Galuega 8

Ua Aoao e Filipo se Tagata Aitiope

O Filipo o se faifeautalai naunauta’i ma faamaoni sa alu atu i le mea tuufua ona o le poloaiga a le Alii. Sa taitai atu e le Agaga ia Filipo i se tagata Aitiope o loo faitauina tusitusiga paia i lana kariota. Ina ua fesili atu Filipo pe malamalama le tagata i le mea sa ia faitauina, sa ia tali mai, “Ou te mafaia faapefea, pe a le faasino mai se tasi ia te au?” (Galuega 8:31). Ona sa malamalama ma fiafia Filipo i tusitusiga paia, o lea sa mafai ai ona ia aoao atu le tagata Aitiope e uiga ia Iesu Keriso i se auala na taitai atu ai o ia ina ia talitonu ma papatisoina. A o e suesueina le Galuega 8:26–40, mafaufau loloto pe mafai faapefea ona e faaaogaina mau e fesoasoani ai i isi ia talitonu ma o mai ia Iesu Keriso.

Faaaogaina o upu a perofeta o aso nei. E masani ona faaaoga e perofeta o aso nei ia tala mai tusitusiga paia e aoao atu ai mataupu faavae ma aoaoga faavae ia e mafai ona aoaoina mai i nei tala. Valaaulia tamaiti aoga e suesue i upu a perofeta o aso nei e faailoa ma malamalama ai i aoaoga faavae ma mataupu faavae mai tusitusiga paia ma aoao ai pe faapefea ona faaaoga nei upumoni i o latou lava olaga.

Sauniuniga a le tamaitiiti aoga: Valaaulia tamaiti aoga e mafaufau e uiga i meafaigaluega po o tomai faaleagaga na fesoasoani ia i latou e malosi atili ai i le talalelei. O le a latou maua se avanoa e faasoa mai ai o latou manatu i le taimi o le lesona.

Gaoioiga E Ono Mafai Ona Aoao Mai Ai

Faaaogaina o meafaigaluega tatau

Mafaufau e aumai se samala po o se sikulu-kalaiva i le vasega pe faaali atu ata nei. Valaaulia se tamaitiiti aoga se toatasi e faataitai le faaaogaina tatau o le meafaigaluega. Ona fesili lea i le vasega po o le a se mea e ono tupu pe afai latou te taumafai e ta i totonu se fao pe vili se sikulu i totonu e aunoa ma le faaaogaina o meafaigaluega.

O le faaaogaina o le meafaigaluega tatau e mafai ona fesoasoani ia te oe e fausia ai pe lipea vave ai ni mea i ni auala faigofie. Mafaufau i le faigata ai ona fausiaina po o le lipeaina o ni mea e aunoa ma meafaigaluega tatau. Mafaufau po o a mea e faaaoga ai meafaigaluega nei.

• O le a le taimi e aogā ai nei meafaigaluega?

• E mafai faapefea ona e faaaogaina tatau?

I se auala talitutusa, e mafai ona faaaoga ni meafaigaluega ma ni tomai faapitoa e fausia ai ma faaleleia ai lo tatou manao e mulimuli i le Faaola ma ola ai i Lana talalelei.

A o tali mai tamaiti aoga i fesili nei, fautuaina i latou e manatua ni manatu mai i a latou sauniuniga o le lesona. Ia mautinoa e lē tele se taimi e alu i le fefaasoaai.

• O a nisi o meafaigaluega po o tomai faaleagaga na fesoasoani ia te oe e tuputupu a’e ai i le talalelei?

• E mafai faapefea ona e faaaogaina nei meafaigaluega e valaaulia ai se isi tagata e sau i le Faaola?

O se tasi o nei meafaigaluega o lo tatou tomai lea e malamalama ai ma faaaoga tusitusiga paia, aemaise lava a o latou aoao ma molimau mai e uiga ia Iesu Keriso. Mafaufau loloto mo sina taimi po o a ni lagona lelei e te lagonaina i le faaaogaina o mau e valaaulia ai isi e o mai ia Iesu Keriso. A o e suesue i lenei lesona, saili le taitaiga e ala i le Agaga Paia ia iloa ai po o a ni auala e mafai ona e faaaogaina lelei ai mau e fesoasoani ai e aumai isi i le Faaola.

Ua valaauina Filipo e alu atu i le mea tuufua

O le Galuega 8 o loo tusia ai nisi o mea na oo ia Filipo, o se tasi o uso e toafitu na valaauina i le galuega e Aposetolo (taga’i i le Galuega 6:3–6). Ina ia solaese mai le faateleina o sauaga i Ierusalema, sa malaga atu Filipo i Samaria e faaauau pea ona talai atu le talalelei. E ala i le perisitua, sa ia faia ai vavega, faamaloloina le toatele o tagata, ma “tala’i atu Keriso ia te i latou” (taga’i i le Galuega 8:5–8). A o e suesue i le tala lenei, vaavaai mo meafaigaluega na faaaoga e Filipo e faamanuiaina ai i le tofiga na te le’i faamoemoeina na ia maua mai le Alii.

Afai e faigata mo nisi o tamaiti aoga ona faitau e i latou lava ni poloka o mau uumi, mafaufau e faitau leotele ia fuaiupu nei ma le vasega pe i ni paga.

Faitau le Galuega 8:26–39, ma vaai faalemafaufau i mea na tutupu o loo faamatala mai i lenei tala. Atonu e te manao e faailoga upu ma fasifuaitau e anoa ia te oe. (Manatua o se eunuka o se auauna faatuatuaina, ma o Esaias o le igoa Eleni lea mo le perofeta o Isaia.)

Valaaulia ni nai tamaiti aoga e faasoa mai upu ma fasifuaitau ua latou makaina ma pe faapefea ona fesoasoani ia i latou ia iloa lesona o loo i le tala. Mafaufau e fai atu nisi o fesili nei e fesoasoani ia faalolotoina ai o latou malamalama.

Atonu e te manao e tusi (pe fai i tamaiti aoga e tusi) ni lesona ua latou iloaina i luga o le laupapa.

• O a ni auala na taitai ai e le Alii ia Filipo? Aisea e taua ai le mulimuli i uunaiga a le Alii a o tatou taumafai e fesoasoani i isi ia o mai ia te Ia?

• Na faapefea ona faaaoga e Filipo lona malamalama i tusitusiga paia e aoao atu ai le tagata Aitiope e uiga ia Iesu Keriso?

• O a ni lesona o tulaga ese ia te oe i lenei tala?

I totonu o le tele o upumoni i lenei tala, atonu na e iloaina se mataupu faavae e pei o lenei: A tatou malamalama i mau ma aoao atu ai e uiga i le Faaola e mafai ona tatou fesoasoani i isi e o mai ia te Ia.

E faavae i manaoga o tamaiti aoga, o le gaoioiga lenei e mafai ona suia i le gaoioiga faaopoopo e aoao ai pe faapefea ona tali atu Filipo i uunaiga a le Agaga.

Faaaogaina o mau e aoao atu ai e uiga ia Iesu Keriso

Ina ua fesili le tagata Aitiope pe o le mau sa ia faitauina sa faatatau i le perofeta o Isaia po o “se isi tagata,” ia mātau o le malamalama o Filipo i tusitusiga paia na mafai ai ona ia vave amata “i lea lava Tusi ona [folafola] ia te ia o le talalelei ia Iesu” ( Galuega 8:34–35).

O le fuaitau o le mau na faitauina e le tagata Aitiope o loo maua i le Isaia 53, o se valoaga matagofie e uiga i lo tatou Faaola, o Iesu Keriso. Atonu e te manao e fefaasinoa’i pe faafesootai le Galuega 8:32–33 ma le Isaia 53:7–8 .

Ia nofouta o nisi tamaiti aoga atonu latou te lē lagonaina ua ia i latou le tomai e malamalama ai i tusitusiga paia pe faamalamalama atu foi i se isi tagata. Toe faamautinoa atu i tamaiti aoga o le a faatuputeleina lo latou malamalama a’o faagasolo āluga o le taimi ma taumafaiga. Faamanatu atu ia i latou o nisi taimi o le aoaoga aupito aoga o le faasoa atu lea o o latou lagona e uiga i se fuaitau o se mau, auā o le a molimau le Agaga Paia i le moni o a latou upu.

Mafaufau faapea o loo e i ai i le tulaga o i ai Filipo ma maua le avanoa e faasoa atu ai i se uo lau molimau ia Iesu Keriso. Faitau le Isaia 53:3–9, ma gaua’i toto’a atu i ou manatu ma lagona e uiga i le Faaola a o e faitauina lea fasi fuaitau.

Tuu atu i tagata a’oga se taimi ia lava e mafaufau loloto ai i fesili nei. E mafai ona e mafaufau e valaaulia tagata a’oga e faatino le faasoa atu i se latou uo, pe e mafai foi ona e valaaulia tagata aoga naunauta’i e faasoa mai mea na latou tusia i le vasega.

• O le a se mea e te manao mo lau uo ia ona iloaina, lagona, pe malamalama ai e uiga ia Iesu Keriso mai lenei fuaitau? Aisea?

• E mafai faapefea ona e faaaogaina mea ua e iloa ma lagona e uiga ia Iesu Keriso e faamalosi’au ai i lau uo e mulimuli atili ia te Ia?

Faamalosiaina e ala i sauniuniga

Ona o taumafaiga a Filipo, sa liua ai le tagata Aitiope ma papatisoina (tagai i le Galuega 8:36–38). E pei o Filipo, e mafai ona tatou musuia ma uunaia isi e mulimuli ma avea e faapei o Iesu Keriso. Na aoao mai Elder Ulisses Soares o le Korama a Aposetolo e Toasefululua e faapea, o a tatou sauniuniga patino e mafai ona fesoasoani ia i tatou e musuia ai isi e faalatalata atili atu i le Atua:

A tatou saili e aoao ma le naunauta’i, loto i ai, mausali, ma le faamaoni le talalelei a Iesu Keriso ma aoao atu i le tasi ma le isi ma se faamoemoega moni ma i lalo o le faatosinaga a le Agaga, e mafai e nei aoaoga ona liua loto ma musuia ai se manao ia ola e tusa ma upumoni a le Atua.

(Ulisses Soares, “E Mafai Faapefea Ona Ou Malamalama?,” Ensign po o le Liahona, Me 2019, 8)

Mafaufau e valaaulia tamaiti aoga e tali fesili nei i a latou api faamaumau o suesuega. Afai e lava le taimi, valaaulia ni tamaiti aoga ua loto i ai e faasoa mai o latou malamalamaga ma le vasega.

• O a ni fetuunaiga e mafai ona e faia i au suesuega patino o tusitusiga paia o le a saunia ai oe e fesoasoani i isi e o mai ia Keriso? O a ni auala e ono faamalosia ai e lenei suiga lou talitonuga mautinoa i le faaaogaina o tusitusiga paia?

• O le fea o vaega o suesuega o tusitusiga paia i le asō na fesoasoani e te lagona ai le latalata atili atu i le Tama Faalelagi ma Iesu Keriso? Aisea e te manatu ai na sili atu le loloto o le aafiaga o oe i lena vaega nai lo isi?

Talatalaga ma Faamatalaga o Talaaga

Galuega 8:27 . O le a le mea e ta’u o le eunuka?

O eunuka o ni tamālii auvaivai sa tautua i le tele o nuu anamua i Tafatafa ma nuu i Sasa’e Tutotonu. Sa latou auauna atu o ni fitafita, leoleo o fale tautu, ma sa masani ona umia ni tofiga faatuatuaina i totonu o le faamasinoga. O le eunuka Aitiope i le Galuega 8:26–39 sa nafa ma le faleteuoloa o le faamasinoga a Aitiope. (Taga’i i le Bible Dictionary, “ Eunuch. ”)

O se tagata aoao faamaoni e mafai ona avea ma se faiaoga musuia

Na aoao mai Elder Ulisses Soares o le Korama a Aposetolo e Toasefululua:

I le faatatauga o le aoaoina mai ma le aoaoina atu o le talalelei, o nisi taimi e pei ai i tatou o le tagata Aitiope—tatou te manaomia le fesoasoani a se faiaoga faamaoni ma musuia; ma o nisi taimi e pei ai i tatou o Filipo—e manaomia ona tatou aoao atu ma faamalosia isi i lo latou liua.

(Ulisses Soares, “E Mafai Faapefea Ona Ou Malamalama?,” Ensign po o le Liahona, Me 2019, 6)

Galuega Faatino Faaopoopo e Aoao Mai Ai

Vitiō—“Hallelujah”

Afai e lava se taimi, a uma ona faitau e tamaiti a’oga le Isaia 53:3–9, atonu e te manao e faaali le vitiō “#Hallelujah—An Easter Message about Jesus Christ” (1:59) o loo maua i le ChurchofJesusChrist.org. O lenei vitiō o loo faaalia ai tagata taitoatasi o loo faitauina vaega o nei fuaiupu mai le Isaia ma molimau atu ia Iesu Keriso.

Ua tali atu Filipo i uuna’iga a le Agaga

Toe faamanatu le Galuega 8:26–35, ma valaaulia tamaiti a’oga e faailoa mai fasifuaitau o loo ta’u mai ai pe na faapefea ona iloa e Filipo le mea na finagalo le Alii na te faia ma pe na faapefea ona tali atu Filipo. Faasoa atu le faamatalaga lenei, valaaulia tamaiti a’oga e mafaufau pe aiseā e matuā taua ai le tali atu i uuna’iga faaleagaga.

Sa faamatala e Elder Ronald A. Rasband o le Korama a Aposetolo e Toasefululua se tala e uiga i le mulimulita’i i se uuna’iga faaleagaga a o auauna atu i se misiona:

I se tasi taeao vevela o Iulai sa ma lagona ai ma la’u soa le uunaiga e saili se tagata o fia malamalama [i le Talalelei] mai lisi a le Temple Square [i Sate Leki]. Sa ma tuitui i le faitotoa o le fale o Elwood Schaffer. Na teena ma le faaaloalo i maua e Mrs. Schaffer.

A o amata ona ia tapunia le faitotoa, sa ou lagona e fai se mea ou te le’i faia muamua lava ma ou te le’i toe faia lava talu mai lena taimi! Sa tuu lo’u vae i le faitotoa ma fesili atu, “O i ai se isi tagata atonu o fia faalogo i le ma sāvali?” O lana tama teine e 16 tausaga o Marti, sa ia fiailoa ma sa tatalo faatauanau mo le taitaiga i le aso ua tuana’i. Sa matou feiloa’i ma Marti, ma i le āluga o taimi, sa auai lona tinā i lesona. Na liliu uma i laua i le Ekalesia.

O le taunuuga o le papatisoga o Marti, e 136 tagata, e aofia ai le toatele o lona lava aiga, ua uma ona papatiso ma ōsia ni feagaiga o le talalelei. Ou te faafetai i lo’u faalogo i le Agaga ma tuu lo’u vae i le faitotoa i lena aso vevela o Iulai.

(Ronald A. Rasband, “Tu’u Atu i le Agaga Paia e Taitai,” Ensign po o le Liahona, Me 2017, 94)

• Na faapefea ona tali atu Elder Rasband i le uuna’iga a le Agaga? O le a le mea na tupu na avea o se taunuuga?

• O le a se taimi na e tali atu ai i uuna’iga a le Agaga? O le a le mea na tupu?

• E mafai faapefea ona e gaua’i atili atu i uuna’iga a le Agaga?

• E mafai faapefea e le faia o lena suiga ona fesoasoani ia te oe e faasoa atili atu ai le talalelei ma le mautinoa i isi?

Mafaufau loloto po o ai atonu e finagalo le Alii e te feiloa’i i ai, faauō, pe faasoa atu i ai le talalelei.

O Se Isi Manatu mo le Lesona

Afai o le a aogā i tamaiti a’oga le aoao e uiga i le manao o Simona e faatau tupe le perisitua i le Galuega 8:5–24, mafaufau e faasoa atu manatu o loo maua i lalo o le “E tatau ona ‘sa’o o tatou loto i le silafaga a le Atua’” i le “Iulai 10–16. Galuega 6-9: ‘Se A Le Mea E Te Finagalo I Ai Ou Te Faia?’” i le Sau, Mulimuli Mai ia te A’u—Mo le Aoga Sa: Feagaiga Fou 2023.