1 Timoteut 4:12–16

“Bëhu Shembull për Besimtarët”

Nuk mund të ketë qenë e lehtë ta jetoje ungjillin e Jezu Krishtit në një vend me ligësi si Efesi. Sigurisht, ata si Timoteu që zgjodhën të jetonin një jetë të drejtë, u dalluan nga bashkëmoshatarët e tyre. Por Pali e nxiti Timoteun që të mos ndikohej nga kritikat e të tjerëve për moshën e tij të re apo besimin e tij dhe të “bëh[ej] shembull për besimtarët” (1 Timoteut 4:12). Ky mësim ka për qëllim të të ndihmojë të përpiqesh të jesh shembull i një dishepulli të Jezu Krishtit në rininë tënde.

Përdorimi i listave ose tabelave. Ndihmojini nxënësit të mësojnë se si t’i studiojnë shkrimet e shenjta në mënyrë më të efektshme duke u treguar atyre se si të krijojnë lista ose tabela. Kjo mund t’i ndihmojë ata t’i organizojnë dhe kuptojnë hollësitë në shkrimet e shenjta, si edhe mbresat që marrin nga Fryma e Shenjtë. Ky mësim do të paraqesë një mundësi që nxënësit ta ushtrojnë këtë aftësi.

Përgatitja e nxënësve: Ftojini nxënësit të mendojnë rreth pyetjes vijuese dhe të përgatiten për t’i shprehur mendimet e tyre: Nëse dikush do të qëndronte pranë jush për një javë çfarë prove do të shihte ai që ju po përpiqeni ta ndiqni Jezu Krishtin?

Veprimtari të Mundshme të të Mësuarit

Mësimi vijues i ndihmon nxënësit të studiojnë mësimet e Palit rreth të qenit një shembull për besimtarët. Për t’i ndihmuar nxënësit të studiojnë më shumë nga mësimet e Palit, merreni parasysh ta ndani klasën në tri grupe. Një grup mund të studiojë vargjet te 1 Timoteut 4:12–16 duke përdorur këtë mësim dhe dy grupet e tjera mund të studiojnë vargjet te 1 Timoteut 6:7–12 dhe 2 Timoteut 1:1–8 duke përdorur informacionin te pjesa “Veprimtari Plotësuese të të Mësuarit”. Më pas nxënësit mund të tregojnë atë që mësuan.

Çfarë thotë rreth teje?

Nëse dikush do të të vëzhgonte për një javë, çfarë prove do të shikonte ai që ti po përpiqesh ta ndjekësh Jezu Krishtin?
Çfarë mund të shohë ai në jetën tënde që mund të ketë nevojë për pak përmirësim ndërsa ti përpiqesh ta ndjekësh Krishtin?

Merreni parasysh të ftoni disa nxënës që t’i shprehin mendimet e tyre.

Merre parasysh të shikosh materialin filmik “The Lost Purse” [“Çanta e Humbur”] (02:40), në dispozicion në ChurchofJesusChrist.org, i cili ilustron disa shembuj të dishepullimit si të Krishtit.

Përse është e rëndësishme ta marrësh parasysh se çfarë shembulli po japim për të tjerët?

Mendo se sa mirë ndihesh rreth të qenit një shembull i një ndjekësi të Jezu Krishtit për ata që të rrethojnë dhe përse.

Teksa e studion këtë mësim, kërko udhërrëfimin e Frymës së Shenjtë për të përcaktuar mënyrën se si ti po jep një shembull që i ndihmon të tjerët dhe i drejton ata te Shpëtimtari. Nëse ndihesh në siklet duke qenë shembull për të tjerët, kërko të vërtetat që mund të të ndihmojnë dhe motivojnë.

Nxitja e Palit për Timoteun

Dhiata e Re përfshin dy letra që Pali ia shkroi njërit prej miqve të tij më të besuar, Timoteut (shih 1 Korintasve 4:17). Teksa e lexon informacionin vijues rreth Timoteut, mendo se përse shembulli i tij do të sillte ndryshim për të tjerët. A e sheh veten tek ai në ndonjë mënyrë?

E ëma dhe gjyshja e Timoteut ishin shembuj të drejtë, por babai i tij ishte një grek johebre që me gjasa nuk ishte besimtar (shih Veprat e Apostujve 16:1 ; 2 Timoteut 1:5 ; 3:14–15).
Timoteu po shërbente si udhëheqës Kishe në Efes (shih 1 Timoteut 1:3), një qytet i madh ku adhurimi i idhujve dhe imoraliteti ishin të përhapur (shih Veprat e Apostujve 19:35).
Pali la të kuptonte se disa anëtarë dyshuan tek aftësitë udhëheqëse të Timoteut ngaqë ishte i ri në moshë (shih 1 Timoteut 4:12).

Lexo te 1 Timoteut 4:12–16 , duke kërkuar atë që Pali e këshilloi Timoteun të bënte.

Çfarë gjete që t’u duk domethënëse?
Si do ta përmblidhje ftesën e Palit te vargu 12 dhe premtimin te vargu 16 në një pohim të vetëm të vërtete?

Lejojini nxënësit të përdorin fjalët e tyre, por ndihmojini ata të përcaktojnë të vërtetën vijuese.

Pali dha mësim te 1 Timoteut 4:12, 16 se nëse jemi shembuj besimtarësh të Jezu Krishtit, ne mund të ndihmojmë për t’i sjellë shpëtim vetes sonë dhe të tjerëve.

Përcaktimi i listave në shkrimet e shenjta mund të na ndihmojë të shohim mënyra të shumta për t’i zbatuar të vërtetat e ungjillit në jetën tonë. Te vargu 12 , Pali renditi fusha në të cilat ne mund të bëhemi më shumë si Krishti për të qenë shembuj të mirë për ata që na rrethojnë.

Lexo vargun 12 përsëri dhe shenjo fjalë që e përshkruajnë çdo fushë ku Pali na ftoi të përqendrohemi. Merre parasysh ta kopjosh këtë listë në ditarin tënd të studimit.

Merreni parasysh të shkruani në tabelë një listë të fushave që përcaktojnë nxënësit. Lini hapësirë në tabelë për të shkruar disa ide poshtë çdo fushe më vonë në mësim.

Si do ta shpjegoje kuptimin e secilës prej këtyre fjalëve? (Nëse është e nevojshme, përdori mjetet e studimit të shkrimeve të shenjta ose një fjalor për të të ndihmuar t’i përcaktosh ato.)

Mund të jetë e dobishme të vësh re fjalën sjellje të përmendur në këtë varg.

Kë njeh ti që është një shembull i mirë në këto fusha? Si të kanë ndihmuar ty dhe të tjerët shembujt e tyre?

Ndërsa nxënësit përsiatin për këtë pyetje, ftojini ata t’i marrin parasysh anëtarët e klasës së tyre. Ftojini disa nxënës të flasin. Nxënësit mund të shkruajnë gjithashtu shënime për anëtarët e tjerë të klasës rreth mënyrës se si ata kanë qenë shembuj të mirë për ta. Vëmendja ndaj shembujve të mirë të të tjerëve dhe përgëzimi për ta mund të ndërtojnë unitet në një klasë.

Në ç’mënyrë Jezu Krishti ishte shembulli i përsosur në këto fusha? Si të ka bekuar shembulli i Tij ty dhe të tjerët?
Si mendon, përse Zoti do që ti të jesh një shembull për të tjerët në këto fusha?

Si mund të jesh një shembull?

Bëj një listë të disa mënyrave se si mund të jesh një shembull në fushat që zgjodhe. Për shembull, për të qenë një shembull “në fjalë”, ti mund të renditësh disa nga idetë vijuese:

të shprehësh mirënjohje më shpesh
t’u bësh njerëzve lëvdata të sinqerta
të thuash të vërtetën
të shmangësh përdorimin e blasfemisë
ta shprehësh dashurinë tënde më shpesh
t’u drejtohesh njerëzve me respekt
të shmangësh bërjen e thashethemeve
të lutesh më sinqerisht

Nëse idetë e tyre nuk janë shumë vetjake, ftojini nxënësit t’i tregojnë ato duke i shkruar poshtë titujve në tabelë.

Gjej një çast për të përsiatur se si Zoti mund të të bekojë ty dhe të tjerët nëse përpiqesh të jesh një shembull në këto mënyra.

Çfarë ke mësuar ose ndier sot që do të të ndihmojë të jesh një shembull më i mirë i një dishepulli të Jezu Krishtit?
Çfarë do të bësh për të qenë ai shembull për të tjerët?
Çfarë shpreson që shembulli yt do t’u mësojë të tjerëve rreth Jezu Krishtit dhe Kishës së Tij të rivendosur? Përse?

Dëshmoni për fuqinë që një shembull i mirë mund të ketë tek ata që e shohin atë. Merreni parasysh të tregoni një histori vetjake të të qenit i bekuar nga shembulli si i Krishtit i dikujt dhe ftojini nxënësit ta zbatojnë ndryshimin ose ndryshimet që përcaktuan në këtë mësim.

Komente dhe Informacion për Rrethanat

Si mund të jem një shembull më i mirë?

Merreni parasysh të shikoni këtë material filmik vijues, në dispozicion në ChurchofJesusChrist.org, që tregon mënyra se si të rinjtë janë një shembull për ata që i rrethojnë. Ndërsa e shikoni, mendoni për mënyrat se si ju mund të jeni një shembull për të tjerët.

“Shpërndarja e Dritës Suaj” (02:56)

A ka me të vërtetë rëndësi shembulli im si adoleshent?

Motra Boni H. Kordën, Presidente e Përgjithshme e Të Rejave, dha mësim rreth rëndësisë së shembullit tuaj:

“Miqtë e mi të dashur, përse është kaq e rëndësishme që drita jonë të shkëlqejë? Zoti na ka thënë se ‘ka shumë vetë akoma mbi tokë … të cilët mbahen larg nga e vërteta vetëm ngaqë nuk dinë se ku ta gjejnë atë’ [ Doktrina e Besëlidhje 123:12]. Ne mund të ndihmojmë. Ne mund ta lëmë dritën tonë të shkëlqejë qëllimisht që të tjerët të mund të shohin. Ne mund të bëjmë një ftesë. Mund ta bëjmë rrugëtimin me ata që po e hedhin një hap drejt Shpëtimtarit, s’ka rëndësi nëse është një hap i pavendosur. …

Unë dëshmoj se Zoti do ta lartësojë çdo përpjekje të vogël. Fryma e Shenjtë do të na nxitë të dimë se çfarë të themi e të bëjmë. Përpjekje të tilla mund të na kërkojnë që të dalim nga zona jonë e rehatisë, por mund të jemi të sigurt se Zoti do të na ndihmojë që drita jonë të shkëlqejë.”

(Boni H. Kordën, “Që Ata të Shohin”, Ensign ose Liahona, maj 2020, f. 80)

Presidenti Tomas S. Monson (1927–2018), dha mësim për të qenit një shembull:

“Bëhuni shembull …. Mundësitë tona gjenden para nesh këtu dhe tani. Por ato mund të prishen. Me gjasa ato do të gjenden në shtëpitë tona dhe në veprimet e përditshme të jetës sonë. Zoti dhe Mësuesi ynë shënoi mënyrën: ‘[Ai] e përshkoi vendin duke bërë mirë’. ( Veprat e Apostujve 10:38 .) Ai ishte model për t’u ndjekur në çdo vepër, madje shembull për besimtarët.

A jemi ne?”

(Thomas S. Monson, “An Example of the Believers”, Ensign, nëntor 1992, f. 98)

1 Timoteut 4:16. Çfarë nënkuptoi Pali kur tha: “Ruaje veten tënde”?

Ndërkohë që Pali përdori fjalët “do të shpëtosh veten dhe ata që të dëgjojnë” ( 1 Timoteut 4:16), ai dëshmoi gjithashtu se ne mund të shpëtohemi vetëm nëpërmjet Jezu Krishtit (shih 1 Timoteut 1:15–16 ; 2:5–6). Ne mund të ushtrojmë besim te Jezu Krishti nëpërmjet përpjekjeve tona dhe ta lejojmë Atë të na shpëtojë.

Veprimtari Plotësuese të të Mësuarit

1 Timoteut 6:7–12. Besimi te pasuritë apo te Perëndia

Tregoni një shumë të vogël parash dhe ftojini nxënësit të tregojnë disa mënyra se si ato mund të përdoren për mirë.

Ftojini nxënësit të lexojnë te 1 Timoteut 6:7–12 dhe të shpjegojnë se përse mendojnë se Pali do të jepte këtë paralajmërim dhe ftesë meqë ai duhet ta ketë ditur se paratë mund të përdoren për mirë. Pyetini se si të vërtetat në këto vargje mund të gjejnë zbatim tek të pasurit dhe të varfrit.

Jepuni kohë nxënësve t’i hetojnë shkrimet e shenjta, duke kërkuar këshillën që Zoti ka dhënë në lidhje me pasuritë. (Disa fragmente të mundshme përfshijnë vargjet te 1 Timoteut 6:17–19 ; Mateu 6:19–21, 24 ; Jakobi [LiM] 2:17–19 ; Doktrina e Besëlidhje 6:7 ; 56:16–17 .)

Ftojini nxënësit ta përmbledhin dhe tregojnë atë që mësuan nga këto shkrime të shenjta.

2 Timoteut 1:1–8. Mposhtja e frikës

Shkruajeni fjalën Frikë në tabelë dhe kërkojuni nxënësve të marrin parasysh se si mund të ndikojë frika te ne. Ftojini nxënësit të lexojnë vargjet te 2 Timoteut 1:1–8 , duke kërkuar një parim që mund t’i ndihmojë ata ta mposhtin frikën. Diskutoni parimin që, teksa kërkojmë me zell ta kemi Shpirtin me vete, ne mund ta mposhtim frikën dhe të mos na vijë turp për dëshminë tonë për Jezu Krishtin. Pyetje si ato në vijim mund t’i ndihmojnë nxënësit ta kuptojnë këtë parim:

Si mund të na ndihmojnë fuqia hyjnore, dashuria dhe gjykimi i mirë që marrim nëpërmjet Shpirtit, që ta mposhtim frikën?
Cilat janë mënyrat sipas të cilave mund të tregojmë se nuk kemi turp nga dëshmia jonë për Jezu Krishtin?
Kur ju ka ndihmuar Shpirti ta mposhtni frikën apo ju ka dhënë kurajë që të qëndroni të palëkundur në dëshminë tuaj për Jezu Krishtin?