1 Pjetër 3:18–22; 4:1–6

Puna e Shpëtimit për të Vdekurit

Çfarë do t’u ndodhë miliarda fëmijëve të Atit Qiellor që jetuan dhe vdiqën pa mundësinë për të dëgjuar për Jezu Krishtin ose për të pranuar ordinancat e autorizuara në emrin e Tij? Apostulli Pjetër dha mësim se Jezu Krishti e predikoi ungjillin në botën e shpirtrave pas vdekjes së Tij, duke ua vënë në dispozicion bekimet e ungjillit të gjithë fëmijëve të Atit Qiellor. Ky mësim do të të ndihmojë të eksplorosh mënyra për ta ndihmuar Shpëtimtarin në punën e Tij të shëlbimit të të vdekurve.

Shikimi paraprak i burimeve. Kur përgatiteni për orën mësimore, sigurohuni që t’i shikoni paraprakisht të gjitha mediat dhe të njiheni me faqet e internetit, mësimet me sende ose materialet e tjera që do të përdoren në orën mësimore. Kjo do të rritë vetëbesimin tuaj në mësimdhënie dhe do të mundësojë përqendrim më të madh në nevojat e nxënësve.

Përgatitja e nxënësve: Për të pasur qasje te veçori të caktuara në FamilySearch.org ose në programin kompjuterik “Pema Familjare” të FamilySearch, nxënësve do tʼu nevojitet të kyçen në sistem me emrin e përdoruesit dhe fjalëkalimin e Llogarisë së tyre të Kishës që është e lidhur me numrin e tyre të dokumentit të anëtarësisë. Nëse nxënësit nuk kanë ose nuk e dinë emrin e përdoruesit dhe fjalëkalimin e tyre, ftojini ata t’i krijojnë ose t’i rimarrin ato në account.ChurchofJesusChrist.org ose ta krijojnë llogarinë në FamilySearch.org. Nëse nevojitet, kërkojini ndihmë një specialisti të historisë familjare të lagjes ose degës apo bashkërenduesit të Seminareve dhe Instituteve të Fesë.

Veprimtari të Mundshme të të Mësuarit

Një pyetje shushatëse

Merreni parasysh ta paraqitni thënien vijuese aty ku nxënësit mund ta lexojnë ndërsa futen në klasë.

Plaku D. Tod Kristoferson, i Kuorumit të Dymbëdhjetë Apostujve, tha:

“Teologët e krishterë [studiuesit] prej kohësh janë përleshur me pyetjen: ‘Cili është fati i miliardave të panumërta të njerëzve që kanë jetuar dhe vdekur pa asnjë njohuri për Jezusin?’”

(D. Todd Christofferson, “The Redemption of the Dead and the Testimony of Jesus”, Ensign, nëntor 2000, f. 9)

• Si mund t’i përgjigjesh dikujt që ta bëri këtë pyetje?

Nëse nxënësit kanë vështirësi të përgjigjen për pyetjen e mëparshme, merreni parasysh t’u tregoni atyre sugjerime të tilla si figura e një tempulli ose një tabelë e trungut familjar.

Nëse nxënësit iu përgjigjën me lehtësi pyetjes, merreni parasysh t’i pyesni ata se si e dinin përgjigjen për diçka që ka pështjelluar shumë njerëz ndër shekuj.

Plaku Kristoferson vazhdoi:

“Me Rivendosjen e ungjillit të Jezu Krishtit ka ardhur kuptueshmëria për mënyrën se si shëlbohen të vdekurit e papagëzuar dhe për mënyrën se si Perëndia mund të jetë ‘një Perëndi i përsosur, i drejtë dhe gjithashtu një Perëndi i mëshirshëm’ [ Alma 42:15 ]”.

(D. Todd Christofferson, “The Redemption of the Dead and the Testimony of Jesus”, f. 9)

Shpëtimtari në botën e shpirtrave

Ndërkohë që njohuria e shpëtimit për të vdekurit u rivendos nëpërmjet Profetit Jozef Smith, Bibla përmban fragmente që na tregojnë se ato të vërteta u kuptuan dhe u dhanë mësim nga Apostujt e hershëm. Për shembull, Apostulli Pjetër dha mësim për atë që bëri Jezu Krishti për ata që vdiqën pa njohurinë e ungjillit.

Lexo te 1 Pjetër 3:18–20 ; 4:6 për të parë atë që dha mësim Pjetri rreth mënyrës se si Jezu Krishti e vazhdoi punën e Tij për të shpëtuar fëmijët e Atit tonë Qiellor, madje edhe pas vdekjes së Tij.

1 Pjetër 4:6 është një fragment i zotërimit doktrinor. Merre parasysh t’i shenjosh fragmentet e zotërimit doktrinor në një mënyrë të dallueshme që të mund t’i gjesh me lehtësi.

• Çfarë të mësojnë këto vargje rreth shërbesës së Shpëtimtarit në botën e shpirtrave?

• Sipas vargut te 1 Pjetër 4:6, përse u predikohet ungjilli atyre që kanë vdekur?

Mund të jetë e dobishme të shpjegoni se, duke e bërë këtë, Perëndia po tregohet i drejtë. Ai do që të gjithë të gjykohen me drejtësi. Prandaj, në vend që t’i dënojë ata që nuk e kanë dëgjuar ungjillin, Ai ua bën të mundur që ta pranojnë dhe marrin atë. Një e vërtetë që nxënësit mund të mësojnë nga ky varg, është se ungjilli u predikohet të vdekurve, që ata të mund të kenë të njëjtat mundësi si ata që e dëgjojnë ungjillin në vdekshmëri.

• Në ç’mënyrë e tregon doktrina e shpëtimit për të vdekurit dashurinë dhe mëshirën e Perëndisë për fëmijët e Tij?

Zbulesë moderne për botën e shpirtrave

Zbulesa moderne mund të na ndihmojë të mësojmë më shumë rreth asaj që bëri Shpëtimtari ndërkohë që ishte në botën e shpirtrave.

Teksa Presidenti Jozef F. Smith (1838–1918) i lexoi dhe i përsiati po këto vargje te 1 Pjetër, ai mori një vegim të shërbesës së Shpëtimtarit mes të vdekurve. Kjo zbulesë është e regjistruar te Doktrina e Besëlidhje 138 dhe përfshin hollësi që më parë ishin të panjohura për anëtarët e Kishës. Merre parasysh të shkruash një referencë-kryq ose ta lidhësh vargun 1 Pjetër 4:6 me seksionin Doktrina e Besëlidhje 138 te shkrimet e tua të shenjta.

Para se të studioni vargjet nga Doktrina e Besëlidhje 138 , mund të jetë e dobishme t’i ftoni nxënësit të tregojnë atë që dinë tashmë për këtë vegim. Gjithashtu, mund t’i ftoni nxënësit ta studiojnë vetë të gjithë seksionin Doktrina e Besëlidhje 138 dhe të përcaktojnë vargjet që i thellojnë të kuptuarit e tyre lidhur me të vërtetat për botën e shpirtrave që jepen mësim te 1 Pjetër.

Lexo vargjet te Doktrina e Besëlidhje 138:29–34, 57–58 , duke kërkuar ide të tjera rreth shërbesës së Shpëtimtarit në botën e shpirtrave.

• Çfarë mësove nga studimi yt i seksionit Doktrina e Besëlidhje 138 që e ndjeve se ishte veçanërisht e rëndësishme? Përse?

• Si mund të ndikojë të kuptuarit e asaj që ndodh në botën e shpirtrave në përvojat e tua për bërjen e punës në tempull dhe për historinë familjare?

• Çfarë provash për dashurinë dhe mëshirën e Jezu Krishtit sheh te këto vargje?

Përgjegjësia jonë

Plaku Dejll G. Renland, i Kuorumit të Dymbëdhjetë Apostujve, foli për përgjegjësinë që kemi për ta ndihmuar Shpëtimtarin në punën e Tij të shëlbimit të të vdekurve. Ti mund të duash të shohësh materialin filmik “Historia Familjare dhe Puna në Tempull: Vulosja dhe Shërimi”, që gjendet te ChurchofJesusChrist.org, nga kodet kohore 03:01 deri në 03:47 ose të lexosh thënien vijuese:

“Si anëtarë të Kishës, ne kemi vërtet një përgjegjësi të caktuar në mënyrë hyjnore për t’i kërkuar paraardhësit tanë dhe për t’i grumbulluar historitë familjare. Kjo është shumë më tepër sesa një hobi për të cilin nxitemi, sepse ordinancat e shpëtimit janë të nevojshme për të gjithë fëmijët e Perëndisë. Ne duhet t’i përcaktojmë vetë paraardhësit tanë të cilët vdiqën pa i marrë ordinancat e shpëtimit. Ne mund t’i kryejmë ordinancat në mënyrë mëkëmbëse në tempuj dhe paraardhësit tanë mund të zgjedhin t’i pranojnë ordinancat. Ne nxitemi gjithashtu që t’i ndihmojmë anëtarët e lagjeve dhe të kunjeve me emrat e familjeve të tyre. Është mahnitëse aq sa të lë pa frymë fakti që, nëpërmjet historisë familjare dhe punës në tempull, ne mund të ndihmojmë për t’i shëlbuar të vdekurit.”

(Dejll G. Renland, “Historia Familjare dhe Puna në Tempull: Vulosja dhe Shërimi”, Ensign ose Liahona, maj 2018, f. 47)

• Si ka ndikuar pjesëmarrja në historinë familjare dhe punën në tempull në jetën tënde ose në jetën e të tjerëve? Nëse nuk ke marrë pjesë ende në të, si mendon se mund të ndikojë në jetën tënde?

Në kohën e mbetur të orës mësimore, ndihmojini nxënësit të fillojnë të marrin pjesë në punën e shpëtimit për të vdekurit. Merrini parasysh një ose disa nga idetë vijuese.

• Vizito faqen FamilySearch.org ose përdor programin kompjuterik “Pema Familjare” të FamilySearch. Shiko nëse mund të gjesh emrat e paraardhësve të cilëve u nevojitet ende të marrin ordinancat e priftërisë. Ti ose mund t’i rezervosh këta emra dhe t’i çosh ata në tempull vetë ose t’i dorëzosh emrat në tempull në mënyrë që dikush tjetër të mund t’i kryejë ordinancat për ta. Veçoria “Ordinancat Gati” mund të përdoret për të të ndihmuar që t’i përcaktosh shpejt paraardhësit të cilët kanë nevojë për ordinancat e priftërisë.

• Vizito pjesën “Family History” [“Historia Familjare”] tek Temat e Ungjillit (topics.ChurchofJesusChrist.org) për të gjetur shpjegime, shkrime të shenjta, mesazhe nga konferencat e përgjithshme dhe materiale filmike rreth historisë familjare.

• Vizito koleksionin e materialeve filmike “Family History” [“Historia Familjare”] te Media Library [Mjete Informimi për Ungjillin] (videos.ChurchofJesusChrist.org) për të gjetur materiale filmike frymëzuese rreth pjesëmarrjes në punën në tempull dhe për historinë familjare.

• Bëj një listë me pyetje rreth paraardhësve të tu që mund t’ua bësh prindërve të tu apo të afërmve të tjerë. Në një kohë të volitshme, bëji pyetjet e tua dhe diskuto se si familja jote mund të marrë pjesë së bashku në punën në tempull dhe për historinë familjare.

Komente dhe Informacion për Rrethanat

Cila është përgjegjësia ime ndaj paraardhësve të mi të vdekur?

Plaku Kuentin L. Kuk, i Kuorumit të Dymbëdhjetë Apostujve, dha mësim:

“Doktrina e familjes në lidhje me historinë familjare dhe punën e tempullit është e qartë. Zoti në udhëzimet e zbulesës fillestare iu drejtua ‘pagëzimi[t] për të vdekurit tuaj’ [ Doktrina e Besëlidhje 127:5 ; theksimi i shtuar]. Detyrimi ynë doktrinor është kundrejt vetë paraardhësve tanë. Kjo është ngaqë organizimi çelestial i qiellit bazohet tek familjet. Presidenca e Parë i ka nxitur anëtarët, veçanërisht rininë dhe të rinjtë në moshë madhore beqarë, që ta theksojnë punën për historinë familjare dhe ordinancat për emrat e vetë familjeve të tyre ose për emrat e paraardhësve të anëtarëve të lagjeve dhe kunjeve të tyre. Ne kemi nevojë të lidhemi si me rrënjët dhe me degët.”

(Kuentin L. Kuk, “Rrënjët dhe Degët”, Ensign ose Liahona, maj 2014, f. 45)

Presidenti Tomas S. Monson (1927–2018) dha mësim:

“Zoti nuk ka treguar kurrë, me aq sa di unë, se puna e Tij është e kufizuar vetëm në vdekshmëri. Përkundrazi, puna e Tij përqafon përjetësinë. Unë besoj se Ai po e përshpejton punën e Tij në botën e shpirtrave. Besoj gjithashtu se, nëpërmjet shërbëtorëve të Tij atje, Zoti po përgatit shumë shpirtra për të marrë ungjillin. Puna jonë është që t’i kërkojmë të vdekurit tanë e më pas të shkojmë në tempull e të kryejmë ordinancat e shenjta që do t’u sjellin atyre përtej velit të njëjtat mundësi që kemi ne. …

Vëllezërit dhe motrat e mia, dëshmoj se Zoti do të na bekojë teksa ne e pranojmë dhe i përgjigjemi kësaj sfide.”

(Thomas S. Monson, “Hastening the Work”, Ensign, qershor 2014, f. 4–5)

Si mund të përfshihem në punën në tempull dhe për historinë familjare?

Presidenti Rasëll M. Nelson shpalli:

“Në çfarëdo kohe që bëni çfarëdo gjëje që e ndihmon cilindo – në çdonjërën prej anëve të velit – të hedhë një hap drejt bërjes së besëlidhjeve jetike me Perëndinë dhe marrjes së ordinancave të veta thelbësore të pagëzimit dhe tempullit, ju po ndihmoni që Izraeli të mblidhet. Kaq e thjeshtë është.”

(Rasëll M. Nelson dhe Uendi W. Nelson, “Shpresa e Izraelit” [takim shpirtëror mbarëbotëror për rininë, 3 qershor 2018], material shtesë për revistat New Era dhe Ensign, f. 15, ChurchofJesusChrist.org)

Si mund të më bekojë puna në tempull dhe për historinë familjare?

Në mesazhin e tij në konferencën e përgjithshme të prillit 2018, Plaku Dejll G. Renland, i Kuorumit të Dymbëdhjetë Apostujve, renditi shumë nga bekimet që mund të marrim nga pjesëmarrja në punën në tempull dhe për historinë familjare. Shikojeni këtë pjesë të shkëputur ose lexojeni të gjithë mesazhin (Dejll G. Renland, “Historia Familjare dhe Puna në Tempull: Vulosja dhe Shërimi”, Ensign ose Liahona, maj 2018, f. 46–49).

Veprimtari Plotësuese të të Mësuarit

Shkruani një bisedë ose mësim

Për t’i ndihmuar nxënësit ta përmbledhin atë që mësuan rreth punës së shpëtimit për të vdekurit, mund t’i ftoni ata të shkruajnë një bisedë apo mësim të shkurtër duke përdorur të vërtetat nga vargjet te 1 Pjetër 3:18 ; 4:6 dhe Doktrina e Besëlidhje 138. Ata mund të tregojnë edhe përvoja që lidhen me përfshirjen e tyre në këtë punë dhe mënyrën se si i ka ndihmuar ata të afrohen më shumë me Zotin.

Relatives Around Me [Të Afërmit Rreth Meje]

Një nga veçoritë argëtuese te programi kompjuterik Pema Familjare në FamilySearch quhet “Relatives Around Me” [“Të Afërmit Rreth Meje”]. Kur shumë pajisje e kanë këtë veçori të hapur, programi mund të gjejë paraardhës të përbashkët mes përdoruesve të pajisjeve. Ftojini nxënësit ta gjejnë dhe hapin veçorinë “Relatives Around Me” [“Të Afërmit Rreth Meje”] për të parë se me cilin prej njerëzve në klasë kanë lidhje familjare. Nxënësit mund të zbulojnë se kanë lidhje familjare më të ngushtë nga sa mendonin më parë. Ftojini nxënësit të ndahen në dyshe dhe të mësojnë më shumë rreth disa prej paraardhësve të tyre të përbashkët. Nëse ndonjë paraardhës ka nevojë për kryerjen e ordinancave të pagëzimit dhe konfirmimit, ftojini nxënësit ta rezervojnë atë emër dhe ta çojnë atë në tempull.