Zotërimi Doktrinor: 2 Timoteut 3:15–17

“Shkrimet e Shenjta … Mund të të Bëjnë të Ditur për Shpëtimin”

Studimi i rregullt i shkrimeve të shenjta mund ta bekojë jetën tënde në shumë mënyra, përfshirë ndihmën për të kaluar nëpër shumë sfida të ditëve të fundit. Ky mësim mund të të ndihmojë të mësosh përmendsh referencën e zotërimit doktrinor dhe frazën kyç të shkrimit të shenjtë për vargjet te 2 Timoteut 3:15–17 , të shpjegosh doktrinën dhe t’i zbatosh parimet e marrjes së njohurisë shpirtërore në një situatë nga jeta reale.

Interpretimi me role. Interpretimi me role mund t’i ndihmojë nxënësit të fitojnë përvojë me vlerë duke shpjeguar të vërtetat e ungjillit dhe duke kuptuar më mirë se si mund të sillen ata në situata nga jeta reale.

Përgatitja e nxënësve: Ftojini nxënësit të mendojnë për cilëndo sfidë që i pengon t’i studiojnë shkrimet e shenjta çdo ditë. Nxitini të mendojnë për mënyra se si parimet e marrjes së njohurisë shpirtërore mund t’i ndihmojnë ata t’i kapërcejnë pengesat e tyre.

Veprimtari të Mundshme të të Mësuarit

Ky mësim i fragmentit të zotërimit doktrinor është hartuar për t’u dhënë pas mësimit “2 Timoteut 3”, që është mësimi kontekstual për fragmentin e zotërimit doktrinor te 2 Timoteut 3:15–17. Nëse ky mësim i fragmentit të zotërimit doktrinor duhet të zhvendoset në një javë tjetër, sigurohuni që të jepni edhe mësimin përkatës kontekstual gjatë asaj jave.

Mëso përmendsh dhe shpjego

Vizato një figurë të një libri të hapur të shkrimit të shenjtë që zë pjesën më të madhe ose të gjithë copën e letrës. Në krye të vizatimit tënd shkruaj 2 Timoteut 3:15–17. Brenda vizatimit tënd shkruaj frazën kyç të shkrimit të shenjtë: Shkrimet e shenjta … mund të të bëjnë të ditur për shpëtimin. Mbuloje frazën me diçka dhe shkruaje atë sërish nga ajo që mban mend. Kontrollo saktësinë dhe përsërite ushtrimin disa herë derisa ta kesh mbushur vizatimin tënd.

Pasi nxënësit t’i kenë vizatuar figurat e tyre, merreni parasysh t’i ndani nxënësit në dyshe dhe t’i ftoni ata ta shkruajnë me radhë frazën kyç të shkrimit të shenjtë.

Në mësimin e mëparshëm ti mësove se teksa i studiojmë shkrimet e shenjta, ne mund të fitojmë urtësi që do të na çojë në shpëtim nëpërmjet besimit te Jezu Krishti. Lexoji përsëri vargjet te 2 Timoteut 3:15–17 , duke kërkuar provën e këtij parimi, si edhe bekime të tjera që mund t’i marrim nga studimi i shkrimeve të shenjta.

Merreni parasysh t’i ndani nxënësit në grupe të vogla në mënyrë që ata të mund ta interpretojnë me role skenarin vijues. Provoni të lëvizni rreth klasës për të dëgjuar se si “misionarët/et” i japin mësim “kërkuesit/es”. Merreni parasysh t’i pyesni nxënësit më pas se çfarë ndien se ishte e lehtë ose e vështirë rreth përvojës.

Përfytyro sikur je një misionare që i jep mësim një të reje me emrin Sara. Sara e ka pranuar mesazhin e Rivendosjes, por ka qenë ngurruese për t’i lexuar fragmentet e shkrimeve të shenjta që ti dhe shoqja e misionit i keni sugjeruar. Gjatë një vizite, ti e pyet Sarën se çfarë e ka penguar t’i lexojë shkrimet e shenjta. Ajo përgjigjet se nuk i pëlqen t’i lexojë shkrimet e shenjta dhe i duken të mërzitshme.

Duke përdorur vargjet te 2 Timoteut 3:15–17 , shkruaj një përgjigje që shpjegon bekimet dhe dobitë nga studimi i shkrimeve të shenjta në një mënyrë që mund ta nxitë Sarën. Nëse është e mundur, merre parasysh të shtosh përvoja dhe dëshminë vetjake si pjesë e përgjigjes tënde.

Ushtroje vënien në zbatim

• Po të të duhej t’i përmblidhje tri parimet e marrjes së njohurisë shpirtërore me një fjali secilin, çfarë do të thoshe?

Nëse është e nevojshme, shpenzo disa minuta duke shqyrtuar paragrafët 5–12 te pjesa “Marrja e Njohurisë Shpirtërore” te materiali Dokumenti Bazë i Zotërimit Doktrinor (2022).

Merreni parasysh ta ftoni një nxënës të zgjedhë në mënyrë rastësore dhe të lexojë me zë një nga fjalitë përmbledhëse nga cilido prej tri parimeve të marrjes së njohurisë shpirtërore. Kërkojini klasës të përcaktojë se me cilin parim lidhet fjalia. Përsëriteni këtë veprimtari disa herë. 

Edhe nëse i dimë dhe i kuptojmë bekimet nga studimi i shkrimeve të shenjta, nganjëherë mund të jetë e vështirë ta bësh atë rregullisht dhe me efektshmëri.

• Cilat janë disa sfida që mund ta bëjnë të vështirë për t’i studiuar shkrimet e shenjta rregullisht dhe me efektshmëri?

Merreni parasysh t’i shkruani në tabelë përgjigjet e nxënësve.

Gjatë veprimtarisë vijuese, merreni parasysh të bëni një lutje në heshtje për nxënësit tuaj që të jenë të hapur ndaj nxitjeve të Shpirtit, që të mund t’i përdorin parimet e marrjes së njohurisë shpirtërore për vete.

Kërko udhërrëfimin e Frymës së Shenjtë për të të ndihmuar të përcaktosh një ose dy pengesa që të pengojnë t’i studiosh shkrimet e shenjta rregullisht dhe me efektshmëri. (Nëse nuk po përballesh me ndonjë pengesë, mendo për pengesat me të cilat mund të përballet një mik apo pjesëtar i familjes.)

Shkruaj të paktën tri mënyra se si mund t’i përdorësh parimet e marrjes së njohurisë shpirtërore për të të ndihmuar t’i kapërcesh këto pengesa. Pyetjet dhe idetë në vijim mund të të ndihmojnë.

Merreni parasysh t’i shkruani tri pyetjet vijuese në tabelë.

Gjithashtu, ju mund t’i ftoni nxënësit të mendojnë se si studimi i shpeshtë dhe i sinqertë i shkrimeve të shenjta mund të ndikojë në përparimin e tyre të përjetshëm. Ata mund të marrin parasysh çdo përvojë pozitive që kanë pasur tashmë dhe ato të vërteta të përjetshme që mësuan nga ato përvoja.

• Si mund t’i shqyrtosh pengesat për studimin tënd të shkrimeve të shenjta me një këndvështrim të përjetshëm?

• Si mund të të ndihmojnë të vërtetat te vargjet te 2 Timoteut 3:15–17 të kesh një këndvështrim të përjetshëm kur po has vështirësi për studimin e shkrimeve të shenjta?

• Si mund të kërkosh kuptueshmëri të mëtejshme nëpërmjet burimeve të caktuara në mënyrë hyjnore?

Në vijim janë disa ide:

1. Gjej fragmente rreth studimit të shkrimeve të shenjta tek Udhëzuesi për Shkrimet e Shenjta në dispozicion në ChurchofJesusChrist.org, duke kërkuar bekimet dhe premtimet që mund të ndihmojnë lidhur me pengesën tënde. Shkrimet e shenjta si Jozueut 1:8 ; 2 Nefi 32:3 dhe Doktrina e Besëlidhje 1:37 mund të jenë të dobishme.

2. Pyete dikë tek i cili ke besim, se përse i studion shkrimet e shenjta çdo ditë dhe si të rekomandon se mund ta kapërcesh pengesën tënde.

3. Kërko pohime nga Autoritetet e Përgjithshme ose artikuj në revistat e Kishës që mund të ndihmojnë. Për shembull, pohimi vijues mund ta ndihmojë dikë që e ka të vështirë të gjejë kohë për studimin e shkrimeve të shenjta.

Plaku Riçard G. Skot (1928–2015), i Kuorumit të Dymbëdhjetë Apostujve, dha mësim:

“Ushqyerja me bollëk me fjalën e Perëndisë çdo ditë është më e rëndësishme sesa gjumi, shkolla, puna, shfaqjet televizive, videolojërat apo mediat shoqërore. Mund t’ju duhet të riorganizoni përparësitë tuaja për të siguruar kohë për studimin e fjalës së Perëndisë. Nëse ju duhet, bëjeni atë!”

(Riçard G. Skot, “Bëjeni Ushtrimin e Besimit Përparësinë Tuaj Parësore”, Ensign ose Liahona, nëntor 2014, f. 93)

Gjej disa minuta për të filluar me një nga idetë e tua.

• Si mund të veprosh me besim për t’i kapërcyer pengesat ndaj studimit ditor të efektshëm të shkrimeve të shenjta? Rendit disa ide në ditarin tënd të studimit.

Pas një kohe të mjaftueshme, ftojini disa nxënës të tregojnë një pikë kulmore të përvojës së tyre gjatë këtij mësimi. Kujtojini ata se shumica, në mos të gjithë ne, përballemi me pengesa ndaj studimit të efektshëm ditor të shkrimeve të shenjta dhe shprehja e mendimeve, pikëpamjeve dhe përvojave mund t’i ndihmojë të tjerët në klasë. Tregoni edhe mendimet dhe dëshminë vetjake.

Përsëritja e zotërimit doktrinor 

Gjatë një mësimi të ardhshëm, shpenzoni disa minuta duke përsëritur referencën e shkrimeve të shenjta dhe frazën kyç të shkrimeve të shenjta për këtë fragment të zotërimit doktrinor duke përdorur të njëjtën veprimtari të mësimit përmendsh në fillim të këtij mësimi.

Veprimtari Plotësuese të të Mësuarit

Burimet e caktuara në mënyrë hyjnore

Ndërsa nxënësit janë duke menduar se si të kërkojnë ndihmë nëpërmjet burimeve të caktuara në mënyrë hyjnore, merreni parasysh ta ftoni një nxënës të kërkojë në internet për të parë se sa libra “autodidaktë” janë aktualisht në dispozicion. Me siguri ai do të shohë dhjetëra mijëra alternativa. Merreni parasysh të bëni pyetje si të mëposhtmet:

• Si mendoni, përse ka kaq shumë libra autodidaktë në botë?

• Si mund të jenë shkrimet e shenjta një burim i fuqishëm ndihme dhe udhërrëfimi për jetën tonë?

Ftojini nxënësit të lidhin si referenca kryq vargjet te 2 Timoteut 3:15–17 me Doktrina e Besëlidhje 88:118 dhe pyetini ata se çfarë mendojnë se nënkuptoi Zoti me fjalët “librat më të mirë”. Merreni parasysh t’u kujtoni nxënësve se ka shumë burime të vlefshme në botë për të na ndihmuar të zhvillojmë urtësi dhe t’i kapërcejmë sfidat. Ftojini nxënësit të shqyrtojnë paragrafët 5–12 të pjesës “Marrja e Njohurisë Shpirtërore” te materiali Dokumenti Bazë i Zotërimit Doktrinor dhe të përcaktojnë fjalë ose fraza që i theksojnë shkrimet e shenjta si një burim thelbësor urtësie dhe njohurie për jetën e tyre.

Një shembull i të vepruarit me besim

Merreni parasysh t’i pyesni nxënësit se çfarë mund të bëjnë për të vepruar me besim nëse e kanë të vështirë t’i kuptojnë shkrimet e shenjta. Pasi nxënësit të shprehin mendimet e tyre, merreni parasysh të shtoni disa ose të gjithë shembujt vijues.

• Lutuni për kuptueshmëri përpara se të studioni.

• Lexojini titujt e kapitujve për një krijuar një vështrim të përgjithshëm.

• Ushtroni kërkimin për t’i kuptuar shkrimet e shenjta në kishë dhe në seminar duke u bërë mësuesve pyetje.

• Me raste lexoni me dikë që e besoni, siç është një prind, i cili mund t’ju ndihmojë me shpjegimin e shkrimeve të shenjta.

• Përdorini manualet në dispozicion te programi kompjuterik Gospel Library [Biblioteka e Ungjillit] ose te ChurchofJesusChrist.org, siç është Manuali i Nxënësit të Seminarit.