Galuega 6–7

Sa Auauna Atu Setefano e pei o Keriso

O le tausiga o e matitiva ma isi o loo manaomia le fesoasoani sa avea pea ma se vaega taua o le avea ma se tagata Kerisiano. Ina ua tuulafoaiina fafine ua oti a latou tane, sa filifili e Aposetolo ia Setefano ma isi e toaono e auauna atu i o latou manaoga. O le mea e faanoanoa ai, e ui ina sa faia e Setefano ni vavega tetele i le mana o le Atua, ae sa fetogia o ia e tagata Iutaia mo lana molimau ia Iesu Keriso. A o e suesue, mafaufau loloto i auala e mafai ona e faamanuiaina ai isi e ala i le taumafai e mulimuli i le Tama Faalelagi ma Iesu Keriso, avea e faapei o i Laua, ma le molimau atu e uiga ia i Laua.

O le avea e faapei o le Tama Faalelagi ma Iesu Keriso. Fesoasoani i tagata aoga e faailoa mai uiga faa-Keriso ma amioga faaalia i tusitusiga paia. Fesoasoani ia i latou ia iloa le ala e mafai ai e le atiina ae o nei uiga ma amioga ma le faia o nei faatinoga ona fesoasoani ia i latou ia avea atili ai e faapei o le Tama Faalelagi ma Iesu Keriso.

Sauniuniga a le tagata aoga: Valaaulia tagata aoga e toe iloilo a latou sini mo le polokalama a Tamaiti ma le Autalavou ma mafaufau pe o faapefea ona avea atili i latou e pei o le Faaola.

Gaoioiga E Mafai Ona Aoao Mai Ai

Faamalamalama faapuupuu mai po o le a le aufono a le uarota ma lisi nisi o sui o le aufono (epikopo, peresitene o le Aualofa, peresitene o le korama a toeaina, peresitene o Tamaitai Talavou, peresitene o le Peraimeri, taitai misiona a le uarota, ma isi). Faatulaga le vasega i se aufono a le uarota se tasi pe sili atu (e faalagolago i le numera o tagata aoga), ma tuu atu i tagata aoga taitasi se valaauga faapitoa. Tuu atu i aufono taitasi le vaaiga faataitai lenei, ma valaaulia i latou e talanoaina mea e mafai ona latou faia e fesoasoani ai. Atonu e fesoasoani le aotele o le vaaiga faataitai i luga o le laupapa.

O le aufono a le uarota o se vaega o tagata e i ai ni valaauga faapitoa (epikopo, peresitene o le korama a toeaina, peresitene o le Aualofa, peresitene o Tamaitai Talavou, peresitene o le Peraimeri, ma isi) e masani ona fono faatasi e talanoaina tulaga ma luitau eseese i a latou uarota. Manatu faapea o loo i ai le tulaga lenei i lau uarota po o le paranesi: O se tina nofofua e igoa ia Litia e i ai lana tama tama e 16 tausaga le matua, lana tama teine e 7 tausaga le matua, ma lana pepe e 6 masina le matua. E faia se taotoga o Litia i lenei vaiaso ma o le a i ai i le falemai mo aso e lima. E ono mafai faapefea e sui eseese o le aufono a le uarota ona fesoasoani i lenei aiga?

A uma ua lava se taimi, valaaulia tagata aoga e faasoa mai pe mafai faapefea e sui faapitoa o le aufono a le uarota ona fesoasoani i lenei tulaga.

• Aisea e te manatu ai e taua aufono a uarota, po o isi faalapotopotoga faapena?

• Mata o a ni lagona o i latou o loo talia le fesoasoani mai se aufono a le uarota po o se vaega faapena?

Faitau i le Galuega 6:1, ma vaavaai mo se faafitauli se tasi na feagai ma le Ekalesia anamua.

Ona o le toatele o fafine ua oti a latou tane e matitiva pe manaomia le fesoasoani i le Ekalesia, sa faaalu ai e le Toasefululua le tele o lo latou taimi e taumafai ai e fesoasoani ia i latou ae le mafai ona latou tuuto atu o latou taimi e talai atu ai le talalelei i le ala na talosagaina ai i latou e le Faaola.

Faitau i le Galuega 6:2–8 ma faailoa mai le tali na maua e le Toasefululua.

• E faapefea ona tutusa valaauga i aufono a le Ekalesia ma uarota i aso nei ma le vaifofo na fautuaina mai e uluai Aposetolo?

• A o e faitau e uiga i alii e toafitu o e na filifilia e fesoasoani i Aposetolo, o a uiga faa-Keriso na e matauina na latou maua?

• O le a sou manatu e mafai faapefea e nei uiga taitasi ona fesoasoani i se tasi e auauna atu ma faamanuia ai isi o loo manaomia le fesoasoani?

O se upumoni e mafai ona tatou iloa mai nei fuaiupu o le: A o tatou atiina ae uiga faa-Keriso, e mafai ona tatou auauna lelei atu ma faamanuia i latou o e manaomia le fesoasoani.

• O a nisi o uiga faaopoopo ua i ai ia Iesu Keriso e fesoasoani ia te Ia e auauna atu ai ia i latou o manaomia le fesoasoani?

Faaalu sina taimi e mafaufau loloto ai po o le a le lelei o lou atiina ae o nei uiga faa-Keriso. Pe o fesootai nisi o nei uiga i soo se tasi o au sini patino mo le polokalama a Tamaiti ma le Autalavou? Afai o lea, faaalu sina taimi e tusi ai i lau api talaaga mo suesuega pe o gasolo lelei lou atiina ae o lena uiga. Afai e leai, mafaufau e fai se fuafuaga i lau api talaaga mo suesuega pe o le a faapefea ona e galue i le atiina ae o lena uiga faa-Keriso ina ia mafai ai ona e atili auauna lelei atu ma faamanuia i latou o loo manaomia le fesoasoani.

O le molimau ma le faamaturoina o Setefano

Na tusia e Elder Bruce R. McConkie (1915–85) o le Korama a Aposetolo e Toasefululua:

E le faigofie ona oo mai o mea tetele; o mea e luluina ai le lalolagi e oo atu i mauga o le tetee.

(Bruce R. McConkie, “Once or Twice in a Thousand Years,” Ensign, Nov. 1975, 18)

O le saunoaga a Elder McConkie e faatatau ia Setefano. E ui lava sa ia “faia vavega ma faailoga tetele i luma o le nuu[,] … ua tutū mai isi o le sunako … ua fefinauai ma [ia]” ( Galuega 6:8–9). Sa aumai Setefano i luma o le aufono a Iutaia, ma sa aumai molimau pepelo e molimau faasaga ia te ia.

A o tu atu Setefano i luma o taitai o Iutaia, sa ia toe faamatalaina le ala na teena ai e tagata Iutaia le Agaga Paia ma teena ma fasiotia perofeta na auina mai e le Atua ia i latou. Ona molimau atu lea o Setefano o nei uiga fouvale sa faaauau pea i lena aso, e pei ona sa fasiotia ai e tagata ia Iesu Keriso, le Alo o le Atua (tagai i le Galuega 7:51–52).

Faitau i le Galuega 7:54–60, ma vaavaai pe na faapefea ona tali atu Setefano e ui i lena ita ma le tetee.

Mafaufau e faaali le vitio “The Martyrdom of Stephen” mai le taimi 3:25 i le 5:34 (o loo maua i le ChurchofJesusChrist.org). Ia nofouta o nisi o tagata aoga e ono le lagolelei i le faaalia o Setefano o loo fetogia i maa.

Afai e le o faaaogaina le vitio, mafaufau e faaali atu le ata lenei.

• O le a se mea na tulaga ese ia te oe i le tala i le faamaturoina o Setefano?

E ono tuuina mai e tagata o le vasega ni tali eseese. Mafaufau ma le agaga tatalo po o a fesili tulitatao e ono fesoasoani e faalolotoina ai le malamalama o tagata aoga, e pei o nei:

• Na faapefea ona faamanuiaina Setefano, e ui ina sa fasiotia o ia? Aisea e te manatu na ia mauaina ai le faaaliga na ia maua?

• O le a se mea ua aoao mai e le faaaliga a Setefano ia i tatou e uiga i lo tatou Tama Faalelagi ma Lona Alo Pele?

• Na faapefea ona pei Setefano o Iesu Keriso, e oo lava a o feagai ma na tetee matautia?

E pei ona faaalia i le tala i le faamaturoina o Setefano, o tagata ma mafuaaga lelei e masani ona faafeagai ma “mauga o le tetee.”

• Na faapefea ona e vaaia o tupu lenei tulaga i lou lava olaga?

E pei o Setefano, a o e filifili e faasoa atu ou talitonuga ma molimau i le Faaola ma Lana talalelei, atonu e te lagonaina le tetee po o sauaga.Na aoao mai Elder Jeffrey R. Holland o le Korama a Aposetolo e Toasefululua:

Ou te fai atu i tagata uma aemaise lava i le autalavou o le Ekalesia pe afai tou te lei faia, o le a oo lava i se tulaga o le a manaomia ai ona e puipuia lou faatuatua pe atonu foi o le onosaia o nisi o sauaga faaletagata ona o oe o se tasi o le Ekalesia a Iesu Keriso o le Au Paia o Aso e Gata Ai. O taimi faapea o le a manaomia uma ai le lototele ma le faaaloalo mai ia te outou.

(Jeffrey R. Holland, “O Le Tau—ma Faamanuiaga—o le Avea ma Soo,” Ensign po o le Liahona, Me 2014, 6)

• Aisea e te manatu ai e aoga le molimau atu ma le puipuia o le Tama Faalelagi ma Iesu Keriso?

• O le a sou manatu e mafai faapefea ona fesoasoani lo tatou Tama Faalelagi ma Iesu Keriso ia te oe pe a e feagai ma sauaga mo le molimau atu ma le puipuia o i Laua?

Faaalu sina taimi e mafaufau loloto ai pe mafai faapefea ona e filifili e molimau atu ma puipuia lou Tama Faalelagi ma Lona Alo Pele i lenei vaiaso a sau.

Tala ma Faamatalaga o Talaaga

Galuega 6:1–6 . O ai ua valaauina e fesoasoani i Aposetolo i mataupu faaletino i aso nei?

E faapei foi ona valaauina e le Alii ia alii agavaa toafitu e fesoasoani i le Toasefululua e saunia mea mo manaoga faaletino o le Ekalesia e pei ona tusia i le tusi o Galuega, ua tofia foi e le Alii ia le Au Epikopo Pulefaamalumalu e fesoasoani i le Toasefululua i le saunia o manaoga faaletino o le Ekalesia i ona po nei. O le Epikopo Pulefaamalumalu ma ona fesoasoani e toalua e galulue i lalo o le taitaiga a le Au Peresitene Sili e faatautaia mataupu faaletino a le Ekalesia. O taulaga anapogi o se vaega taua o lenei polokalama ma e saunia ai le fesoasoani mo se taimi le tumau e lagolago ai le olaga mo e matitiva i le lalolagi atoa. (Mo nisi faamatalaga, tagai i le autu “Au Epikopo Pulefaamalumalu” o loo maua; i le newsroom.ChurchofJesusChrist.org.)

Pe o le a ou feagai ea ma sauaga pe tatau ona puipuia lo’u faatuatua?

Matamata le vitio “The Cost—and Blessings—of Discipleship” (o loo maua i le ChurchofJesusChrist.org) mai le taimi 1:01 i le 2:31, pe faitau le faamatalaga o loo i lalo.

//media.ldscdn.org/webvtt/general-conference/april-2014-general-conference/2014-04-1020-elder-jeffrey-r-holland-en.vtt

Sa tuuina mai e Elder Jeffrey R. Holland o le Korama a Aposetolo e Toasefululua se faataitaiga o se tagata sa sauaina a o tauivi e molimau ia Keriso:

Sa tusi mai ia te a’u talu ai nei se tamaitai faifeautalai: “Sa ma vaaia ma lau soa se alii o saofai i luga o se nofoa umi i totonu o le taulaga ma tausami lana aiga o le aoauli. A o ma latalata atu, sa ia tilotilo mai i luga ma iloa mai ma pine faifeautalai. Faatasi ai ma se foliga pāū, sa ia oso i luga ma sii lona lima e po a’u. Sa fetaui lelei lava ma lau alo, o lea sa ia luai mai ai ana meaai ia te a’u ma amata ona palauvale i upu sili ona mataga ia i ma’ua. Sa ma savavali ese e aunoa ma se upu. Sa ou taumafai e soloese meaai mai ou mata, ae ou faalogoina le tau o le potoi pateta i tua o lou ulu. O nisi taimi e faigata le avea ma se faifeautalai aua sa ou manao e toe foi i ai i lena taimi, uu lena alii, ma fai i ai, ‘E I AI SOU FAIAI!’ Ae ou te lei faia.”

Ou te fai atu i lenei faifeautalai tuuto, lau pele, na e faia i lau lava ala faamaulalo ua laasia ai se li’o o tamaitai ma alii tulagaese o e, e pei ona fai mai le perofeta o Iakopo o le Tusi a Mamona, na “manatunat[u i le maliu o Keriso], ma mafati[a] i lona satauro ma [tauave] tauemuga a le lalolagi” [Iakopo 1:8].

(Jeffrey R. Holland, “O Le Tau—ma Faamanuiaga—o le Avea ma Soo,” Ensign po o le Liahona, Me 2014, 6)

Gaoioiga Faaopoopo e Aoao Ai

Vitio: “Sheri Sought to Ease Suffering—His Hands”

Mafaufau e faaali atu le “Sheri Sought to Ease Suffering—His Hands” (4:17) ma valaaulia tagata aoga e vaavaai mo mea na aoaoina e se tasi tausimai e uiga i le avea atili e faapei o Keriso e ala i le auauna atu. A uma le vitio, fai atu fesili nei.

• O a uiga faa-Keriso ua e vaaia ia Sheri?

• E pei o i latou o e na faamanuiaina i le auaunaga a Setefano, o le a le taua o nei uiga auaumama ia i latou na auauna atu i ai ma faamanuiaina e Sheri?

• Na faapefea e aafiaga ua tuanai a Sheri i le auauna atu i lona tina ona fesoasoani ia te ia e saili ia avea faapei o Keriso i lona alofa ma le auauna atu?

E toatolu peresona mavaevae i le Aiga Atua

A uma ona faitau tagata aoga e uiga i le faaaliga a Setefano, fesili po o le a se mea o aoao mai ai e uiga i le Aiga Atua. O se upumoni e tasi e mafai ona tatou aoao mai i lenei tala o le, o le Tama Faalelagi, Iesu Keriso, ma le Agaga Paia o ni peresona mavaevae e toatolu. Ona mafai lea e tagata aoga ona vaavaai i le faamatalaga ua faaulutalaina “Aiga Atua” i le Taiala mo Autu po o le Taiala i Tusitusiga Paia ma sue ni mau fesootai e ono fesoasoani ia i latou e malamalama atili ai i lenei aoaoga faavae. E mafai foi e tagata aoga ona tusifaamaumau i a latou api talaaga mo suesuega le ala o le a latou tali atu ai i se tasi na faapea mai o le Tama Faalelagi ma Iesu Keriso o le Tagata lava e tasi.