Seminary
Mga Taga-Galacia

Mga Taga-Galacia

Kinatibuk-ang Pagpasabot

Sa iyang epistola ngadto sa mga Santos sa Galacia, mipahayag si Pablo sa iyang lawom nga mga kabalaka nga daghan ang mipalayo sa Ginoo pinaagi sa pagsunod sa mga pagtulun-an sa uban kinsa buot nga “magatuis sa [ebanghelyo]” (Mga Taga-Galacia 1:6–7). Iyang gitudlo pag-ayo ang kaimportante sa pagpaminaw sa mga pulong ni Jesukristo nga gihatag pinaagi sa Iyang mga Apostoles, sa paglakaw diha sa Espiritu aron sa pagbuntog sa mga kahigal sa unod, ug sa balaod sa pag-ani.

Pangandam sa Pagtudlo

Ang mosunod nga impormasyon maghatag sa mga magtutudlo og mga ideya kon unsa ang lagmit nga kinahanglang andamon daan para sa kada leksiyon.

Mga Taga-Galacia 1

Katuyoan sa leksiyon: Kini nga leksiyon makatabang sa mga estudyante sa pagkat-on unsaon paglikay sa mga paglingla ug kalibog pinaagi sa pagpaminaw og maayo sa mga pulong ni Jesukristo nga gihatag sa parehong mga karaan ug modernong mga propeta.

  • Pagpangandam sa estudyante: Dapita ang mga estudyante sa pagtambong nga andam mohatag og mga pananglitan sa mga ideya o mga panudlo nga gigamit ni Satanas aron mosulay pagpanglingla kanila o pagdala kanila palayo gikan sa tinuod nga ebanghelyo ni Jesukristo.

  • Sugyot sa pagtudlo pinaagi sa videoconference: Ikonsiderar ang pagmugna og usa ka wala mailhi nga online poll aron dapiton ang mga estudyante sa pagpaambit og mga sitwasyon diin sila nadayag o tingali mahimong madayag ngadto sa mga tawo o mga ideya nga mahimong makabira kanila palayo gikan sa kamatuoran sa ebanghelyo ni Jesukristo. Gamita ang mga tubag sa estudyante sa poll agi og puli sa mga senaryo sa sinugdanan sa leksiyon.

Mga Taga-Galacia 5

Katuyoan sa leksiyon: Kini nga leksiyon gituyo aron matabangan ang mga estudyante nga mahimong mas susama ni Jesukristo pinaagi sa paghatag kanila og kahigayonan sa pag-ila sa mga paagi nga sila mas hingpit nga “[maglakaw diha] sa Espiritu” ( Mga Taga-Galacia 5:16).

  • Pagpangandam sa estudyante: Dapita ang mga estudyante sa pagtuon sa Mosiah 3:19 ug sa pag-ila sa mga pagtulun-an nga mahimong makatabang kanila nga makadawat og panabang sa Manluluwas aron mabuntog ang atong napukan nga kinaiya, o “kinaiyanhon nga tawo.” Kini mahimo usab nga makabenepisyo ang pagdapit sa mga estudyante nga isag-ulo kini nga tudling sa kasulatan sa doktrinal nga kahanas.

  • Hulagway: Ipakita ang hulagway sa mga tawo sa biray-biray [tug-of-war] nga kontes.

Mga Taga-Galacia 6

Katuyoan sa leksiyon: Kini nga leksiyon makatabang sa mga estudyante nga maila ang mga buhat nga ilang kinahanglang buhaton aron makab-ot ang ilang mahangtorong mga tumong.

  • Pagpangandam sa estudyante: Dapita ang mga estudyante nga mobasa sa Mga Taga-Galacia 6:7–9 ug aron motambong nga andam mopaambit sa unsang paagi sila mibati nga ang mga pagtulun-an niini nga mga bersikulo mahimong makaapekto sa ilang adlaw-adlaw nga mga desisyon.

  • Bidyo: “Maalamong Mopili” (15:18; tan-awa gikan sa time code 3:03 hangtod 4:52)

  • Sugyot sa pagtudlo pinaagi sa videoconference: Ikonsiderar ang pagdapit og usa ka lokal nga lider sa Simbahan (sama sa usa ka bishop, usa ka branch president, pangulo sa Relief Society, o pangulo sa Young Women) aron motambong ug mamulong sa pipila ka minuto sa sinugdanan sa klase mahitungod sa kaimportante sa programa sa mga Kabataan ug mga Kabatan-onan ug sa pagtakda ug pagtinguha sa pagkab-ot sa mga tumong. Hinumdomi nga makigsulti sa imong lokal nga koordinitor sa Seminaries and Institutes of Religion mahitungod sa unsa nga mga pagtugot ang kinahanglanon.

Mga Taga-Efeso 1

Katuyoan sa leksiyon: Kini nga leksiyon gituyo aron matabangan ang mga estudyante nga maila ang mga panalangin nga anaa tungod kay gipahiuli ni Jesukristo ang Iyang ebanghelyo ngadto sa kalibotan sa ulahing mga adlaw.

  • Pagpangandam sa estudyante: Dapita ang mga estudyante sa paglista og mga paagi nga paminaw nila ang Pagpahiuli sa ebanghelyo ni Jesukristo nakaapekto sa ilang kinabuhi. Hangyoa sila nga dalhon kini nga lista sa klase.

  • Sugyot sa pagtudlo pinaagi sa videoconference: Dapita ang mga estudyante sa pagpuli-puli og paambit og mga makahuluganong mga panabot nga aduna sila diha sa ilang pagtuon sa pamahayag sa Pagpahiuli. Kini mahimong buhaton sa mga breakout room o magkauban isip usa ka klase.

Doktrinal nga Kahanas: Mga Taga-Efeso 1:10

Katuyoan sa leksiyon: Kini nga leksiyon makahatag sa mga estudyante og kahigayonan nga madugangan ang ilang kahanas sa mga pagtulun-an sa Mga Taga-Efeso 1:10 pinaagi sa pagsag-ulo sa pakisayran ug sa mahinungdanong hugpong sa pulong sa kasulatan, pagpasabot sa doktrina, ug sa paggamit sa mga baroganan sa pag-angkon og espirituhanong kahibalo diha sa tinuod nga sitwasyon sa kinabuhi.

  • Pagpangandam sa estudyante: Dapita ang mga estudyante sa pagtambong sa klase nga andam mopaambit og labing menos sa duha ka mga kamatuoran nga pamati nila kinahanglang mahibaloan sa tanan ug masabtan mahitungod sa Pagpahiuli.

  • Sugyot sa pagtudlo pinaagi sa videoconference: Ikonsiderar ang pagdapit sa mga estudyante sa paghunahuna og lain pang mga senaryo nga tingali masulbad pinaagi sa mga pagtulun-an sa Mga Taga-Efeso 1:10 . Dayon mahimong dapiton ang mga estudyante nga mopaambit unsaon nila paggamit sa doktrina nga gitudlo sa Mga Taga-Efeso 1:10 ug sa mga baroganan sa pag-angkon og espirituhanong kahibalo aron makatabang pagsulbad niadtong mga senaryo.

Iprinta