Susiha ang Imong Nakat-onan 9

1 Mga Taga-Corinto 8–16 ug 2 Mga Taga-Corinto

Kini nga leksiyon gituyo sa pagtabang kanimo nga makatimbang-timbang sa mga tumong nga imong gitakda ug sa personal nga paglambo nga imong nasinati atol sa imong pagtuon sa Bag-ong Tugon.

Pagtabang sa mga estudyante sa pagsusi sa ilang nakat-onan. Hatagi ang mga estudyante og mga kahigayonan sa pagsusi sa ilang nakat-onan. Usa ka paagi mao ang pagdapit kanila sa pagpamalandong sa mga tumong nga ilang gitakda sa pagpuyo sa ebanghelyo ni Jesukristo. Diha sa pagpamalandong sa mga estudyante, ilang maila kon asang dapita sila kinahanglang molambo ug diin sila nilambo. Dasiga ang mga estudyante sa pagdapit sa panabang sa Espiritu aron sila makabati og paglaom ug kahibalo unsaon nila pagpadayon sa pagkat-on.

Pagpangandam sa estudyante: Dapita ang mga estudyante sa pagrebyo ug pipila ka mga paagi nga ilang gisulayan aron magamit ang mga baroganan nga ilang nakat-onan gikan sa 1 Mga Taga-Corinto 8–16 ug 2 Mga Taga-Corinto .

Posible nga mga Kalihokan sa Pagkat-on

Kini nga leksiyon gituyo aron matabangan ang mga estudyante nga matimbang-timbang ang mga tumong nga ilang gitakda, ilang abilidad sa pagpasabot sa mga pagtulun-an sa Bag-ong Tugon, o sa unsang paagi nga ang ilang mga kinaiya, mga tinguha, ug abilidad sa pagsunod sa ebanghelyo nausab. Ang pagtuon sa klase sa 1 Mga Taga-Corinto 8–16 ug 2 Mga Taga-Corinto lagmit mihatag og gibug-aton sa mga kamatuoran gawas niadtong anaa sa mosunod nga mga kalihokan. Tungod niini, ang mga kalihokan mahimong ipahiangay aron malakip kadto nga mga kamatuoran.

Niini nga leksiyon aduna kay kahigayonan sa pagsusi sa imong nakat-onan ug giunsa nimo paggamit sa mga baroganan nga gitudlo diha sa 1 Mga Taga-Corinto 8–16 ug 2 Mga Taga-Corinto . Ang pagsusi sa imong nakat-onan mahimong makatabang kanimo sa pag-analisa kon giunsa pagtabang sa pagtuon sa mga kasulatan kanimo aron mahimong mas mahisama sa Manluluwas.

Timbang-timbanga ang imong mga tumong

Ikonsiderar ang pagsugod sa klase pinaagi sa paghagit sa mga estudyante sa pagtagna pila ka giimprinta nga mga panid sa kasulatan ang anaa sa Bibliya, Basahon ni Mormon, Doktrina ug mga Pakigsaad, ug Perlas nga Labing Bililhon kon hiusahon. Human sa pagtagna sa mga estudyante, dapita sila sa pagsumada sa tinuod nga mga inihap nga panid aron makita kang kinsang tagna ang pinaka duol.

Tag-ana pila ka giimprinta nga mga panid sa kasulatan ang anaa sa Bibliya, Basahon ni Mormon, Doktrina ug Mga Pakigsaad, ug Perlas nga Labing Bililhon kon hiusahon.

Ngano sa imong hunahuna ang Ginoo mihatag kanato og daghan kaayong mga panid sa kasulatan?
Sa unsang paagi nimo mapakita ang pasalamat sa Iyang mga pulong?

Si Elder D. Todd Christofferson sa Korum sa Napulog Duha ka Apostoles mipasabot nganong ang Ginoo naghatag og daghan kaayo sa Iyang mga pulong diha sa kasulatan.

3:3

Hunahunaa ang gidaghanon sa atong panalangin sa pagkaangkon sa … ingon ka buhong sa mga kasulatan. Ug dili lamang kana, apan ang matag lalaki, babaye, ug bata mahimong makaangkon ug magtuon sa iyang personal nga kopya niining sagrado nga mga teksto, labaw sa tanan diha sa iyang kaugalingong pinulongan. … Sa tinud-anay uban niini nga panalangin ang Ginoo nagsulti kanato nga ang atong panginahanglan alang sa makanunayon nga kapilian sa mga kasulatan mas labaw ka dako kay sa bisan kanus-a sa miaging panahon. Unta kita padayon nga magbusog sa mga pulong ni Kristo nga mosulti kanato sa tanang butang nga kinahanglan natong buhaton (tan-awa ang 2 Nephi 32:3).

(D. Todd Christofferson, “Ang Panalangin sa Kasulatan,” Liahona, Mayo 2010, 35)

Ngano sa inyong hunahuna nga ang atong panginahanglan sa pagdangop “[sa] kasulatan mas labaw ka dako [karon] kay sa bisan kanus-a sa miaging panahon”?
Unsang personal nga mga panginahanglan ang nahatag sa mga kasulatan nimo sa imong kinabuhi, o unsa nga mga panginahanglanon ang ilang mahatag?

Paggahin og usa ka minuto sa pagpamalandong sa imong personal nga pagtuon sa kasulatan. Pakigtambag sa Langitnong Amahan kon giunsa sa imong pagtuon sa kasulatan paghatag sa imong mga panginahanglan ug kon ikaw kinahanglan nga mohimo og bisan unsang mga pagpahiangay. Lagmit nagkinahanglan kang mahimong mas makanunayon sa imong inadlaw nga pagtuon sa kasulatan o dugangan ang giladmon sa pagsabot nga imong nakuha gikan sa imong mga pagtuon. Isulat ang bisan unsang mga pagpahiangay nga sa imong pamati kinahanglang buhaton. Ikonsiderar ang paghangyo sa imong pamilya, imong magtutudlo sa seminary, o usa ka lider sa Simbahan nga tabangan ka sa imong mga tumong sa pagtuon sa kasulatan.

Salig sa Manluluwas ug tinguhaa ang Iyang panabang

Dihang si Pablo misulat ngadto sa mga Santos sa Corinto, siya nagpokus sa mga paagi nga si Jesukristo mipanalangin ug mitabang kanato. Pipila sa mga ehemplo naglakip sa pagtabang kanato aron makalingkawas sa tintasyon (tan-awa ang 1 Mga Taga-Corinto 10:13), nagtabang kanato aron makapalambo sa gugmang putli (tan-awa ang 1 Mga Taga-Corinto 13), nagbanhaw kanato gikan sa kamatayon pinaagi sa Pagkabanhaw (tan-awa ang 1 Mga Taga-Corinto 15), nagdapit kanato aron makig-uli Kaniya (tan-awa ang 2 Mga Taga-Corinto 5:16–21 ; 7:1–10), ug nagpalig-on kanato aron matinud-anong molahutay sa mga hagit (tan-awa ang 2 Mga Taga-Corinto 11 – 12).

Paggahin og pipila ka higayon sa pagrebyo sa mga tudling sa kasulatan nga imong gimarkahan o mga mugbong sulat nga gihimo sa 1 Mga Taga-Corinto 8–16 ug 2 Mga Taga-Corinto nga nakatabang nimo nga makat-on o mosalig sa Manluluwas.

Pag-andam og 3 hangtod sa 5 ka minuto nga mensahe kon giunsa pagtabang ni Jesukristo kanimo. Ilakip ang mosunod:

usa o daghang mga tudling sa kasulatan gikan sa 1 Mga Taga-Corinto 8–16 o 2 Mga Taga-Corinto nga labing mahinungdanon kanimo
usa ka pagpasabot sa unsa ang gitudlo sa maong mga tudling mahitungod sa giunsa sa Manluluwas pagtabang ug paglig-on kanimo
usa ka kasinatian gikan sa imong kinabuhi o usa ka pananglitan diha sa kasulatan nga si Jesukristo nagtabang sa paagi nga gitudlo niadtong mga tudling
unsaon kaha nimo pagdapit sa uban aron modawat sa panabang ug paglig-on sa Manluluwas

Ikonsiderar ang pagdapit og pipila ka boluntaryo nga mopaambit sa ilang mga ideya diha sa klase. Isip alternatibong paagi, ang mga estudyante mahimong mopaambit sa ilang pares. Dasiga ang mga estudyante nga mopaambit sa ilang mensahe diha sa panimalay o diha sa Simbahan.

Buhat sa family history ug sa templo ug ang Pagkabanhaw

Kalihokan A: Pag-apil sa buhat sa family history ug sa templo

Kon ang leksiyon sa 1 Mga Taga-Corinto 15:29 wala natudlo o kon ang mga estudyante wala gidapit sa pagmugna og usa ka plano aron mas makaapil sa buhat sa family history ug sa templo, mahimong laktawan ang kalihokan A.

Kon sa imong tan-aw ang mga estudyante wala mahibalo unsaon paggamit sa FamilySearch.org o sa FamilySearch nga app, mahimong hatagan sila og oras sa klase aron mosuhid. Mahimo silang mangita sa mipanaw nga katigulangan nga ilang nailhan o ilang mahisgotan. Tabangi ang mga estudyante sa pagpamalandong kon unsa kaha ang kahulugan sa Pagkabanhaw sa Manluluwas ngadto sa mga katigulangan nga ilang makit-an.

Sa miagi, lagmit imong natun-an ang 1 Mga Taga-Corinto 15:29 . Paghunahuna kon unsa ang epekto sa Pagkabanhaw sa Manluluwas ngadto imong mga katigulangan.

2:3

Sa imong pagtuon sa 1 Mga Taga-Corinto 15:29 , tingali nakamugna ka og plano sa pagsalmot sa buhat sa family history ug sa templo. Kon nakahimo ka, paggahin og higayon sa pagrebyo sa imong plano ug pamalandongi ang imong mga gibuhat aron pagpatuman sa imong plano. Kon wala nimo nahimo, ikonsiderar ang paghimo og plano karon kon unsaon nimo pagtabang sa imong mga katigulangan nga makadawat sa tanang mga panalangin sa ebanghelyo ni Jesukristo.

Mahimong ipakita ang mosunod nga mga instruksiyon aron ang mga estudyante makakita kanila samtang sila namalandong ug nagsulat. Human sa igo nga panahon, pagdapit og andam nga mga estudyante nga mopaambit sa ilang mga hunahuna.

Ireport ang imong plano.

Kon nakahimo ka og plano, pagpaambit unsa ang maayong nahitabo ug unsa ang mga babag nga imong giatubang. Aduna bay bisan unsang mga pagpahiangay nga imong nabati nga gusto sa Langitnong Amahan nga imong buhaton? Sa unsang paagi nga kadtong mga pagpahiangay makatabang kanimo?

Kon wala ka mihimo og plano, ipaambit unsa ang imong gustong buhaton ug ngano. Unsa kaha ang epekto sa imong plano nganha kanimo ug sa uban diha sa imong pagpatuman niini?

Tubaga ang usa sa mosunod nga mga pangutana:

Sa unsang paagi nga ang imong pagsalmot sa buhat sa family history ug sa templo magpakita sa imong paglaom sa Pagkabanhaw?
Sa unsang paagi nga ang pagsalmot sa buhat sa family history ug sa templo nakatabang nimo nga mobati nga mas nahiduol sa Langitnong Amahan ug nahimong mas susama ni Jesukristo?

Kalihokan B: Ipasabot ang doktrina sa Pag-ula sa Manluluwas

Tabangi ang mga estudyante sa pagsusi sa ilang abilidad sa pagpasabot sa doktrina sa Pag-ula sa Manluluwas pinaagi sa paghisgot og pipila sa mosunod nga mga pangutana. Dapita ang Espiritu Santo sa paggiya niini nga panaghisgot.

Nganong ang Pagkabanhaw sa Manluluwas nahimong mahinungdanong bahin sa Iyang Pag-ula?
Unsa ang imong natun-an sa 1 Mga Taga-Corinto 8–16 o 2 Mga Taga-Corinto mahitungod sa Pagkabanhaw nga nakatabang kanimo?
Unsa nga mga pagpili ang sa imong hunahuna mahimong malahi sa atong kinabuhi kon kita wala pa motuo sa usa ka literal nga Pagkabanhaw?
Nganong mapasalamaton ka nga si Jesukristo nagtanyag kanato og gahom ibabaw sa kamatayon? Unsaon nimo pagpakita kana nga pagpasalamat?