Pagrebyo sa Doktrinal nga Kahanas 22
Sag-uloha ang mga Pakisayran ug Mahinungdanong Hugpong sa mga Pulong sa Kasulatan
Nakahunahuna na ba ka nganong importante man kaayo nga sag-ulohon ang mga kasulatan? Ang pagsag-ulo sa mga kasulatan mahimong makatabang kanimo nga makadawat og inspirasyon, mahinumdom sa Manluluwas, ug makatudlo sa ebanghelyo ngadto sa uban. Kini nga leksiyon gituyo nga makatabang nimo sa pagmemorya sa pipila ka pakisayran sa kasulatan ug sa mahinungdanong hugpong sa mga pulong sa kasulatan sa mga tudling sa doktrinal nga kahanas diha sa Bag-ong Tugon.
Pagpalambo sa usa ka luwas nga palibot sa pagkat-on sa pagdawat ug pagtahod. Kon mahibalo ang mga estudyante nga sila gihigugma ug gidawat sa ilang magtutudlo ug sa ilang mga klasmeyt, mas lagmit nga sila motambong sa klase nga andam nga magkat-on ug motampo ngadto sa kasinatian sa pagkat-on. Pangita og mga paagi aron matabangan ang mga estudyante nga mobati nga gimahal ug nga tabangan sila nga tukmang mopahayag og gugma sa kada usa.
Pagpangandam sa estudyante: Dapita ang mga estudyante sa pakig-istorya kauban sa usa ka miyembro sa pamilya o higala mahitungod sa unsang paagi nga ang pagsag-ulo sa mga kasulatan nakapadasig niana nga miyembro sa pamilya o higala o nagtabang kanila aron mapaduol sa Manluluwas.
Posible nga mga Kalihokan sa Pagkat-on
Nganong sag-ulohon man ang mga kasulatan?
Ang tudling sa doktrinal nga kahanas nga leksiyon kinahanglang matudlo isip puli niini nga leksiyon sa pagrebyo. Tan-awa ang eskedyul sa pagtudlo nga gihatag sa direktor sa lugar o rehiyon o koordinitor aron maseguro nga matudlo ang kada leksiyon sa tudling sa doktrinal nga kahanas samtang anaa sa sesyon ang seminary.
Handurawa nga ikaw misalmot sa usa ka panuhid alang sa Alang sa Kalig-on sa Kabatan-onan nga magasin. Unsaon nimo pagtubag kon pangutan-on ka sa mosunod nga pangutana?
-
Unsa ang nag-unang lima ka mga hinungdan sa pagsag-ulo sa mga kasulatan?
Ang mga estudyante mahimong maghunahuna mahitungod sa unsa ang ilang nakat-onan panahon sa pagpangandam sa estudyante nga kalihokan diha sa ilang pagtubag sa pangutana.
Adunay daghang maayong mga hinungdan sa pagsag-ulo sa mga kasulatan. Ang nasag-ulo nga mga kasulatan mahimong susama sa mga higala kinsa makahatag kanato og inspirasyon, kahupay, ug kadasig sa mga panahon sa panginahanglan (tan-awa ang Richard G. Scott, “Ang Gahom sa Kasulatan,” Liahona, Nob. 2011, 6). Ang pagsag-ulo sa mga kasulatan mahimong makatabang kanato sa “Paghunahuna sa [Manluluwas] sa matag hunahuna” ( Doktrina ug mga Pakigsaad 6:36). Ang pagsag-ulo sa mga kasulatan mahimong makatabang kanato sa “pagbaton sa pulong [sa Dios]” aron kita makatudlo sa uban ( Doktrina ug mga Pakigsaad 11:21).
-
Sa unsang paagi nga ang pagsag-ulo sa mga kasulatan makaapekto sa imong relasyon kang Jesukristo?
Sag-uloha ang mga tudling
Paggahin og pipila ka minuto sa pagsag-ulo o paghinumdom sa mga pakisayran sa kasulatan ug mahinungdanong mga hugpong sa mga pulong sa kasulatan sa mosunod nga mga tudling sa doktrinal nga kahanas sa Bag-ong Tugon. Dihang ikaw mobati og kamasaligon nga ikaw nahibalo niining mga pakisayran ug mahinungdanong mga hugpong, pagpili og usa o daghan sa mosunod nga mga kalihokan aron masusi ang imong memorya.
Ipakita ang mosunod nga tsart, o ihatag kini ngadto sa mga estudyante isip usa ka handout.
Doktrinal nga Kahanas sa Bag-ong Tugon: 1 Mga Taga-Corinto–Gipadayag
|
“Ang inyong lawas templo sa Espiritu Santo.” | |
|
“Diha sa Ginoo ang babaye dili gawas sa lalaki ni ang lalaki gawas sa babaye” | |
|
“Kay ingon nga nangamatay ang tanang mga tawo tungod sa ilang pagkahiusa kang Adan, banhawon usab ang tanan tungod sa ilang pagkahiusa kang Kristo.” | |
|
Diha sa Pagkabanhaw, adunay tulo ka ang-ang sa himaya. | |
|
“Usa ka laraw nga pagatumanon inig-abot sa tukma nga panahon, laraw sa paghiusa diha kang Kristo sa tanang mga butang.” | |
|
Ang Simbahan “tinukod ibabaw sa patukoranan nga mao ang mga apostoles ug mga propeta, nga niini si Jesukristo mao ang ulohang bato sa pamag-ang.” | |
|
“Ang adlaw ni Kristo … dili pa moabot, hangtod nga mahitabo una ang pagsupil.” | |
|
“Ang balaan nga kasulatan … makagagahom sa pagtudlo kanimo ngadto sa kaluwasan.” | |
|
Ang Langitnong Amahan mao “ang Amahan sa mga espiritu.” | |
|
“Kon aduna man kaninyoy nakulangan og kaalam, papangayoa siya sa Dios.” | |
|
“Ang [hugot nga pagtuo] patay kon kini walay binuhatan.” | |
|
“Ang maayong balita [gi]wali hangtod ngadto sa mga patay.” | |
|
“Ug ang mga patay gipanaghukman … pinasikad sa ilang mga binuhatan.” |
Opsiyon 1: Pagdrowing og usa ka hulagway
Pagdapit og usa ka estudyante nga mopili og usa ka tudling sa kasulatan sa doktrinal nga kahanas nga dili mosulti sa ubang mga estudyante kon unsa ang maong tudling. Ang estudyante dayon mosulat og mga timailhan (nga dili mogamit og mga numero o mga letra) hangtod nga ang lain nga estudyante makaila sa eksakto nga pakisayran sa kasulatan ug mahinungdanong hugpong sa kasulatan. Ang mga estudyante mahimong mobuhat nga manag paresan, sa gagmay nga mga grupo, o isip usa ka klase. Human sa pagbansay, ang mga estudyante maghisgot sa mosunod nga pangutana isip usa ka klase o diha sa gagmay nga mga grupo.
-
Sa unsang paagi sa imong hunahuna nga ang usa ka nasag-ulo nga kasulatan mahimong susama sa usa ka higala kinsa makahatag kanimo og inspirasyon, kahupay, ug kadasig sa mga panahon sa panginahanglan?
Opsiyon 2: Isulat kini
Ikonsiderar ang pagbahin sa mga estudyante ngadto sa gagmayng mga grupo. Hatagi ang matag grupo og usa ka pirasong papel. Dapita ang mga miyembro sa grupo sa pagpili og usa ka tudling sa doktrinal nga kahanas. Mahimo silang magpuli-puli sa pagsulat og usa ka pulong sa matag higayon sa pakisayran sa tudling sa kasulatan ug mahinungdanong hugpong sa mga pulong sa kasulatan. Human ang usa ka miyembro sa grupo makasulat og usa ka pulong, ilaha dayon ipasa ang papel ngadto sa sunod nga miyembro sa grupo, kinsa mosulat sa sunod nga pulong, hangtod nga ang grupo insaktong makasulat sa kinatibuk-ang pakisayran ug mahinungdanong hugpong sa mga pulong. Ang mga grupo mahimong mosubli niini nga kalihokan ug orasan ang ilang kaugalingon aron makita unsa kadako ang ilang paglambo. Human sa pagbansay, ang mga estudyante maghisgot sa mosunod nga pangutana isip usa ka klase o diha sa gagmay nga mga grupo.
-
Sa unsang paagi sa imong hunahuna nga ang pagsag-ulo sa mga kasulatan mahimong makatabang kanimo nga “maghunahuna ngadto sa [Manluluwas] sa matag hunahuna”? ( Doktrina ug mga Pakigsaad 6:36).
Opsiyon 3: Nganli ang pakisayran sa kasulatan
Ipares-pares ang mga estudyante o bahina sa gagmay nga mga grupo. Pagdapit og usa ka estudyante sa pagpaambit kon pila ka mga pulong gikan sa usa ka mahinungdanong hugpong sa pulong sa kasulatan ang sa hunahuna niya nga iyang kinahanglanon aron makatag-an sa pakisayran sa kasulatan. Lain nga estudyante ang mopili og usa ka mahinungdanong hugpong sa mga pulong sa kasulatan ug basahon sa makusog ang gidaghanon nga mga pulong gikan sa mahinungdanong hugpong sa kasulatan. Ang unang estudyante dayon mosulay pag-ila sa pakisayran sa kasulatan. Ang mga estudyante mahimong mosubli niini nga pagbansay sa makadaghang higayon kutob sa ilang gusto ug ilisan ang gidaghanon sa mga pulong nga basahon gikan sa mahinungdanong hugpong sa pulong sa kasulatan. Human sa pagbansay, ang mga estudyante maghisgot sa mosunod nga pangutana isip usa ka klase o diha sa gagmay nga mga grupo.
-
Sa unsang paagi sa imong hunahuna nga ang pagsag-ulo sa mga kasulatan mahimong makatabang kanimo nga maandam sa pagpaambit sa ebanghelyo ngadto sa uban?
Pamalandungi ang imong kasinatian
-
Unsa nga mga pagbansay ang imong gigamit aron matabangan ka pagsag-ulo sa mga pakisayran sa kasulatan ug sa mahinungdanong mga hugpong sa mga pulong sa kasulatan?
-
Kumusta ka sa imong pagsag-ulo sa mga pakisayran ug sa mahinungdanong mga hugpong sa mga pulong sa kasulatan alang sa mga tudling sa doktrinal nga kahanas sa Bag-ong Tugon? Unsa ang imong plano sa pagsag-ulo nianang kasamtangang imong gipaningkamotan?
-
Sa unsang paagi sa imong hunahuna nga ang pagsag-ulo sa mga kasulatan makapanalangin sa imong kinabuhi?