Galuega 8:1–3; 9:1–20

“Se A Le Mea E Te Finagalo I Ai Ou Te Faia?”

I le taimi “ua tupu ai le sauā tele i le ekalesia” (Galuega 8:1), sa ulu atu ai Saulo ma le faamalosi i le tele o fale, pu’e faapagota ma faafalepuipui i latou o e sa talitonu ia Iesu Keriso (taga’i i le Galuega 8:3). A o malaga atu Saulo i Tamaseko e faaauau ona sauāina le Au Paia, sa faaali atu e Iesu Keriso o Ia lava ia Saulo (taga’i i le Galuega 9:3–5). Ma le ofo tele, sa fesili Saulo i le Alii, “Se a le mea e te finagalo i ai ou te faia?” (Galuega 9:6). O lenei lesona ua faamoemoe e fesoasoani ia te oe e mafaufau loloto ai i mea e faia e le Alii e fesoasoani ai ia te oe ia suia mo le lelei atili ma saili ia iloa le mea e finagalo o Ia e te faia.

Faaaogaina o le tele o tala faaletusi paia. O nisi taimi e tele tala o loo i ai i tusitusiga paia e faatatau i se mea e tasi na tupu. Vaavaai mo avanoa e valaaulia ai tamaiti a’oga e suesue i tala taitasi ma faailoa mai upumoni faaopoopo e mafai ona aoaoina e ala i le faia o lena mea. Fautuaina i latou e vaavaai mo avanoa e faia ai foi lenei mea i a latou lava suesuega patino o tusitusiga paia.

Sauniuniga a le tamaitiiti aoga: Valaaulia tamaiti aoga e talanoa i se tagata o le aiga pe i se uo e uiga i auala ua valaaulia ma fesoasoani ai Iesu Keriso ia i tatou ia suia.

Gaoioiga E Ono Mafai Ona Aoao Mai Ai

O se suiga o le itu e aga’i i ai

Valaaulia tamaiti a’oga e faataavale se mapu po o se polo i luga o se mea mafolafola ma matamata i ai a o suia le itu e aga’i i ai pe a tau i se isi mea.

• O le a se mea e faia e suia ai le itu e aga’i i ai le mapu po o le polo?

• I le faatusatusaina o le mea faitino o loo faataavale i le tagata, o a nisi o mafuaaga e ono suia ai se tasi mo le lelei sili atu ma suia ai le itu e aga’i ai lona olaga? O a ni mafuaaga e ono lē suia ai i latou?

Tuu atu i tamaiti a’oga se avanoa e iloilo ai o latou lava olaga. O le parakalafa o le a sosoo ai ua tuuina mai ai se tasi o auala e faatino ai. E mafai ona tali tamaiti a’oga i nisi o nei fesili i totonu o a latou api faamaumau o suesuega.

Mafaufau i le itu o aga’i i ai lou lava olaga. O a ni auala e te lagonaina ai le alofa ma le faamaoniga a le Alii? Pe o i ai ni suiga i le itu o aga’i i ai lou olaga e ono valaaulia ai oe e le Alii ina ia faia? Saili faaaliga i fesili nei a o e suesue i lenei lesona.

“Saulo, Saulo e, se a le mea ua e saua mai ai ia te au?”

Sa fesoasoani le Alii i se tagata e igoa ia Saulo e suia lona olaga. I le amataga, o Saulo o se Faresaio o le sa “saua i le ekalesia” ( Galuega 8:3). Sa ia molimauina le maliu o le soo ia Setefano (taga’i i le Galuega 7:58 ; 8:1 ; 22:20) ma “tuu i fale puipui ma sasa i lea sunako ma lea sunako i e faatuatua i [le Alii]” ( Galuega 22:19).

Vaelua se itulau i lau api talaaga, ma faaulutalaina le tasi itu “O le ala na fesoasoani ai le Alii ia Saulo e sui.” Faaulutala le isi itu “O le tali a Saulo i le Alii.”Faitau se tasi pe sili atu o tala e uiga i le mea na oo ia Saulo i le ala i Tamaseko, ma faatumu le siata e fua i mea e te mauaina.

E mafai ona vaevaeina tamaiti a’oga i ni vaega toalaiti ma atofa atu i tamaiti a’oga taitasi e faitauina tala eseese. E mafai ona latou galulue faatasi e lisi mea latou te mauaina mai i tala taitasi o le aafiaga o Saulo. Pe a vaevaeina le vasega i ni vaega toalaiti, mafaufau i manaoga ma tomai o tamaiti a’oga. Tuu faatasi tamaiti a’oga i ni vaega e mafai ona faatupula’ia ai le aafiaga e aoao ai mo tagata uma.

Afai e manaomia e le vasega se fesoasoani e malamalama ai i le fasifuaitau “aa i tui” ( Galuega 9:5), faaaoga le faamalamalamaga o loo maua i le vaega o “Talatalaga ma Faamatalaga o Talaaga” o le lesona.

Galuega 9:3–20 (Na tusi Luka e uiga i le liua o Saulo)

Galuega 22:6–16 (Na ta’uina atu e Saulo i isi le tala o lona liua)

Galuega 26:12–20 (Na ta’uina atu e Saulo i le Tupu o Akeripa le tala o lona liua)

Atonu foi e te manao e matamata i le vitiō “The Road to Damascus” (5:21) o loo maua i le ChurchofJesusChrist.org.

Valaaulia ni nai tamaiti a’oga e faasoa mai mea na latou mauaina. Mafaufau e fai atu ni fesili faaopoopo e pei o nei: O le a le mea na silafia e le Alii e uiga ia Saulo ma le tagata e mafai ona avea ai o ia? Na faapefea ona faalotomaulalo e le Alii ia Saulo? O ai na auina atu e le Alii e fesoasoani ia Saulo? Aisea?

E faavae i mea na e tusia i lau api talaaga, mafaufau po o a upumoni po o lesona na e aoaoina mai lenei tala.

Valaaulia tamaiti aoga e faasoa mai nisi o upumoni na latou aoaoina. O se upumoni e tasi e mafai ona taulai atu i ai i auiliiliga sili atu e faapea e mafai e Iesu Keriso ona fesoasoani ia i tatou e suia ma ausia le gafatia o loo Ia silafia i totonu o i tatou.

E naunau le Alii i lo tatou suia

Faaalu sina taimi e mafaufau ai i se tagata e te iloa ua suia ona o le faatosinaga a Iesu Keriso i o latou olaga.

Mafaufau e faasoa atu se aafiaga patino e uiga i le liua i le Alii o Iesu Keriso. E mafai foi ona talosagaina tamaiti a’oga e tuuina mai se tala o a latou sauniuniga mo le vasega.

• O le a sou manatu na faapefea ona uuna’ia e Iesu Keriso lenei tagata ia suia?

Ina ia vaai i se faataitaiga o se tasi ua suia, matamata le vitiō “His Grace: Change Is Possible through Christ” (3:29), ma vaavaai pe na faapefea ona fesoasoani le Alii i se tagata e igoa ia Kenny e suia le ala o lona olaga. O loo maua lenei vitio i le ChurchofJesusChrist.org.

Mo Saulo, o le e masani ona lauiloa i lona igoa Latina o Paulo (taga’i i le Galuega 13:9), o le mulimuli i faatonuga a le Alii na suia atoa ai lona olaga. Sa faamuta e Paulo le sauāina o tagata Kerisiano ae avea ma se soo malosi tele o Iesu Keriso. Sa malaga Paulo i le tele o atunuu a o avea ma faifeautalai ma tusi atu ni tusi faamalosi’au ma apoapoa’i i le Au Paia. O le sefulufa o nei tusi o loo aofia ai i le Feagaiga Fou (taga’i i le Taiala i Tusitusiga Paia, “ Paulo,” scriptures.ChurchofJesusChrist.org, po o le Bible Dictionary. “ Paul ”). O le filifiliga a Paulo e mulimuli ia Iesu Keriso o loo faaauau pea ona faamanuiaina ai tagata e lē mafaitaulia i aso nei.

Fuafua e faaali le ata o faamatalaga o le soifuaga o Paulo ma valaaulia le vasega e toeiloilo i ai. Atonu e fesoasoani le faasino atu i lenei ata o faamatalaga mai lea taimi i lea taimi a o suesue le vasega i le soifuaga ma tusitusiga a Paulo.

Ua silafia foi e le Alii i tatou ma valaaulia i tatou e faia ni suiga i o tatou olaga. Atonu o ni fetuuna’iga tetele nei, ae e mafai foi ona avea ma ni nai suiga itiiti.

I lau api talaaga, vavae afa se isi itulau ma faaulutalaina le tasi itu “O auala o loo valaaulia ai a’u e le Alii ia ou suia” ma le isi itu “O la’u tali atu i le Alii.” Mafaufau loloto i fesili nei ia fesoasoani ia te oe e tusi ai se tali i lau api faamaumau suesuega i lalo o le “O ala o loo valaaulia ai a’u e le Alii ia ou suia.”

• E ui atonu e le’i faaali atu le Alii ia te oe i se faaaliga vaaia, ae o le a se mea ua Ia faia, po o le a le mea o loo Ia faia, e fesoasoani ai ia te oe e faia ni suiga lelei i lou olaga?

• O ai na Ia auina mai e fesoasoani ia te oe e sui mo le lelei sili atu?

I lalo o le “O la’u tali atu i le Alii,” tusi ai pe faapefea ona e manao e tali atu i taumafaiga a le Alii e fesoasoani ia te oe ia suia mo le lelei sili atu.

Atonu e aogā le ta’u atu i tamaiti a’oga o se lesona i le lumanai o le a latou maua ai le avanoa e tomanatu ai i a latou taumafaiga e tali atu i le Alii ma iloilo lo latou tuputupu a’e faaletagata lava ia.

Molimau atu i tamaiti a’oga o le a fesoasoani mai le Alii ia i tatou ia suia ma ausia le gafatia o loo Ia silafia i totonu o i tatou pe afai tatou te tali atu ma le lotomaualalo i Ana valaaulia.

Talatalaga ma Faamatalaga o Talaaga

Galuega 9:5 . O le a le uiga o le “a’a i tui”?

O se tao po o se laau maai e masani ona faaaoga e tui ai manu ina ia savali ai aga’i i luma. O manu e tali atu i le taufeaa nai lo le aga’i i luma e mafai ona sili atu le tigā mo i latou lava. O le faaaogaina o lenei talafaatusa, na fesoasoani ai le Alii ia Saulo ia ona iloa o le faasagatau ia te Ia na o le aumaia ai o le tigā ia te ia lava.

O a ni suiga atonu e finagalo le Alii ou te faia?

Na aoao mai Sister Becky Craven, Fesoasoani Lua i le Au Peresitene Aoao o Tamaitai Talavou:

Atonu o se suiga o manatu, se suiga i amioga masani, po o se suiga i le taulaiga o o tatou olaga. I le taui atu ai i Lana togisala e lē mafaatauina mo i tatou taitoatasi, ua finagalo le Alii ia i tatou ia suia o tatou loto. O le suiga ua Ia finagalo ia tatou faia ua lē mo Sona lelei, ae e mo lo tatou manuia.

(Becky Craven, “Tuu Ma Oe le Sui,” Ensign po o le Liahona, Nov. 2020, 58)

O le a se mea e tatau ona ou malamalama i ai e uiga i a’u filifiliga ma le taula’iga o lo’u olaga?

Na aoao mai Elder Jeffrey R. Holland o le Korama a Aposetolo e Toasefululua:

E lē popole tele lava le Atua po o fea sa e i ai ae popole o Ia po o fea o loo e i ai ma, faatasi ai ma Lana fesoasoani, o fea le mea o e naunau e te alu i ai.

(Jeffrey R. Holland, “The Best is Yet to Be,” Ensign, Jan. 2010, 27)

Na aoao mai Elder Dieter F. Uchtdorf o le Korama a Aposetolo e Toasefululua:

E manao Satani ina ia tatou mafaufau faapea a tatou agasala ua tatou laasia se “vaega ma’oti o le lē toe foi mai”—e faapea ua fai si tuai ona sui lo tatou auala. …

Na afio mai Keriso e lavea’i i tatou. Afai ua tatou uia se auala sesē, o le Togiola a Iesu Keriso e mafai ona aumaia ia i tatou le faamautinoaga … e mafai ona tatou maua [se] toe foi mai saogalemu pe afai tatou te mulimuli i le fuafuaga faataatia a le Atua mo lo tatou faaolataga. …

O le meaalofa o le Togiola a Iesu Keriso, ua tatou maua ai i taimi uma, ma i nofoaga uma ia faamanuiaga o le salamo ma le faamagaloga. Ona o lenei meaalofa, ua tatou maua uma ai le avanoa tatou te toe foi saogalemu atu ai mai ala faigata o le agasala.

(Dieter F. Uchtdorf, “Vaega Tonu o le Toe Foi Saogalemu,” Ensign po o le Liahona, Me 2007, 99, 101)

Galuega Faatino Faaopoopo e Aoao Mai Ai

Toefaafouga ma le valaaulia a le Alii ia sui

Ina ia fesoasoani i tamaiti a’oga ia iloa le manaomia ona faia o ni suiga i o tatou olaga faatasi ai ma le fesoasoani a le Alii, mafaufau e faaaoga se talafaatusa. O se tasi manatu o le faitau lea o nisi po o saunoaga uma a Peresitene Nelson “Savali Faafeiloai,” lea na ia faatusatusa ai faafouga o si’omia ai le Malumalu o Sate Leki i le valaaulia a le Faaola mo i tatou e “faaauau pea ona suia, tuputupu a’e, ma ia mamā atili” (taga’i i le Liahona, Me 2021, 6–7). O fesili nei e mafai ona fesoasoani i tamaiti a’oga e mafaufau ai pe na faapefea ona latou faia ni suiga pe faapefea foi ona latou ono faia ni suiga:

Ua faapefea ona faamanuiaina oe e le Alii a o e faia ni laasaga laiti aga’i i luma e mulimuli ai ia te Ia?

O le a se mea na saunoa mai ai Peresitene Nelson e fesoasoani ia te oe e iloa ai auala e faia ai suiga i lou olaga?

Faataitaiga o suiga e ala ia Iesu Keriso

O nisi nei o faataitaiga o tagata o e na suia e ala i le taliaina o le valaaulia e mulimuli ia Iesu Keriso.

Sa papatisoina se alii talavou ma, e ala i le molimauina e lona aiga o lona suiga, na talia ai e le vaega na totoe o lona aiga le valaaulia e mulimuli foi ia Iesu Keriso (taga’i i le Sam Lofgran ma Annelise Gardiner, “His Example for Change,” New Era, Aug. 2020).

Sa lagona e Juan Mendoza le gaogao i lona olaga lea na ia taumafai e faatumuina e ala i le mulimuli i uuna’iga a le Agaga. Na fesoasoani lenei mea ia Juan e iloa ai le Alii ma lagona ai le naunau e auauna atu ia te Ia. Mafaufau e faaali le vitiō “Acting on Inspiration: Juan Mendoza” (3:52), o loo maua i le ChurchofJesusChrist.org.

Sa lagona pea e Dominic le tosinaga a le Alii e fesoasoani ia te ia e suia lona olaga. Ia nofouta ona o lenei faataitaiga e aofia ai le mataupu maaleale o le pule i le ola. Mafaufau e faaali le vitiō “Finding Christ during Difficult Times” (4:35), o loo maua i le ChurchofJesusChrist.org.