChrist.org.
Unsa kaha sa imong hunahuna ang buot ipasabot sa “[masaligong muduol] sa trono sa grasya”?
Mahimong makatabang ang paghatag og gibug-aton nga kon kita moduol atubangan sa Dios, kini kinahanglang buhaton nga adunay balaang pagtahod, madayegon nga pagsimba, ug mahinulsolon nga paghangyo. Kita makabaton og pagkamasaligon dili tungod sa atong kaugalingong kaayo o mga abilidad kon dili tungod sa mga maayo nga buhat ni Jesukristo, nga maoy naghimo niining posible alang kanato nga makaduol atubangan sa Dios (tan-awa ang 2 Nephi 2:8).
Unsa ang angay natong kasaligan mahitungod sa pagduol sa Dios?
Unsa kaha ang hulagway ug pamati niini nga “[masaligong moduol] sa trono sa grasya”?
Mahimong mopaambit og usa ka personal nga pagpamatuod kang Jesukristo ug sa Iyang Pag-ula. Dapita ang mga estudyante nga masaligong moduol sa trono sa grasya aron makakita og kalig-on ug tabang sa ilang panahon sa panginahanglan.
Komentaryo ug Background nga Impormasyon
Unsa ang pagpakig-angay ni Jesukristo?
Si Elder Quentin L. Cook sa Korum sa Napulog Duha ka Apostoles mitudlo:
Imahe
Official portrait of Elder Quentin L. Cook. Called to the Quorum of the Twelve Apostles on 6 October 2007.
Ang ehemplo sa Manluluwas bahin sa pagkamapainubsanon ug pagsakripisyo alang sa tanang katawhan mao ang labing tulukibon nga panghitabo sa kasaysayan. Ang Manluluwas, bisan isip sakop sa Dios nga Kapangulohan, andam nga moanhi sa yuta isip ordinaryo nga masuso ug misugod sa pagpakabuhi nga naglakip sa pagtudlo ug pag-ayo sa Iyang mga kaigsoonan ug sa kataposan nag-antos sa dili mahulagway nga kasakit didto sa Getsemani ug sa krus aron mahingpit ang Iyang Pag-ula. Kining buhat sa gugma ug pagkamapainubsanon sa bahin ni Kristo nailhan isip ang Iyang pagpakig-angay [condescension]. Gibuhat Niya kini alang sa matag lalaki ug babaye nga gilalang o ilalang sa Dios.
Si Presidente Howard W. Hunter (1907–95) mitudlo sa mosunod:
Imahe
Howard W. Hunter
Importante nga hinumduman nga si Jesus makahimo sa pagpakasala, nga nagpatintal unta siya, nga ang plano sa kinabuhi ug kaluwasan napakyas unta, apan nagpabilin siyang matinuoron. Kon wala pa untay posibilidad sa iyang pagkatintal sa mga pag-agni ni Satanas, wala untay tinuod nga pagsulay, walay tinuod nga kadaogan diha sa resulta. Kon gitangtangan pa siya sa abilidad nga makasala, matangtangan unta siya sa iya mismong kabubut-on. Siya kadto nga miabot aron mabantayan ug maseguro ang kabubut-on sa tawo. Kinahanglan niyang ipabilin ang kapasidad ug abilidad nga makasala kon buot pa unta niya nga buhaton kini. Sama sa gisulat ni Pablo, “Bisan tuod siya Anak, siya nakakat-on sa pagkamasinugtanon pinaagi sa mga butang nga iyang giantos” ( Mga Hebreohanon 5:8); ug siya “sa tanang paagi gitintal ingon kanato, apan wala makasala” ( Mga Hebreohanon 4:15). Hingpit Siya ug walay sala, dili tungod kay kinahanglan Niyang maingon niini, apan tungod kay Siya gusto niini sa tinuoray ug sa determinadong paagi.
(Howard W. Hunter,“The Temptations of Christ,” Ensign, Nob. 1976, 19)
“Sa daghang karaan nga mga kultura, ang pagduol sa trono sa usa ka hari nga wala dapita nagbutang sa kinabuhi sa tawo ngadto sa kakuyaw, apan kon dapiton sa hari, ang usa ka tawo makaduol ug mamulong uban sa kasiguroan. Ang pagduol sa Dios ‘uban sa pagsalig’ nagpasabot sa pagbaton og pagsalig nga gusto sa Dios nga moduol kita sa Iyang trono ug nga kita makadawat sa Iyang tabang” (Manwal sa Estudyante sa Bag-ong Tugon [2018], 477).
Agig paghisgot sa kaluoy nga gitanyag sa Dios kanato, si Elder Jeffrey R. Holland sa Korum sa Napulog Duha ka Apostoles mitudlo:
Imahe
Official Portrait of Elder Jeffrey R. Holland. Photographed January 2018.
Usa ka butang nga ganahan kaayo sa Dios isip usa ka Dios mao ang kahinam sa pagkamaloloy-on, ilabi na niadtong wala magdahom niini ug kanunay mibati nga dili angay niini.
Ang akong mga pagsulay makatabang kanako nga makasabot ug makatabang sa uban
Human mahisgotan ang abilidad sa Manluluwas nga makasabot kanato, ipaambit ang mosunod nga pamahayag ni Elder Joseph B. Wirthlin (1917–2008) sa Korum sa Napulog Duha ka Apostoles:
Imahe
Last official portrait of Elder Joseph B. Wirthlin of the Quorum of the Twelve Apostles, 2004. Died December 1, 2008.
Tungod si Jesukristo miantos sa hilabihan, Siya nakasabot sa atong mga pag-antos. Siya nakasabot sa atong kasubo. Kita nagsinati og lisod nga mga butang aron kita usab mahimong modugang og kaluoy ug pagsabot ngadto sa uban.
Aron matabangan ang mga estudyante nga makapamalandong niini nga pamahayag, ipangutana ang sama sa “Kanus-a man ka nahupay sa usa ka tawo kinsa nakasinati og susamang kasinatian sa imoha?“ “Sa unsang paagi ka nakakuha og mas maayong pagsabot sa uban tungod sa mga pagsulay nga imong nasinati?”
“Ang Manluluwas Nakasabot Kanako”
Agig puli sa pamahayag ni Elder David A. Bednar, mahimong ipakita ang bidyo nga “Ang Manluluwas Nakasabot Kanako” (3:37), nga nagpakita kang Elder Jeffrey R. Holland sa Korum sa Napulog Duha ka Apostoles. Kini nga bidyo anaa sa ChurchofJesusChrist.org.
