Two young women sit together on a bench. One of the young women appears to be distraught, sad, or concerned about something. The other young woman is showing concern and appears to be trying to comfort the other.
Kitang tanan nakasinati og kasakit sa kasingkasing ug kasubo, mga kapakyasan ug mga babag, ug kahasol ug sakit. Sa dihang ang katawhan sa Corinto nakasinati og kalisod, si Pablo nisulat sa mga miyembro sa Simbahan didto aron maghatag og padayon nga suporta ug tambag. Siya nagpamatuod sa kahupayan ug kalinaw nga maanaa kanila pinaagi sa Langitnong Amahan ug ni Jesukristo (tan-awa sa 2 Mga Taga-Corinto 1:3–4). Kini nga leksiyon makatabang kanimo aron makasabot sa pipila sa mga paagi sa Dios sa paghupay sa Iyang mga anak ug sa pag-ila og mga paagi nga ikaw makapaambit sa Iyang kahupayan ngadto sa uban.
Paggamit og mga butang ug mga hulagway. Ang uban nga mga konsepto sa ebanghelyo mahimong lisod nga masabtan. Ang paggamit og mga butang ug mga litrato mahimong usa ka epektibong paagi sa pagtabang sa mga estudyante nga makasabot sa espirituhanong mga baroganan.
Pagpangandam sa estudyante: Dapita ang mga estudyante sa paghunahuna og lain-laing mga paagi nga sila nakadawat og kahupayan atol sa dili maayong dagan sa ilang kinabuhi. Kon posible, dasiga sila sa pagdala og usa ka hulagway o butang nga nagrepresentar og tinubdan sa kahupayan ngadto kanila.
Posible nga mga Kalihokan sa Pagkat-on
Unsay naghatag kanimo ug kahupayan?
Kon ang mga estudyante gisultihan sa pagbuhat sa pagpangandam sa estudyante nga kalihokan, dapita sila sa pagpakita ngadto sa klase sa butang nga ilang gidala ug ipasabot giunsa niini paghatag og kahupayan kanila.
Unsa o kang kinsa ka modangop alang sa kahupayan panahon sa kalisod?
Unsa o kinsa ang naghatag kanimo og labing dako nga kahupayan? Ngano man kaha?
Paghimo og usa ka listahan sa kasamtangan o umaabot nga mga sitwasyon sa kinabuhi nga lagmit magkinahanglan ka og tabang ug kahupayan aron magmalamposon.
Pamalandongi ang mosunod nga mga pangutana:
Nganong makasalig ka man nga ang Langitnong Amahan ug si Jesukristo mohupay kanimo pinaagi sa gasa sa Espiritu Santo niining mga panahona?
Unsa ka maayo sa imong pamati nga imong naila ug nadawat ang kahupayan nga gitanyag sa Langitnong Amahan ug ni Jesukristo pinaagi sa Espiritu Santo?
Sa unsang paagi nga ikaw makahimo sa pagpaambit sa kahupayan nga Ilang gitanyag ngadto sa uban?
Pangita og mga tubag sa miaging mga pangutana diha sa imong pagtuon niini nga leksiyon.
Si Pablo gusto nga mohupay sa mga Santos sa Corinto sa ilang mga pagsulay
Samtang anaa sa Macedonia, si Pablo nakadawat og pulong gikan sa usa ka disipulo nga ginganlan og Titus nga ang iyang naunang sulat maayong gidawat sa mga Santos sa Corinto (tan-awa sa 2 Mga Taga-Corinto 2:13 ; 7:5). Nahibaloan usab ni Pablo ang padayon nga mga hagit niini nga mga Santos ug misulat og laing sulat (2 Mga Taga-Corinto) aron maghatag kanila og kahupayan ug mahisgotan ang ilang mga problema.
Unsa ang imong nahinumdoman mahitungod sa Corinto ug sa mga kalisdanan sa mga Santos didto?
Kon ang mga estudyante naglisod pagtubag, pahinumdomi sila nga ang Corinto usa ka dako, dato nga lungsod nga adunay reputasyon sa pagbaton og dios-dios [idolatry] ug imoralidad. Ang mga Santos didto naglisod sa pagpabiling nagkahiusa, pagdawat sa kaalam sa Dios kaysa sa sayop nga mga pagtulun-an, ug sa pagtuman sa balaod sa kaputli.
Basaha ang 2 Mga Taga-Corinto 1:1–4 , nga may pagtagad kon giunsa ni Pablo pagsugod sa iyang ikaduhang sulat ngadto sa mga Santos sa Corinto.
Ikonsiderar ang paghangyo sa mga estudyante sa pag-ila sa mga ngalan nga gigamit ni Pablo nga nagpaila sa Langitnong Amahan ug dayon isulat kini nga mga ngalan ngadto sa pisara.
Unsa ang mipatigbabaw kanimo sa pasiunang sulat ni Pablo ngadto sa mga Santos?
Unsa nga mga ngalan o mga titulo ang gigamit ni Pablo alang sa Langitnong Amahan ang nakapukaw sa imong atensiyon?
Unsa ang gitudlo niadto nga mga ngalan o mga titulo kanimo mahitungod sa Langitnong Amahan?
Unsa nga kamatuoran ang gitudlo ni Pablo sa bersikulo 4 ?
Pagdawat og kahupayan gikan sa Langitnong Amahan ug pagtabang sa uban nga makadawat niini
Lagmit imong naila ang usa ka kamatuoran gikan sa bersikulo 4 sama sa mosunod: Kon kita makadawat sa kahupayan sa Langitnong Amahan panahon sa atong mga pagsulay, kita mas makatabang sa uban nga makadawat usab niini.
Samtang ang mga estudyante nag-ila sa kamatuoran sa 2 Mga Taga-Corinto 1:4 , ikonsiderar ang pagdapit kanila sa pagtandi niini nga bersikulo diha sa Mosiah 18:8–10 ug mangita og mga pagkaparehas.
Ikonsiderar ang pagpaambit sa kinutlo gikan kang Elder Gary E. Stevenson sa “Komentaryo ug Background nga Impormasyon” nga bahin sa kataposan sa leksiyon ug pangutana niining mosunod.
Unsa sa imong hunahuna ang pasabot sa “paghupay niadtong anaa sa bisan unsang kalisdanan”? ( bersikulo 4).
Ngano sa imong hunahuna nga kini gilaoman sa mga disipulo ni Jesukristo?
Kanus-a ka o imong kaila nakadawat og tabang ug kahupayan gikan sa Langitnong Amahan panahon sa usa ka pagsulay?
Unsay nakat-onan nimo o niya gikan niini nga kasinatian?
Unsa sa imong hunahuna ang imong mabuhat aron mas makadawat og kahupayan sa Dios panahon sa imong panginahanglan?
Kon ang mga tubag sa mga estudyante dili kaayo personal, dapita ang pipila ka mga estudyante sa pagpaambit sa ilang mga kasinatian. Mahimong makatabang alang sa mga estudyante ang makadungog og pipila ka mga paagi nga ang Langitnong Amahan naghupay kanato. Ikonsiderar ang pagdugang og personal nga pagpamatuod ug ingon man usab ang personal nga mga kasinatian.
Basaha ang mosunod nga pamahayag ni Presidente Spencer W. Kimball (1895–1985).
Imahe
Portrait painting of President Spencer W. Kimball.
Ang Dios makakita kanato, ug iya kita nga pagabantayan. Apan sa kasagaran ipaagi niya kini sa uban aron iyang mahatag ang atong mga panginahanglan. Busa, importante kaayo nga moserbisyo kita sa usag-usa sa gingharian.
(Mga Pagtulun-an sa mga Presidente sa Simbahan: Spencer W. Kimball [2006], 103)
Ngano kaha sa imong hunahuna ang Langitnong Amahan sagad nga mogamit kanato aron pagtabang sa uban panahon sa ilang mga pagsulay aron mabati ang Iyang gugma ug kahupayan?
Paghunahuna og usa ka tawo nga imong kaila nga kasamtangang nakasinati og kalisod. Mainampoong ikonsiderar kon unsaon kaha nimo pagtabang kanila nga mabati ang kahupayan nga gitanyag sa Langitnong Amahan diha sa imong pagbuhat sa mosunod:
A. Paghunahuna mahitungod sa unsa ang imong nakat-onan gikan sa 2 Mga Taga-Corinto 1:1–4 nga mahimong makatabang niining tawhana.
B. Pagbasa og duha o daghan pa sa mosunod nga mga set sa mga bersikulo, nga naglangkob sa mga dugang nga pagtulun-an ni Pablo ngadto sa mga taga-Corinto mahitungod sa mga pagsulay. Pangita og usa ka hugpong sa mga pulong o bersikulo nga pamati nimo mahimong mahinungdanon ngadto sa tawo nga imong napili.
C. Paghimo og usa ka butang karon aron matabangan kining tawhana nga mabati ang kahupayan sa Langitnong Amahan. Mahimong mag-ampo alang kanila sama sa pag-ampo sa mga Santos sa Corinto alang kang Pablo (tan-awa sa 2 Mga Taga-Corinto 1:11). Dugang pa niini, mahimo kang magsulat alang niining tawhana og usa ka makapadasig nga mensahe sama sa gibuhat ni Pablo sa mga Taga-Corinto, bisan og ang imong mensahe mahimong usa ka text, email, o note inay nga usa ka sulat. (Mahimong ilakip unsa ang imong nakat-onan niini nga leksiyon gikan sa 2 Mga Taga-Corinto 1: 4 ingon man usab ang bisan unang personal nga mga kasinatian nga mahimong makatabang.)
D. Paghimo og dugang pa nga mga plano sa pagtabang niining tawhana. Ang Langitnong Amahan mahimong mag-aghat kanimo sa paghimo og dugang pa nga mga buhaton, sama sa pagbisita kanila o pag-alagad kanila sa pipila ka paagi. Seguroha nga isulat ang bisan unsang mga plano nga imong mahunahunaan sa usa ka lugar aron ikaw mapahinumdoman sa pagbuhat, sama sa imong kalendaryo, sa imong smartphone, o sa usa ka piraso nga papel nga imong tan-awon unya.
Human mahatagan ang mga estudyante og igong panahon, dapita sila sa pagpaambit og usa ka butang nga ilang planong buhaton aron matabangan ang tawo nga ilang gihunahuna. Bisan kon angay ra nga ipaambit sa mga estudyante ang kinatibuk-an nga pagsulay o kahimtang sa tawo, pahinumdomi sila nga dili ipaambit kinsa ang maong tawo o dili ipaklaro kaayo nga mahimong matag-anan ra sa ubang mga estudyante kon si kinsa kini.
Pagpamatuod sa mga baroganan nga gitudlo niini nga leksiyon ug dasiga ang mga estudyante sa pagsunod sa ilang mga plano sa paghupay sa ubang tawo.
Komentaryo ug Background nga Impormasyon
2 Mga Taga-Corinto 1:4 . Nganong ang Ginoo naglaom kanako sa pagtabang ug paghupay sa mga tawo nga nagkinahanglan?
Si Elder Gary E. Stevenson sa Korum sa Napulog Duha ka Apostoles mitudlo sa mosunod:
Imahe
Official portrait of Elder Gary E. Stevenson of the Quorum of the Twelve Apostles, 2015.
Gikan sa higayon nga mikawas kita gikan sa tubig sa bunyag, gisugo na kita ngadto niini nga buhat. Motabang kita sa uban pinaagi sa gugma tungod kay mao kini ang gisugo sa Manluluwas nga atong buhaton. … Sa higayon nga ang atong mga silingan magkalisod sa temporal o sa espiritwal nga paagi, magdali kita sa pagtabang kanila. Magtambayayong kita sa mga alantoson sa usag usa aron mahimo kining gaan. Magbangutan kita uban niadtong nagbangutan. Hupayon nato kadtong nanginahanglan og paghupay. Ang Ginoo mahigugmaong naglaom niini gikan nato. Ug moabot ang adlaw sa dihang manubag kita sa atong gihimong pag-atiman sa pagpangalagad sa Iyang panon.
2 Mga Taga-Corinto 4:17 . Unsa ang gipasabot ni Pablo sa iyang pag-ingon nga ang atong mortal nga mga hagit usa lamang ka “magaan ug lumabay nga kasakit”?
Si Elder Paul V. Johnson sa Kapangulohan sa Seventy mitudlo:
Imahe
Elder Paul V. Johnson of the Quorum of the Seventy takes an official portrait, 2021.
Taliwala sa mga problema, daw imposibling makita nga ang moabot nga mga panalangin mas molabaw pa kay sa kasakit, kaulawan, o kasakit sa dughan nga tingali atong nasinati nianang higayona. … Si Apostol Pablo mitudlo, “Kay kining magaan ug lumalabay nga kasakit naandam alang kanamo sa labihan gayod kadako ug walay kataposang gibug-aton sa himaya” [ 2 Mga Taga-Corinto 4:17 ]. Makapainteres nga si Pablo migamit sa termino nga “magaan nga mga kasakit.” Naggikan kini sa usa ka tawo kinsa gibunalan, gibato, nag-ungaw sa kamatayon, gibilanggo, ug kinsa nakasinati og daghan pa nga mga pagsulay. Ambot lang kaha kon kita motawag ba sa atong mga kasakit og gaan. Apan kon itandi sa mga panalangin ug sa pagtubo nga atong madawat sa kaulahian, niining kinabuhia ug didto sa kahangtoran, ang atong mga kasakit gaan ra gayod kaayo. …
Usahay gusto kita nga motubo nga wala ang mga hagit ug molambo ang kalig-on nga wala ang bisan unsa nga panlimbasog. Apan ang pagtubo dili mahitabo pinaagi sa pagsubay sa sayon nga paagi. Atong hingpit nga masabtan nga ang usa ka atleta kinsa mobalibad sa lisod nga pagbansay dili gayod mamahimong world-class nga atleta. Kinahanglan gayod kita nga magmatngon nga dili mosalikway sa mga butang nga makatabang kanatong makabaton og diosnong kinaiya.
Dapita ang mga estudyante sa pagpangita og lain pang mga asoy sa mga kasulatan o gikan sa kasaysayan sa Simbahan nga nagpakita nga ang Langitnong Amahan makahatag og kahupayan. Pananglitan, ang mga estudyante mahimong mopamubo sa asoy sa Basahon ni Mormon sa dihang ang Ginoo nagpagaan sa mga palas-unon sa katawhan ni Alma samtang sila anaa sa pagkaulipon sa mga Lamanite (tan-awa sa Mosiah 24), o mahimo nilang hisgotan giunsa sa Ginoo paghupay si Joseph Smith didto sa Bilanggoan sa Liberty (tan-awa sa Doktrina ug mga Pakigsaad 121). Hatagi ang mga estudyante og panahon sa pagsiksik sa mga kasulatan ug lain pang mga kapanguhaan sa dili pa sila mopaambit.
Kahupayan pinaagi ni Jesukristo
Human gipangutana ang mga estudyante nganong sila mibati nga ang Langitnong Amahan kanunay nga naggamit kanato aron sa paghupay sa uban, ikonsiderar ang pagbasa sa 2 Mga Taga-Corinto 1:5–7 kauban ang mga estudyante ug dapita sila sa pagpangita niini nga mga bersikulo isip laing kapanguhaan sa kahupayan nga gihatag sa Langitnong Amahan: ang Manluluwas nga si Jesukristo. Pangutan-a ang mga estudyante nganong mibati sila nga si Jesukristo usa ka gamhanang tinubdan sa kahupayan sa panahon nga sila makasinati og mga pagsulay. Mahimong dapiton ang mga estudyante sa pagtandi niini nga mga bersikulo diha sa Alma 7:11–13 .
