Cornelius greets Peter outside of his home. Outtakes include Cornelius kneeling, Peter raising Cornelius from the ground, surrounding landscape, and others involved in the filming.
Nang magpakita si Jesus sa Kanyang mga disipulo matapos ang Kanyang Pagkabuhay na Mag-uli, iniutos Niya sa kanila na ipalaganap ang ebanghelyo sa buong mundo (tingnan sa Mateo 28:19–20). Ang ebanghelyo ay karaniwang ibinabahagi noon sa mga Judio, at patuloy na itinuon ni Pedro at ng iba pang mga disipulo ang kanilang gawaing-misyonero sa kanila. Si Cornelio, isang Gentil na nagmahal sa Diyos at humingi ng Kanyang patnubay, ay inutusan sa pamamagitan ng isang sugo ng langit na hanapin si Apostol Pedro. Kasabay nito, nagkaroon ng pangitain si Pedro na nakatulong sa kanya na mas maunawaan kung ano ang nadarama ng Ama sa Langit para sa lahat ng Kanyang anak. Ang lesson na ito ay makatutulong sa iyo na mas makita ang ibang tao sa paraan kung paano sila nakikita ng Ama sa Langit at ni Jesus.
Pagiging higit na katulad ni Cristo. Tulungan ang mga estudyante na makita ang kaugnayan ng pagsasabuhay ng ebanghelyo at pagiging higit na katulad ni Jesucristo. “Ang pagiging [katulad ni Jesucristo] ay isang proseso ng pagbabago sa pagkatao at likas na ugali ng estudyante. Dumarating ito sa pamamagitan ng nakatutubos at nagpapalakas na kapangyarihan ni Jesucristo” (Kim B. Clark, “Malalim na Pagkatuto at Kagalakan sa Panginoon” [mensaheng ibinigay sa Seminaries and Institutes of Religion annual training broadcast], Hunyo 13, 2017, broadcasts.ChurchofJesusChrist.org).
Paghahanda ng estudyante: Sabihin sa mga estudyante na bigyang-pansin kung paano nila tinitingnan at pinakikitunguhan ang mga tao sa paligid nila at kung bakit ganito ang ikinikilos nila. Sabihin sa kanila na maghandang magbahagi ng ilang pananaw nila mula sa kanilang mga obserbasyon.
Ano ang nakikita mo?
Larawan
Clouds in a sunny sky
Tingnan ang mga ulap (sa labas o sa larawang ito) at ilarawan ang nakikita mo.
Bakit maaaring iisang ulap ang tinitingnan ng dalawang tao ngunit magkaibang bagay ang nakikita nila?
Bakit maaaring tingnan ng dalawang tao ang ibang tao at magkaiba ang tingin nila sa taong iyon?
Ano ang nalalaman mo tungkol sa kung paano tinitingnan ng Ama sa Langit at ni Jesucristo ang bawat isa sa atin?
Sabihin sa mga estudyante na ibahagi ang kanilang mga obserbasyon at pananaw kung ginawa nila ang aktibidad sa paghahanda ng estudyante.
Habang nag-aaral ka, tandaan na kung paano mo tinitingnan ang mga tao ay maaaring iba sa kung paano sila tinitingnan ng Ama sa Langit at ni Jesucristo. Tulutan ang Espiritu Santo na gabayan ka sa maaaring kailangan mong gawin upang mas lubos na maiayon ang iyong mga pananaw sa pananaw ng Ama sa Langit at ni Jesucristo.
Tinuruan ni Pedro si Cornelio, isang Gentil
Hanggang sa panahong iyon sa Bagong Tipan, ang ebanghelyo ay ipinangaral, maliban sa ilang eksepsyon, sa mga Judio lamang, ayon sa utos ng Tagapagligtas (tingnan sa Mateo 10:5–6). May ilang miyembro ng Simbahan ni Cristo na mga Gentil (hindi mga Judio) nang ipinanganak, ngunit nagbalik-loob na sila sa Judaismo bago sumunod kay Cristo. Gayunpaman, sinabi ng Tagapagligtas sa Kanyang mga disipulo na matapos mapasakanila ang Espiritu Santo ay ipangangaral nila ang ebanghelyo “hanggang sa kadulu-duluhang bahagi ng lupa” ( Mga Gawa 1:8). Nabasa natin sa Mga Gawa10 ang tungkol sa malaking pagbabago sa pamamahala ng Simbahan na magpapabilis sa paggawa nito.
Basahin ang Mga Gawa 10:1–8 upang malaman ang tungkol kay Cornelio. Maghanap ng mga indikasyon kung paano siya tiningnan ng Ama sa Langit.
Ano ang natutuhan mo tungkol kay Cornelio mula sa mga talatang ito?
Ano ang nakita mo na nagsasaad ng nadama ng Ama sa Langit para kay Cornelio?
Habang naglalakbay ang mga tauhan ni Cornelio upang hanapin si Apostol Pedro, itinuro ng Panginoon kay Pedro kung paano Niya tinitingnan ang lahat ng tao.Basahin ang Mga Gawa 10:9–16 at idrowing kung ano sa palagay mo ang hitsura ng pangitain ni Pedro.
Maaaring magdrowing ang mga estudyante ng mga indibiduwal na larawan, o maaaring idrowing sa pisara ng isang estudyante ang pangitain. Huwag magtagal sa pagdrowing upang magkaroon ang mga estudyante ng sapat na oras para sa natitirang bahagi ng lesson.
Sabihin sa mga estudyante na ibahagi ang idinrowing nila. Maaari mong sabihin sa mga estudyante na ibahagi ang kanilang mga ideya tungkol sa maaaring kahulugan ng pangitain.
Bakit nag-alala si Pedro tungkol sa ipinagagawa sa kanya sa pangitain?
Si Pedro ay lumaking isang Judio, at sumusunod sa mga utos at mga tradisyon ng batas ni Moises. Ang batas na ito ay naglalaman ng mahihigpit na utos tungkol sa maaari at hindi maaaring kainin ng mga tao (tingnan sa Levitico11). Ang mga hayop na pinahintulutang kainin ng mga Judio ay tinatawag na “malinis,” samantalang ang mga hayop na ipinagbawal ng Diyos na kainin ng mga Judio ay tinatawag na “marumi.”
Noong una ay hindi naunawaan ni Pedro ang buong kahulugan ng pangitain. Habang pinagninilayan niya ito, dumating ang mga tauhang ipinadala ni Cornelio. Sinabi ng Espiritu kay Pedro na sumama sa mga lalaking ito sa tahanan ni Cornelio (tingnan sa Mga Gawa 10:17–20).
Basahin ang Mga Gawa 10:25–29, 34–35 , at hanapin ang nalaman ni Pedro tungkol sa kahulugan ng pangitaing natanggap niya.
Larawan
Clouds in a sunny sky
Hanapin sa talata34 ang katotohanang nalaman ni Pedro tungkol sa kung paano tinitingnan ng Ama sa Langit ang lahat ng Kanyang anak. Maaari mong markahan ang katotohanang nahanap mo.
Nalaman ni Pedro na walang kinikilingan ang Diyos. Kung makatutulong sa mga estudyante ang pagbabasa ng iba pang banal na kasulatan na nagbibigay-diin sa katotohanang ito, sama-samang basahin ang 2 Nephi 26:13, 28, 33 ; Doktrina at mga Tipan 1:34–35 .
Maaari mong ibahagi ang mga pahayag mula sa bahaging “Komentaryo at Pinagmulang Impormasyon” kung kinakailangan sa talakayang ito.
Isulat sa iyong study journal ang ibig sabihin para sa iyo ng “walang kinikilingan ang Diyos.”
Sa iyong palagay, paano binago ng paghahayag ng Ama sa Langit ang puso at pananaw ni Pedro? Paano mababago ng pag-unawa sa paghahayag na ito ang puso ng mga tao sa kasalukuyang panahon?
Sabihin sa mga nagboluntaryo na ibahagi ang isinulat nila.
Nang maunawaan ni Pedro na nais ng Diyos na ituro ang ebanghelyo sa lahat ng tao, ipinangaral niya ang mensahe ni Jesucristo kay Cornelio at sa kanyang pamilya at mga kaibigan (tingnan sa Mga Gawa 10:36–43).
Larawan
Clouds in a sunny sky
Sa iyong palagay, paano ipinapakita ng buhay at misyon ni Jesucristo ang pagmamahal ng Diyos sa lahat ng tao?
Paano nakakaimpluwensya ang pag-alaala sa kung paano pinahahalagahan ng Ama sa Langit at ni Jesucristo ang lahat ng tao sa kung paano mo tinitingnan at pinakikitunguhan ang iba?
Ano ang magagawa mo para makahingi ng tulong sa Ama sa Langit na makita ang iba tulad sa paraan kung paano Niya nakikita ang iba?
Habang nagpapatotoo si Pedro tungkol kay Jesucristo, naparoon ang Espiritu Santo kay Cornelio at sa kanyang sambahayan. Pagkatapos ay inanyayahan sila ni Pedro na magpabinyag (tingnan sa Mga Gawa 10:44–48). Binago ng paghahayag ng Diyos kay Pedro ang mga kaugalian sa Simbahan, at nagsimulang ipangaral ang ebanghelyo sa lahat ng tao.
Maaaring gawin ng mga estudyante ang sumusunod na aktibidad sa kanilang study journal. Maaari mo ring sabihin sa mga estudyante na ibahagi sa kanilang pamilya ang natutuhan nila mula sa lesson na ito.
Isipin kung paano maiiba ang mundo o ang iyong bansa, komunidad, paaralan, o pamilya kung tinitingnan ng lahat ng anak ng Ama sa Langit ang bawat isa sa paraan kung paano Niya tayo tinitingnan.
Pumili ng isa sa mga lugar na ito. Ipaliwanag kung anong mga pagkakaiba ang maaari mong makita kung tinitingnan ng mga tao sa lugar na ito ang iba sa paraan kung paano sila tinitingnan ng Ama sa Langit at ni Jesucristo.
Komentaryo at Pinagmulang Impormasyon
Sino ang tatanggapin ni Jesucristo sa Kanyang Simbahan at kaharian?
Ipinaliwanag ni Pangulong Russell M. Nelson:
Larawan
Official portrait of President Russell M. Nelson taken January 2018
Bawat isa sa atin ay may banal na potensiyal dahil bawat isa ay anak ng Diyos. Lahat ay pantay-pantay sa Kanyang paningin. Malawak ang implikasyon ng katotohanang ito. Mga kapatid, sana’y makinig kayong mabuti sa sasabihin ko. Pantay-pantay ang pagmamahal ng Diyos sa lahat ng lahi. Malinaw ang Kanyang doktrina ukol sa bagay na ito. Inaanyayahan Niya ang lahat na lumapit sa Kanya, “maitim at maputi, alipin at malaya, lalaki at babae.” [ 2Nephi 26:33 ].
Tinitiyak ko sa inyo na ang katayuan sa harap ng Diyos ay hindi batay sa kulay ng inyong balat. Ang pagsang-ayon o hindi pagsang-ayon ng Diyos ay batay sa inyong katapatan sa Kanya at sa Kanyang mga utos at hindi sa kulay ng inyong balat.
(Russell M. Nelson, “Hayaang Manaig ang Diyos,” Ensign o Liahona, Nob. 2020, 94)
Mga Gawa 10:45 . Ano ang ibig sabihin ng “kaloob ng Espiritu Santo”?
Sa Mga Gawa 10:45 , ang pariralang “ang kaloob ng Espiritu Santo” ay tumutukoy sa kapangyarihan ng Espiritu Santo, na bumaba sa mga Gentil na ito. Naiiba ito sa kaloob ng Espiritu Santo na natatanggap natin sa pamamagitan ng ordenansa ng kumpirmasyon pagkatapos ng binyag (tingnan sa Mga Gawa 8:14–17 ; tingnan din sa Mga Turo ng mga Pangulo ng Simbahan: Joseph Smith [2007], 113).
Paano binago ng pangitain ni Pedro ang kaugalian sa Simbahan?
Ipinaliwanag ni Elder D. Todd Christofferson ng Korum ng Labindalawang Apostol:
Larawan
Portrait of Elder D. Todd Christofferson. Photographed in March 2020.
Sa karanasang ito at paghahayag kay Pedro, binago ng Panginoon ang kaugalian sa Simbahan at higit na ipinaunawa ang doktrina sa Kanyang mga disipulo sa pamamagitan ng paghahayag. Kaya nga ang pangangaral ng ebanghelyo ay lumaganap sa buong sangkatauhan.
Ano ang mga pagkakatulad ng pangitain ni Pedro at ng paghahayag na ipagkaloob ang priesthood sa lahat ng karapat-dapat na lalaking miyembro ng Simbahan?
Ang mga sumusunod na resource ay maaaring makatulong kung nais mong mas maunawaan pa ang paghahayag noong 1978 kung saan ipinagkaloob ng Ama sa Langit ang ordenasyon sa priesthood sa lahat ng karapat-dapat na lalaking miyembro ng Simbahan:
Ang Tagapagligtas ay naglibot na gumagawa ng mabuti
Maaari mong sabihin sa mga estudyante na basahin ang Mga Gawa 10:38 at pag-isipan kung paanong ang Tagapagligtas ay “naglibot na gumagawa ng mabuti” sa paraan kung paano Niya tinitingnan at pinakikitunguhan ang iba. Pagkatapos ay maaaring sabihin sa mga estudyante na pag-isipan kung ano ang magagawa nila upang matularan ang Tagapagligtas sa paggawa ng mabuti.
Turuan ang iba tungkol sa Tagapagligtas
Nang turuan ni Pedro si Cornelio at ang mga kasama nito, una niyang binanggit ang tungkol kay Jesucristo at sa Kanyang Pagbabayad-sala at pagkatapos ay inanyayahan niya ang mga tinuturuan niya na isabuhay ang mga turong ito sa pamamagitan ng pagtanggap ng mga ordenansa (tingnan sa Mga Gawa 10:35–48). Tinularan ng iba pang mga misyonero ang ganitong paraan (tingnan sa Mosias 18:1–10 ; Alma 18:24–39). Maaaring sabihin sa mga estudyante na basahin ang mga turo ni Pedro kay Cornelio at ihanda ang sarili nilang outline tungkol sa maaari nilang ibahagi sa isang kaibigan na interesadong mas matuto pa tungkol sa ebanghelyo. Maaari din nilang isaalang-alang ang sumusunod na pahayag ni Pangulong Dallin H. Oaks ng Unang Panguluhan:
Larawan
Official Portrait of President Dallin H. Oaks taken March 2018.
Kapag kakausapin natin ang iba, kailangang alalahanin natin na ang paanyayang alamin pa ang tungkol kay Jesucristo at sa Kanyang ebanghelyo ay lalong mainam kaysa sa paanyayang alamin ang tungkol sa ating Simbahan. Gusto nating magbalik-loob ang mga tao sa ebanghelyo. Iyan ang mahalagang papel na ginagampanan ng Aklat ni Mormon. Mahihikayat sila na alamin ang tungkol sa ating Simbahan kasunod ng pagbabalik-loob nila kay Jesucristo; dapat mauna ang pagbabalik-loob. Maraming hindi nagtitiwala sa mga simbahan ngunit nagmamahal sa Tagapagligtas. Unahin natin ang dapat unahin.
(Dallin H. Oaks, “Pagbabahagi ng Ipinanumbalik na Ebanghelyo,” Ensign o Liahona, Nob. 2016, 59)
Isang makabagong halimbawa
Maaaring maghanap ang mga estudyante ng mga salaysay o turo sa Aklat ni Mormon na nagpapakita na inaanyayahan ng Ama sa Langit ang lahat ng Kanyang anak na lumapit sa Kanya (tingnan sa 2Nephi 9:21–22 ; 2Nephi 26:28 ; Mosias 27:23–25 ; Mosias 28:1–3).
