2 Mga Taga-Corinto 5

“Ang Pangalagad sa Pagpasig-uli”

Jesus embraces the man who was born blind when the man finds him again after Jesus healed him.

Mibati ka ba og pagkahilayo sa Dios? Ang imong mga kaila mibati ba usab og sama sa ingon? Si Pablo nagpahinumdom sa mga Santos sa Corinto sa kaluoy nga gipakita ni Jesukristo alang kanila. Si Pablo nagtudlo sa mga tawo nga nahilayo sila sa Dios gumikan sa sala. Maayo gani kay, pinaagi sa Pag-ula ni Kristo sila madala pagbalik ngadto sa maayo nga relasyon uban sa Dios ug makadawat sa pagkamatarong ni Kristo (tan-awa sa 2 Mga Taga-Corinto 5:16–21). Kini nga leksiyon makatabang nimo nga mahiduol sa Dios ug mahimong kinsa ang Iyang gusto nga ikaw mamahimo.

Pagdasig sa mga estudyante aron motambong nga andam alang sa klase. Kon ang mga estudyante motambong sa klase nga andam, sila nagdapit sa Espiritu Santo sa pagtudlo kanila ug mahimutang sa mas maayong posisyon sa pagtabang sa uban pang mga estudyante.

Pagpangandam sa estudyante: Dapita ang mga estudyante sa pagpamalandong mahitungod sa mga higayon nga sila mibati nga nahiduol sa Dios ug sa mga higayon nga sila mibati nga nahilayo gikan Kaniya, ug motambong sa klase nga andam mopaambit ug makat-on gikan niining maong mga kasinatian.

Posible nga mga Kalihokan sa Pagkat-on

Imong relasyon sa Dios

Rebyoha ang mosunod nga mga senaryo. Paghunahuna kon unsa ang pagkaparehas o pagkalahi sa imong personal nga sitwasyon gikan niining mga senaryo.

Ipakita ang mosunod nga mga senaryo o dapita ang mga estudyante sa pagmugna og ilang kaugalingong mga senaryo nga nalambigit sa mga sitwasyon diin ang usa ka batan-on lagmit makabati nga nahilayo sa Dios.

Isip alternatibo, sugdi ang leksiyon gamit ang kalihokan nga “Pagdawat sa pagkamatarong ni Kristo” nga anaa sa “Dugang nga mga Kalihokan sa Pagkat-on” nga bahin sa kataposan sa leksiyon. Kini nga kalihokan naglakip sa sugilanon ni Jean Valjean gikan sa Les Miserables nga nagpasig-uli sa Dios.

Si Jamilah usa ka matinud-anong disipulo ni Jesukristo. Daghang mga higala ang mitan-aw kaniya isip usa ka ehemplo. Bisan pa niana, kon siya makahimo og kasaypanan, ubos iyang pagtan-aw sa iyang kaugalingon ug mabalaka mahitungod sa kon siya ba makabalik unya ngadto sa Langitnong Amahan.
Si Andre adunay mga batasan nga nasayod siyang dili maayo, ug lisod alang kaniya nga makita unsaon nga siya mapasaylo ug mabag-o. Siya naghunahuna kon siya ba makabati pa nga mahiduol sa Dios, ug dili siya segurado nga kini bililhon sa iyang paningkamot. Dili siya ganahan makigsulti sa iyang mga ginikanan o sa bishop mahitungod sa iyang mga problema.

Dapita ang mga estudyante sa pagpamalandong sa ilang pagpangandam sa klase samtang magtubag sa mosunod nga kalihokan.

Paghunahuna mahitungod sa imong kaugalingong relasyon sa Langitnong Amahan. Sa imong journal sa pagtuon, ihulagway ang imong kaugalingong sitwasyon sa kinabuhi ug imong relasyon Kaniya. Mahimo nimong ilakip kanus-a ka mibati nga nahaduol Kaniya ug kanus-a ka mibati nga nahilayo ingon man usab ang imong mga tinguha alang sa imong relasyon ngadto Kaniya sa umaabot.

Sa imong pagtuon, pangita og mga kamatuoran nga mahimong makatabang nimo nga makasabot sa mga panalangin sa pagkahiduol sa Dios ug unsaon nimo pagpahiduol Kaniya.

Pagpasig-uli

Sa 2 Mga Taga-Corinto 5 si Pablo nagsulat nga samtang kita nagpuyo sa kalibotan, kita “nag-agulo” ug mibati nga “nabug-atan,” naghandom nga makabalik ngadto sa atong Amahan sa Langit (tan-awa sa 2 Mga Taga-Corinto 5:1–5). Paghunahuna mahitungod sa mga panahon sa imong kinabuhi nga ikaw mibati og susama sa gihulagway ni Pablo.

Basaha ang 2 Mga Taga-Corinto 5:17–20 , nga mangita sa mga kamatuoran nga imong magamit sa imong kinabuhi sa higayon nga ikaw mobati og pagkahilayo sa Dios. Timan-i nga niini nga mga bersikulo, ang pasig-uli ug pagpasig-uli nagpasabot sa pagdala og balik ngadto sa pagkahiusa ug pabor sa Dios human mahimulag gikan Kaniya.

Ipakita ang mosunod nga mga pangutana aron makita sa mga estudyante samtang magtuon sila.

Unsa nga mga pulong ug hugpong sa mga pulong niini nga mga bersikulo sa ( 2 Mga Taga-Corinto 5:17–20) ang labing naghulagway sa unsa ang gibuhat sa Manluluwas alang kanimo?
Unsa ang papel sa Langitnong Amahan sa pagtabang kanimo nga mahibalik Kaniya?(Tan-awa sa 2 Mga Taga-Corinto 5:18–19 .)
Unsa nga mga panalangin ang atong madawat diha sa atong pagpaningkamot sa pagpuyo “kang Kristo”? ( 2 Mga Taga-Corinto 5:17.)

Usa ka kamatuoran nga gitudlo sa 2 Mga Taga-Corinto 5:17–20 mao nga kita mahimong mapasig-uli sa Dios ug mahimong bag-ong mga binuhat pinaagi sa Pag-ula ni Jesukristo.

Si Pablo nagtudlo usab kon nganong kita mahimong bag-ong mga binuhat ug unsa ang gipasabot niini.

Basaha ang 2 Mga Taga-Corinto 5:21 , nga mangita sa mga pakisayran sa Langitnong Amahan, ni Jesukristo, ug kanimo.

Dapita ang mga estudyante sa pagpakigbahin sa unsay ilang nakaplagan. Kon gikinahanglan, ipasabot nga “niya” sa bersikulo 21 nagpasabot sa Langitnong Amahan, samtang ang “kaniya ug siya” nagtumong kang Jesukristo.

Unsa man ang imong nakat-onan gikan niini nga bersikulo?

Tabangi ang mga estudyante sa pagsabot niini nga bersikulo. Mahimong irebyo ang mosunod nga parapo uban sa mga estudyante, ug paghunahuna kon unsaon sa pagtabang ang mga estudyante nga makasabot niini nga konsepto. Pag-andam sa pagpaambit niining mga ideya sa imong kaugalingong mga pulong.

Sa 2 Mga Taga-Corinto 5:21 si Pablo nagtudlo nga bisan tuod si Jesus wala gayod sukad makahimo og pagpakasala, sa Tanaman sa Getsemani ug sa krus sa Kalbaryo Iyang gidala sa Iyang kaugalingon ang palas-anon, ang gibug-aton, ug ang sangpotanan sa atong mga sala. Kon kita matinud-anon nga magtinguha nga mapasaylo ug mahimo nga usa ka “bag-ong binuhat,” kita midawat sa gitanyag ni Jesukristo nga kon kita adunay hugot nga pagtuo Kaniya ug maghinulsol sa atong mga sala, Iyang kuhaon ang atong mga sala ug kita makadawat sa Iyang pagkamatarong. Sa ingon niini nga paagi, kita mahimong putli, sama nga Siya putli (tan-awa usab sa Mga Taga-Colosas 2:13–14 ; 1 Pedro 2:24).

Seguroha nga matabangan ang mga estudyante sa pagsabot nga ang proseso sa pagkahimong putli sama kang Jesukristo nagkinahanglan og tibuok kinabuhing pagpaningkamot.

Unsaon sa mga pagtulun-an sa 2 Mga Taga-Corinto 5:21 pagtabang kanimo nga mas makasabot nganong kita mahimong bag-ong mga binuhat kang Kristo ug unsa ang buot ipasabot niini?
Unsa nga mga hunahuna ug mga pagbati ang lagmit nasinati sa walay sala nga Anak sa Dios dihang Siya andam nga midala sa inyong mga sala sa Iyang kaugalingon aron nga kamo mapasig-uli sa Dios ug mabag-o? (Ikonsiderar ang pagbasa sa Isaias 49:16 ug ang Doktrina ug mga Pakigsaad 19:18 sa dili pa motubag niini nga pangutana.)

Hatagi ang mga estudyante og usa ka ehemplo sa atong panahon karon kon unsaon nato mapasig-uli sa Dios. Ikonsiderar ang pagpakigbahin og personal nga kasinatian.

6:24

Pamalandong kon giunsa nimo, o sa imong kaila, pagsinati ang pagkaayo ug pagpasig-uli nga gitanyag sa Manluluwas pinaagi sa Iyang Pag-ula.

Ikonsiderar ang pagdapit sa mga estudyante sa pagpaambit og bisan unsa nilang mga hunahuna o mga pagbati (pahinumdomi sila nga dili mopaambit og bisan unsa nga personal ra kaayo o pribado). Kon sila mopaambit og usa ka kasinatian, sundi kini og mga pangutana sama sa “Unsa ang gitudlo niini nga kasinatian kanimo mahitungod kang Jesukristo ug sa Iyang Pag-ula?” o “Unsa nga mga lihok ang gibuhat niini nga tawo nga nagtugot kaniya nga mapasig-uli sa Dios? Sa imong hunahuna nganong nakatabang man kadto nga mga buhat?”

Ang pagpamalandong sa mga baroganan sa ebanghelyo mahimong makatabang kanato aron mas makasabot ug mabati ang ilang importansiya. Basaha og balik ang paghulagway sa imong kasamtangang sitwasyon sa kinabuhi ug relasyon sa Dios nga imong gisulat sa sinugdanan sa leksiyon. Dayon paggahin og pipila ka gutlo sa pagpamalandong sa mosunod nga mga pangutana:

Ipakita ang mosunod nga mga ideya aron pamalandongan sa mga estudyante. Mahimong magdugang og personal nga mga ideya o dapita ang mga estudyante sa pagpaambit sa ilang mga hunahuna mahitungod sa mga butang nga ilang mapamalandongan base sa unsa ang ilang nakat-onan niini nga leksiyon.

Unsa kaha ang hitsura ug pagbati nga makig-uli sa Dios sa kahangtoran?
Sa unsang mga paagi ikaw gustong mamahimong bag-o pinaagi sa Pag-ula ni Jesukristo?
Unsa nga mga kasinatian ang imong nasinati sa kinabuhi nga nagpakita unsa kaandam si Jesukristo nga motabang kanimo nga mabag-o?

Sa unsang paagi nga ang pagpamalandong nakatabang?
Unsa ang imong nakat-onan niini nga leksiyon mahitungod sa mga pagbati ug mga gitinguha sa Langitnong Amahan ug ni Jesukristo alang kanimo?

Pagkat-on, pagbati, ug pagbuhat

Sa imong journal sa pagtuon, isulat unsa ang imong nakat-onan ug nabati karon nga labing mahinungdanon alang kanimo ug ngano. Isulat unsa ang nakapadasig nimong buhaton nga mahimong makatabang kanimo nga makig-uli sa Dios ug mahimong “usa ka bag-ong binuhat” kang Kristo. Unsa nga mga kabag-ohan ang lagmit imong laoman nga makita sa imong kaugalingon (sulod sa usa ka tuig, duha ka tuig, o lima ka tuig) isip usa ka tawo kinsa tinud-anay nga nabag-o diha kang kristo?

Dapita ang mga estudyante nga komportable sa pagbuhat sa ingon nga mopaambit sa ilang mga hunahuna ug mga pagbati. Ikonsiderar usab ang pagpakigbahin sa imong mga pagbati.

Komentaryo ug Background nga Impormasyon

Sa unsang paagi kini nakatabang nako aron magpuyo sa ebanghelyo ni Kristo ug mahimong “usa ka bag-ong binuhat” diha Kaniya?

Si Elder Ulisses Soares sa Korum sa Napulog Duha ka Apostoles mipasabot:

Ang maong napalambo nga pagtuo ug pagkakabig makatabang kanato sa paghimo ug pagtuman sa mga pakigsaad ngadto sa Dios, sa ingon makapalig-on sa atong tinguha nga mosunod ni Jesus ug makahimo og tinuod nga espirituhanong kausaban ngari kanato—sa ato pa, mousab kanato ngadto sa pagkabag-ong binuhat, sama sa gitudlo ni Apostol Pablo diha sa iyang sulat sa mga taga-Corinto ( 2 Mga Taga-Corinto 5:17). Kini nga kausaban magdala kanato og mas malipayon, mabungahon, ug himsog nga kinabuhi ug makatabang kanato nga mapabilin ang mahangtorong panglantaw.

(Ulisses Soares, “Unsaon Nako Pagkasabot?” Liahona, Mayo 2019, 6)

2 Mga Taga-Corinto 5:17–21 . Unsaon nako nga mas makasabot kon unsa ang gitudlo ni Pablo niini nga mga bersikulo?

Ang mosunod nga pagpasabot mahimong makatabang nimo sa pagsabot sa pipila ka mga pulong ug mga hugpong sa mga pulong niini nga mga bersikulo:

Ang pagkahimong “usa ka bag-ong binuhat” nagpasabot nga “ang atong kasingkasing, panagway, ug kinaiya mausab aron mahimong mas susama sa Manluluwas” (Benjamin M. Z. Tai, “Ang Gahom sa Basahon ni Mormon sa Pagkakabig,” Liahona, Mayo 2020, 47).

Si Kristo “sa walay pag-isip batok kanila sa ilang kalapasan” nagpasabot nga tungod sa gibuhat ni Kristo alang kanato, sa dihang napasig-uli kita sa Dios ang atong mga sala wala maihap batok kanato.