2 Tимот 4

“Би итгэлээ сахисан”

Есүс Христийн сайн мэдээний дагуу амьдрах нь биднийг олон арга замаар адисалдаг. Хэдийгээр бид сорилт бэрхшээл, дарамт хавчлагатай тулгарах ч Есүс Христэд итгэснээр эцэстээ зоригтой хэвээр үлдэж чадна. Аврагчийг хэдэн арван жил дагахыг эрэлхийлснийхээ дараа Паул тун удахгүй амиа алдана гэдгээ мэдэж байв. Тимотод бичсэн сүүлийн захиандаа, тэр үнэнч хэвээр үлдсэндээ өөрөө төдийгүй итгэлдээ үнэнч байхыг сонгосон бүх хүн яагаад харамсахгүй тухай илэрхийлжээ. Энэ хичээл нь насан туршдаа Есүс Христийн шавь болох эсвэл шавь хэвээр үлдэх амлалт өгөхөд танд туслах зорилготой.

“Олж мэдэх” урилгуудыг тодорхойлоход суралцагчдад туслах. Хичээлийн эхэн хавьд ихэвчлэн суралцагчдыг судрын агуулгаас сургаал, үнэн эсвэл зарчмуудыг олж мэдэхэд урьсан урилга байдаг. Суралцагчдыг юуг олж мэдээсэй гэж хүсэж байгаагаа харуулах нь тустай байж болох юм. Ингэх нь суралцагчдад судрын багцыг судалж байхдаа олж мэдэх урилгыг мартахгүй байхад тусалж болно.

Суралцагчийн бэлтгэл: Суралцагчдыг Есүс Христийг дагахаар чармайхдаа урам хугарч байгаа хэн нэгэнтэй хуваалцах судрын хэсгийг олоход урь.

Боломжит суралцах үйл ажиллагаа

Итгэлтэйгээр тэвчих

Дараах үйл ажиллагааны үеэр, хүнд өвдсөн юм уу найз эсвэл гэр бүлийн гишүүн нь саяхан нас барсан суралцагчдад болгоомжтой ханд.

Удахгүй нас барах гэж байгаагаа мэдэх танд ямар байхыг төсөөл.

Судлах тэмдэглэлдээ дараах асуултуудад өгөх хариултаа бичихэд суралцагчдыг урих талаар бодож үз. Дараа нь цөөн суралцагчийг сүүлийн асуултад өгөх хариултаа ангийнхантайгаа хуваалцахад урих талаар бодож үз.

• Тэр өдөр ирэхэд та амьдралынхаа талаар юу гэж хэлнэ гэж найдаж байна вэ?

• Тэр үед танд юу чухал байх вэ? Юу нь чухал биш байх бол?

• Амьдралынхаа туршид Аврагчийг дагахын тулд гаргасан хүчин чармайлт тань яг тэр үед танд хэрхэн нөлөөлнө гэж та бодож байна вэ?

Есүс Христийн шавийн хувьд хэдэн арван жилийн турш зоригтой үйлчилсний эцэст Паул удахгүй амиа алдана гэдгээ мэдэж байсан ба Ромын шоронгоос Тимотод захидал бичжээ. Энэ бол Шинэ Гэрээнд багтсан, Паулын бичсэн хамгийн сүүлийн захидал юм. Туулсан амьдралаа эргэн харж, ирж буй үхлийнхээ талаар эргэцүүлэн бодох сүүлчийн мөчид энэ агуу хүнд төрсөн зарим бодол санааг унших боломжоор бид адислагдсан.

Паул үнэнч хэвээр үлдэхийн тулд гаргасан хүчин чармайлтаа хоёр үйлдэлтэй харьцуулжээ. 2 Тимот 4:6–7 -г уншаад, Паулын харьцуулалтыг хайж ол.

Суралцагчдыг дараах асуултыг ярилцаж байх үеэр энэ хоёр зургийг үзүүлэх тухай бодож үз.

• Яагаад сайн тэмцлээр тэмцэх болон замаа дуусгахыг амьдралынхаа туршид Есүс Христэд итгэх итгэлээ хэвээр авч үлдэхтэй харьцуулах нь үр дүнтэй байж болох вэ?

Та амьдралынхаа энэ цаг мөчид хэрхэн замаа дуусгахаа буюу Христэд үнэнч хэвээр үлдэхээр тэмцэлдэж байгаагаа нэг минут тунгаан бод. Танд хэзээ нэгэн цагт ядарч, туйлдаж, гэмтэж шархадсан мэт мэдрэмж төрж байсан уу? Та бууж өгөхөөр уруу татагдаж байсан уу? Аврагч эдгээр нөхцөл байдалд танд хэрхэн тусалж байсан бэ? Өнөөдөр судалж байхдаа, замаа дуусгах юм уу шавийн хувьд үргэлжлүүлэн тэмцэх нь таны хувьд яагаад зөв болох талаар бод.

Үнэнч хүмүүст Аврагч юу санал болгодог вэ?

2 Тимот 4:8 -ыг уншаад, Аврагчийн Паулд болон итгэлтэй байж тэвчиж чадсан бүх хүнд бэлдсэн адислалуудыг олж мэд.

Энэхүү титэм нь мөн өргөмжлөл хэмээн нэрлэгддэг Тэнгэрлэг Эцэг, Есүс Христ хоёртой хамт байх боломжтой мөнх амийг бэлгэддэг.

• Паул яагаад Есүс Христийн бидэнд өгдөг энэхүү адислалыг “зөв байдлын титэм” хэмээн дүрсэлсэн гэж та бодож байна вэ?

Судрын энэ хэсгээс бид Есүс Христийн ачаар эцсээ хүртэл итгэлтэй байж тэвчиж чадсан бүх хүн мөнх амийг хүлээн авах болно гэх үнэнийг мэдэж авч болно.

• “Эцсээ хүртэл тэвчих” гэдэг хэллэг таны хувьд ямар утгатай вэ? Та одоо ямар арга замаар тэвчих хэрэгтэй вэ? Эцсээ хүртэл тэвчихийг юу хүнд хэцүү болгодог вэ?

• Ямар арга замаар Аврагч эцсээ хүртэл тэвчихийн үлгэр дуурайлыг үзүүлдэг вэ? ( Сургаал ба Гэрээ 19:16–19 -ийг үзнэ үү).

• Аврагчийн эцсээ хүртэл тэвчсэн явдал бидэнд хэрхэн нөлөөлдөг вэ?

Таны эцсээ хүртэл тэвчихийг сонгосон сонголт хэнд нөлөөлсөн байж болох талаар хэсэг хугацаанд бод.

Суралцагч бүрд жижиг цаас өгөхийг бод. Суралцагч тус бүрийг Есүс Христийг дагахыг хичээхээ болих уруу таталтад хэн нэгэн орж болох товч жишээг нэрээ нууцлан бичээд, хураалгахад урь. (Энэ нь бүр хайрладаг хүн нь Есүс Христийг дагахаа болихоор шийдсэн бодит шалтгаан байж болно.) Эдгээр цаасыг хичээлийн сүүлээр тарааж өгөх эсвэл хичээлийг өөрсдийн амьдралтай холбоход нь суралцагчдад туслах өөр өөр арга замаар ашиглаж, уншиж болно.

Бидний итгэл найдвар Есүс Христ дээр суурилдаг

Арван хоёр төлөөлөгчийн чуулгын ахлагч Л. Том Пэрри (1922–2015) эцсээ хүртэл тэвчих нь хүнд хэцүү тул бид ганцаараа амжилтад хүрэх боломжгүй болохыг тайлбарласан. Тэрээр ийн заасан.

Эцсээ хүртэл тэвчих нь ганцаараа хийдэг зүйл огтхон ч биш юм. Үүнд Аврагчийн гэтэлгэгч хүч шаардлагатай.

(L. Tom Perry, “The Gospel of Jesus Christ,” Ensign or Liahona, May 2008, 46)

Паулын адил өөр олон хүн Аврагчийн тусламжтайгаар эцсээ хүртэл тэвчсэн. Мормоны Номын дараах хэсгүүдээс дор хаяж хоёрыг нь унш. Аврагчтай харилцах харилцаа нь эдгээр бошиглогчийг итгэлтэйгээр тэвчиж, үхэлтэй нүүр тулах үед хэрхэн нөлөөлсөн болохыг олж мэд.

Мөн Есүс Христийг амьдралынхаа туршид дагахыг хичээсний эцэст үхэлтэй нүүр тулж буй хүнд мэдрэгдэж болох амар амгалангийн талаарх өөрийн гэр бүлийн хэн нэгний жишээг хуваалцахад урьж болно.

Лихай: 2 Нифай 1:14–15

Енос: Енос 1:27

Моронай: Моронай 10:32–34

• Эдгээр шавь Есүс Христтэй харилцах харилцаагаа хэрхэн дүрсэлсэн бэ?

• Тэрхүү харилцаа үхлийн талаарх бодол санаанд нь хэрхэн нөлөөлсөн бэ?

Та ямар зөвлөгөө өгөх вэ?

Есүс Христийг дагахыг хичээхээ болиход уруу татаж болох нөхцөл байдлыг бичээд хураалгасан цаасыг өөр өөр суралцагчид тарааж өгөх талаар бодож үз.

Дараах асуултуудыг үзүүлээд, хүлээн авсан нөхцөл байдалтай хамт тэдгээрийг дотроо тунгаан бодох цагийг суралцагчдад өг. Дараа нь тухайн нөхцөл байдалд байгаа хүнд, асуултад шууд хариулахгүй байсан ч юу гэж хэлэх байснаа сайн дураараа хуваалцахад суралцагчдыг урь. Суралцагчийн бэлтгэл үйл ажиллагааг хийж дуусгасан суралцагчдыг мөн олсон судраа хуваалцахад урь.

• Хангалттай тэвчих хүчгүй гэж санаа зовниж байгаа итгэлтэй хүнд та ямар зөвлөгөө өгөх байсан бэ?

• Аврагчийг дагахаа аль хэдийн больсон, дахин дагаж эхлэхэд хэт оройтсон гэж бодож байгаа хүнд та юу гэж хэлэх вэ? Аврагч бидэнд өөрчлөгдөж, дахин эхлэхэд тусална гэдгийг олж харахад тэдэнд туслахын тулд та Паулын амьдралын жишээг хэрхэн ашиглаж болох вэ?

• Тэд Аврагчаас тусламж хүлээн авахын тулд ямар алхмуудыг хийж болох вэ?

Танд ямар захиас өгч байна вэ?

2 Тимот 4 рүү эргэж очоод, 6–8 болон 18-р шүлгийг уншина уу. Өөрийгөө ирээдүй рүү очиж, амьдралынхаа эцсийн мөчид Паулын хэлсэн үгийг хэлж байна гэж төсөөл. Дараа нь дараах асуултуудад хариул.

• Тэнгэрлэг Эцэг танд ямар захиас өгсөн гэж та бодож байна вэ?

• Өнөөдөр таны олж мэдэж, мэдэрсэн зүйлс Есүс Христийг танд хэрэгтэй гэдгийг илүү сайн ойлгоход хэрхэн тусалсан бэ?

• Та юу хийхээр өдөөгдөж байна вэ?

Тайлбар ба нөхцөл байдлын талаарх мэдээлэл

Бид хэрхэн эцсээ хүртэл тэвчих вэ?

Арван хоёр төлөөлөгчийн чуулгын ахлагч Л. Том Пэрри (1922–2015) ийн тайлбарлажээ.

“Би сайн тэмцлээр тэмцсэн, замаа дуусгасан, итгэлээ сахисан” ( 2 Тимот 4:7) хэмээн Тимотод хэлсэн Паултай адил эцсээ хүртэл тэвчих нь эцсээ хүртэл итгэлтэй байхыг шаарддаг. Мэдээж ийн үйлдэх амаргүй. Тэнгэр дэх Эцэгтэйгээ хамт амьдарч, мөнхийн адислалуудыг хүлээн авахаар эргэж очихоор хийх бэлтгэл нь хүнд хэцүү, амаргүй төдийгүй цэвэршүүлэгч нөлөөтэй байх ёстой.

(L. Tom Perry, “The Gospel of Jesus Christ,” Ensign or Liahona, May 2008, 46)

   

//media.ldscdn.org/webvtt/scripture-and-lesson-support/doctrine-and-covenants-visual-resource/2010-07-019-endure-to-the-end-en.vtt

Үнэнч хэвээр үлдэхийн адислалыг олж харахад заримдаа хэцүү байвал яах вэ?

Арван хоёр төлөөлөгчийн чуулгын ахлагч Жэффри Р. Холланд ийн хэлсэн.

Бүү бууж өг. Алхсаар, оролдсоор бай. Тусламж, аз жаргал урд чинь байгаа. … Эцэстээ бүх зүйл сайн сайхан болно. Бурханд итгэн, сайн зүйлс ирнэ гэдэгт итгээрэй.

… Зарим адислал удалгүй, зарим нь оройтож ирдэг байхад зарим нь бүр тэнгэрт очих хүртэл ирдэггүй ч Есүс Христийн сайн мэдээг хүлээн авсан хүмүүсийн хувьд бол заавал ирнэ.

(Jeffrey R. Holland, “An High Priest of Good Things to Come,” Ensign, Nov. 1999, 38)

Нэмэлт суралцах үйл ажиллагаа

Филемон ном нь бидэнд Аврагчийн тухай заадаг

Энэ захидалд Паулын бичсэн нөхцөл байдлын тухай дараах мэдээллийг чанга уншихад нэг суралцагчийг урь.

Филемонд Онесим гэдэг зарц буюу боол байсан бөгөөд тэр Филемоноос нэг зүйл хулгайлан, Ром руу зугтан оджээ ( Филемон 1:18 -ыг үзнэ үү). Паулын амьдарч байсан цаг үеийн Иудео-Христийн шашны ёсонд боолчлолыг хилэнцэт зүйл гэж үздэггүй байсан бөгөөд Ромын хуулиар дэмждэг байв. Оргосон боолуудыг маш их зодож занчин, духан дээр нь тамгалах эсвэл бүр амь насыг нь хөнөөх зэргээр шийтгэдэг байв. Онесим зугтсаныхаа дараа төлөөлөгч Паултай таарч, Есүс Христийн сайн мэдээнд хөрвөгджээ. Паул Онесимыг Филемон руу буцаж очиход уриалсан байна.

Нэг суралцагчаас Филемон 1:8–12 -ыг чанга уншихыг хүс. Дагаж уншаад, Паул Филемоныг юу хий хэмээн гуйсан эсвэл хүссэн болохыг олж мэдэхийг ангийнхнаас хүс.

Дараа нь суралцагчдыг Филемон 1:15–19 -ийг уншаад, Паулын хэлсэн үгийг болон Онесимын өмнөөс хийнэ хэмээн амласан зүйлийг Аврагчийн бидний хүн нэг бүрийн төлөө хийнэ хэмээн амласан зүйлтэй харьцуулахад урь.

2 Tимот 4:8. Есүс Христ бидний өмнөх алдааг авч үзэлгүйгээр, ирээдүйд итгэх итгэл найдварыг бидэнд өгдөг

Паул хэзээ ч алдаа гаргаж байгаагүй тул мөнхийн шагналын баталгаа ( 2 Тимот 4:8 -ыг үзнэ үү) ирсэн гэсэн үг биш гэдгийг ойлгоход суралцагчдад тусал. Үнэндээ амьдралынхаа эхэн үед буюу Саул гэх нэртэй байхдаа тэрээр Аврагчийн Сүмийн эсрэг тэмцдэг байсан ( Үйлс 8:3 ; 9:1–2 -ыг үзнэ үү). Паул туулсан амьдралаа эргэн хараад, залуу байсан өөрийгөө нүгэлтнүүдийн “эхнийх” ( 1 Тимот 1:15 -ыг үзнэ үү) хэмээн дүрсэлжээ. Паул өмнөх нүгэл, сул талаасаа болж бууж өгөх уруу таталтад орж болох л байсан.

Суралцагчдыг 1 Тимот 1:12–17 -г уншаад, Паул өөрийн хүчээр аврагдахгүй, харин Есүс Христ түүнийг аварч чадна гэдэгт итгэж байсныг харуулсан ямар нэг зүйлийг шүлэг тус бүр дээр тэмдэглэхэд урь.

Суралцагчдаас эдгээр шүлгийн аль нь тэдний хувьд хамгийн утга учиртай болохыг мөн яагаад гэдгийг хуваалцахыг хүс.

Өмнөх нүгэл, одоогийн сул талаасаа болж бууж өгөх нь дээр гэж бодож байгаа хэн нэгэнд Паулын захиасыг хураангуйлан хэлж өгөхөд тэднийг урь.