Doktrinal nga Kahanas: 1 Mga Taga-Corinto 15:40–42

Diha sa Pagkabanhaw, Adunay Tulo Ka Ang-ang sa Himaya

Imahe

An illustration showing Salvation and Exaltation: Sun & Moon and Stars

Sa miaging leksiyon, sa “1 Mga Taga-Corinto 15:32–54,” ikaw nakat-on mahitungod sa tulo ka ang-ang sa himaya diha sa Pagkabanhaw. Imo usab nga nakat-onan nga ang atong Amahan sa Langit maghatag ngadto sa matinud-anon og celestial nga himaya pinaagi ni Jesukristo. Kini nga leksiyon makatabang kaninyo sa pagmemorya sa pakisayran sa doktrinal nga kahanas ug sa mahinungdanon nga hugpong sa pulong sa kasulatan alang sa 1 Mga Taga-Corinto 15:40–42, pagpasabot sa doktrina, ug paggamit sa mga baroganan sa pag-angkon og espirituhanong kahibalo sa tinuod nga sitwasyon sa kinabuhi.

Pagtabang sa mga estudyante nga makakaplag og mga tubag sa ilang mga pangutana. Dili responsibilidad sa magtutudlo ang pagtubag sa kada pangutana sa usa ka estudyante. Tabangi ang mga estudyante sa paggamit sa mga baroganan sa pag-angkon og espirituhanon nga kahibalo aron sila mismo ang makadiskobre sa mga tubag. Dasiga ang mga estudyante nga magmatinud-anong moduol ug mosalig sa Ginoo. Mahimong makatabang ang paglihok isip usa ka giya sa pag-ila sa balaanong gitudlo nga mga tinubdan nga mahimo nilang gamiton sa pagpangita og mga tubag.

Pagpangandam sa estudyante: Dapita ang mga estudyante nga mobasa sa 1 Mga Taga-Corinto 15:40–42 ug motambong sa klase nga andam mopaambit og usa ka senaryo sa tinuod nga kinabuhi diin ang doktrina nga gitudlo niini nga tudling mahimong makatabang.

Posible nga mga Kalihokan sa Pagkat-on

Gidisenyo kini nga leksiyon sa tudling sa doktrinal nga kahanas aron itudlo human sa leksiyon sa “1 Mga Taga-Corinto 15:32–54,” nga mao ang pangkontekstong leksiyon para sa tudling sa doktrinal nga kahanas sa 1 Mga Taga-Corinto 15:40–42 . Kon gikinahanglan nga kining leksiyon sa tudling sa doktrinal nga kahanas ibalhin ngadto sa laing semana, seguroha nga itudlo usab ang tukma nga pangkonteksto nga leksiyon nianang semanaha.

Imemorya ug ipasabot

Tabangi ang mga estudyante sa pagsag-ulo ug pagpasabot sa pakisayran sa kasulatan ug sa mahinungdanong hugpong sa pulong sa kasulatan alang sa 1 Mga Taga-Corinto 15:40–42 . Ang mosunod nga kalihokan usa ka paagi aron mabuhat kini.

Alang niini nga kalihokan, ikonsiderar ang pagtugot sa mga estudyante sa pagkompleto sa matag lakang sa dili pa hatagan sa sunod nga lakang.

Isulat ang “1 Mga Taga-Corinto 15:40–42: Diha sa Pagkabanhaw, Adunay Tulo Ka Ang-ang sa Himaya” sa ibabaw nga bahin sa usa ka piraso sa papel.
Pagdrowing og usa ka adlaw sa ubos sa hugpong sa pulong, usa ka bulan sa ubos sa adlaw, ug usa ka bitoon ubos sa bulan.
Basaha ang 1 Mga Taga-Corinto 15:40–42 , ug panganli ang matag drowing og ngalan sa himaya nga girepresentar niini. (Timan-i nga ang Paghubad ni Joseph Smith sa 1 Mga Taga-Corinto 15:40 nagdugang og usa ka pakisayran ngadto sa telestial nga himaya [sa 1 Mga Taga-Corinto 15:40 ].)
Tan-awa ang imong gidrowing samtang nagbalik-balik og sulti sa pakisayran sa kasulatan ug sa mahinungdanong hugpong sa pulong sa kasulatan sa imong hunahuna hangtod imong mabati ang kompyansa nga ikaw nahibalo na gayod kaayo niini.
Unsaon nimo pagpasabot sa mga kamatuoran nga gitudlo niini nga tudling ngadto sa usa ka tawo nga wala makasabot unsa ang mahitabo human sa kamatayon sa plano sa Langitnong Amahan? Isulat ang imong pagpasabot sa imong kaugalingong mga pulong.

Ikonsiderar ang pagdapit sa mga estudyante sa paglibot sa lawak klasehanan [room] ug sa pagpaambit sa ilang mga pagpasabot sa dili mominos tulo ka lain pang mga estudyante. Kon gikinahanglan, ipakita unsaon pagpahayag niini nga mga kamatuoran sa dili pa sugdan sa mga estudyante ang pagpaambit ngadto sa usag usa.

Dasiga ang mga estudyante sa pagtipig sa ilang mga drowing o ipasa kini aron ilang magamit sa pagrebyo niini nga tudling sa usa ka leksiyon sa umaabot.

Bansaya ang paggamit

Ang paggamit sa mga baroganan sa pag-angkon og espirituhanong kahibalo mahimong makatabang kanato sa mga sitwasyon sa tinuod nga kinabuhi ug importanteng mga pangutana nga anaa kanato.

Basaha ang mosunod nga mga senaryo, ug pagpili og usa nga ganahan nimong i-pokus alang sa sunod nga kalihokan.

Dapita ang mga estudyante nga nakakompleto sa pagpangandam sa estudyante nga kalihokan sa pagpaambit sa ilang mga senaryo. Mahimong pulihan ang mosunod nga mga senaryo sa mga senaryo sa mga estudyante.

Si Julia matinud-anong nagsulay pagbuhat sa unsa ang insakto, apan kanunay siyang mobati nga gitunglo tungod sa iyang mga kahuyang. Siya nagtuo nga ang ubang mga tawo makaadto sa celestial nga gingharian apan nagduhaduha nga siya makahimo niini.
Si Maria bag-o lang nakadungog og usa ka mahinungdanong pakigpulong mahitungod sa gasa sa pagkabanhaw nga ihatag sa Langitnong Amahan ug ni Jesukristo sa matag usa. Siya nahibulong, “Nganong kinahanglang maghinulsol man ako o magpadayon sa pagtuman sa mga sugo kon ang tanan mabanhaw man sa usa ka hingpit nga imortal nga lawas?”

Mahimong igrupo ang mga estudyante sa tinagtulo kauban sa ubang mipili sa susamang senaryo. Alang sa mosunod nga kalihokan, ang matag estudyante sa grupo mahimong hangyoon sa pagtuon ug paggamit og managlahing baroganan sa pag-angkon og espirituhanong kahibalo. Human sa igong panahon, dapita sila nga moreport unsay ilang nakat-onan sa ilang grupo.

Mahimong makatabang ang pagpakita o pag-imprinta sa mosunod nga mga seksiyon aron makita sa mga estudyante samtang sila magtuon.

Sa miaging leksiyon, inyong gitun-an ang mahitungod sa mosunod nga kamatuoran nga gitudlo sa 1 Mga Taga-Corinto 15:40–42 : sa plano sa Langitnong Amahan, adunay lainlaing mga ang-ang sa himaya alang sa nabanhaw nga mga lawas. Gamita ang mga baroganan sa pag-angkon og espirituhanong kahibalo ug ang kamatuoran nga gitudlo sa 1 Mga Taga-Corinto 15:40–42 aron tabangan si Julia o Maria sa iyang mga kabalaka o mga pangutana.

Susiha ang mga konsepto ug mga pangutana inubanan sa mahangtorong panglantaw

Basaha ang parapo 8 diha sa “Pag-angkon og Espirituhanong Kahibalo” nga seksiyon diha sa Mahinungdanon nga Dokumento sa Doktrinal nga Kahanas (2022). Mahimong markahan ang duha ka mga pangutana sa kataposan niana nga parapo.

Sa unsang paagi nga magamit sa sitwasyon ni Julia o Maria kadtong mga tubag sa duha ka mga pangutana.

Ang parapo 8 nagsulti usab nga, “Tinguhaon nato ang tabang sa Espiritu Santo aron makita ang mga butang sama sa pagkakita niini sa Ginoo.”

Unsa kalagmitan ang makita sa Ginoo niini nga sitwasyon nga mahimong makatabang kang Julia o Maria? Ngano man kaha?

Tinguhaa ang dugang nga panabot pinaagi sa balaanong gitudlo nga mga tinubdan

Basaha ang mga parapo 11–12 diha sa “Pag-angkon og Espirituhanong Kahibalo” nga seksiyon sa Mahinungdanon nga Dokumento sa Doktrinal nga Kahanas.

Sa asa nimo tambagan si Julia o Maria aron mangita sa mga kamatuoran nga ilang gikinahanglan sa ilang kinabuhi?
Unsa nga mga kasinatian ang imong nasinati nga nagpakita sa importansiya sa mabinantayong pagpili kon asa ka mangita sa espirituhanong kamatuoran?

Paggahin og pipila ka minuto sa pagpangita og piho nga mga kasulatan o propetikanhong mga pamahayag nga pamati nimo magamit sa sitwasyon ni Julia o Maria. (Ang pipila sa mga tudling sa kasulatan gikan sa bag-ohayng leksiyon nga mahimong makatabang naglakip sa 1 Mga Taga-Corinto 15:40–42 ; Doktrina ug mga Pakigsaad 76:50–52, 62–64, 69–70, 71–76, 81–85 ; 88:21–24 .)

Unsa ang imong nakit-an nga lagmit imong mapaambit? Sa unsang paagi nga ang mga kamatuoran nga imong nakit-an nakahimo og kalahian sa imong kinabuhi?

Paglakaw-lakaw palibot sa lawak klasehanan [room], ug tabangi ang mga estudyante nga dili kaayo kaantigo unsaon pagpangita sa mga tudling sa kasulatan o mga pamahayag sa mga lider sa Simbahan. Ikonsiderar ang pagpakita kanila unsaon pagpangita sa ilang gipangita kaysa yanong hatagan sila og usa ka pakisayran sa kasulatan o usa ka pamahayag nga mahimong magamit.

Lihok diha sa hugot nga pagtuo

Ribyoha ang mga parapo 5–6 diha sa “Pag-angkon og Espirituhanong Kahibalo” nga seksiyon sa Mahinungdanon nga Dokumento sa Doktrinal nga Kahanas. Mahimong markahan ang labing menos sa tulo ka lainlaing mga hugpong sa mga pulong o mga ideya nga sa imong hunahuna mahimong makatabang ni Julia o Maria.

Unsa nga mga hugpong sa mga pulong ang imong gipili? Sa unsang paagi nga ang matag usa niining mga hugpong sa mga pulong makatabang kang Julia o Maria?
Kon aduna kay mga gipanghunahuna nga sama kang Julia o Maria, unsa ang imong gibuhat aron matinud-anong mosanong sa maong mga hunahuna?
Nganong ang matag usa niining batan-ong mga babaye nagkinahanglang ipokus ang ilang hugot nga pagtuo ngadto kang Jesukristo samtang ilang sulbaron ang ilang sitwasyon? Ngano nga dili nalang buhaton ang labing maayo nga ilang mahimo nga wala magpokus Kaniya?

Mahimong sultihan ang mga estudyante sa pagpamalandong sa ilang kaugalinong mga kinabuhi, mga kinaiya, ug mga pangutana. Dasiga sila sa paggamit sa mga baroganan sa pag-angkon og espirituhanong kahibalo sa ilang kaugalingong mga sitwasyon sa gawas sa klase. Pagpamatuod nga kining mga baroganan makatabang kanila nga moduol kang Kristo aron makakaplag sa kamatuoran ug mas dakong kalinaw.

Rebyo sa doktrinal nga kahanas

Sa sinugdanan o kataposang bahin sa umaabot nga leksiyon, paggahin og dili mosobra sa tulo hangtod sa lima ka minuto sa pagrebyo sa tudling sa doktrinal nga kahanas. Pananglitan, ang mga estudyante mahimong magrebyo sa ilang gidrowing nga tulo ka mga ang-ang sa himaya samtang nagbalik-balik og sulti sa ilang hunahuna sa pakisayran ug sa mahinungdanong hugpong sa mga pulong sa kasulatan. Dayon dapita sila sa pagpakita sa ilang mga gidrowing ngadto sa usa ka kapares samtang sublion pag-sulti sa makusog nga paagi pinaagi sa pagmemorya sa pakisayran ug sa hugpong sa pulong.