Zotërimi Doktrinor: 1 Pjetër 4:6

“Ungjilli u Është Predikuar edhe të Vdekurve”

Pamja

The resurrected Jesus Christ preaching to spirits in the Spirit World.

Në studimin tënd të kapitullit te 1 Pjetër 4, ti mësove se Shpëtimtari e themeloi punën misionare në botën e shpirtrave që të gjithë fëmijët e Atit Qiellor të mund të kenë mundësinë për të marrë shpëtimin. Ky mësim mund të të ndihmojë të mësosh përmendsh referencën e zotërimit doktrinor dhe frazën kyç të shkrimit të shenjtë për vargun te 1 Pjetër 4:6. Gjithashtu, mund të të ndihmojë të shpjegosh doktrinën e dhënë mësim në atë fragment. Më pas ti do të kesh mundësi ta zbatosh atë doktrinë dhe parimet e marrjes së njohurisë shpirtërore në një situatë nga jeta reale.

Mësimdhënia ndaj nxënësve e parimeve të marrjes së njohurisë shpirtërore. Zotërimi doktrinor do të jetë më i efektshëm nëse nxënësit i dinë dhe i kuptojnë parimet e marrjes së njohurisë shpirtërore. Ndihmojini nxënësit t’i kuptojnë dhe t’i shqyrtojnë rregullisht këto parime.

Përgatitja e nxënësve: Ftojini nxënësit të përsiatin dhe të përgatiten për të treguar atë që kanë ndier ndërsa kanë kryer pagëzime dhe konfirmime në tempull ose kanë bërë punë tjetër për historinë familjare për paraardhësit e tyre të vdekur.

Veprimtari të Mundshme të të Mësuarit

Ky mësim i fragmentit të zotërimit doktrinor është hartuar për t’u dhënë pas mësimit “1 Pjetër 3:18–22; 4:1–6”, që është mësimi kontekstual për fragmentin e zotërimit doktrinor 1 Pjetër 4:6. Nëse ky mësim për fragmentin e zotërimit doktrinor nevojitet të zhvendoset në një javë tjetër, sigurohuni që të jepni edhe mësimin përkatës kontekstual gjatë asaj jave.

Mëso përmendsh dhe shpjego

Ftojeni një nxënës të vizatojë në tabelë një diagram të thjeshtë të planit të shpëtimit. Më pas bëni disa nga pyetjet vijuese për të vlerësuar njohurinë e nxënësve për planin dhe mënyrën se si ungjilli jepet mësim. Për t’i angazhuar nxënësit të cilët zakonisht nuk dalin vullnetarë për të folur, mund të jepni pyetjet vijuese si detyrë kontrolli dhe më pas t’i diskutoni si klasë.

Të gjithë fëmijëve të Perëndisë iu dha mësim ungjilli në jetën paratokësore. Çfarë u ndodhi atyre që e pranuan ungjillin duke zgjedhur planin e Perëndisë? Çfarë u ndodhi atyre që e refuzuan atë?
Si jepet mësim ungjilli këtu në tokë?

Përdorini dy pyetjet vijuese për t’i ndihmuar nxënësit të përcaktojnë referencën e fragmentit të zotërimit doktrinor dhe frazën kyç të shkrimit të shenjtë.

Çfarë u ndodh atyre që nuk kanë asnjëherë mundësi të mësojnë për Jezu Krishtin ose të marrin ordinancat e autorizuara të priftërisë në këtë jetë?
Ku mund të lexojmë rreth kësaj në Dhiatën e Re?

Merreni parasysh të përdorni veprimtarinë vijuese të mësimit përmendsh:

Jepini çdo nxënësi një copë letër dhe ftojini nxënësit ta shkruajnë referencën e plotë dhe frazën kyç të shkrimit të shenjtë në krye të fletës: “ 1 Pjetër 4:6 : ‘Ungjilli u është predikuar edhe të vdekurve’”. Udhëzojini ata ta palosin kreun e fletës për të mbuluar atë që shkruan, dhe më pas ta shkruajnë referencën dhe frazën përsëri, duke përjashtuar tri ose katër fjalë dhe numra të zgjedhur prej tyre. Kërkojuni nxënësve t’i shkëmbejnë fletët e tyre me dikë pranë vetes.

Kërkojuni nxënësve t’i përcaktojnë fjalët dhe numrat e përjashtuar në fletën e tyre të re. Më pas udhëzojini ata ta palosin fletën për të mbuluar atë që shkruan dhe ta rishkruajnë referencën dhe frazën, kësaj here duke përjashtuar gjashtë deri në tetë fjalë ose numra. Kërkojuni atyre t’ia kthejnë fletën personit fillestar dhe më pas të përcaktojnë fjalët që mungojnë në fletën e tyre fillestare, ta palosin fletën edhe një herë të fundit dhe tʼi shkruajnë plotësisht përmendsh referencën dhe frazën.

Ushtroje vënien në zbatim

Në mësimin e mëparshëm ti mësove të vërtetën vijuese nga 1 Pjetër 4:6 : Ungjilli u është predikuar të vdekurve në mënyrë që ata të mund të kenë të njëjtat mundësi si ata që e dëgjojnë ungjillin në vdekshmëri.

Përdore skenarin vijues për të ushtruar vënien në zbatim të kësaj të vërtete dhe parimeve të marrjes së njohurisë shpirtërore.

Situata: Pjesa 1

Përfytyro sikur ke një mik që quhet Andi, i cili po takohet me misionarët. Andi të kërkon që të vijë në seminar me ty për të mësuar më shumë rreth ungjillit. Në ditën e tij të parë në seminar, mësuesi yt u kërkon nxënësve që të shqyrtojnë me një partner parimet e marrjes së njohurisë shpirtërore. Andi kthehet nga ti dhe të pyet: “Cilat janë parimet e marrjes së njohurisë shpirtërore?”

Si do t’ia paraqitje Andit parimet e marrjes së njohurisë shpirtërore? (Merre parasysh të shqyrtosh paragrafët 5–12 në pjesën “Marrja e Njohurisë Shpirtërore” te Dokumenti Bazë i Zotërimit Doktrinor (2022) nëse të duhet ndihmë për këtë pyetje.)

Situata: Pjesa 2

Më vonë atë javë, Andi dhe misionarët takohen në shtëpinë tënde. Ti i ndihmon misionarët të japin mësim për parimet dhe ordinancat e para të ungjillit, duke përfshirë besimin te Jezu Krishti dhe pagëzimin me anë të zhytjes për heqjen e mëkateve. Misionarët përdorin vargun te Gjoni 3:5 për të dhënë mësimin se pagëzimi nga autoriteti i duhur i priftërisë është i domosdoshëm për tʼu shpëtuar në mbretërinë e qiejve. Andi mendon rreth kësaj për një çast, më pas duket pak i trishtuar. Një nga misionarët e pyet përse është i trishtuar dhe Andi i përgjigjet: “Gjyshi im nuk u pagëzua asnjëherë, por ai ishte një njeri shumë i mirë, i cili gjithmonë thoshte se donte të bënte një jetë të mirë në mënyrë që të mund të shkonte në qiell. A do të shkojë ai?” Ti bën një lutje në heshtje, duke e pyetur Atin Qiellor se si mund ta ndihmosh Andin. Në mendje të vjen ideja e përdorimit të parimeve të marrjes së njohurisë shpirtërore dhe doktrina e dhënë mësim te 1 Pjetër 4:6 .

Në varësi të madhësisë së klasës dhe kohës, nxënësit mund t’i përdorin përgjigjet e tyre për të interpretuar me role mësimdhënien ndaj Andit. Përndryshe, nxënësve mund t’u caktohet një nga parimet e marrjes së njohurisë shpirtërore dhe më pas ta diskutojnë me një partner ose në një grup të vogël se si ai parim mund ta ndihmonte Andin. Kur të përfundojnë diskutimin, ata mund t’i raportojnë klasës ose të ndahen në grupe të vogla me nga tre veta për t’ua treguar mendimet e tyre shokëve të klasës, të cilët i studiuan dy parimet e tjera.

Përvijo mënyrën se si mund t’i përdorësh të tri parimet e marrjes së njohurisë shpirtërore dhe doktrinën e dhënë mësim te 1 Pjetër 4:6 për ta ndihmuar Andin të gjejë përgjigje për pyetjen e tij dhe të ndihet në paqe për gjyshin e tij. Pas përvijimit, përgatit një përgjigje për Andin. Mendo për ato pyetje që do të bëje për ta ndihmuar atë të zbulojë dhe ndiejë të vërtetën e doktrinës. Sigurohu që t’i përfshish të tri parimet e marrjes së njohurisë shpirtërore dhe doktrinën e dhënë mësim te 1 Pjetër 4:6 në përgjigjen tënde.

Nëse nevojitet, mund të përdorësh disa ose të gjitha pyetjet vijuese për të të udhërrëfyer.

Si mund ta ndihmosh Andin të ketë një këndvështrim të përjetshëm? Çfarë do t’i thoshe Andit rreth Atit Qiellor dhe Jezu Krishtit që të mund t’i japë atij paqe për gjyshin e tij?
Përveç vargut te 1 Pjetër 4:6 , cilat janë disa burime të tjera të caktuara në mënyrë hyjnore që mund t’ia tregosh Andit për ta ndihmuar atë të ndiejë paqe nëpërmjet Jezu Krishtit? Si do t’i përdorje këto fragmente për ta ndihmuar Andin ta zbulojë të vërtetën?
Me çfarë ngjason të vepruarit me besim në situatën e Andit? Çfarë do ta ftoje atë të bënte?
Çfarë përvojash ke pasur duke bërë punë në tempull ose për historinë familjare për paraardhësit e tu, të cilat mund t’ia tregoje Andit?
Për çfarë do të dëshmoje për ta ndihmuar shokun tënd?

Përsëritja e zotërimit doktrinor

Ndihmoji nxënësit tʼi shqyrtojnë referencën dhe frazën kyç të shkrimit të shenjtë për vargun te 1 Pjetër 4:6 gjatë një mësimi të ardhshëm. Në vijim është një mënyrë për ta bërë këtë gjë:

Shkruani karakteret 1, P, 4:6, U, U, Ë, P, E, T, V, në një kolonë në tabelë. Ftojini nxënësit të përcaktojnë fjalët e referencës së zotërimit doktrinor dhe frazën kyç të shkrimit të shenjtë nga këto germa të para. Pasi të gjitha fjalët të jenë përcaktuar, përsëritini referencën dhe frazën kyç si klasë.