Doktrinal nga Kahanas: 1 Mga Taga-Corinto 15:20–22

“Maingon Man Usab Diha Kang Kristo Ang Tanan Mangabuhi”

Imahe

One oil painting of Mary seeing the resurrected Christ. The tomb is in the background, Mary is seen dressed in brown, her back to the viewer. Christ is seen with marks on his hands, dressed in a white robe.

Sa miaging leksiyon, imong nakat-onan nga tungod sa Pagkabanhaw sa Manluluwas, ang tanang mga anak sa Langitnong Amahan mabanhaw (tan-awa sa 1 Mga Taga-Corinto 15:20–22). Kini nga leksiyon makatabang nimo sa pagmemorya sa pakisayran sa doktrinal nga kahanas ug sa mahinungdanon nga hugpong sa mga pulong sa kasulatan alang sa 1 Mga Taga-Corinto 15:20–22, pagpasabot sa doktrina sa Pagkabanhaw, ug paggamit sa mga baroganan sa pag-angkon og espirituhanong kahibalo sa tinuod nga sitwasyon sa kinabuhi.

Pagpangandam sa estudyante: Dapita ang mga estudyante sa pagpamalandong og mga kasinatian nga ilang nahibaloan mahitungod sa usa ka tawo nga namatyan og minahal sa kinabuhi. Sultihi sila nga motambong nga andam maghisgot sa mga hagit niining mga kasinatian ug unsaon sa hugot nga pagtuo kang Jesukristo pagtabang niadtong nag-atubang niining maong mga hagit.

Posible nga mga Kalihokan sa Pagkat-on

Gidisenyo kini nga leksiyon sa tudling sa doktrinal nga kahanas aron itudlo human sa leksiyon sa “1 Mga Taga-Corinto 15:13–28,” nga mao ang pangkontekstong leksiyon para sa tudling sa doktrinal nga kahanas sa 1 Mga Taga-Corinto 15:20–22 . Kon gikinahanglan nga kining leksiyon sa tudling sa doktrinal nga kahanas ibalhin ngadto sa laing semana, seguroha nga itudlo usab ang tukma nga pangkonteksto nga leksiyon nianang semanaha.

Imemorya ug ipasabot

Si Presidente Gordon B. Hinckley (1910–2008) nagtudlo nga “sa tanang mga panghitabo sa kasaysayan sa tawo, wala nay makalabaw pa kaysa sa pagkabanhaw sa Anak sa Dios” (“The Empty Tomb Bore Testimony,” Ensign, Mayo 1988, 65).

Gamita ang mga kamatuoran gikan sa 1 Mga Taga-Corinto 15:20–22 , sama sa tungod sa Pagkabanhaw ni Jesukristo, ang tanan mabanhaw, aron ipasabot nganong ang Pagkabanhaw sa Manluluwas mao ang labing mahinungdanong hitabo sa kasaysayan sa tawo. Ilakip nganong mahinungdanon kini alang sa imong kaugalingon.

Dapita ang pipila ka estudyante sa pagpakigbahin sa ilang mga pagpasabot diha sa klase. Ilha kon ang mga estudyante nagkinahanglan ba og dugang nga mga panudlo mahitungod sa doktrina sa Pagkabanhaw sa dili pa mopadayon sa leksiyon.

Paggahin og higayon sa pagsag-ulo sa pakisayran sa kasulatan ug sa mahinungdanong hugpong sa mga pulong sa kasulatan diha sa 1 Mga Taga-Corinto 15:20–22 . Ang mosunod nga mga lakang makahatag og paagi aron mabuhat kini.

Dapita ang mga estudyante sa paghipos sa papel nga ilang gigamit niniing kalihokan aron magamit sa umaabot nga leksiyon.

Sa ibabaw nga bahin sa papel, isulat ang pakisayran sa kasulatan ug ang mahinungdanong hugpong sa mga pulong sa kasulatan 1 Mga Taga-Corinto 15:20–22: “Maingon nga diha kang Adan ang tanan nangamatay, maingon usab diha kang Kristo ang tanan mangabuhi.”
Pil-a ang ibabaw nga bahin sa inyong papel paubos aron dili ninyo makita ang inyong gisulat. Dayon pagsulat og kutob sa inyong mahimo sa pakisayran sa kasulatan ug sa mahinungdanong mga hugpong sa mga pulong sa kasulatan nga inyong mahinumdoman.
Ablihi ang ibabaw aron ma-tsek ang pagka insakto niini ug usba ang bisan unsang mga sayop.
Balika kini nga proseso hangtod inyong mahingpit pagsulat ang pakisayran sa kasulatan ug ang mahinungdanong hugpong sa mga pulong sa kasulatan gikan sa panumdoman.

Bansaya ang paggamit

Tungod sa Pagkapukan ni Adan ug Eba, ang matag anak sa Langitnong Amahan kinsa nakasinati og mortalidad sa kalibotan mamatay (tan-awa sa 1 Mga Taga-Corinto 15:21–22). Kon kita makasinati nga mamatyan og usa ka tawo nga duol kanato, kita mobati og dili masabtan nga pagbangotan. Bisan og kining mga kasinatian managlahi sa tanan, ang pagsabot ug paggamit sa mga kamatuoran sa ebanghelyo ni Jesukristo mahimong makatabang niana nga pagbangotan.

Ang mosunod nga senaryo usa ka pananglitan nga mahimong gamiton alang sa pagbansay sa paggamit sa kalihokan. Isip alternatibong paagi, ang uban pa nga mga senaryo mahimong gamiton, sama sa usa ka personal nga kasinatian, usa ka kasinatian sa estudyante gikan sa iyang pagpangandam sa klase, o ang kasinatian nga gipaambit ni Sister Reyna I. Aburto sa Kinatibuk-ang Kapangulohan sa Relief Society sa iyang pakigpulong nga giulohan “Ang Lubnganan Walay Kadaogan” (tan-awa gikan sa time code 4:22 hangtod 4:49). Kini nga bidyo anaa sa ChurchofJesusChrist.org.

Si Elder S. Mark Palmer sa Seventy naghulagway sa kasinatian sa iyang mga ginikanan sa pagkamatay sa ilang anak nga babaye sa wala pa sila makat-on mahitungod sa ebanghelyo ni Jesukristo.

Tan-awa ang “Mahimong Kalipay ang Atong Kaguol,” anaa sa ChurchofJesusChrist.org, gikan sa time code 3:27 hangtod 4:26, o basaha ang pamahayag sa ubos.

Imahe
Former Official portrait of Elder S. Mark Palmer. Replaced March 2017.

Ang akong mga ginikanan tigpamuhi og mga karnero sa New Zealand. Nalingaw sila sa ilang kinabuhi. Sa bag-o pa silang naminyo, gipanalanginan sila og tulo ka anak nga babaye. Ang kinamanghoran niini ginganlan og Ann. Usa ka adlaw samtang naglingawlingaw sila sa usa ka linaw, ang 17 ka bulan nga si Ann nawala dihang naglakaw-lakaw. Human sa mga minutos nga walay kahimoang pagpangita, nakit-an siyang patay na diha sa tubig.

Kining masulub-ong hitabo nagmugna og dili matukib nga kasubo. Si Papa misulat paglabay sa katuigan nga ang hudyaka nawala sa ilang kinabuhi sa hangtod. Misangpot usab kini sa pagtinguha og mga tubag sa pinakaimportanting mga pangutana sa kinabuhi: Unsay mahitabo sa among pinalangga kaayong si Ann? Makita ba namo siya pag-usab? Sa unsang paagi ang among pamilya magmalipayon pag-usab?

(S. Mark Palmer, “Mahimong Kalipay ang Atong Kaguol,” Liahona, Mayo 2021, 89)

Kanus-a ka o ang imong kaila nakasinati og susamang mga pagbati sama niadtong mga ginikanan ni Elder Palmer human sa pagkamatay sa usa ka minahal sa kinabuhi?
Sa unsang paagi nga ang wala pagkasayod mahitungod sa plano sa kaluwasan sa Langitnong Amahan makahimo niining mga sitwasyon nga mas mahagiton?

Ang mga baroganan sa pag-angkon og espirituhanong kahibalo makatabang kanato aron matinud-anong molahutay sa malisod nga mga sitwasyon sama sa nasinati sa pamilya Palmer.Handurawa nga ikaw higala sa usa sa mga maguwang nga igsoong babaye ni Ann, kinsa karon nanlimbasog sa mga pangutana ug mga hagit human sa kamatayon ni Ann. Ikaw mibati nga naaghat sa pagsulat kaniya og pagdasig ug pagsuporta. Sa alternatibong paagi, pagsulat og usa ka sulat ug ihatag kini sa imong kaila kinsa makabenepisyo gikan niini.

Sa dili pa hatagan ang mga estudyante og higayon aron sa pagsulat og mga sulat, mahimong bahinon sila nga magkapares o sa gagmayng mga grupo ug dapita sila sa paghisgot sa mga pangutana nga nalista sa ubos nga may kalabotan sa mga baroganan sa pag-angkon og espirituhanong kahibalo. Ang mga estudyante mahimong ibutang sa tinagtulo kada grupo, diin ang matag tawo sa grupo tahasan sa pagtuon ug pagtudlo sa usa sa mga baroganan sa pag-angkon og espirituhanong kahibalo ngadto sa ilang mga kagrupo.

Dapita sila sa paggamit og mga panabot gikan sa ilang pagpangandam sa klase samtang ilang gibuhat ang mosunod nga kalihokan.

Aron maandam sa pagsulat niini nga sulat, basaha ang mga parapo 5–8, 11 sa “Pag-angkon og Espirituhanong Kahibalo” nga bahin diha sa Mahinungdanon nga Dokumento sa Doktrinal nga Kahanas (2022). Pangitaa ug markahi ang mga pulong, mga hugpong sa mga pulong, mga kasulatan, o mga kamatuoran nga nabati nimong makatabang sa tawo nga imong gisulatan.

Sa unsang paagi nga ang pagsulay og tan-aw sa tawo nga imong gisulatan sama sa pagtan-aw sa Langitnong Amahan kaniya makapausab sa unsa ang imong isulat ngadto kanila?

Pagsulat og usa ka sulat ngadto sa igsoong babaye ni Ann o ngadto sa laing tawo nga imong napili. Paglakip og mga panabot gikan sa tulo ka mga baroganan sa pag-angkon og espirituhanong kahibalo.

Ikonsiderar ang pipila sa mosunod nga mga ideya diha sa imong pagsulat.

Ipakita ang mosunod nga mga ideya aron makita sa mga estudyante samtang magsulat sila.

Lihok diha sa hugot nga pagtuo

Unsa lagmit ang hitsura sa paglihok nga may hugot nga pagtuo kang Jesukristo sa ilang sitwasyon?
Sa unsang paagi nga ang paglihok nga may hugot nga pagtuo kang Kristo makatabang nato sa paglahutay sa pagbangotan?
Unsa ang usa ka kasinatian nga nasinati nimo o sa imong kaila diin ang paglihok nga may hugot nga pagtuo kang Jesukristo nakatabang sa paglahutay sa susamang hagit?

Susiha ang mga konsepto ug mga pangutana inubanan sa mahangtorong panglantaw

Unsa nga mga kamatuoran mahitungod sa Langitnong Amahan ug sa Iyang plano ang mahimong makapahupay sa sitwasyon sa tawo nga imong gisulatan? Ngano man kaha?
Sa unsang paagi nga ang pagbaton og mahangtorong panglantaw makatabang kanila nga mahibalo unsaon pagsagubang ang ilang sitwasyon?

Tinguhaa ang dugang nga panabot pinaagi sa balaanong gitudlo nga mga tinubdan

Unsa nga mga hugpong sa mga pulong gikan sa 1 Mga Taga-Corinto 15:20–22 ang mahimong makatabang kanila? Ngano man kaha?
Unsa pa ang uban nga balaanong gitudlo nga mga tinubdan ang makatabang kanila sa pagpalambo sa hugot nga pagtuo kang Jesukristo?

Mahimong taposon ang imong sulat pinaagi sa pagpaambit sa imong pagpamatuod.

Pagdapit og andam nga mga estudyante nga mopakigbahin sa ilang mga sulat ngadto sa klase. Dasiga sila sa paggamit sa mga baroganan sa pag-angkon og espirituhanong kahibalo aron mogiya kanila panahon sa mga hagit o mga pangutana sa ilang kaugalingong mga kinabuhi.

Rebyo sa doktrinal nga kahanas

Sa sinugdanan o sa kataposang bahin sa umaabot nga leksiyon, paggahin og dili molapas sa tulo hangtod sa lima ka minuto sa pagrebyo sa pakisayran sa kasulatan ug sa mahinungdanong hugpong sa mga pulong sa kasulatan alang niining tudling sa doktrinal nga kahanas. Dapita ang mga estudyante sa pagpangita sa gipilo nga papel nga ilang gigamit sa pagsag-ulo sa 1 Mga Taga-Corinto 15:20–22 . Tungod sa pagpilo sa papel dili nila makita kon unsay ilang gisulat kaniadto, dapita dayon ang mga estudyante nga mosulay ug mosulat sa pakisayran ug sa hugpong sa pulong sa kasulatan gikan sa panumdoman. Kon sila dili makahimo niini nga walay tabang, dapita sila sa pag-ukab sa papel ug pagrebyo niini kon gikinahanglan. Mahimo nilang ipadayon ang pagpilo ug pagsulat hangtod ilang masulat ang pakisayran ug hugpong sa mga pulong gikan sa panumdoman.