Mga Hebreohanon 7–10
“Nagkab-ot sa Katubsanan nga Dayon [alang Kanato]”
Nakasinati ka ba og panahon diin ikaw nagkinahanglan nga makadawat og kasegurohan sa imong hugot nga pagtuo diha kang Jesukristo? Kanus-a man ka mibati nga nagkinahanglan ka og pipila ka dugang nga tabang aron magpabilin sa dalan sa pakigsaad? Ang mga Santos nga Hebreohanon nangita og subli nga kasegurohan mahitungod sa ilang hugot nga pagtuo diha kang Jesukristo ug sa Iyang gahom sa pagluwas. Si Pablo nagsulat ngadto kanila aron magtanyag pag-usab niini nga pasalig. Iyang gipahinumdoman sila nga ang balaod ni Moises mismo ang nagtumbok kang Jesukristo ug sa Iyang Pag-ula isip maoy tinuod nga tinubdan sa kaluwasan. Kini nga leksiyon gituyo aron matabangan ka nga mapalig-on ang imong hugot nga pagtuo diha kang Jesukristo isip imong Manluluwas ug Manunubos pinaagi sa pagtabang kanimo nga makasabot sa karaang mga simbolo sa balaod ni Moises.
Paglakip nga presentasyon sa magtutudlo. Ang aktibong pag-apil sa tahas [role] sa proseso sa pagkat-on makatabang sa mga estudyante nga makasabot ug makagamit sa doktrina ug mga baroganan gikan sa mga kasulatan. Bisan pa niini, kini dili gayod sa kinatibuk-an makahulip sa hingpit sa pagkinahanglan sa usa ka magtutudlo nga mopresentar og impormasyon sa tukma nga paagi samtang ang mga estudyante maminaw. Usahay ang usa ka magtutudlo kinahanglan mopasabot, mopatin-aw, ug mohulagway sa mga konsepto aron ang mga estudyante mahimong mas klarong makasabot niini.
Pagpangandam sa estudyante: Dapita ang mga estudyante sa pagdala og usa ka butang ngadto sa klase ug ipasabot sa unsang paagi kini nagpamatuod o nagpahinumdom kanila kang Jesukristo. Pananglitan, ang usa ka estudyante mahimong magdala og usa ka papas ug mopasabot nga kini nagpahinumdom kanila kang Jesukristo tungod kay Siya makapapas, o makapasaylo, sa atong mga sala.
Posible nga mga Kalihokan sa Pagkat-on
“Ang tanan nga mga butang magpamatuod kang [Jesukristo]” ( Moises 6:63)
Kon posible, mahimong mag outline sa tabernakulo (tan-awa ang dayagram sa unahan niini nga leksiyon) sa salog sa dili pa ang klase, gamit ang tape o pisi. O idrowing kini diin ang mga estudyante makakita niini. Isip alternatibo, ipakita ang pipila o ang tanan nga mga hulagway niini nga leksiyon alang sa mga estudyante aron makita sa kinatibuk-ang panahon sa klase.
Pangita og usa ka butang sa duol nga nagpahinumdom kanimo kang Jesukristo o mahimong gamiton aron magpamatuod Kaniya. Ikonsiderar kon unsa ang mahitungod sa butang nga nagpahinumdom kanimo (o nagrepresentar) kang Jesukristo.
Kompletoha ang mosunod nga pamahayag gamit kini nga butang:
Ipakita ang mosunod nga dili kompleto nga mga pahayag, ug dapita ang mga estudyante sa pagkompeto niini gamit ang butang nga ilang gipili sa ilang pagpangandam sa klase. Mahimo nila kining himoon nga magkapares, sa gagmay nga mga grupo o isip usa ka klase.
“__________________ nagpahinumdom kanako kang Jesukristo tungod kay ________________________.”
-
Sa unsang paagi nga ang mga simbolo ug mga pagtandi nga sama niini nakatabang kanimo nga mapalawom ang imong pagsabot kang Jesukristo ug unsa ang Iyang nabuhat alang kanimo?
Ang mga kasulatan nagrekord nga ang tanang mga butang nga gihatag sa Dios nagpamatuod kang Jesukristo (pananglitan, tan-awa ang 2 Nephi 11:4 ; Moses 6:63).
-
Sa unsang paagi nga ang paghinumdom niini makatabang kanimo?
Ang mga gipahigayon ug mga ordinansa sa balaod ni Moises gituyo aron molihok isip usa ka “sumbanan” o “pagkasama” nga nagpunting sa mga Israelita ngadto kang Jesukristo ug sa Iyang maulaong sakripisyo (tan-awa ang 2 Nephi 11:4 ; Jacob 4:4–5 ; Mosiah 3:15). Sa iyang Epistola ngadto sa mga Hebreohanon, si Pablo naghisgot sa simbolismo sa balaod ni Moises ug sa karaang tabernakulo aron magpahinumdom sa mga Santos sa ilang pagkinahanglan kang Jesukristo ug sa Iyang Pag-ula. Gusto niyang motabang sa Judio nga mga Santos nga magpabiling matinud-anon kang Jesukristo imbis nga mobalik sa pagsunod sa balaod ni Moises—ug ang iyang mga pagtulun-an makatabang usab kanato diha sa atong pagpaningkamot nga magpabiling matinud-anon ngadto sa Manluluwas karon. Sa niini nga leksiyon, aduna kay kahigayonan aron mas makasabot sa unsang paagi nga ang simbolismo sa mga kasulatan nagpunting kanato ug nagpamatuod kang Jesukristo.
Base sa panginahanglanon sa mga estudyante ug oras sa klase, ilha kon magpokus ba sa bahin nga “Mga pari human sa mando ni Melchizedek,” sa bahin nga “Ang simbolismo sa karaang tabernakulo,” o ang duha.
“Mga pari sumala sa laray ni Melchizedekk
Sa Epistola ni Pablo ngadto sa mga Hebreohanon, ang mga sacerdote [high priest] ug uban pang mga pari sa karaang mga Israelita nagsimbolo kang Jesukristo.
Usa sa mga tahas sa mga pari mao ang molihok isip mga tigpataliwala, nagsimbolong nagtindog taliwala sa katawhan ug sa Dios. Natuman nila kini nga tahas pinaagi sa adlaw-adlaw nga paghalad og mananap nga mga sakripisyo alang sa mga sala ug mga paglapas sa mga Israelita (tan-awa ang Levitico 1 ; Mga Hebreohanon 10:11). Kini gihimo diha sa tabernakulo.
Basaha ang Mga Hebreohanon 7:22–28 , nga timan-an ang Paghubad ni Joseph Smith alang sa Mga Hebreohanon 7:25–26 (anaa makita sa appendix sa Biblia). Pangitaa kon giunsa sa mga lihok niining mga pangulong pari pagtabang kanato nga makasabot nga si Jesukristo mihalad sa Iyang kaugalingong kinabuhi isip usa ka sakripisyo alang sa atong mga sala. Ikonsiderar ang mosunod nga paghatag og kahulogan diha sa imong pagtuon:
Ipakita ang mosunod nga mga kahulogan aron makita sa mga estudyante samtang nagbasa sila:
Ang “garantiya” sa Mga Hebreohanon 7:22 nagpasabot sa usa ka tawo nga migarantiya sa pinansiyal nga utang sa laing tawo.
Ang “mas maayo nga kasabotan” nagpasabot sa labaw nga pakigsaad sa ebanghelyo nga gi-establisar ni Kristo.
“Kini siya” sa Mga Hebreohanon 7:24 nagpasabot kang Jesukristo.
Ang “karon ug sa gihapon” sa Mga Hebreohanon 7:25 nagkahulogan og “bug-os” ug “walay kataposan.”
Mahimong dapiton ang mga estudyante sa pagsulat sa ilang mga tubag sa mosunod nga mga pangutana didto sa pisara:
-
Hain nga mga pulong o mga hugpong sa mga pulong niini nga mga bersikulo ang labing mahinungdanon nganha kanimo? Ngano man?
-
Unsa niini nga mga bersikulo ang nagtudlo nga si Jesukristo mihalad sa Iyang kaugalingong kinabuhi isip usa ka sakripisyo alang sa atong mga sala?
-
Unsa ang imong nahibaloan mahitungod ni Jesukristo o unsa nga mga kasinatian ang imong nasinati uban Kaniya nga naghatag kanimo og pagsalig nga Siya makaluwas kanimo?
Simbolismo sa karaang tabernakulo
Mahimong ipunting ang lainlaing mga parte sa tabernakulo samtang nagpasabot sa Adlaw sa Pag-ula.
Kausa sa usa ka tuig, sa Adlaw sa Pag-ula (tan-awa ang Levitico 16), ang pangulong pari mopahigayon og espesyal nga mga sakripisyong mananap una pa mosulod sa bahin sa tabernakulo nga giila isip ang labing balaang dapit (o Balaan sa mga Balaan). Kini nga bahin sa tabernakulo nagsimbolo sa celestiyal nga gingharian, o ang presensiya sa Dios. Kini nga mga sakripisyo ug ang mga buhat sa pangulong pari gituyo aron pagsimbolo unsaon ni Jesus, ang Halangdong Pangulong Pari, paghimo og usa ka sakripisyo nga mahimong mag-andam og usa ka agianan alang sa mga tawo aron makasulod sa presensiya sa Dios (tan-awa ang Mga Hebreohanon 9:1–15).
![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F8f%2F6e%2F8f6ec60d979b0c2f17df7cab635b4b1c1005b955%2F8f6ec60d979b0c2f17df7cab635b4b1c1005b955.jpeg/full/!250,/0/default)
Alang sa sunod nga kalihokan, mahimong tungaon ang klase ug dapiton ang katunga sa pagbasa sa mga tudling sa Mga Hebreohanon 9 ug ang lain pang katunga nga mobasa sa mga tudling sa Mga Hebreohanon 10. Mahimong makatabang ang pagpakita sa mga pangutana aron madangpan sa mga estudyante samtang sila nagbasa sa mga bersikulo. Paglibot-libot sa klase ug tabangi ang indibidwal nga mga estudyante kon gikinahanglan.
Pangita sa mga tubag alang sa mosunod nga mga pangutana diha sa imong pagbasa sa Mga Hebreohanon 9:11–15, 24, 28 o Mga Hebreohanon 10:4, 10–17 .
-
Unsay imong nakat-onan gikan niini nga mga bersikulo mahitungod sa Manluluwas ug sa Iyang Pag-ula?
-
Base niini nga mga bersikulo, unsa nga mga panalangin ang moabot kanato tungod sa Pag-ula ni Jesukristo?
Tabangi ang mga estudyante sa pag-ila sa mga kamatuoran gikan niini nga mga bersikulo. Usa ka posibleng kamatuoran nga lagmit nilang maila mao nga pinaagi sa Pag-ula ni Jesukristo, kita mahinloan gikan sa sala ug makadawat sa saad sa kinabuhing dayon.
-
Unsa ang gitudlo sa mga gisaad nga panalangin sa Manluluwas kanimo mahitungod sa unsa ang Iyang gusto alang kanimo?
-
Unsaon man nimo pagpakita sa imong pagpasalamat alang sa unsay nahimo ni Jesukristo alang kanimo?
Hatagi ang mga estudyante og igong panahon aron sa pagpamalandong sa mosunod nga mga panudlo ug pagsulat sa ilang mga journal. Dasiga sila nga mosunod sa mga pangaghat. Pagpaambit og pagpamatuod kabahin ni Jesukristo isip atong Manluluwas ug Manunubos.
Pamalandongi kon sa unsang paagi nga ang pagtuon sa mga pagtandi ug mga simbolismo niini nga leksiyon nakatabang kanimo nga mas makasabot kang Jesukristo ug sa Iyang Pag-ula.
-
Unsa ang pipila sa mga simbolo sa atong panahon nga nagpunting kanato ngadto kang Jesukristo?
Tan-awa sa unsang paagi nga ang kanunay nga pagpangita sa mga simbolismo mahitungod kang Jesukristo mahimong makaimpluwensya sa imong relasyon uban Niya. Pangita og tabang gikan sa Langitnong Amahan pinaagi sa Balaang Espiritu aron mailhan kon unsaon nimo pagbuhat niini nga mas makanunayon sa imong personal nga pagtuon sa kasulatan. Buhata ang bisan unsang pag-aghat nga imong madawat.
Komentaryo ug Background nga Impormasyon
Unsa ang Adlaw sa Pag-ula?
Matag tuig atol sa balaan nga adlaw sa Judio nga gitawag og Adlaw sa Pag-ula (gitawag usab nga Yom Kippur), ang labawng sacerdote [high priest] gitugotan nga mosulod sa dapit nga labing balaan (gitawag usab nga ang Balaan sa Mga Balaan) didto sa tabernakulo o, sa wala madugay, sa templo sa Jerusalem. Didto sa altar sa sakripisyo, nga nahimutang lamang sa gawas sa balaang dapit, ang labawng pari mosakripisyo og usa ka toro nga baka ug usa ka laki nga kanding. Iya dayong iwisik ang dugo sa mga hayop sa napili nga mga dapit didto sa Labing balaan nga dapit aron sa pagsimbolo sa Pag-ula ni Jesukristo alang sa mga sala sa sacerdote ug alang sa mga sala sa mga katawhan. Dayon ang labawng sacerdote simbolikanhong mibalhin sa mga sala sa katawhan ngadto sa laing lalaki nga kanding (gitawag nga pinasanginlan), diin abugon dayon kini ngadto sa kamingawan, nagtimaan sa pagkatangtang sa mga sala sa katawhan. Misakripisyo usab siya og duha ka karnerong toro isip mga halad nga sinunog alang sa iyang kaugalingon ug sa mga katawhan. (Tan-awa sa Bible Dictionary, “ Fasts ”; tan-awa usab sa Levitico 16:22 .)
![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F4f%2F95%2F4f953892ffb976ee85d8985f522c3a72fe1f80b7%2F4f953892ffb976ee85d8985f522c3a72fe1f80b7.jpg/full/!250,/0/default)
Dugang nga mga Kalihokan sa Pagkat-on
Ang Melchizedek nga Pagkapari
Kon ang mga estudyante makabenepisyo gikan sa pagpokus sa Melchizedek nga Pagkapari, mahimong gamiton ang bahin nga “Ang Melchizedek nga Pagkapari nagpunting kanako ngadto kang Jesukristo” gikan sa Dali, Sunod Kanako nga outline “Nobyembre 6–12. Mga Hebreohanon 7–13: ‘Ang Labawng Sacerdote sa mga Maayong Butang nga Nanagpangabot,’” (Dali, Sunod Kanako—Alang sa mga Indibidwal ug mga Pamilya: Bag-ong Tugon 2023). Dapita ang mga estudyante sa pag-ila og mga paagi nga ang mga ordinansa sa Melchizedek nga Pagkapari mahimong makatabang kanila nga mas mapaduol ug mahimong mas susama ni Jesukristo.
Karaan ug bag-ong mga ordinansa
Kon ang mga estudyante makabenepisyo gikan sa pagpokus kon giunsa sa mga ordinansa sa pagkapari pagpunting ngadto kang Jesukristo, mahimong gamiton ang bahin nga “Karaan ug bag-ong mga ordinansa nagpunting kang Jesukristo” gikan sa Dali, Sunod Kanako nga outline “Nobyembre 6–12. Mga Hebreohanon 7–13: ‘Ang Labawng Sacerdote sa mga Maayong Butang nga Nanagpangabot,’” (Dali, Sunod Kanako—Alang sa mga Indibidwal ug mga Pamilya: Bag-ong Tugon 2023). Dapita ang mga estudyante sa paghisgot giunsa sa lainlaing mga ordinansa pagpamatuod kang Jesukristo. Pananglitan, mahimo nilang hisgotan giunsa sa bunyag pagsimbolo sa kamatayon, paglubong, ug pagkabanhaw ni Kristo (tan-awa ang Mga Taga-Roma 6:1–6).
Mga Hebreohanon 10:32–39. “Busa ayaw wad-a ang inyong pagsalig”
Kon ang mga estudyante makabenipisyo gikan sa pagpokus kon giunsa sa ilang mga espirituhanong mga kasinatian ug mga kamatuoran nga ila nang nahibaloan pagtabang kanila nga mabuntog ang mga hagit, mahimong dapiton sila sa pagtuon sa Mga Hebreohanon 10:32–39 ug sa artikulo ni Elder Jeffrey R. Holland sa Korum sa Napulog Duha ka Apostoles nga giulohan og “Busa Ayaw Wagtanga Ang Inyong Pagsalig” (Ensign, Marso 2000, 6–11; Liahona, Hunyo 2000, 34–42). Dapita ang mga estudyante sa pagpaambit og mga panabot nga ilang nakita sa tudling sa kasulatan ug sa artikulo. Dayon dapita sila nga “hinumdoman” ang mga panahon nga diin sila “nalamdagan” ( Mga Hebreohanon 10:32) ug pagsulat mahitungod niini diha sa ilang journal sa pagtuon. Dasiga sila sa pagkuha og kalig-on gikan niining mga kasinatian kon sila mahiatubang sa mga hagit.