2 Mga Taga-Corinto 8–13

Kinatibuk-ang Pagpasabot

Gidapit ni Pablo ang mga Santos nga Taga-Corinto nga mosunod sa ehemplo sa Manluluwas pinaagi sa pagsakripisyo sa ilang mga kabtangan alang sa pag-atiman sa mga kabos. Siya nagpaambit sa pipila sa mga pag-antos nga iyang gilahutay ug giunsa niya pagkakita og kalipay niadtong mga kasinatian pinaagi sa panabang sa Manluluwas. Dihang ang pipila ka mga miyembro sa Simbahan nahimong kritikal kaniya, siya mitubag pinaagi sa pagdapit kanila sa pagsusi sa ilang kaugalingong koneksiyon kang Kristo.

Pangandam sa Pagtudlo

Ang mosunod nga impormasyon maghatag sa mga magtutudlo og mga ideya kon unsa ang lagmit nga kinahanglang andamon daan para sa kada leksiyon.

2 Mga Taga-Corinto 8–9

Tumong sa leksiyon: Kini nga leksiyon makatabang sa mga estudyante nga mosunod sa ehemplo ni Jesukristo pinaagi sa pagpakigbahin unsa ang anaa kanila ngadto sa mga nanginahanglan.

Pagpangandam sa estudyante: Dapita ang mga estudyante sa pagtan-aw sa mga aytem nga nalista sa Ikapulo ug Ubang mga Paghalad nga porma ug sa pagpangandam sa pagpaambit unsa ang kahulugan sa nagkalain-laing nakalinya nga mga aytem. Mahimo usab silang mangutana og bisan unsang mga pangutana nga anaa sila mahitungod niini nga porma.

Content nga ipakita: Ang pamahayag ni Elder Jeffrey R. Holland nga anaay nawala nga pulong ug ang usa ka Ikapulo ug Ubang Mga Paghalad nga porma

Sugyot sa pagtudlo pinaagi sa videoconference: Ikonsiderar ang pagdapit og usa ka lokal nga bishop o presidente sa Relief Society aron mopaambit sa mga estudyante giunsa paggamit ang fast-offering nga mga pundo aron panalanginan ang kadtong mga nanginahanglan.

2 Mga Taga-Corinto 11–12

Tumong sa leksiyon: Kini nga leksiyon makatabang sa mga estudyante nga mosalig sa Ginoo samtang sila maningkamot nga matinud-anong molahutay sa ilang kaugalingong mga hagit.

Pagpangandam sa estudyante: Dapita ang mga estudyante aron andam nga mopaambit nganong ilang gibati nga ang mosunod nga pamahayag dili tinuod: “Kon kita mag-ampo nga adunay igong hugot nga pagtuo kang Jesukristo, ang Langitnong Amahan motangtang sa bisan unsang mga pagsulay nga atong giagian.”

Butang o hulagway nga ipakita: Usa ka tunok o usa ka imahe sa tunok

Sugyot sa pagtudlo pinaagi sa videoconference: Human tun-an sa mga estudyante ang 2 Mga Taga-Corinto 12:8–10 , ikonsiderar ang paggamit sa ideya nga giulohan og “Ang hugot nga pagtuo nga dili mamaayo” diha sa “Dugang nga mga Kalihokan sa Pagkat-on” nga bahin. Mahimong pangitaon ang artikulo nga “Pagdawat sa Kabubut-on ug Panahon sa Ginoo” (Ensign, Ago. 2016, 29–35) sa ChurchofJesusChrist.org ug i-share ang screen aron ang mga estudyante magpuli-puli og basa sa sugilanon.

2 Mga Taga-Corinto 13

Tumong sa leksiyon: Kini nga leksiyon makatabang sa mga estudyante sa pagsusi sa ilang pagkamatinud-anon sa Ginoo ug sa pagbuntog sa tintasyon sa pagpanaway sa Iyang mga sulugoon.

Pagpangandam sa estudyante: Dapita ang mga estudyante sa paghunahuna mahitungod sa unsa ang ilang bation kon ilang madungog ang mga tawo nga magsulti og negatibo mahitungod sa Simbahan sa Manluluwas o sa Iyang mga sulugoon.

Content nga ipakita: Ang pamahayag ni Presidente Henry B. Eyring uban ang mga pangutana aron pamalandongan sa mga estudyante

Sugyot sa pagtudlo pinaagi sa videoconference: Aron matugotan ang mga estudyante sa pagtuon og dugang pang mga asoy sa kasulatan, mahimong bahinon ang mga estudyante ngadto sa gagmayng mga grupo ug ibutang sila sa mga breakout room. Dapita sila sa pagtuon og usa o daghan pang mga asoy nga naghulagway sa mga sangpotanan sa pagpanaway sa mga sulugoon sa Ginoo. Ang matag grupo mahimong mopili og tigpamaba aron mopaambit sa tibuok klase og butang nga ilang nakat-onan.

Susiha ang Imong Nakat-onan 9

Tumong sa leksiyon: Kini nga leksiyon gituyo aron matabangan ang mga estudyante nga matimbang-timbang ang mga tumong nga ilang gitakda ug ang personal nga paglambo nga ilang nasinati gikan sa ilang pagtuon sa Bag-ong Tugon.

Pagpangandam sa estudyante: Dapita ang mga estudyante sa pagrebyo sa mga paagi nga ilang nasuwayan aron magamit ang mga baroganan nga ilang nakat-onan gikan sa 1 Mga Taga-Corinto 8-16 ug 2 Mga Taga-Corinto.

Content nga ipakita: Mga pangutana mahitungod sa plano sa family history sa estudyante (alang sa Kalihokan A)

Sugyot sa pagtudlo pinaagi sa videoconference: Kon imong makita nga ang mga estudyante wala masayod unsaon paggamit sa FamilySearch.org o sa FamilySearch nga app, mahimong hatagan sila og oras sa klase aron pagsuhid. Mahimo usab nga mapuslan ang pagdapit og usa ka estudyante kinsa nahibalo unsaon paggamit sa app sa pagtambong nga andam mopaambit og pipila ka mga tip nga ilang nakat-onan. Mahimo silang mopaambit sa ilang screen gikan sa ilang phone o computer aron ang tibuok klase makakita unsa ang ilang gibuhat.

Pagrebyo sa Doktrinal nga Kahanas 20

Tumong sa leksiyon: Kini nga leksiyon maghatag sa mga estudyante og kahigayonan sa pagpalawom sa ilang pagsabot ug pagbansay sa pagpasabot sa mga kamatuoran gikan sa lainlaing mga tudling sa doktrinal nga kahanas sa Bag-ong Tugon.

Pagpangandam sa estudyante: Dapita ang mga estudyante sa pagrebyo sa mga tudling sa doktrinal nga kahanas sa Bag-ong Tugon ug pagpili og usa nga ilang gustong mas masabtan.

Content nga ipakita: Upat ka nagkalain-laing mga hulagway ni Jesukristo

Sugyot sa pagtudlo pinaagi sa videoconference: Paingon sa kataposan sa leksiyon, mahimong dapiton ang mga estudyante sa pagpangita og dugang nga mga tudling sa doktrinal nga kahanas nga makapalambo sa ilang pagsabot sa usa ka napiling tudling sa Bag-ong Tugon. Mahimong igrupo ang mga estudyante ngadto sa upat ka breakout room, nga ang matag grupo mangita sa mga tudling sa doktrinal nga kahanas gikan sa lainlaing bahin sa kasulatan. Kon ang klase mabalik nga magkauban, dapita ang matag grupo sa pagpaambit sa mga tudling nga ilang napalgan sa ilang natahasan nga basahon sa kasulatan. Ang mga estudyante mahimong dapiton sa pag-share sa ilang screen aron ang ilang mga klasmeyt makakita giunsa nila paggamit sa mga tool sa Gospel Library nga app.