2 Mga Taga-Corinto 11–12

Paglahutay sa Kalisdanan uban ang Hugot nga Pagtuo diha ni Kristo

A young woman sitting down. A woman (possibly her mother) has her hand on the girl’s shoulder. The girl has a sad expression on her face.

Bisan ang labing matinud-anong mga disipulo ni Jesukristo naglahutay og kalisdanan sa ilang mga kinabuhi. Si Pablo mipaambit og pipila ka mga pag-antos nga iyang gilahutay ug giunsa niya pagpangita og kalipay niadtong mga kasinatian pinaagi sa panabang sa Manluluwas. Kini nga leksiyon makatabang nimo nga mosalig sa Ginoo diha sa imong pagpaningkamot sa paglahutay nga matinud-anon sa imong kaugalingong mga hagit.

Pag-ampo alang sa mga estudyante sa ngalan. Pangayo sa Langitnong Amahan og tabang sa pagsabot sa panginahanglan sa indibidwal nga mga estudyante ug unsaon pagtubag niadtong mga panginahanglan. Dayon pamati sa mga pag-aghat gikan sa Espiritu nga moabot panahon sa leksiyon o panahon sa pagpangandam sa leksiyon agig tubag niadtong mga pag-ampo.

Pagpangandam sa estudyante: Dapita ang mga estudyante nga mangandam nga mopaambit nganong sila mibati nga ang mosunod nga pamahayag dili tinuod: “Kon kita mag-ampo nga adunay igong hugot nga pagtuo kang Jesukristo, ang Langitnong Amahan mowagtang sa bisan unsang kalisdanan nga atong giagian.”

Posible nga mga Kalihokan sa Pagkat-on

Mga kalisdanan sa kinabuhi

Kon mahimo, pagdala sa klase o pagpakita og hulagway sa usa ka rosas nga adunay tunokon nga sanga.

Unsa sa imong hunahuna ang katuyoan sa mga tunok sa usa ka bulak sa rosas?

Sa kinabuhi, kita adunay daghang maayong mga kasinatian nga mahimong itandi nganha sa usa ka rosas. Bisan pa niana, kita usab nahiatubang og mga kalisdanan ug mga hagit nga mahimong matandi sa mga tunok.

Unsa ang pipila sa mga kalisdanan ug mga hagit nga mahimong masinati sa mga tawo niini nga kinabuhi?

Paminaw og maayo sa mga tubag sa mga estudyante sa mosunod nga pangutana. Ang ilang mga tubag mahimong moila sa labing mahinungdanong mga kamatuoran nga pokusan sa tibuok nga leksiyon.

Unsa nga mga hunahuna ug mga pangutana ang lagmit ipangutana sa mga tawo kabahin sa Dios samtang sila nagsinati og mga pagsulay? Unsa lagmit ang ilang ikatingala mahitungod sa ilang kaugalingon?

Sa imong pagtuon karon, pangita sa mga kamatuoran nga makatabang kanimo nga matinud-anong makalahutay sa mga kalisdanan nga ang Dios, sa Iyang gugma ug kaalam, mipili nga dili tangtangon. Pamalandong nganong kinahanglan nimo ang panabang sa Dios diha sa imong paglahutay kanila.

Mga kalisdanan ni Pablo

Basaha ang 2 Mga Taga-Corinto 11:24–28 , nga mangita sa pipila sa mga kalisdanan ni Pablo nga gilahutay panahon sa iyang pagpangalagad.

Aron matabangan ang mga estudyante nga makaamgo sa kalawom sa pag-antos nga nasinati ni Pablo, mahimong dapiton sila nga mopaambit kon hain sa mga kalisdanan ni Pablo nga sa ilang hunahuna mahimong labing malisod nga lahutayon.

Unsa pa ang ubang mga ehemplo nga imong mahunahunaan gikan sa mga kasulatan o gikan sa kasaysayan sa Simbahan nga nagpakita nga bisan ang mga matarong nag-antos og mga kalisdanan? Sa unsang paagi nga ang kinabuhi sa Manluluwas pruweba niini?
Ngano sa imong hunahuna ang Langitnong Amahan nagtugot sa mga matinud-anong disipulo ni Jesukristo nga mag-antos og maayo?

Bisan tuod og ang Dios nagpanalangin kang Pablo og katingalahang mga pagpadayag, lakip na ang panan-awon sa celestial nga gingharian (tan-awa ang 2 Mga Taga-Corinto 12:1–4), si Pablo kinahanglan lang gihapon nga molahutay og kalisdanan ug pagsulay sa iyang hugot nga pagtuo. Basaha ang 2 Mga Taga-Corinto 12:7 aron makita unsa ang gitandi ni Pablo sa usa sa iyang nagpadayong mga kalisdanan.

Sa unsang paagi nga ang “tunok sa unod” mahimong maayong paghulagway sa pipila ka personal nga mga kalisdanan?

Kaysa yanong ipangutana ang mosunod, mahimong dapiton ang mga estudyante sa pagdrowing sa ilang journal sa pagtuon o sa pisara unsa lagmit ang ilang matandi sa ilang personal nga mga kalisdanan.

Unsa nga pagtandi ang lagmit imong gamiton aron paghulagway sa usa ka pihong kalisdanan nga giantos nimo o sa imong mga minahal sa kinabuhi? Ngano man?

Basaha ang 2 Mga Taga-Corinto 12:8–10 aron makita ang kasinatian ni Pablo nga nag-ampo alang sa iyang “tunok sa unod” aron matangtang. Samtang magbasa ka, hinumdomi nga ang pulong nga grasya nagpasabot og “diosnon nga panabang o kalig-on gihatag pinaagi sa kalooy ug gugma sa Dios” (Giya ngadto sa mga Kasulatan, “ Grasya ,” scriptures.ChurchofJesusChrist.org; tan-awa usab sa Ether 12:27).

Usa ka kamatuoran nga atong makat-onan gikan sa kasinatian ni Pablo mao nga ang Ginoo dili kanunay motangtang sa atong mga hagit, apan kita mapalig-on pinaagi sa Iyang grasya samtang ato kining gilahutay nga matinud-anon.

Sa unsang paagi nimo nakita kini nga kamatuoran sa kinabuhi sa Manluluwas? (tan-awa ang Lucas 22:41–44).

Alang sa mosunod nga kalihokan, mahimong dapiton ang mga estudyante sa pagbuhat kauban sa pares ug mahimong pabasahon ang matag estudyante ug nagkalahi nga tudling ug ipaambit unsa ang ilang nakat-onan sa usag usa.

Pangita ug pagbasa og labing menos sa usa ka asoy sa kasulatan nga nagpakita unsaon sa Ginoo pagpanalangin kadtong naglahutay sa mga kalisdanan nga adunay hugot nga pagtuo ngadto Kaniya. (Ang mosunod mao ang mga sugyot sa mga asoy nga imong lagmit mapili.)

Doktrina ug mga Pakigsaad 121:1–8; 122:7–9 . (Si Joseph Smith nag-ampo samtang siya nag-antos sa Prisohan sa Liberty.)

Mosiah 24:8–15 . (Ang katawhan ni Alma nabihag sa mga Lamanite ug gidumala sa daotan nga pari nga si Amulon.)

Unsa ang imong nakat-onan mahitungod sa Ginoo ug unsa ang Iyang mahatag sa kadtong naglahutay sa mga kalisdanan nga matinud-anon?
Hain sa Iyang mga panalangin ang imong labing gikinahanglan diha sa imong paglahutay sa imong mga kalisdanan? Ngano man?
Kinsa ang imong nailhan sa personal nga nilahutay sa usa ka hagit nga matinud-anon? Unsay ilang gihimo aron makalahutay nga matinuoron? Sa unsang paagi nimo nakita ang grasya sa Ginoo nga nagtabang kanila?
Unsa sa imong hunahuna ang buot ipabuhat sa Manluluwas kanimo aron matinud-anong makalahutay sa imong mga kalisdanan?

5:12

Unsa ang imong nakat-onan mahitungod sa paglahutay sa mga kalisdanan nga may hugot nga pagtuo ni Jesukristo?

Base sa unsa ang imong nakat-onan ug nabati sa imong pagtuon sa 2 Mga Taga-Corinto 12 karon, dugangi o isulat pagbalik ang mosunod nga pamahayag aron mahimong mas matukma.

Ikonsiderar ang pagsulat sa pisara sa mosunod nga pamahayag ug dapita ang mga estudyante sa paghisgot diha sa ginagmayng mga grupo kon unsaon nila pag-usab niini. Dayon dapita ang pipila ka estudyante nga moadto sa pisara ug isulat ang pamahayag base sa ilang paghisgot sa grupo. Hangyoa ang mga estudyante sa pagpasabot sa klase nganong ang ilang grupo naghimo sa mga kabag-ohan nga ilang gihimo.

“Kon kita mag-ampo nga adunay igong hugot nga pagtuo kang Jesukristo, ang Langitnong Amahan mowagtang sa bisan unsang kalisdanan nga atong giagian.”

Pagpamatuod sa gugma sa Langitnong Amahan ug ni Jesukristo ug sa grasya nga Ilang gitanyag diha sa atong paglahutay sa mga kalisdanan nga may hugot nga pagtuo Kanila. Dapita ang mga estudyante sa pagpaambit og mga kasinatian giunsa sa Dios pagpanalangin kanila, ingon man usab kon unsa ilang nakat-onan, diha sa ilang paglahutay sa mga kalisdanan.

Komentaryo ug Background nga Impormasyon

Sa unsang paagi nga ang Manluluwas usa ka ehemplo sa mga kamatuoran nga gitudlo niini nga leksiyon?

Si Presidente Dallin H. Oaks sa Unang Kapangulohan mipaambit sa mosunod kabahin sa Lucas 22:41–44 :

Dinhi atong makita ang hingpit nga hugot nga pagtuo sa Manluluwas ug pagsalig sa Amahan. Hinumdomi, si Jesus miingon “Dili ang akong pagbuot maoy matuman kondili ang imo.” Ang tubag sa Langitnong Amahan mao ang pagbalibad sa pangamuyo sa iyang Bugtong Anak. Ang Pag-ula kinahanglang trabahoon pinaagi nianang kordero nga walay lama. Apan bisan kon ang hangyo sa Anak gibalibaran, ang iyang pag-ampo gitubag. Ang kasulatan nagrekord: “Ug dihay manulonda nga mitungha kaniya gikan sa langit, sa pagpalig-on kaniya” ( Lucas 22:43).

(Dallin H. Oaks, “Faith in the Lord Jesus Christ,” Ensign, Mayo 1994, 100)

Unsa ang gitanyag sa Manluluwas kanato panahon sa atong mga kalisdanan?

Gipaambit ni Presidente Dallin H. Oaks sa Unang Kapangulohan nga:

Ang gahom sa pag-ayo ni Ginoong Jesukristo—mahimong kini motangtang sa atong alantoson o mopalig-on kanato aron makalahutay ug makadawat kanila sama ni Apostol Pablo—anaa alang sa matag kalisdanan niining mortalidad.

(Dallin H. Oaks, “Iyang Papahulayon ang Nag-antos,” Liahona, Nob. 2006, 8)

Sa unsang paagi nga ang atong mga pakigbisog [struggles] nakatabang kanato nga mapanalanginan ang mga nagpalibot kanato?

Si Sister Reyna I. Aburto, Ikaduhang Magtatambag sa Kinatibuk-ang Kapangulohan sa Relief Society, nagtudlo:

Ang imong mga pakigbisog dili mohulagway kon unsa ka, apan kini mopalambo nimo. Tungod sa “tunok dinhi sa lawas,” ikaw maadunay katakos nga mobati og dugang nga kalooy sa uban.

(Reyna I. Aburto, “Sa Dag-om ug Kahayag, Ginoo, Ubani Ako!,” Liahona, Nob. 2019, 58)

Kadto bang mga naghupot sa pagkapari makaayo sa tanang adunay hugot nga pagtuo nga maayo?

Si Presidente Dallin H. Oaks sa Unang Kapangulohan mipasabot:

2:3

Bisan og ang Manluluwas makaayo sa tanan nga buot Niya nga ayohon, dili kini tinuod ngadto sa tanan nga naghupot sa Iyang awtoridad sa priesthood. Ang paggamit sa tawo sa awtoridad nag-agad sa kabubut-on Kaniya nga tag-iya sa priesthood. Sa ingon man, kita giingnan nga ang uban nga gipanalanginan sa mga elders wala mamaayo tungod kay sila ‘panahon na nga mamatay’ [ Doktrina ug mga Pakigsaad 42:48 ]. Sama usab, sa dihang si Apostol Pablo naninguha nga mamaayo gikan sa “sakit sa unod” nga naghasol kaniya ( 2 Mga Taga-Corinto 12:7), ang Ginoo nagdumili sa pag-ayo kaniya.

(Dallin H. Oaks, “Iyang Papahulayon ang Nag-antos,” Ensign o Liahona, Nob. 2006, 7)

Dugang nga mga Kalihokan sa Pagkat-on