Үйлс 11, 15

Аврагч илчлэлтээр дамжуулан Өөрийн Сүмийг удирдан чиглүүлдэг

Есүс төлөөлөгчдөдөө сайн мэдээг бүх үндэстэнд номлох болно хэмээн хэлсэн. Гэхдээ ийн номлохын тулд өнө эртний еврей уламжлалыг өөрчлөхөд хэцүү байх байв. Есүс тэнгэр өөд гарснаар эдгээрийг илчлэлтээр дамжуулан өөрчлөх хэрэгтэй болсон билээ. Энэ хичээлийн зорилго бол Аврагч Өөрийн Сүмийг бошиглогч, төлөөлөгчдөдөө өгдөг илчлэлтээр дамжуулан удирдан чиглүүлдэг талаарх таны ойлголтыг гүнзгийрүүлэх явдал юм.

Юу заахаа шийдэх. Хичээлийн цагт багтааж заахааргүй их ярилцаж болох материал судрын бүлэг эшлэлд байх болно. Суралцагчид тань тодорхойлж, ойлгож, хэрэгжүүлэхэд сургаалын аль үнэн, зарчмууд хамгийн чухал болохыг мэдэхийн тулд судрууд болон сургалтын материалыг залбирч судал.

Суралцагчийн бэлтгэл: Судруудын удирдамж дахь “Илчлэл”-ийг scriptures.ChurchofJesusChrist.org-оос уншаад, Их Эзэн Өөрийн тааллыг бошиглогчдодоо хэрхэн илчилдэг талаар ойлгосон зүйлээ хуваалцахаар бэлдэж ирэхэд урь.

Найзын асуулт

Танаас өөр итгэл үнэмшилтэй найз тань орчин үеийн бошиглогч, төлөөлөгчдөд итгэх таны итгэлийн талаар олж мэдсэн гэж төсөөл. Хэдийгээр найз тань Библид гардаг бошиглогч, төлөөлөгчдөд итгэдэг боловч Бурхан тэднээр дамжуулан өнөөдөр ч үйл хэргээ явуулдаг гэсэн санааг хүлээн зөвшөөрч чадахгүй байлаа. Тэр танаас “Есүс бошиглогч, төлөөлөгчидтэй яаж ярилцдаг юм бэ?” гэж асуув.

• Та энэ асуултад хариулж чадна гэдэгтээ хэр итгэлтэй байна вэ?

• Та найздаа юу гэж хэлэх вэ?

Хариулах хэд хэдэн арга байгаа ч Үйлс 11 болон 15 нь Есүс Христ илчлэлтээр дамжуулан Өөрийн Сүмийг удирдан чиглүүлдэг хоёр арга замыг дүрслэн харуулсан.

Бошиглогчдод өгсөн илчлэлт

Петр үзэгдэл харж, Корнелтэй уулзсаныхаа дараа ( Үйлс 10 -ыг үзнэ үү) Иерусалим руу явж, шинээр илчлэгдсэн эдгээр үнэнийг Сүмийн бусад удирдагчид заажээ.

Петр үзэгдэл харж, Корнелтай уулзсан тухай Үйлс 10 дээрх үйл явдлыг товчхон эргэж харахын тулд суралцагчдыг хос хосоор нь ажиллуулах нь тустай байж болно. Өөр нэг хувилбар нь ангийнхандаа уг түүхийг хураангуйлан ярихад нэг суралцагчийг урих явдал байж болно.

Петр Иерусалимд ирснийхээ дараа, өөрийн харсан үзэгдэл болон Корнелтай уулзсан талаараа хүүрнэжээ ( Үйлс 11:1–18 -ыг үзнэ үү).

Үйлс 11:4–18 -ыг уншаад, Бурхан Сүмийг хэрхэн удирдан чиглүүлдэг талаар олж мэд.

• Их Эзэн Өөрийн Сүмийг хэрхэн удирдан чиглүүлдэг талаар энэ түүхээс та юу олж мэдсэн бэ?

Суралцагчдыг суралцагчийн бэлтгэлээр уншсан зүйлээсээ олж мэдсэн зүйлээ эргэн харахад урихыг бодож үз. Илчлэлт нь бошиглогч, ахлах төлөөлөгчид шууд үзэгдлээр ирдэг гэдгийг ойлгоход суралцагчдад тусал.

Самбарт дараах үнэнийг үзүүлэх эсвэл бичих талаар бодож үз.

Петрт тохиолдсон явдлаас бид Есүс Христ Өөрийн бошиглогч, ахлах төлөөлөгчид илчлэлт өгөх замаар Өөрийн Сүмийг удирдан чиглүүлдэг гэдгийг олж мэдэж болно.

• Энэ үнэнийг мэдэж байх нь Есүс Христийн тухай мөн Түүний бошиглогчдын талаарх таны гэрчлэлийг бэхжүүлэхэд хэрхэн туслах вэ?

• Яагаад та өнөөгийн Сүмийг Их Эзэний бошиглогчдод өгсөн илчлэлтээр удирдан чиглүүлдэг гэдэгт итгэдэг вэ?

Зөвлөлөөр дамжуулан өгдөг илчлэлт

Аврагч Өөрийн бошиглогч, төлөөлөгчдөд хэрхэн илчлэлт өгдөг талаарх өөр нэг жишээг Үйлс 15 -д дүрслэн харуулсан байдаг.

Паул, Барнаб гэгч хоёр номлогч олон харийнханд зааж, баптисм хүртээсэн. Иудейн зарим Христэд итгэгч Антиохт ирсэн бөгөөд харийнхны хөрвөгдсөн эрчүүдийг Есүс Христийн болон Түүний төлөөлөгчдийн заасан сайн мэдээний дагуу амьдрахын зэрэгцээ Мосегийн хуулийн дагуу хөвч хөндүүлэх хэрэгтэй гэж заасан байна ( Үйлс 15:1, 5 -ыг мөн Судруудын удирдамж дахь “ Хөвч хөндөх ёслол ”-ыг scriptures.ChurchofJesusChrist.org-оос үзнэ үү).

Үйлс 15:2 -ыг уншаад, Паул, Барнаб хоёр энэ асуудлыг хэрхэн шийдэхээр эрэлхийлснийг олж мэд.

• Яагаад Паул, Барнаб хоёрыг Иерусалим дахь Сүмийн удирдагчдаас удирдамж заавар авахаар эрэлхийлсэн гэж та бодож байна вэ?

Үйлс 15 нь Сүмийн удирдагчид хамтдаа зөвлөлдөж, Бурханаас илчлэлт эрэлхийлснээр хүнд хэцүү асуудлуудыг шийдвэрлэх сүнслэг өдөөлтийг хүлээн авдаг гэсэн нэг үнэнийг харуулдаг. Петр болон Сүмийн бусад удирдагч хамтдаа зөвлөлдсөнөөр Бурханаас удирдамж заавар хүлээн авсан. Тэд хөрвөгдсөн харийнхнаас хөвч хөндүүлэхийг шаардахгүй гэсэн шийдвэрээ Сүмийн гишүүдэд мэдэгдсэн захидлыг илгээсэн бөгөөд бусад зарлигийг сахих урилгыг мөн багтаажээ.

Зөвлөл гэдэг нь чухал асуудлын талаар болон тэдгээрт хэрхэн хариулахыг авч хэлэлцэхээр хамтдаа цуглардаг хэсэг бүлэг хүн юм. Сүмд зөвлөл хэрхэн ажилладаг талаар илүү сайн ойлгохын тулд Ерөнхий гарын авлагаас дараахыг унш.

[Зөвлөлийн] удирдагч гишүүдийг нээлттэй, шударга ярихад урамшуулна. Зөвлөлийн гишүүдийн янз бүрийн нөхцөл байдал, нас, туршлага, харах өнцөг зөвлөлийг баяжуулдаг. Гишүүд нэг нэгнээ хүндэтгэлтэй сонсож, санаагаа хуваалцана. Тэд Их Эзэний хүслийг мэдэхээр эрэлхийлэх үедээ илчлэлт, эв нэгдлийн сүнсээр дүүргэгддэг.

(Ерөнхий гарын авлага: Есүс Христийн Хожмын Үеийн Гэгээнтнүүдийн Сүмд үйлчлэх нь, 4.4.3, ChurchofJesusChrist.org)

• Сүмийн зөвлөл гэж юу болохыг та хэрхэн нэгтгэн дүгнэх вэ?

Дараах мэдээллийг суралцагчдад тараах материал болгон өг эсвэл самбарт харуул.

Иерусалим дахь зөвлөл

Үйлс 15:6–15, 22–28 -ыг уншаад, зөвлөлийн өөр өөр хэсгийн нотолгоог хайж ол. Дараах хүснэгтийг судлах тэмдэглэлдээ хуулж зур. Баруун баганад зүүн багана дахь хэллэгтэй холбоотой шүлгийн үг хэллэгүүдийг бич.

Санваарын түлхүүрийн дагуу ажилладаг
Хувь хүн, гэр бүлийн сайн сайханд төвлөрсөн
Зөвлөлийн гишүүдэд санал бодлоо илэрхийлэхийг зөвшөөрдөг
Эв нэгдэл рүү хөтөлдөг

Мөн орчин үеийн удирдагчид Сүмийн асуудалд Их Эзэний удирдамжийг урин авчрахын тулд зөвлөлийг ашигладаг. Ерөнхийлөгч Рассэлл М.Нэлсон дараах зүйлийг хуваалцжээ.

Биднийг Тэргүүн Зөвлөл, Арван хоёрын чуулгын хамтарсан зөвлөлийн хувьд хуралдахад уулзалтын өрөөнүүд маань илчлэлтийн өрөөнүүд болж, тэнд Сүнс илт оршин байдаг. Биднийг ярвигтай асуудлуудтай тэмцэлдэж байхад, төлөөлөгч бүр үзэл бодлоо чөлөөтэй илэрхийлэх үед сэтгэл хөдөлгөм үйл явц явагддаг. Бидний харах өнцөг эхэндээ өөр өөр байж болох ч нэг нэгнээ гэсэн хайр маань хувиршгүй байдаг. Бидний нэгдмэл байдал Их Эзэний Сүмээ гэсэн хүслийг ялган танихад тусалдаг юм.

Уулзалтуудад маань олонх хэзээ ч захирч ноёрхдоггүй! Бид нэгдмэл болох хүртлээ нэг нэгнээ залбиран байж сонсон, харилцан ярилцдаг. Тэгээд биднийг бүрэн зөвшилцөлд хүрэхэд Ариун Сүнсний нэгтгэгч нөлөө үнэхээр сэтгэл хөдлөм байдаг. Бошиглогч Иосеф Смитийн “Бид сэтгэл санааны эв нэгдлээрээ Бурханы хүчийг олж авдаг” хэмээн заахдаа мэддэг байсан зүйл бидэнд тохиолддог [Сүмийн ерөнхийлөгчдийн сургаалаас: Иосеф Смит (2007), 447]. Тэргүүн Зөвлөлийн эсвэл Арван хоёрын чуулгын гишүүн нь Их Эзэнээс асууж лавлахгүйгээр Сүмд зориулан шийдвэр гаргадаггүй.

(Рассэлл М.Нэлсон, “Сүмд болон бидний амьдралд зориулсан илчлэлт,” Ensign, May 2018, 95 эсвэл 2018 оны 4-р сарын Ерөнхий чуулган, 116)

Энэ нь Их Эзэний Өөрийн Сүмийг удирдан чиглүүлдэг арга барилын талаарх аливаа асуултыг тавих боломжийг суралцагчдад олгоход тохиромжтой цаг байж болох юм. Хэрэгтэй ойлголтыг олж авахын тулд “ Илчлэлт ” (scriptures.ChurchofJesusChrist.org) болон хичээлийн “Тайлбар ба нөхцөл байдлын талаарх мэдээлэл” хэсэг дээрх материалыг үзнэ үү.

• Та хичээлийн эхэнд өгсөн жишээн дээрх, Есүс Христ бошиглогч, төлөөлөгчидтэй хэрхэн ярилцдаг талаар асуусан найзынхаа асуултад хэрхэн хариулах байсан бэ?

• Эдгээрт сударт тодорхойлсон үнэнүүдийг мэдэх нь бошиглогч болон Сүмийн бусад удирдагчийн талаарх таны бодолд хэрхэн нөлөөлөх вэ?

• Есүс Христ эдгээр арга замаар Өөрийн Сүмийг удирдан чиглүүлдэг гэдгийг мэдэх нь өнөөгийн бошиглогч, төлөөлөгчдийн гаргасан шийдвэрийг хардаг байдалд тань хэр нөлөөлөх вэ?

• Та амьдралынхаа туршид ямар зөвлөлд оролцох вэ?

• Та зөвлөлд илчлэлт хүлээн авахад туслахын тулд юу хийж чадах вэ?

Зааврын дагуу энэ хичээлээр заасан үнэнүүдийг гэрчил.

Тайлбар ба нөхцөл байдлын талаарх мэдээлэл

Сүмийн удирдагчдад өгсөн илчлэлт

Арван хоёр Төлөөлөгчийн Чуулгын ахлагч Д.Тодд Кристоффэрсон “Христийн сургаал” хэлсэн үгэндээ Сүмийн удирдагчдад өгдөг илчлэлтийн талаар заахдаа Үйлс 11 ба 15 -д цэдэглэсэн түүхийг ашигласан. Хэлсэн үгийг бүхэлд нь судал.

 

     

   

Гэр бүлд зөвлөл хэрхэн ажилладаг вэ?

Арван хоёр Төлөөлөгчийн Чуулгын ахлагч, ерөнхийлөгч М.Рассэлл Баллард “Гэр бүлийн зөвлөл” (Ensign, May 2016, 63–65 эсвэл 2016 оны 4-р сарын Ерөнхий чуулган, 49–52) хэлсэн үгэндээ гэр бүлийн зөвлөлийн талаар заажээ.

Нэмэлт суралцах үйл ажиллагаа

Өсвөр үеийнхэн зөвлөлд оролцдог

Олон өсвөр үеийнхэн анги эсвэл чуулгын ерөнхийлөгчийн зөвлөл дэх дуудлагынхаа нэгэн хэсэг болгож зөвлөлд оролцох боломжтой байсан эсвэл ийм боломж тэдэнд олдох болно. Суралцагчдыг эдгээр зөвлөлд оролцсон туршлагынхаа талаар болон тэднийг өөрсдийн дуудлагаар бусадтай зөвлөлдөх үед энэ хичээлээр олж мэдсэн зүйлс нь тэдэнд хэрхэн тус болох талаар ярилцахад урь.

Хувийн илчлэлт зөвлөлөөр дамжин хэрхэн ирдэг вэ?

Суралцагчдыг одоо болон ирээдүйд өөрсдийн гаргах хэд хэдэн чухал шийдвэрийн жагсаалтыг гаргахад урь. Дараахтай адил асуултуудыг суралцагчдад тавь. Бусадтай зөвлөлдөх нь эдгээр шийдвэрийг гаргах талаар сүнслэг удирдамж авахад хэрхэн туслах вэ? Эдгээр шийдвэрийг гаргахдаа хэн хэнтэй зөвлөлдөж болох вэ? Зарим эх сурвалж нь эцэг эх, гэр бүлийн гишүүд (М.Рассэлл Баллард, “Гэр бүлийн зөвлөл,” Ensign, May 2016, 63–65 эсвэл 2016 оны 4-р сарын Ерөнхий чуулган, 49–53), Сүмийн удирдагчид болон Их Эзэн байж болно ( Алма 37:37 -г үзнэ үү).

Арван хоёр Төлөөлөгчийн Чуулгын ахлагч Квинтин Л.Күкийн дараах мэдэгдлийг хуваалцах талаар бодож үз. “Эрхэм залуу хүмүүс та нараас олон нь хэн гэдгээ болон хэн болж чадах талаараа тодорхой ойлголтгүй байгаа байх. Гэсэн ч та нар амьдралдаа гаргах хамгийн чухал шийдвэрүүдийнхээ босгон дээр ирсэн байна. Эцэг эх, бишопынхоо аль алинтай өмнөө байгаа чухал сонголтуудын талаар зөвлөлдөөрэй. Бишопыг өөрийнхөө найз, зөвлөгч болохыг зөвшөөр” (“Бишоп бол Их Эзэний сүргийг хариулдаг хоньчин,” 2021 оны 4-р сарын Ерөнхий чуулган, 60). Суралцагчдыг Есүс Христийн удирдамжийг өөрсдийн амьдралд урин авчрахын тулд зөвлөлдөх зарчмыг хэрхэн ашиглах талаар бичихэд урь.

Судрууд Сүмийн зөвлөлийг тэргүүлэн удирдахдаа илчлэлтийг хэрхэн урьдаг вэ?

Суралцагчдаас илчлэлт хүлээн авдаг өөр арга замын талаар асууж болно. Үйлс 15:13–18 -ыг суралцагчдаар уншуулах талаар бодож үз. Иаков эрх мэдлийн ямар эх сурвалжийг цохож дурдсан бэ?

Арван хоёр Төлөөлөгчийн Чуулгын ахлагч Д.Тодд Кристоффэрсон “Тэд судар, өгөгдсөн илчлэлт, Сүмийн удирдагчдын заавар зэргийг мөн өмнө нь хийдэг байсан талаар олонтоо зөвлөлддөг. Шинэ Гэрээний үеийн Сүмийнх шиг, зөвлөлийн гишүүдийн үндсэн зорилго нь зөвхөн хоорондоо санал нийлэх явдал биш, харин Бурханы илчлэлт хүлээн авах явдал юм. Энэ нь Их Эзэний оюун хийгээд тааллыг олж мэднэ гэсэн итгэл болон шалтгааныг багтаадаг үйл явц билээ” гэж заасан (“Христийн сургаал”, Ensign, May 2012, 88 эсвэл 2012 оны 4-р сарын Ерөнхий чуулган, 95). Суралцагчид Үйлс 10:28 -ыг уншаад, зөвшилцөл, Бурханаас ирэх илчлэлт хоёрын аль алиныг хэрхэн дурдсаныг олж мэдэж болно.