1 Mga Taga-Corinto 15:29

“Ngano man nga gibunyagan sila alang sa mga Patay?”

Daghan sa mga Santos sa Corinto ang misalmot sa mga pagbunyag alang sa ilang nangamatay nga mga katigulangan, apan bisan pa man niini aduna gihapoy pipila nga wala mituo sa Pagkabanhaw sa patay. Gitabangan sila ni Pablo aron makakita nga kita mibuhat sa mga ordinansa alang sa mga patay inubanan sa hugot nga pagtuo nga si Kristo mobanhaw kanatong tanan aron mabuhi pag-usab diha sa Pagkabanhaw. Kini nga leksiyon gituyo aron matabangan ka nga magtinguha ug magplano sa pagsalmot nga mas makahuluganon sa family history ug sa buhat sa templo.

Paghatag og mga kahigayonan alang sa paggamit. Ang tumong sa pagtudlo sa ebanghelyo mao ang pagtabang sa mga estudyante sa paghunahuna ug mobati og usa ka tinguha sa pagpuyo sa ebanghelyo ni Jesukristo ug dayon molihok sa ilang mga tinguha. Hatagi ang mga estudyante og mga kahigayonan sa klase aron magplano sa paggamit sa mga kamatuoran nga ilang nakat-onan sa ilang kinabuhi. Sa higayon nga sila maghimo og mga plano sa paggamit sa unsa ang ilang nakat-onan, mapalambo sa mga estudyante ang ilang abilidad sa pagpuyo sa mga kamatuoran nga gitudlo sa leksiyon.

Pagpangandam sa estudyante: Dapita ang mga estudyante nga motambong nga andam sa pagpaambit sa ilang family tree o sa pagsulti ug usa ka sugilanon mahitungod sa usa ka katigulangan nga wala makadawat sa ebanghelyo o nakapahimus sa mga ordinansa sa kaluwasan ug kahimayaan.

Posible nga mga Kalihokan sa Pagkat-on

Ang importansiya sa mga saksi

Ang mosunod nga kalihokan gitumong alang sa pagpagaan sa buot ug makapakatawa nga paagi sa pagtabang sa mga estudyante sa paghunahuna mahitungod sa relasyon tali sa pagkabanhaw ug buhat nga gihimo sa templo alang niadtong mga nangamatay. Kon mahimo, ipahiangay ang unang duha ka mga paresan sa mga hulagway aron sila mahimong may kalabotan sa kultura ug makadasig sa mga estudyante.

Susiha ang mosunod nga tulo ka mga paresan sa hulagway. Pamalandongi ang relasyon tali sa duha ka mga hulagway sa matag set.

Unang set

Koro sa Tabernakulo, “Elijah” nga konsyerto, Mayo 2007

Ikaduhang set

Ikatulong set

• Unsaon nimo pagpasabot sa usa ka tawo sa kalambigitan tali sa walay sulod nga lubnganan sa Manluluwas ug sa mga templo sa bag-ong adlaw?

Sa dihang si Apostol Pablo nakahibalo nga pipila sa mga indibidwal sa Corinto nagtudlo nga walay pagkabanhaw, iyang gipasabot nga ang mga Santos nagbuhat na og butang nga nagpamatuod sa realidad sa pagkabanhaw.

Basaha ang 1Mga Taga-Corinto 15:29 , pangitaa ang buhat nga gipasabot ni Pablo.

• Unsaon nimo pagsulti pag-usab sa imong kaugalingong mga pulong kon unsa ang gitudlo ni Pablo sa bersikulo 29 ?

• Sa unsang paagi nga ang mga pagbunyag alang sa mga patay usa ka pagpamatuod sa Manluluwas, sa Iyang Pag-ula, ug sa Pagkabanhaw?

Kon ang mga estudyante nagkinahanglan og tabang sa pagtubag sa miaging pangutana, mahimong hatagan sila og kasayoran gikan sa “Komentaryo ug Background nga Impormasyon” nga bahin sa kataposan niini nga leksiyon.

Mga bunyag alang sa mga patay

Usa ka kamatuoran nga atong makat-onan gikan sa 1Mga Taga-Corinto 15:29 mao nga kadtong mga nangamatay nga walay bunyag mahimo gihapong makadawat niining mahinungdanong ordinansa pinaagi sa buhat nga gihimo diha sa mga templo.

Ikonsiderar ang pagdapit sa mga estudyante nga mihimo sa pagpangandam sa estudyante nga kalihokan sa pagpaambit mahitungod sa ilang mga minahal sa kinabuhi kinsa namatay nga walay bunyag. Mahimong sultihan ang mga estudyante sa paghunahuna kon sa unsang paagi nga kining mga indibidwal nahimo, o mahimong maapektohan sa mga pagbunyag sa mga patay.

Si Presidente Gordon B. Hinckley (1910–2008) mitudlo kon sa unsang paagi nga ang partisipasyon sa buhat sa templo mahimong makakonektar kanato ngadto kang Jesukristo:

Ako nagtuo nga ang buluhaton sa pagpuli alang sa mga patay mas hapit masama sa pagpuli nga sakripisyo sa Manluluwas sa Iyang Kaugalingon kay sa bisan unsa nga buluhaton nga akong nahibaloan. Kini gihatag uban sa gugma, wala maglaom og bayad, o pagbalos o bisan unsa. Unsa ka mahimayaong baroganan [fireside sa Birmingham, England, 29 Ago. 1995].

(Gordon B. Hinckley, “Excerpts from Recent Addresses of President Gordon B. Hinckley,” Ensign, Ene. 1998, 73)

• Sa unsang paagi nga ang pag-apil sa mga pagbunyag ug uban pang buhat sa templo alang sa mga patay makatabang kanato aron mas mahimo kitang susama sa Manluluwas?

Palawman ang imong pagsabot

Handurawa nga usa ka adlaw niana sa tulunghaan, ikaw ug imong mga higala naghisgot sa inyong mga plano alang sa kataposan sa semana. Usa ka higala miingon nga siya naghinam-hinam nga moadto sa templo aron maghimo og mga pagbunyag alang sa mga patay kauban ang ubang mga batan-on sa iyang ward. Lain pang higala, si Kaya, nakitaan sa iyang panagway nga naglibog ug nangutana, “Pagbunyag sa mga patay? Unsa man kana?”

• Unsa ka kakompyansa nga makatubag niini nga pangutana sa paagi nga masabtan ni Kaya?

Paggahin og pipila ka oras sa pagpalawom sa imong pagsabot sa ordinansa sa pagbunyag alang sa mga patay pinaagi sa pagpili og usa o daghan pa sa mosunod nga mga kapanguhaan aron tun-an o pinaagi sa pagpangita sa imong kaugalingong mga kapanguhaan. Sa imong pagtuon, pangita og pipila ka mga butang nga lagmit nimong mapaambit sa uban sama ni Kaya kinsa gustong mas makasabot niini nga buhat.

Ilha ang mga panginahanglan sa mga estudyante. Kaysa maghatag sa mosunod nga mga kapanguhaan alang sa mga estudyante aron tun-an, mahimong makabenepisyo ang paghatag kanila ug higayon sa pagpangita ug pagdiskobre og mga kapanguhaan sa ilang kaugalingong paningkamot, nga makatabang nila nga mabansay sa pagpangita og kasaligan nga mga tinubdan sa impormasyon.

Makabenepisyo usab ang mga estudyante gikan sa pagtuon sa dugang nga mga kapanguhaan sa “Komentaryo ug Background nga Impormasyon” nga bahin sa kataposan niini nga leksiyon.

• Tan-awa sa “Pagbunyag sa mga patay” ubos sa “ Pagbunyag, Binunyagan ,” Giya sa mga Kasulatan, scriptures.ChurchofJesusChrist.org

• Gospel Topics, “Family History,” topics.ChurchofJesusChrist.org

Agig dugang sa pagsulti sa mga estudyante nga mopaambit sa unsa ang ilang nakat-onan gikan sa ilang pagtuon, ikonsiderar usab ang paghatag kanila og mga kahigayonan sa pagbansay sa pagpasabot sa doktrina sa pagbunyag sa mga patay ngadto sa usa ka tawo sama ni Kaya kinsa wala kaayoy kasayuran niini nga ordinansa. Kini mahimong buhaton pinaagi sa usa ka pagdula-dula [role play] o pinaagi sa pagpasulat sa mga estudyante sa ilang mga pagpasabot ug ipaambit unsa ang ilang nasulat. Ikonsiderar ang pagdapit sa mga estudyante sa pagbuhat nga magkapares o sa gagmayng mga grupo aron daghan ang mahatagan og kahigayonan sa pagpasabot, pagpaambit, ug pagpamatuod. Ang mosunod nga mga punto lagmit magamit sa ilang mga pagpasabot:

• Unsa ang gihulagway sa ordinansa sa pagbunyag sa mga patay mahitungod sa unsa ang gibati sa atong Langitnong Amahan ug sa Iyang Anak, si Jesukristo, alang sa matag usa kanato.

• Ang imong kaugalingong mga kasinatian sa pagsalmot niini nga ordinansa.

Buhata unsay imong nakat-onan

Paghunahuna mahitungod sa imong personal nga mga kasinatian sa family history ug sa buhat sa templo. Pamalandongi unsa ang nakapahimong mahingdunanon niini nga mga kasinatian ug ang bisan unsang mga babag nga imong giatubang. Dayon pagmugna og usa ka yano, personal nga plano kon unsaon nimo paggamit ang imong nakat-onan ug nabati karon. Pananglitan, ikonsiderar ang paghimo og usa ka plano nga may kalabotan sa pagtambong sa templo, pagkuha og rekomend sa templo, paggamit sa FamilySearch aron sa pagpangita sa mga pangalan sa imong mga katigulangan kinsa nagkinahanglan nga makadawat sa ordinansa sa pagbunyag, pagbuhat og usa ka butang aron makahimo sa imong kasinatian sa templo nga mas mahinungdanon, o paghunahuna og usa sa imong kaugalingong makapadasig nga mga ideya. Sunda ang mga pag-aghat sa Espiritu Santo sa pagmugna og usa ka plano nga insakto alang kanimo. Irekord ang imong mga plano diha sa imong journal sa pagtuon.

Komentaryo ug Background nga Impormasyon

Sa unsang paagi nga ang pagbunyag sa mga patay may kalabotan kang Jesukristo ug sa Iyang Pagkabanhaw?

Si Elder D. Todd Christofferson sa Korum sa Napulog Duha ka Apostoles mitudlo:

Ang atong dakong paningkamot sa pagtubos sa mga patay, ug ang panahon ug kapanguhaan nga atong gipahinungod tungod niana nga pasalig, mao, labaw sa tanan, usa ka pagpahayag sa atong pagsaksi kabahin ni Jesukristo. Kini naglangkob ingon ka gamhanan nga pamulong nga atong mahimo kabahin sa Iyang balaan nga kinaiya ug misyon. Kini nagpamatuod, una, sa Pagkabanhaw ni Kristo; [ug] ikaduha, sa walay kinutobang epekto sa Iyang Pag-ula. …

Kita gibunyagan alang sa mga patay tungod kay kita nasayod nga sila mabanhaw.

(D. Todd Christofferson, “The Redemption of the Dead and the Testimony of Jesus,” Ensign, Nob. 2000, 10)

Nagbuhat ba ang mga miyembro sa Simbahan ni Kristo sa Bag-ong Tugon og mga pagbunyag sa mga patay?

Ang puli [proxy] nga mga bunyag gipahigayon lamang human mabanhaw si Jesus. Ang bugtong tudling nga naghisgot sa puli nga bunyag alang sa mga patay mao ang 1 Mga Taga-Corinto 15:29 , bisan og ang ubang karaang mga teksto nagmatuod nga ang bunyag alang sa mga patay gihimo na sa unang mga Kristiyano.

“Si Jesukristo nagtudlo nga ang bunyag gikinahanglan aron makaangkon og kinabuhing dayon (tan-awa sa Juan 3:5). Si Pablo mismo nabunyagan ug gitudloan pinaagi niining importante nga ordinansa aron kita ‘magkinabuhi sa bag-ong kinabuhi ( Mga Taga-Roma 6:4 tan-awa usab sa Mga Buhat 9:18). Apan minilyon sa mga anak sa Langitnong Amahan nangamatay nga wala makaangkon og kahibalo ni Jesukristo o makadawat sa gikinahanglan nga ordinansa sa bunyag. Ang pakisayran ni Pablo sa bunyag alang sa mga patay nagsugyot nga ang unang mga miyembro sa Simbahan nakahibalo sa plano sa Dios sa pagtubos sa mga patay (tan-awa usab sa Juan 5:25, 28 ; 1 Pedro 3:18–19 ; 4:6)” (Manwal sa Estudyante sa Bag-ong Tugon [2014], 385).

Kanus-a nagsugod ang mga miyembro sa Simbahan ni Kristo sa ulahing mga adlaw pagbuhat sa mga pagbunyag sa mga patay?

Asa ako makakat-on pa og dugang kabahin sa bunyag sa mga patay?

“Unsa Ang Mga Pagbunyag sa mga Patay?” (1:22), anaa sa ChurchofJesusChrist.org

Dugang nga Kalihokan sa Pagkat-on

Pag-apil sa buhat sa templo ug sa family history

Aron tabangan nga madasig ang mga estudyante sa pagsalmot sa buhat sa templo ug sa family history, ikonsiderar ang pagdapit sa mga estudyante sa pagtuon sa pakigpulong nga “Ang mga Kasingkasing sa mga Anak Mobati” (Liahona, Nob. 2011, 24–27) ni Elder David A. Bednar sa Korum sa Napulog Duha ka Apostoles. Unsa ang pipila sa mga imbitasyon ni Elder Bednar nga iyang gipa-abot ngadto sa mga kabatan-onan? Nganong iya mang gihatag ang maong mga imbitasyon? Unsa nga mga panalangin ang moabot gikan sa pagsalmot sa buhat sa templo ug sa family history?