Doktrinal nga Kahanas: 2 Timoteo 3:15–17

“Ang Balaan nga Kasulatan … Makagagahom sa Pagtudlo Kanimo ngadto sa Kaluwasan”

Ang regular nga pagtuon sa kasulatan makapanalangin sa imong kinabuhi sa daghang mga paagi, lakip na ang pagtabang kanimo nga malawig ang daghang mga hagit sa kataposang mga adlaw. Kini nga leksiyon makatabang nimo sa pagmemorya sa pakisayran sa doktrinal nga kahanas ug sa mahinungdanon nga hugpong sa pulong sa kasulatan alang sa 2 Timoteo 3:15–17 , pagpasabot sa doktrina, ug paggamit sa mga baroganan sa pag-angkon og espirituhanong kahibalo sa tinuod nga sitwasyon sa kinabuhi.

Pagdrama-drama. Ang pagdrama-drama makatabang sa mga estudyante nga makakuha og bililhong kasinatian sa pagpasabot sa mga kamatuoran sa ebanghelyo ug mas makasabot kon unsaon nila paglihok diha sa tinuod nga mga sitwasyon sa kinabuhi.

Pagpangandam sa estudyante: Dapita ang mga estudyante nga maghunahuna mahitungod sa bisan unsang mga hagit nga nakabalda kanila gikan sa pagtuon sa mga kasulatan adlaw-adlaw. Dasiga sila nga maghunahuna og mga paagi nga ang mga baroganan sa pag-angkon og espirituhanong kahibalo mahimong makatabang kanila aron mabuntog ang ilang mga babag.

Posible nga mga Kalihokan sa Pagkat-on

Gidisenyo kini nga tudling sa doktrinal nga kahanas nga leksiyon aron itudlo human sa leksiyon sa “2 Timoteo 3,” nga mao ang pangkontekstong leksiyon alang sa tudling sa doktrinal nga kahanas sa 2 Timoteo 3:15-17. Kon gikinahanglang ibalhin kini nga leksiyon sa tudling sa doktrinal nga kahanas ngadto sa laing semana, seguroha nga itudlo usab ang tukma nga pangkonteksto nga leksiyon nianang semanaha.

Imemorya ug ipasabot

Pagdrowing og usa ka hulagway sa abli nga basahon sa mga kasulatan nga mipuno sa halos tibuok o tanan piraso sa papel. Sa ibabaw sa imong drowing, isulat ang 2 Timoteo 3:15–17. Sa sulod sa imong drowing, isulat ang mahinungdanong hugpong sa pulong sa kasulatan nga Ang balaan nga kasulatan … makagagahom sa pagtudlo kanimo ngadto sa kaluwasan. Tabuni ang hugpong sa pulong og usa ka butang ug sulayan kini pagsulat og usab gikan sa panumdoman. Susiha ang pagkatukma ug balika ang pagbansay sa makadaghang higayon hangtod imong mapun-an ang imong drowing.

Human makadrowing ang mga estudyante sa ilang mga hulagway, ikonsiderar ang pagbahin sa mga estudyante nga magka pares ug dapita sila nga magpuli-puli sa pagsulat sa mahinungdanong hugpong sa pulong sa kasulatan.

Sa milabay nga leksiyon imong nakat-onan nga samtang nagtuon kita sa mga kasulatan, makakuha kita og kaalam nga magdala kanato ngadto sa kaluwasan pinaagi sa hugot nga pagtuo kang Jesukristo. Basaha ang 2 Timoteo 3:15–17 pag-usab, nga mangita sa mga ebidensiya niini nga baroganan, ingon man usab ang uban pang mga panalangin nga atong madawat gikan sa pagtuon sa kasulatan.

Mahimong bahinon ang mga estudyante ngadto sa ginagmay nga mga grupo aron ilang madrama-drama ang mosunod nga senaryo. Sulayi pagsuroy sa palibot sa room aron madungog giunsa sa “mga misyonaryo” pagtudlo ang “investigator.” Mahimong ipangutana sa mga estudyante inig ka human kon unsay gibati nila nga sayon o lisod mahitungod sa kasinatian.

Handurawa nga ikaw usa ka misyonaryo nga nagtudlo og usa ka batan-ong babaye nga ginganlan og Suravi. Si Suravi madinawaton nga naminaw sa mensahe sa Pagpahiuli apan maduhaduhaon sa pagbasa sa mga tudling sa kasulatan nga gisugyot nimo ug sa imong kauban. Panahon sa pagbisita, imong gipangutana si Suravi unsa ang nakapugong kaniya sa pagbasa sa mga kasulatan. Siya mitubag nga dili siya malingaw sa pagbasa sa mga kasulatan ug mibati og kalaay niini.

Gamit ang 2 Timoteo 3:15–17 , pagsulat og tubag nga magpasabot sa mga panalangin ug mga benepisyo sa pagtuon sa kasulatan sa paagi nga lagmit makapadasig kang Suravi. Kon mahimo, ikonsiderar ang pagdugang og personal nga mga kasinatian ug pagpamatuod isip bahin sa imong tubag.

Bansaya ang paggamit

• Kon kinahanglan nimong i-summarize ang tulo ka mga baroganan sa pag-angkon og espirituhanong kahibalo sa usa ka pamahayag matag usa, unsay imong ikasulti?

Kon gikinahanglan, paggahin og pipila ka minuto sa pagrebyo sa mga parapo 5–12 diha sa “Pag-angkon og Espirituhanong Kahibalo” nga bahin sa Kinauyokang Dokumento sa Doktrinal nga Kahanas (2022).

Ikonsiderar ang pagdapit og usa ka estudyante sa pagpili sa random nga pamaagi ug basahon sa makusog ang gipinamubo nga mga pamahayag gikan sa bisan unsa sa tulo ka mga baroganan sa pag-angkon og espirituhanong kahibalo. Hangyoa ang klase sa pag-ila kon hain nga baroganan ang may kalabotan sa pamahayag. Balik-balika kini nga kalihokan sa pipila ka higayon. 

Bisan tuod kon kita nahibalo ug nakasabot sa mga panalangin sa pagtuon sa kasulatan, kini usahay mahimong lisod buhaton sa makanunayon ug epektibong paagi.

• Unsa ang pipila ka mga hagit nga nakapalisod sa pagtuon sa kasulatan sa makanunayon ug epektibong paagi?

Ikonsiderar ang pagsulat sa mga tubag sa mga estudyante diha sa pisara.

Panahon sa mosunod nga kalihokan, mahimong mag-ampo sa hilom alang sa imong mga estudyante nga sila mahimong bukas sa mga pangaghat sa Espiritu aron makahimo sa paggamit sa mga baroganan sa pag-angkon sa espirituhanong kahibalo alang sa ilang kaugalingon.

Tinguhaa ang giya sa Espiritu Santo sa pagtabang kanimo nga maila ang usa o duha sa mga babag nga nagpugong kanimo sa pagtuon sa mga kasulatan sa makanunayon ug epektibo nga paagi. (Kon wala ka mag-atubang og mga babag, paghunahuna og mga babag nga lagmit giatubang sa usa ka higala o miyembro sa pamilya.)

Pagsulat og labing menos sa tulo ka mga paagi nga lagmit nimong magamit ang mga baroganan sa pag-angkon og espirituhanong kahibalo aron matabangan ka nga mabuntog kini nga mga babag. Ang mosunod nga mga pangutana ug mga ideya mahimong makatabang.

Ikonsiderar ang pagsulat sa mosunod nga tulo ka mga pangutana ngadto sa pisara.

Mahimo usab nimong dapiton ang mga estudyante sa paghunahuna kon unsa ang mamahimong epekto sa kasubsob ug pagkasinsero sa pagtuon sa kasulatan ngadto sa ilang mahangtorong pag-uswag. Mahimo nilang ikonsiderar ang bisan unsang positibo nga mga kasinatian nga aduna silang daan ug unsang mahangtorong mga kamatuoran ang ilang nakat-onan gikan niadtong mga kasinatian.

• Unsaon nimo pagsusi ang mga babag sa imong pagtuon sa kasulatan uban sa mahangtoron nga panglantaw?

• Sa unsang paagi nga ang mga kamatuoran sa 2 Timoteo 3:15–17 nagtabang nimo nga makabaton og mahangtorong panglantaw kon ikaw naglisod sa pagtuon sa kasulatan?

• Sa unsang paagi ka nangita og dugang pagsabot pinaagi sa mga balaanong gitudlo nga mga tinubdan?

Ang mosunod mao ang pipila ka mga ideya:

1. Pangita og mga tudling mahitungod sa pagtuon sa kasulatan diha sa Giya ngadto sa mga Kasulatan, nga anaa sa ChurchofJesusChrist.org, pangitaa ang mga panalangin ug mga panaad nga mahimong makatabang sa imong babag. Ang mga kasulatan sama sa Josue 1:8 ; 2 Nephi 32:3 ; ug Doktrina ug mga Pakigsaad 1:37 mahimong mapuslanon.

2. Pangutana og usa ka tawo nga imong gisaligan kon nganong ilang gitun-an ang mga kasulatan adlaw-adlaw ug sa unsa nga paagi sila morekomendar kanimo aron imong mabuntog ang imong babag.

3. Pangita og mga pamahayag sa Kinatibuk-ang mga Awtoridad [General Authorities] o mga artikulo sa magasin sa Simbahan nga mahimong makatabang. Pananglitan, ang mosunod nga pamahayag mahimong makatabang sa usa ka tawo nga naglisod og pangita og panahon alang sa pagtuon sa kasulatan.

Si Elder Richard G. Scott (1928–2015) sa Korum sa Napulog Duha ka Apostoles mitudlo:

Ang pagbusog sa pulong sa Dios matag adlaw mas importante kay sa katulog, eskwelahan, trabaho, salida sa telebisyon, mga video game, o social media. Tingali kinahanglan ninyong i-organisar og usab ang inyong mga prayoridad aron makagahin og panahon sa pagtuon sa pulong sa Dios. Kon mao, buhata kini!

(Richard G. Scott, “Himoa ang Paggamit sa Pagtuo nga Inyong Unang Prayoridad,” Liahona Nob. 2014, 93)

Paggahin og pipila ka minuto aron sa pagsugod sa usa sa imong mga ideya.

• Sa unsang paagi ka makalihok sa hugot nga pagtuo aron mabuntog ang mga babag sa epektibong pagtuon sa kasulatan adlaw-adlaw? Paglista og daghang mga ideya sa imong journal sa pagtuon.

Human sa igo nga panahon, dapita ang pipila ka mga estudyante sa pagpaambit og nagpatigbabaw nila nga kasinatian panahon niini nga leksiyon. Pahinumdomi sila nga kadaghanan, kon dili man gani tanan, kanato nag-atubang og mga babag sa epektibong pagtuon sa kasulatan adlaw-adlaw, ug ang pagpaambit sa ilang mga hunahuna, mga panglantaw, ug mga kasinatian mahimong makatabang sa uban diha sa klase. Pagpaambit og personal nga mga hunahuna ug ingon man usab ang pagpamatuod.

Pagrebyo sa doktrinal nga kahanas 

Atol sa umaabot nga leksiyon, paggahin og pipila ka minuto sa pagrebyo sa pakisayran sa kasulatan ug sa mahinungdanong hugpong sa pulong sa kasulatan alang niining tudling sa doktrinal nga kahanas gamit ang parehas nga pagmemorya nga kalihokan gikan sa nahiuna niining leksiyon.

Dugang nga mga Kalihokan sa Pagkat-on

Balaanong gipili nga mga tinubdan

Samtang ang mga estudyante naghunahuna kon unsaon pagpangita og tabang pinaagi sa balaanong gitudlo nga mga tinubdan, ikonsiderar ang pagdapit og usa ka estudyante sa pagsiksik diha sa internet aron makita kon pila kabuok libro sa “tabang sa kaugalingon” ang magamit sa kasamtangan. Lagmit makakita sila og napulo ka libo nga mga kapilian. Ikonsiderar ang pagpangutana og sama sa mosunod:

• Sa inyong hunahuna ngano man nga adunay daghan kaayong mga libro sa tabang sa kaugalingon sa kalibotan?

• Sa unsa nga paagi nga ang mga kasulatan mahimong gamhanang tinubdan sa tabang ug giya alang sa atong mga kinabuhi?

Dapita ang mga estudyante nga mag-cross-reference sa 2 Timoteo 3:15–17 ngadto sa Doktrina ug mga Pakigsaad 88:118 , ug pangutan-a ang mga estudyante unsa sa ilang hunahuna ang buot gipasabot sa Ginoo sa “labing maayo nga mga basahon.” Mahimong pahinumdoman ang mga estudyante nga adunay daghang mga bililhong mga kapanguhaan sa kalibotan aron motabang kanato nga mapalambo ang kaalam ug mabuntog ang mga hagit. Dapita ang mga estudyante sa pagrebyo sa mga parapo 5–12 diha sa “Pag-angkon og Espirituhanon nga Kahibalo” nga bahin sa Mahinungdanon nga Dokumento sa Doktrinal nga Kahanas ug ilhon ang mga pulong o mga hugpong sa mga pulong nga nagtumong sa balaang kasulatan isip usa ka mahinungdanong tinubdan sa kaalam ug kahibalo sa ilang mga kinabuhi.

Usa ka ehemplo sa paglihok uban sa hugot nga pagtuo

Mahimong pangutan-on ang mga estudyante kon unsa ang mahimo nilang buhaton sa paglihok nga may hugot nga pagtuo kon sila naglisod sa pagsabot sa mga kasulatan. Human ang mga estudyante mopakigbahin sa ilang mga hunahuna, mahimong magdugang og pipila o tanan sa mosunod nga mga pananglit.

• Pag-ampo alang sa pagsabot sa dili pa magtuon.

• Basaha ang ulohan sa mga kapitulo [chapter heading] aron makakuha og kinatibuk-ang pagsabot.

• Pagbansay sa pagtinguha sa pagsabot sa kasulatan diha sa simbahan ug diha sa seminary pinaagi sa pagpangutana sa mga magtutudlo og mga pangutana.

• Pagbasa panagsa uban sa tawo nga imong gisaligan, sama sa usa ka ginikanan, kinsa mahimong makatabang pagpasabot sa mga kasulatan diha kanimo.

• Gamita ang mga manwal nga anaa sa Gospel Library nga app o diha sa ChurchofJesusChrist.org, sama sa Manwal sa Estudyante sa Seminary.