Vlerësoni të Mësuarit Tuaj 9

1 Korintasve 8–16 dhe 2 Korintasve

Ky mësim ka për qëllim të të ndihmojë të vlerësosh synimet që ke vendosur dhe rritjen që ke përjetuar gjatë studimit tënd të Dhiatës së Re.

Ndihma ndaj nxënësve që ata të vlerësojnë të mësuarit e tyre. Jepuni nxënësve mundësi të vlerësojnë të mësuarit e tyre. Një mënyrë është t’i ftoni ata të reflektojnë për qëllimet që kanë vendosur për ta jetuar ungjillin e Jezu Krishtit. Ndërsa nxënësit reflektojnë, ata do ta dallojnë se ku duhet të përmirësohen dhe ku janë përmirësuar. Nxitini nxënësit ta ftojnë ndihmën e Shpirtit në mënyrë që të ndiejnë shpresë dhe të dinë se si mund të vazhdojnë të mësojnë.

Përgatitja e nxënësve: Ftojini nxënësit të përsëritin mënyrat se si janë përpjekur t’i zbatojnë parimet që kanë mësuar nga kapitujt te 1 Korintasve 8–16 dhe 2 Korintasve .

Veprimtari të Mundshme të të Mësuarit

Ky mësim ka për qëllim t’i ndihmojë nxënësit të vlerësojnë synimet që kanë vendosur, aftësinë e tyre për të shpjeguar mësimet në Dhiatën e Re ose mënyrën se si po ndryshojnë qëndrimet, dëshirat dhe aftësia e tyre për ta jetuar ungjillin. Studimi në klasë i kapitujve te 1 Korintasve 8–16 dhe 2 Korintasve mund të ketë theksuar të vërteta të ndryshme nga ato në veprimtaritë vijuese. Nëse po, veprimtaritë mund të përshtaten për t’i përfshirë ato të vërteta.

Në këtë mësim ti do të kesh mundësi të vlerësosh të mësuarit tënd dhe mënyrën se si i ke zbatuar parimet e dhëna mësim te 1 Korintasve 8–16 dhe 2 Korintasve . Vlerësimi i të mësuarit mund të të ndihmojë të analizosh mënyrën se si studimi i shkrimeve të shenjta po të ndihmon të bëhesh më i ngjashëm me Shpëtimtarin.

Vlerësoji synimet e tua

Merreni parasysh ta filloni orën mësimore duke i sfiduar nxënësit të hamendësojnë se sa faqe të shtypura të shkrimit të shenjtë janë në Bibël, në Librin e Mormonit, Doktrinën e Besëlidhjet dhe Perlën me Vlerë të Madhe të marra së bashku. Pasi nxënësit të hamendësojnë, ftojini ata të mbledhin numrin e vërtetë të faqeve për të parë se kush mund t’i jetë afruar më shumë.

Hamendëso se sa faqe të shtypura të shkrimit të shenjtë janë në Bibël, Librin e Mormonit, Doktrinën e Besëlidhjet dhe Perlën me Vlerë të Madhe të marra së bashku.

Përse mendon se Zoti na ka dhënë kaq shumë faqe të shkrimit të shenjtë?
Në ç’mënyrë mund të tregoni mirënjohje për fjalën e Tij?

Plaku D. Tod Kristoferson, i Kuorumit të Dymbëdhjetë Apostujve, shpjegoi arsyen përse Zoti ka dhënë kaq shumë nga fjalët e Tij në shkrimet e shenjta.

“Merrni në konsideratë madhësinë e bekimit tonë që kemi … një sasi të tillë shkrimi të shenjtë. Dhe jo vetëm kjo, por çdo burrë, grua e fëmijë mund të ketë e të studiojë librin vetjak të këtyre teksteve të shenjta, shumicën në gjuhën e vet. Me siguri, me këtë bekim Zoti po na thotë se nevoja që kemi për përdorimin e vazhdueshëm të shkrimeve të shenjta, është më e madhe se në çdo kohë të mëparshme. Qoftë e mundur që të ushqehemi vazhdimisht me bollëk mbi fjalët e Krishtit, të cilat do të na tregojnë gjithçka që ne duhet të bëjmë (shih 2 Nefi 32:3).”

(D. Tod Kristoferson, “Bekimi prej Shkrimeve të Shenjta”, Ensign ose Liahona, maj 2010, f. 35)

Si mendon, përse nevoja jonë për t’u kthyer “te shkrime[t e] shenjta, është më e madhe [tani] se në çdo kohë të mëparshme”?
Cilat nevoja vetjake plotësojnë shkrimet e shenjta në jetën tënde ose cilat nevoja mund të plotësojnë ato?

Gjej një minutë për të menduar për studimin tënd vetjak të shkrimeve të shenjta. Këshillohu me Atin Qiellor rreth mënyrës se si studimi yt i shkrimeve të shenjta po i plotëson nevojat e tua dhe nëse ti duhet të bësh ndonjë rregullim. Ndoshta duhet të jesh më i qëndrueshëm në studimin tënd të përditshëm të shkrimeve të shenjta ose ta rritësh thellësinë e kuptueshmërisë që fiton nga studimet e tua. Shkruaje çdo rregullim që e ndien se duhet ta bësh. Merr parasysh t’i kërkosh familjes sate, mësuesit të seminarit ose një udhëheqësi të Kishës të të ndihmojë me synimet e tua për studimin e shkrimeve të shenjta.

Mbështetu te Shpëtimtari dhe kërko ndihmën e Tij

Kur Pali u shkroi shenjtorëve në Korint, ai u përqendrua te mënyrat se si Jezu Krishti na bekon dhe na ndihmon. Disa shembuj përfshijnë ndihmesën që t’i shpëtojmë tundimit (shih 1 Korintasve 10:13), ndihmesën që të zhvillojmë dashuri hyjnore (shih 1 Korintasve 13), ngritjen tonë nga vdekja nëpërmjet Ringjalljes (shih 1 Korintasve 15), ftesën që të pajtohemi me Të (shih 2 Korintasve 5:16–21 ; 7:1–10) dhe forcimin tonë për t’i duruar sfidat me besnikëri (shih 2 Korintasve 11 – 12).

Gjej disa çaste për të shqyrtuar fragmentet e shkrimit të shenjtë që ke shenjuar ose shënimet që ke bërë te 1 Korintasve 8–16 dhe 2 Korintasve që të kanë ndihmuar të mësosh rreth Shpëtimtarit ose të mbështetesh tek Ai.

Përgatit një mesazh 3 deri në 5 minuta për mënyrën se si Jezu Krishti të ndihmon. Përfshi sa vijon:

një ose më shumë fragmente nga 1 Korintasve 8–16 ose 2 Korintasve që ishin kuptimplota për ty
një shpjegim se çfarë mësimi na mësojnë ato fragmente rreth mënyrës se si Shpëtimtari të ndihmon dhe të forcon
një përvojë nga jeta jote ose një shembull në shkrimet e shenjta të Jezu Krishtit që ndihmon sipas mënyrës së dhënë mësim në ato fragmente
mënyrën si mund t’i ftosh të tjerët që të marrin ndihmën dhe forcën e Shpëtimtarit

Merreni parasysh të ftoni disa vullnetarë që t’i japin klasës mesazhin e tyre. Përndryshe, nxënësit mund t’ia tregojnë një partneri. Nxitini nxënësit që ta japin mesazhin e tyre në shtëpi ose në Kishë.

Historia familjare e puna në tempull dhe Ringjallja

Veprimtaria A: Pjesëmarrja në historinë familjare dhe punën në tempull

Nëse mësimi rreth vargut te 1 Korintasve 15:29 nuk është dhënë ose nëse nxënësit nuk u ftuan të hartonin një plan për të qenë më të përfshirë në historinë familjare dhe punën në tempull, merreni parasysh ta anashkaloni veprimtarinë A.

Nëse duket sikur nxënësit nuk dinë se si ta përdorin faqen FamilySearch.org ose programin FamilySearch, merreni parasysh t’u jepni atyre kohë në mësim për ta zbuluar. Ata mund të kërkojnë për një paraardhës të vdekur që e njihnin personalisht ose një për të cilin mund të flasin. Ndihmojini nxënësit të mendojnë mbi domethënien që mund të ketë Ringjallja e Shpëtimtarit për paraardhësit që gjejnë.

Më parë mund të keni studiuar vargun te 1 Korintasve 15:29 . Mendoni se si ndikon Ringjallja e Shpëtimtarit te paraardhësit tuaj. Shiheni këtë material filmik teksa mendoni.

Teksa e studiove vargun te 1 Korintasve 15:29 , ti mund të kesh hartuar një plan për të marrë pjesë në historinë familjare dhe punën në tempull. Nëse e bëre atë plan, gjej një çast për ta shqyrtuar planin tënd dhe mendo për veprimet që ndërmore për ta zbatuar atë plan. Nëse nuk e bëre atë plan, merre parasysh të zhvillosh tani një plan të mënyrës se si ti mund t’i ndihmosh paraardhësit t’i shijojnë të gjitha bekimet e ungjillit të Jezu Krishtit.

Merreni parasysh t’i paraqitni udhëzimet vijuese në mënyrë që nxënësit të mund t’i shohin ndërkohë që përsiatin dhe shkruajnë. Pas një kohe të mjaftueshme, ftojini nxënësit e gatshëm t’i shprehin mendimet e tyre.

Raporto për planin tënd.

Nëse bëre një plan, trego se çfarë shkoi mirë dhe me çfarë pengesash u përballe. A ka ndonjë rregullim që ti e ndien se Ati Qiellor dëshiron që ti ta bësh? Si do të të ndihmojnë ato rregullime?

Nëse nuk bëre një plan, trego se çfarë dëshiron të bësh dhe përse. Si mendon se do të ndikojë plani yt tek ti dhe tek të tjerët ndërsa e zbaton atë?

Përgjigju njërës prej pyetjeve vijuese:

Si e tregon pjesëmarrja jote në historinë familjare dhe punën në tempull shpresën tënde për Ringjalljen?
Si të ka ndihmuar pjesëmarrja në historinë familjare dhe punën në tempull të ndihesh më afër Atit Qiellor dhe të bëhesh më i ngjashëm me Jezu Krishtin?

Veprimtaria B: Shpjegimi i doktrinës së Shlyerjes së Shpëtimtarit

Ndihmojini nxënësit të vlerësojnë aftësinë e tyre për të shpjeguar doktrinën e Shlyerjes së Shpëtimtarit duke diskutuar disa nga pyetjet në vijim. Ftojeni Frymën e Shenjtë ta drejtojë këtë diskutim.

Përse është Ringjallja e Shpëtimtarit një pjesë thelbësore e Shlyerjes së Tij?
Çfarë studiove te 1 Korintasve 8–16 ose 2 Korintasve rreth Ringjalljes që të ka ndihmuar?
Cilat zgjedhje mendon se do të ishin të ndryshme në jetën tonë nëse nuk do të besonim në Ringjalljen e vërtetë?
Pse je mirënjohës që Jezu Krishti na ofron fuqi mbi vdekjen? Si mund ta tregosh atë mirënjohje?