2 Mga Taga-Corinto 1–7

Kinatibuk-ang Pagpasabot

Sa dihang ang mga tawo sa Corinto nakasinati og kalisod, si Pablo nagsulat sa mga miyembro sa Simbahan didto aron magtanyag og padayon nga suporta ug tambag. Iyang gidapit sila aron mopasaylo sa usag usa, alang sa kaayohan sa tawong gipasaylo ingon man usab alang sa ilang kaugalingong benepisyo. Iyang gitudlo nga tungod sa Pag-ula ni Kristo, sila matubos gikan sa sala ug madala balik ngadto sa gikahimut-ang relasyon sa Dios. Sa iyang kalipay ug katagbawan, siya nakadungog nga ang mga Santos nga Taga-Corinto nakasinati og tinud-anay nga paghinulsol.

Pangandam sa Pagtudlo

Ang mosunod nga impormasyon maghatag sa mga magtutudlo og mga ideya kon unsa ang lagmit nga kinahanglang andamon daan para sa kada leksiyon.

2 Mga Taga-Corinto 1, 4

Tumong sa leksiyon: Kini nga leksiyon makatabang sa mga estudyante aron makasabot sa pipila sa mga paagi nga ang Dios maghatag og kahupayan ngadto sa Iyang mga anak ug aron sa pag-ila sa mga paagi diin sila mahimong makapaambit sa Iyang kahupayan ngadto sa uban.  

Pagpangandam sa estudyante: Dapita ang mga estudyante sa paghunahuna og lainlaing mga paagi nga sila nakadawat og kahupayan kon mahitabo ang dili maayong mga butang sa ilang mga kinabuhi. Kon mahimo, dasiga sila sa pagdala og usa ka litrato o butang nga nagrepresentar og tinubdan sa kahupayan alang kanila.

Sugyot sa pagtudlo pinaagi sa videoconference: Sa higayon nga ang mga estudyante hangyoon sa paghunahuna og mga butang nga makahupay kanila, ikonsiderar ang pagpakita og pipila ka makahupay nga personal nga mga butang o mga hulagway gikan sa balay. Ang pagpakita niining mga butang sa screen ug pagpasabot sa ilang importansiya mahimong makatabang sa pagdugtong sa gilay-on ug pagmugna og usa ka komportable nga palibot sa pagkat-on.

2 Mga Taga-Corinto 2

Tumong sa leksiyon: Kini nga leksiyon gituyo aron matabangan ang mga estudyante nga madugangan ang ilang pagsabot sa importansiya sa pagpasaylo ug ilang tinguha sa pagpasaylo sa uban.

Pagpangandam sa estudyante: Dapita ang mga estudyante nga motambong nga andam nga mopaambit og usa ka pananglitan sa ilang kaila kinsa naghatag og Kristohanong pagpasaylo ngadto sa ubang tawo.

Sugyot sa pagtudlo pinaagi sa videoconference: Alang sa 2 Mga Taga-Corinto 2:5–11 , gamita ang whiteboard nga function aron sa paghimo og duha ka mga kolum. Suwati ang usa ka kolum og “Unsaon nato pagtratar ang usa ka tawo nga maoy hinungdan sa atong tumang kaguol?” ug ang lain pang kolum og “Nganong kinahanglan nato silang itratar nianang paagiha?” Ang mga estudyante mahimong dapiton sa pagpaambit sa ilang mga hunahuna aron imong i-type, o mahimo nilang i-type ang ilang mga tubag gamit ang usa ka annotation tool.

2 Mga Taga-Corinto 5

Tumong sa leksiyon: Kini nga leksiyon makatabang sa mga estudyante aron mas mahiduol sa Dios ug mahimong kinsa Iyang gusto nga sila mamahimo.

Pagpangandam sa estudyante: Dapita ang mga estudyante sa pagpamalandong mahitungod sa mga panahon diin sila nakabati nga mas duol sa Dios ug sa mga panahon nga sila nakabati og pagkahilayo gikan Kaniya ug aron motambong sa klase nga andam magkat-on ug mopaambit niini nga mga kasinatian.

Content nga ipakita: Ang tulo ka mga pangutana nga ikonsiderar sa mga estudyante samtang sila magtuon sa 2 Mga Taga-Corinto 5:17–21 , ingon man usab ang upat ka mga ideya nga ila unyang pamalandongan sa leksiyon (nagsugod sa “Unsa kaha tingali ang hulagway ug pagbati nga mapasig-uli sa Dios sa kahangtoran?”)

Sugyot sa pagtudlo pinaagi sa videoconference: Sa sinugdanan sa leksiyon, dapita ang mga estudyante sa pagpaambit diha sa chat og pipila sa tinuod nga kinabuhi nga mga senaryo nga lagmit maparehas sa kadtong anaa sa leksiyon. Mahimo silang dapiton sa pagkonsiderar kon sa unsang paagi ang mga kamatuoran niini nga leksiyon makatabang niadtong mga senaryo.

2 Mga Taga-Corinto 7

Tumong sa leksiyon: Kini nga leksiyon makatabang sa mga estudyante nga makasabot sa importanteng sangkap sa tinuod nga paghinulsol ug matabangan sila aron mas mahiduol ngadto kang Jesukristo.

Pagpangandam sa estudyante: Dapita ang mga estudyante sa paghunahuna kon unsaon nila pagkasayod kon sila nakasinati og tinuod nga paghinulsol. Mahimo usab silang dapiton sa pagtuon sa bahin nga “Ang Diosnon nga kasubo mosangpot sa paghinulsol” gikan sa Dali, Sunod Kanako sa outline nga (“Setyembre 11–17. 2 Mga Taga-Corinto 1–7: ‘Magpasig-uli Kamo ngadto sa Dios,’” Dali, Sunod Kanako—Alang sa mga Indibidwal ug mga Pamilya: Bag-ong Tugon 2023).

Sugyot sa pagtudlo pinaagi sa videoconference: Ikonsiderar ang paghimo og usa ka tsart nga ang usa ka kolum sulatan og “Diosnong Kasubo” ug ang usa ka kolum sulatan og “Kalibotanong Kasubo.” Dayon ipakigbahin ang imong screen ug pun-a ang mga kolum sa mga panabot sa mga estudyante mahitungod sa kadtong duha ka mga klase sa kasubo. Isip alternatibong paagi, ang mga estudyante mahimong mangita sa ChurchofJesusChrist.org og mga imahe nga maghulagway sa bisan asa sa diosnong kasubo o kalibotanong kasubo. Ang mga estudyante mahimo dayong magdugang niini ngadto sa usa ka shared nga tsart nga makita nilang tanan. Dapita ang mga estudyante sa pagpasabot giunsa sa mga imahe nga ilang gipaambit paghulagway sa diosnon o kalibotanong kasubo.

Pagrebyo sa Doktrinal nga Kahanas 19

Tumong sa leksiyon: Kini nga leksiyon gituyo aron sa pagtabang sa mga estudyante sa pagsag-ulo sa pipila ka mga pakisayran sa kasulatan sa doktrinal nga kahanas sa Bag-ong Tugon ug sa mahinungdanong hugpong sa mga pulong sa kasulatan.

Pagpangandam sa estudyante: Hatagi ang mga estudyante og kopya sa tsart sa pakisayran sa kasulatan ug sa mahinungdanong hugpong sa mga pulong sa kasulatan, ug dapita sila sa pagsag-ulo og ingon kadaghan sa lima ka mga pakisayran sa kasulatan sa doktrinal nga kahanas ug sa mahinungdanong hugpong sa mga pulong sa kasulatan kon mahimo. Ang mga estudyante mahimo usab mogamit sa Doctrinal Mastery nga app. Isip alternatibo nga paagi, ang mga estudyante mahimong maningkamot sa pagsag-ulo sa usa ka tibuok tudling sa doktrinal nga kahanas.

Sugyot sa pagtudlo pinaagi sa videoconference: Gamit ang lima ka mga tudling sa doktrinal nga kahanas gikan sa leksiyon o bisan asa sa lima ka mga tudling nga kinahanglang irebyo sa mga estudyante, mahimong dapiton ang mga estudyante sa pagsulat og mahinungdanong hugpong sa mga pulong sa kasulatan diha sa lima ka managlahing panid sa papel. Ibutang ang usa sa mga tudling sa screen, ug dayon dapita ang mga estudyante nga dungan nga ipataas ang saktong mahinungdanong hugpong sa pulong sa kasulatan sa ihap nga tulo. Ipadayon kini nga kalihokan hangtod ang tanang mga tudling narebyo ug ang mga estudyante makabati og kompyansa nga sila makatugma sa mga tudling sa insakto.