Pagrebyo sa Doktrinal nga Kahanas 20

Sabta ug Ipasabot

Ang usa ka katuyoan sa doktrinal nga kahanas mao ang pagtabang kanimo nga mas masabtan ang mga pagtulun-an sa Manluluwas ug mapasabot kini sa imong kaugalingong mga pulong. Kini nga leksiyon maghatag kanimo og kahigayonan sa pagpalawom sa imong pagsabot ug pagbansay sa pagpasabot sa mga kamatuoran gikan sa lainlaing mga tudling sa doktrinal nga kahanas sa Bag-ong Tugon.

Pagpangandam sa estudyante: Dapita ang mga estudyante sa pagrebyo sa mga tudling sa doktrinal nga kahanas sa Bag-ong Tugon ug mopili og usa nga gusto nilang mas masabtan.

Posible nga mga Kalihokan sa Pagkat-on

Ang tudling sa doktrinal nga kahanas nga leksiyon kinahanglang matudlo isip puli niini nga leksiyon sa pagrebyo. Tan-awa ang eskedyul sa pagtudlo nga gihatag sa direktor sa lugar o rehiyon o koordinitor aron maseguro nga matudlo ang kada leksiyon sa tudling sa doktrinal nga kahanas samtang anaa sa sesyon ang seminary.

Unsa ang imong nahibaloan mahitungod ni Jesukristo?

Mahimong ipakita ang mosunod nga hulagway ug dapita ang mga estudyante sa paghisgot kauban sa pares unsa ang gitudlo sa panghitabo kanato mahitungod kang Jesukristo.

Ihulagway unsa ang imong nahibaloan mahitungod kang Jesukristo gamit lamang ang bahin sa Iyang kinabuhi nga girepresentar sa mosunod nga hulagway:

Sunod, ipakita ang mosunod nga tulo ka mga hulagway (o lahi nga mga imahe sa Manluluwas), ug dapita ang mga estudyante sa paghisgot sa mosunod nga mga pangutana.

Karon tan-awa kining mga hulagway ug tubaga ang mosunod nga mga pangutana:

• Unsa nga mga panghitabo ang gipakita sa matag usa niining tulo ka mga hulagway?

• Unsa ang nadugang sa matag usa niining mga panghitabo sa imong pagsabot kang Jesukristo ug sa Iyang misyon?

Aron makasabot gayod kon kinsa ang Manluluwas ug nganong Siya importante kanimo, makatabang ang pagtuon og daghang mga asoy sa Iyang kinabuhi ug ang mga sinulat sa sobra pa sa usa ka propeta.

Sa susamang paagi, ang pagtuon ug pagtandi sa mga kamatuoran nga anaa sa daghang mga tudling sa doktrinal nga kahanas mahimong makatabang kanimo nga mas makasabot sa doktrina sa Manluluwas kaysa pagsalig lamang sa bisan unsang usa ka tudling.

Ikonsiderar ang pagdapit sa mga estudyante sa pagbuhat sa mosunod nga mga kalihokan kauban sa kapares. Mahimo silang maglahi og pares alang sa matag pagtandi.

Basaha ug ikonsiderar unsa ang gitudlo sa Mga Hebreohanon 12:9 , Santiago 1:5–6 , ug Santiago 2:17–18 kanato mahitungod sa atong Langitnong Amahan ug sa atong relasyon Kaniya.

• Sa unsang paagi nga ang dungan nga pagtuon niining tulo ka mga tudling sa doktrinal nga kahanas nagtabang kanimo aron mas makasabot sa atong relasyon ngadto sa Dios?

Basaha ug ikonsiderar unsa ang gitudlo sa 1 Pedro 4:6 ug Pinadayag 20:12 kanato mahitungod sa Kataposang Paghukom sa plano sa Langitnong Amahan.

• Sa unsang paagi nga ang pagtuon og dungan niining duha ka mga tudlling sa doktrinal nga kahanas nakatabang kanimo aron mas makasabot sa Kataposang Paghukom?

Ikonsiderar ang pag-cross-reference o pagsumpay sa bisan unsang mga tudling nga gusto nimong dunganon pagtuon og balik sa umaabot.

Pagsumpay sa mga tudling sa doktrinal nga kahanas

Kon mas makaayo alang sa mga estudyante ang pagkompleto sa mosunod nga kalihokan isip usa ka klase, dapita ang klase sa pagpili hain nga tudling sa doktrinal nga kahanas sa Bag-ong Tugon ang gusto nilang mas makat-onan. Isulat ang pakisayran ug ang mahinungdanong hugpong sa pulong diha sa pisara.

Dayon dapita ang mga estudyante sa pagbuhat diha sa ginagmayng mga grupo nga mangita og mas daghan pang may kalabotan nga mga tudling sa doktrinal nga kahanas kutob sa ilang mahimo sulod sa gitagana nga oras. Kon bug-at ra alang sa mga estudyante ang pagpangita sa tanang 96 ka mga tudling, mahimong pagamyan ang ilang pagpangita ngadto lamang sa Basahon ni Mormon nga mga tudling (o gamit og lahi nga paagi sa pagpagamay sa ilang mga kapilian sa pagpangita). Mahimong ilista sa mga estudyante ang mga tudling nga ilang nakita diha sa pisara ubos sa pakisayran.

Sa kataposan, dapita ang mga estudyante sa pagpasabot giunsa niining nadugang nga mga tudling nga ilang napalgan pagpataas sa ilang pagsabot sa napili nga tudling sa Bag-ong Tugon.

a. Pagpili og usa sa mga tudling sa doktrinal nga kahanas sa Bag-ong Tugon nga gusto nimong mas makat-onan, ug isulat ang pakisayran ug ang mahinungdanong hugpong sa pulong sa kasulatan diha sa imong journal sa pagtuon.b. Pangitaa ug basaha ang tibuok tudling sa doktrinal nga kahanas, ug irekord unsa ang imong nasabtan mahitungod sa doktrina nga gitudlo niini.

c. Pangitaa ang kompleto nga lista sa mga tudling sa doktrinal nga kahanas ug sa mahinungdanong hugpong sa mga pulong sa kasulatan nga anaa sa kataposan sa Kinauyokang Dokumento sa Doktrinal nga Kahanas (2022).

d. Pangita og bisan duha ka mga tudling sa doktrinal nga kahanas gikan sa laing mga kurso sa kasulatan nga may kalabotan sa tudling sa Bag-ong Tugon nga imong gipili.

e. Irekord sa imong journal sa pagtuon giunsa niining dugang nga mga tudling pagpataas sa imong pagsabot sa tudling sa Bag-ong Tugon.

Kon ang mga estudyante nakakompleto sa naunang kalihokan sa tinagsa, dapita sila sa pagpaambit ngadto sa mga estudyante nga nakapalibot kanila sa tudling sa Bag-ong Tugon nga ilang gipili ug sa pagpasabot unsa ang ilang nakat-onan gikan sa mga dugang nga mga tudling.

Kon itugot sa panahon, mahimong balikon ang kalihokan sa ikaduhang tudling sa doktrinal nga kahanas. O kompletoha ang usa ka susamang kalihokan pinaagi sa pagpasulat sa mga estudyante og usa ka pangutana o usa ka kabalaka diha sa ilang journal sa pagtuon ug sa pagpangita og pihong mga tudling sa doktrinal nga kahanas nga makatabang sa ilang pangutana o kabalaka.

Dapita ang mga estudyante sa paghisgot unsaon nila paggamit sa kalihokan sa ilang pagtuon sa kasulatan sa panimalay ug unsaon nga ang pagbuhat sa ingon makapanalangin kanila diha sa ilang pagtuon sa ebanghelyo.