Celestial, Terrestrial, ug Telestial nga mga Lawas
Imahe
Profile of a Young Woman in bright sunlight.
Nganong bililhon man ang pagsunod kang Jesukristo bisan og ang uban nakakitag kalipay sa sala? Si Pablo mipasabot sa usa sa mga hinungdan pinaagi sa pagtudlo sa Mga Taga-Corinto mahitungod sa lainlaing mga ang-ang sa himaya diha sa Pagkabanhaw. Kini nga leksiyon makatabang nimo sa pagpaningkamot nga mahimong takos sa usa ka celestial nga pagkabanhaw pinaagi ni Jesukristo.
Pagdasig sa mga kontribusyon sa estudyante. Tabangi ang mga estudyante nga makasabot nga ang ilang mga kontribusyon importante sa kasinatian sa pagtuon sa klase. Sulayi pagdasig sa ilang mga komento pinaagi sa pagpasalamat kanila, pinaagi sa pagdayeg kanila, o pinaagi sa pagpangutana sa ubang mga estudyante unsa ang ilang nakat-onan gikan sa mga komento.
Pagpangandam sa estudyante: Dapita ang mga estudyante sa pagbasa sa Alma 40:23 aron makita unsa ang anaa sa tanang nabanhawng mga lawas, dayon basahon ang 1 Mga taga-Corinto 15:40–42 aron makita ang mga kalahian nga anaa taliwala sa nabanhawng mga binuhat.
Posible nga mga Kalihokan sa Pagkat-on
Umaabot nga mga panalangin sa plano sa Dios
Ikonsiderar ang paghatag og usa ka pahalipay sa tanang mga estudyante nga nagsul-ob og usa ka pihong kolor. Pangutan-a ang mga estudyante nga wala magsul-ob sa maong kolor kon gusto ba nilang mahibalo daan mahitungod niining ganti ug unsaon pagkab-ot niini sa dili pa moabot sa ilang klase.
Kon ikaw nahibalo nga ang imong magtutudlo maghatag og ganti sa tanang nagsul-ob ug pihong kolor karon, unsa kaha ang posibleng makaapekto sa pagpili sa imong sul-obon?
Masagmuyo ka ba kon ulahi na kaayo una pa nimo nahibaloan ang mahitungod niini? Ngano o nganong dili?
Tungod kay ang Langitnong Amahan nahigugma kanato, Iya kitang gisultian unsa ang mahitabo inig human niining kinabuhia ug unsa nga mga pagpili ang magdala og kalipay og pagmahay. Samtang ikaw magtuon niini nga leksiyon karon, pangita og mga kamatuoran nga magdasig kanimo sa paghimo og mga pagpili nga maggiya ngadto sa mahangtoron nga kalipay.
Pagdrowing og yanong paghulagway o dayagram kon unsa ang imo nang nahibaloan mahitungod sa plano sa kaluwasan sa Dios. Ilakip kon diin kita sa wala pa matawo, kinabuhi sa kalibotan, ug unsa ang mahitabo human sa kamatayon. Sa imong pagdrowing, seguroha nga mamalandong sa papel ni Jesukristo sa tibuok plano sa Amahan.
Ikonsiderar ang pagdapit og labing menos duha ka mga estudyante sa pagdrowing sa ilang mga pagrepresentar ngadto sa pisara. Ang pagkasayod sa kasamtangang pagsabot sa mga estudyante sa kinabuhi human sa kamatayon mahimong maghatag og panabot kon unsaon pagpahiangay sa leksiyon aron matubag ang ilang mga panginahanglan.
Sa unsang paagi nga ang atong pagsabot sa plano sa Langitnong Amahan alang kanato human sa kamatayon makaapekto sa mga desisyon nga imong himoon sa mortalidad?
Sa unsang paagi nga si Jesukristo nasentro sa maong plano?
Sa 1 Mga Taga-Corinto 15:1–29 , si Apostol Pablo nagtul-id sa sayop nga pagtuo nga “wala may pagkabanhaw [sa mga patay]” ( 1 Mga Taga-Corinto 15:13). Siya dayon mipasidaan sa mga Taga-Corinto nga dili magpailad pinaagi sa kinaiya sa mga tawo nga moingon, “Mangaon ug manginom kita kay ugma mangamatay man kita”.( 1 Mga Taga-Corinto 15:32), nga nagpadayag og sayop nga pagtuo nga walay kinabuhi human sa kamatayon ug, busa, bisan unsa ang atong buhaton niining kinabuhi dili importante.
Aron matabangan ang mga estudyante sa paghanduraw niining sayop nga pagtuo, ikonsiderar ang pagpapas sa tanan human sa mortal nga kinabuhi sa usa sa mga gidrowing sa mga estudyante diha sa pisara.
Lain pang sayop nga pagtuo mao nga, dili igsapayan kon unsa may atong mga pagpili, ang Dios mohatag sa tanan og mga panalangin sa kinabuhing dayon (tan-awa sa 2 Nephi 28:8 ; Alma 1:4).
Ikonsiderar ang pag-usab sa gidrowing sa laing estudyante diha sa pisara pinaagi sa pagdugang og usa ka linya nga pana [arrow] gikan sa kalibotan diretso sa celestial nga gingharian ug papasa ang celestial ug telestial nga mga gingharian.
Sa unsang paagi nga ang sayop nga mga pagtuo nga walay kinabuhi human sa kamatayon o nga ang Dios maghatag sa tanan og mga panalangin sa kinabuhing dayon makaapekto sa atong mga desisyon ug mga kinaiya? Ngano man?
Basaha ang 1 Mga Taga-Corinto 15:40–42 , pangitaa sa mga pagtulun-an ni Pablo ang mahitungod sa pagkabanhaw diha sa plano sa Langitnong Amahan. Makatabang ang kahibalo nga ang Paghubad ni Joseph Smith sa 1 Mga Taga-Corinto 15:40 nagpasabot usab sa telestial nga mga lawas.
Kon ang mga estudyante nagbuhat sa pagpangandam sa estudyante nga kalihokan, ikonsiderar ang pagdapit kanila sa pagpaambit unsa ang anaa sa tanang mga nabanhawng lawas, ug unsa ang anaa nga mga kalainan.
Nganong importante man nga mahibalo sa kamatuoran nga sa plano sa Langitnong Amahan, adunay lainlaing ang-ang sa himaya alang sa nabanhaw nga mga lawas?
Mga ang-ang sa himaya
Imahe
Illustration of the three degrees of glory. A sun, moon and stars are pictured. Stick figures underneath show varying degrees of shining rays.
Alang sa mosunod nga kalihokan, mahimong ipakita ang tulo ka mga pangutana nga nalista human sa pamahayag ni Presidente Monson aron matan-aw sa mga estudyante panahon sa ilang pagtuon.
Human sa igo nga panahon, dapita ang mga estudyante sa pagpakigbahin sa ilang mga tubag ug mga pangutana sa bisan unsa nga aduna sila ngadto sa klase.
Ang pagpadayag pinaagi sa modernong mga propeta naghatag og dugang nga mga panabot ngadto sa mga pagtulun-an ni Pablo. Tun-i ang Doktrina ug mga Pakigsaad 76:50–52, 62–64, 69–70, 71–76, 81–85 ; 88:21–24 ug basaha ang mosunod nga pamahayag ni Presidente Thomas S. Monson (1927–2018). Pangita og mga tubag sa tulo ka mga pangutana nga mosunod sa pamahayag.
Imahe
Official portrait of President Thomas S. Monson, 2008.
Isip resulta sa kadaugan ni Kristo ibabaw sa lubnganan, kitang tanan mabanhaw. Mao kini ang katubsanan sa kalag. Si Pablo misulat: “Adunay … mga lawas nga langitnon, ug mga lawas nga yutan-on: apan lain ang kasanag sa mga langitnon, ug lain usab ang mga kasanag sa mga yutan-on” ( 1 Mga Taga-Corinto 15:40).
Ang celestial nga himaya ang atong gipangita. Kita nagtinguha sa pagpuyo diha sa presensiya sa Dios. Gusto kitang mahimong miyembro sa mahangtorong pamilya. Ang ingon nga mga panalangin maangkon pinaagi sa tibuok kinabuhi nga pagpaningkamot, pagtinguha, paghinulsol, ug sa kataposan kalamposan.
Unsa ang papel sa Manluluwas sa atong panaw paingon sa celestial nga himaya?
Unsa ang kinahanglan natong buhaton aron makadawat sa celestial nga himaya?
Nganong ang pagdawat sa celestial nga himaya takos sa atong mga paningkamot kaysa sa celestial o telestial nga himaya?
Pamalandongi asa nimo dapita makita ang imong kaugalingon sa dalan paingon sa celestial nga gingharian. Nagasalig ka ba nga tabangan ka sa Manluluwas sa pagpuyo sa ingon nga paagi nga ikaw makadawat niining mga panalangin?
Makakab-ot ba gayod kita sa celestial nga himaya?
Ang pipila ka mga tawo mibati og kawalay kadasig kon ilang maamgohan unsa sila kalayo gikan sa pagpuyo sa celestial nga kinabuhi dinhi sa kalibotan. Basaha unsa ang gitudlo ni Elder Dieter F. Uchtdorf sa Korum sa Napulog Duha ka Apostoles mahitungod sa atong walay kataposang pag-uswag, o tan-awa ang bidyo nga “Ang Dios taliwala Kanato,” gikan sa time code 5:01 hangtod 6:58, anaa sa ChurchofJesusChrist.org.
Imahe
Illustration of the three degrees of glory. A sun, moon and stars are pictured. Stick figures underneath show varying degrees of shining rays.
Imahe
Official portrait of Elder Dieter F. Uchtdorf of the Quorum of the Twelve Apostles, 2006. Called as Second Counselor in the First Presidency, 3 February 2008. Made official portrait in 2008 replacing portrait taken in 2004.
Ang akong kasingkasing napuno sa pasalamat alang sa akong Langitnong Amahan. Ako nakaamgo nga Siya wala molaglag sa Iyang mga anak aron nga maglisod sa mortalidad nga walay paglaom alang sa usa ka hayag ug walay kataposan nga kaugmaon. Siya naghatag og mga panudlo nga mipadayag sa dalan balik ngadto Kaniya. Ug ang sentro niining tanan mao ang Iyang Pinalanggang Anak, si Jesukristo, ug ang Iyang sakripisyo alang kanato. …
Kitang tanan mga bata pa kon ikomparar sa mga nilalang sa himaya ug kahalangdon nga diin kita gidesinyo nga mamahimo. Walay mortal nga mga paglambo sa tawo gikan sa pagkamang ngadto sa paglakaw ngadto sa pagdagan nga walay kanunay nga mga pagkadagma, mga pagkabangga ug mga bun-og. Sa ingon niana kita makat-on.
Unsa ang natabang sa pamahayag ni Elder Uchtdorf sa imong pagsabot mahitungod sa Langitnong Amahan?
Sa unsang paagi kana nakaimpluwensiya sa imong mga pagbati ngadto Kaniya ug sa imong relasyon diha Kaniya?
Ikonsiderar ang pagdapit sa mga estudyante nga mamalandong sa hilom sa mosunod nga pangutana.
Unsa ang inyong nadasig nga pagabuhaton tungod sa unsay inyong nakat-onan karong adlawa?
Pagpamatuod nga bililhon ang pagpaningkamot alang sa pagpangandam sa pagdawat og usa ka celestial nga lawas pinaagi kang Jesukristo. Dapita ang mga estudyante sa pagpaambit unsa ang ilang nakat-onan ngadto sa ilang mga minahal sa kinabuhi kinsa nagkinahanglan niini nga mga kamatuoran.
Komentaryo ug Background nga Impormasyon
Unsa kaha kon kita naningkamot sa pagpuyo nga matinud-anon niining kinabuhia apan nagpabilin gihapon nga dili hingpit sa higayon nga kita mamatay?
Si Propeta Joseph Smith (1805–44) mipasabot:
Imahe
Half-length frontal portrait of the Prophet Joseph Smith, Jr. Joseph’s head is turned to the side in a three-quarter view, right hand on hip and his left hand holds sheets of papers. He is depicted wearing a dark brown suit and a white shirt and tie.
Kon ikaw mosaka og hagdanan, ikaw kinahanglan magsugod sa ubos, ug motikang sa kada ang-ang, hangtod ikaw moabot sa ibabaw; ug ingon usab niini ang mga prinsipyo sa ebanghelyo—kinahanglan nga ikaw magsugod sa sinugdanan, ug mopadayon hangtod nga ikaw makakat-on sa tanang mga prinsipyo sa kahimayaan. Apan mahimo nga madugay-dugay nga ikaw makaaninag sa luyo sa tabil sa dili pa ikaw makakat-on kanila. Dili ang tanan mahimong masabtan dinhi sa kalibotan; may dako nga buluhaton sa pagkat-on sa atong kaluwasan ug kahimayaan nga molungtad lapas sa lubnganan.
(Mga Pagtulun-an sa mga Presidente sa Simbahan: Joseph Smith [2007], 323)
Unsa ang gipasabot sa “Ang lawas nga igatisok madunot ra, apan ang lawas nga unya pagabanhawon dili madunot” ( 1 Mga Taga-Corinto 15:42)?
Gitandi ni Pablo ang mortal nga lawas ngadto sa usa ka liso nga dili hingpit, o madunot (tan-awa sa 1 Mga Taga-Corinto 15:37–38, 42). Human kita mamatay ug malubong (gipugas o gitanom), kita usa ka adlaw motubo gikan sa lubnganan sama sa usa ka tanom nga mitubo gikan sa yuta. Ang atong nabanhaw nga mga lawas dili na gayod madunot, apan mahimong hingpit pinaagi sa gahom sa Dios.
Kinsa ang makadawat sa celestial nga himaya?
Ang celestial nga gingharian mao ang lugar nga giandam alang niadtong mga “nakadawat sa pagpamatuod ni Jesus” ug “nahimo nga hingpit pinaagi ni Jesus ang tigpataliwa sa bag-o nga pakigsaad, kinsa naghimo niini nga hingpit nga pag-ula pinaagi sa pagpaagas sa iyang kaugalingong dugo” ( Doktrina ug mga Pakigsaad 76:51, 69). Aron mapanunod kini nga gasa, kita kinahanglang makadawat sa mga ordinansa sa kaluwasan, motuman sa mga kasugoan, ug maghinulsol sa atong mga sala. Alang sa detalyadong pagpasabot niadtong mga makapanunod sa celestial nga himaya, tan-awa ang Doktrina ug mga Pakigsaad 76:50–70 ; 76:92–96 .
(Gospel Topics, “Kingdoms of Glory,” topics.ChurchofJesusChrist.org)
Dugang nga Kalihokan sa Pagkat-on
Pagtandi sa atong mortal nga mga lawas ngadto sa atong nabanhaw nga mga lawas
Dapita ang mga estudyante nga maghimo og ilang kaugalingong mga butang sa leksiyon [object lessons] nga mahimo nilang gamiton aron tabangan ang usa ka tawo nga makasabot sa Pagkabanhaw. Mahimong hatagan sila og usa ka pananglitan sama sa pagtandi sa usa ka ulod ngadto sa usa ka alibangbang, o itandi ang pagguba sa usa ka karaan nga bilding ngadto sa pagtukod og usa ka bag-ong bilding puli niini.
Ipasabot sa mga estudyante nga si Pablo migamit sa pananglitan sa pagtanom og usa ka liso aron matabangan ang mga Taga-Corinto nga makasabot sa Pagkabanhaw (tan-awa ang 1 Mga Taga-Corinto 15:35–38). Ang atong mortal nga mga lawas mahimong itandi ngadto sa usa ka liso. Ang atong kamatayon ug paglubong mahimong itandi sa liso nga gitanom (gipugas). Ang atong nabanhaw nga mga lawas mahimong ikatandi ngadto sa tanom nga mitubo.
Dapita ang mga estudyante sa pagtuon sa 1 Mga Taga-Corinto 15:43–54 , aron markahan ang mga pulong nga gigamit ni Pablo sa paghulagway sa atong mortal nga mga lawas, ug aron markahan (sa laing mga paagi) ang mga pulong nga gigamit ni Pablo sa paghulagway sa atong nabanhaw nga mga lawas.
Dapita ang mga estudyante sa pagsulat sa pisara og usa ka pisikal nga kalisod nga anaa sa usa ka minahal sa kinabuhi. Ang mga pananglitan naglakip sa sakit, dili maayong panan-aw, usa ka wala sa kondisyon nga likod, o problema sa mga lutahan. Dapita ang mga estudyante sa pagpiyong sa ilang mga mata ug handurawon ang ilang minahal sa kinabuhi sa usa ka nabanhaw nga lawas, giayo sa gahom sa Dios gikan sa tanan niining mga kalisdanan. Papasa ang matag usa sa pisikal nga mga kalisdanan sa pisara, ug pagpamatuod sa gugma sa Langitnong Amahan ug ni Jesukristo, kinsa naghimo niadtong mga kalisdanan nga temporaryo, ug kinsa maghatag sa matag usa kanato ug nabanhaw nga lawas alang sa kahangtoran.