Doktrinal nga Kahanas: Mga Taga-Efeso 1:10

Ang Pagpahiuli sa Tanan nga mga Butang

Sa imong pagtuon sa Mga Taga-Efeso 1, imong nakat-onan ang mahitungod sa doktrina sa Pagpahiuli. Kini nga leksiyon maghatag kanimo og kahigayonan aron mapalambo ang imong kahanas sa mga pagtulun-an sa Mga Taga-Efeso 1:10 pinaagi sa pagsag-ulo sa pakisayran ug sa mahinungdanong hugpong sa pulong sa kasulatan, pagpasabot sa doktrina, ug paggamit sa mga baroganan sa pag-angkon og espirituhanong kahibalo diha sa tinuod nga sitwasyon sa kinabuhi.

Paghinumdom sa katuyoan sa doktrinal nga kahanas. Si Presidente M. Russell Ballard sa Korum sa Napulog Duha ka Apostoles mipasabot nga ang doktrinal nga kahanas “magtutok sa atong mga estudyante sa pagpalig-on sa ilang pagtuo kang Jesukristo ug madugangan ang ilang abilidad nga masunod ug ma-apply ang ebanghelyo sa ilang kinabuhi. Pinaagi sa paggamit sa mga kasulatan ug sa pulong sa mga propeta, makat-onan nila unsaon sa paglihok uban sa pagtuo kang Kristo sa pag-angkon og espirituhanong kahibalo ug panabot sa Iyang ebanghelyo. Ug may oportunidad sila sa pagkat-on unsaon sa pag-apply ang doktrina ni Kristo ug mga baroganan sa ebanghelyo diha sa mga pangutana ug mga hagit nga ilang madungog ug makita kada adlaw sa ilang mga higala ug sa social media” (M. Russell Ballard, “Ang mga Oportunidad ug [mga] Respondibilidad sa mga Magtutudlo sa CES sa Ika-21 nga Siglo” [Pamulong ngadto sa CES Religious Educators, Peb. 26, 2016], broadcasts.ChurchofJesusChrist.org).

Pagpangandam sa estudyante: Dapita ang mga estudyante aron motambong sa klase nga andam mopaambit og labing menos sa duha ka mga kamatuoran nga pamati nila gikinahanglan sa tanan nga mahibaloan ug masabtan mahitungod sa Pagpahiuli.

Posible nga mga Kalihokan sa Pagkat-on

Gidisenyo kini nga leksiyon sa tudling sa doktrinal nga kahanas nga itudlo human sa leksiyon sa “Mga Taga-Efeso 1,” nga mao ang pangkonteksto nga leksiyon alang sa tudling sa doktrinal nga kahanas sa Mga Taga-Efeso 1:10 . Kon kinahanglang ibalhin kini nga leksiyon sa tudling sa doktrinal nga kahanas ngadto sa laing semana, seguroha nga itudlo usab ang tukma nga pangkontekstong leksiyon nianang semanaha.

Ipasabot ug isag-ulo

Handurawa nga pipila sa mga klasmeyt ang wala mitungha sa adlaw nga ang inyong klase nagtuon sa doktrina sa Pagpahiuli sa Mga Taga-Efeso 1 . Ang imong magtutudlo sa seminary naghangyo kanimo sa paggahin og pipila ka minuto aron sa pagsummarize sa labing importanteng mga pagtulun-an nga pamati nimo kinahanglang mahibaloan sa tanang mga estudyante ug mahinumdoman mahitungod sa doktrina sa Pagpahiuli ug ang mga pagtulun-an gikan sa Mga Taga-Efeso 1:10 .

Aron motubag, ang mga estudyante mahimong mogamit kon unsa ang ilang gibuhat alang sa pagpangandam sa estudyante alang niini nga leksiyon. Paminaw og maayo sa mga tubag sa mga estudyante, ug timbang-timbanga ang ilang pagsabot. Kon gikinahanglan, pagrebyo sa mga kasulatan ug mga baroganan gikan sa miaging leksiyon.

• Unsang importanteng mga kamatuoran mahitungod sa Pagpahiuli sa ebanghelyo ang imong ipaambit? Ngano man?

• Unsaon nimo sa pagpasabot sa mga pagtulun-an nga anaa makita sa Mga Taga-Efeso 1:10 sa imong kaugalingong mga pulong?

• Sa unsang paagi nga ang pagkasabot sa Pagpahiuli makaimpluwensiya sa pagsabot ug pagbati sa usa ka tawo ngadto sa Langitnong Amahan ug kang Jesukristo?

Hatagi ang mga estudyante og kahigayonan aron mosag-ulo sa pakisayran alang sa tudling sa doktrinal nga kahanas sa Mga Taga-Efeso 1:10 ug sa kauban niini nga mahinungdanong hugpong sa pulong sa kasulatan. Ang mosunod mao ang usa ka ehemplo kon unsaon kini pagbuhat.

Sa imong journal sa pagtuon o sa imong digital nga device, irekord ang mahinungdanong hugpong sa pulong sa kasulatan ug ang pakisayran alang sa tudling sa doktrinal nga kahanas sa Mga Taga-Efeso 1:10 pinaagi sa pagbahin niini ngadto sa upat ka mga parte sama sa gipakita sa ubos:

• Usa ka laraw nga pagatumanon inig-abot sa tukma nga panahon

• Laraw sa paghiusa

• Diha kang Kristo sa tanang mga butang

• Mga Taga-Efeso 1:10

Tabuni ang mga linya 2–4, ug subli-a ang linya 1 sa imong hunahuna hangtod imong masag-ulo kini. Balhin sa ikaduhang linya, ug balika ang proseso. Buhata ang susama alang sa mga linya 3 ug 4. Kon mabati nimo nga masaligon nga imong nasag-ulo ang tanang upat ka mga linya, isulat kini silang tanan diha sa imong journal sa pagtuon nga dili magtan-aw. Balika ang proseso kon gikinahanglan hangtod nga imo nang masulat ang tibuok mahinungdanong hugpong sa pulong sa kasulatan ug ang pakisayran gikan sa panumduman.

Ang miaging kalihokan mahimong ipahiangay pinaagi sa pagpakita sa upat ka mga gibahin nga seksiyon ug pag-assign og lainlaing mga grupo sa mga estudyante alang sa kada seksiyon. Dayon tudloa ang usa ka grupo, ug sultihi ang mga estudyante niana nga grupo nga subli-on ang ilang bahin sa makusog. Balika kini alang sa tanang mga grupo. Tudloa ang lainlaing mga grupo sa makadaghang higayon aron matabangan ang mga estudyante nga mabansay ang pagsulti ug pagkadungog niini nga mga hugpong sa mga pulong. Dayon ipabansay sa klase ang pagsubli sa tibuok nga hugpong ug pakisayran nga magkauban. Buhata kini kutob sa gikinahanglan aron masag-ulo sa mga estudyante kini nga tudling sa doktrinal nga kahanas ug ang iyang mahinungdanong hugpong sa pulong sa kasulatan.

Pagbansay sa paggamit

Mahimong irebyo ang mga parapo 5–12 diha sa Kinauyokang Dokumento sa Doktrinal nga Kahanas (2022). Pagpili og usa sa tulo ka mga baroganan sa pag-angkon og espirituhanong kahibalo, ug pagmugna og usa ka icon o yanong biswal nga representasyon aron magpahinumdom kanimo niini nga baroganan ug sa iyang konsepto. Pananglitan, alang sa baroganan nga “susiha ang mga konsepto ug mga pangutana inubanan sa mahangtorong panglantaw,” mahimo nimong ikonsiderar ang paghimo og usa ka biswal sama sa mosunod:

Aron maseguro ang igong oras alang sa mosunod nga pagbansay sa paggamit, mahimong hatagan ang mga estudyante og limitasyon sa oras nga duha hangtod sa upat ka minuto aron pagmugma og usa ka yanong biswal nga representasyon sa usa sa mga baroganan sa pag-angkon og espirituhanong kahibalo. Kon mahuman na ang mga estudyante, dapita ang pipila sa pagpaambit sa ilang mga biswal ug ipasabot giunsa sa pagrepresentar sa ilang gimugna ang baroganan nga ilang gipili.

Basaha ang mosunod nga senaryo aron matabangan ka nga mabansay ang paggamit sa mga baroganan sa pag-angkon og espirituhanong kahibalo ug ang doktrina nga gitudlo sa Mga Taga-Efeso 1:10 nga panahon sa dispensasyon sa kahingpitan sa panahon, ang tanang mga butang managkatigom diha kang Kristo. Dayon gamita kini nga senaryo, o pagmugna og usa sa imong kaugalingon, aron matubag ang mga pangutana nga mosunod.

Usa ka higala nimo ang gibunyagan kauban ang iyang pamilya ug mibati nga masaligon niana nga panahon nga siya misunod sa ehemplo ni Jesukristo pinaagi sa pag-apil sa Iyang Simbahan. Apan sa miaging tuig sukad sa iyang pagbunyag, siya kanunay nga gitintal sa uban niyang mga higala nga mosupak sa mga sugo. Siya nagsugod na og pagduhaduha kon kini ba gayod ang tinuod nga Simbahan ni Kristo ug kon angayan ba nga magpabiling matinud-anon sa ebanghelyo.

Samtang adunay daghang mga kamatuoran nga mahimong makatabang sa imong higala, tan-awa unsaon sa mga doktrina sa Pagpahiuli ug ang dispensasyon sa kahingpitan sa panahon lagmit makapalig-on ug makadasig kaniya.

Inay nga sultihan ang mga estudyante nga motubag sa tanang mosunod nga mga pangutana sa makausa, mahimong dugangan og lain pa aron matabangan ang mga estudyante nga makabaton og usa ka halandumon nga kasinatian. Pananglitan, mahimong dapiton ang mga estudyante nga mobuhat kauban sa pares o gagmayng mga grupo aron maghisgot sa mga pangutana. Mahimo sab silang mag drama-drama sa senaryo gamit ang ilang mga tubag alang sa pipila sa mosunod nga mga pangutana. Isip lain nga kapilian, ang magpares o gagmayng mga grupo mahimong hatagan og usa lamang sa mga baroganan sa pag-angkon og espirituhanong kahibalo aron tubagon ug dayon i-presentar ang ilang mga hunahuna ngadto sa klase.

Lihokon inubanan sa hugot nga pagtuo

• Unsa kaha nga mga lakang ang mahimo nimong buhaton nga makapadasig sa imong higala aron siya makalihok inubanan sa hugot nga pagtuo?

• Sa unsang paagi nga ang paglihok inubanan sa hugot nga pagtuo makatabang sa imong higala diha sa iyang mga pangutana ug mga kabalaka?

Susiha ang mga konsepto ug mga pangutana inubanan sa mahangtorong panglantaw

• Unsa ang imong nahibaloan mahitungod sa mga pagtulun-an sa Manluluwas mahitungod sa Pagpahiuli?

• Sa unsang paagi lagmit nga ang pagpadayon sa pagbaton sa usa ka mahangtorong panglantaw makatabang kanimo ug sa imong higala niini nga sitwasyon?

Tinguhaa ang dugang nga panabot pinaagi sa balaanong gitudlo nga mga tinubdan

• Sa unsang paagi kaha nga ang mga kamatuoran nga anaa makita sa Mga Taga-Efeso 1:10 makatabang niini nga sitwasyon?

• Kon aduna kay dugang nga panahon sa dili pa motubag sa imong higala, unsa kaha ang imong irebyo o tun-an? Unsang mga kapanguhaan ang imong idapit nga tun-an sa imong higala alang sa iyang kaugalingon? Ngano man?

Human ang mga estudyante makapamalandong ug makatubag sa mga pangutana sa ibabaw, mahimong dapiton sila sa pagpaambit unsa nga senaryo ang ilang gigamit ug sa paghisgot sa ilang mga tubag.

Pagrebyo sa doktrinal nga kahanas

Aron matabangan ang mga estudyante sa pagrebyo sa tudling sa doktrinal nga kahanas ug sa mahinungdanong hugpong sa pulong sa kasulatan alang sa Mga Taga-Efeso 1:10 sa umaabot nga leksiyon, mahimong gamiton ang parehas nga upat ka bahin nga paghubit [recitation] nga kalihokan nga gipaila-ila sa sinugdanan niini nga leksiyon.