2 Mga Taga-Corinto 2
“Pasayloa Na Ninyo”
Ang pagpasaylo sa uban mahimong malisod kaayo. Si Pablo nagsulat ngadto sa mga Santos sa Corinto mahitungod sa pagpasaylo sa usa ka malapason sa ilang komunidad. Si Pablo nag-awhag kanila nga mopasaylo, alang sa kaayohan sa tawo nga gipasaylo ingon man usab alang sa ilang kaugalingong benepisyo. Sa imong pagtuon, pangita aron madugangan ang imong pagsabot sa importansiya sa pagpasaylo ug sa imong tinguha nga makapasaylo sa uban.
Pagdasig og kada adlaw nga pagtuon sa kasulatan. Pag-awhag og kinaiya sa inadlaw-adlaw nga pagtuon sa kasulatan. Pipila ka mga butang adunay mas gamhanan ug malungtarong impluwensiya sa kaayohan diha sa mga kinabuhi sa mga estudyante kay sa pagtabang kanila sa pagkat-on sa paghigugma sa mga kasulatan ug sa pagtuon niini kada adlaw.
Pagpangandam sa estudyante: Dapita ang mga estudyante sa pagtambong nga andam nga mopaambit ug usa ka pananglitan sa usa ka tawo nga ilang nailhan kinsa naghatag og pagpasaylo sama kang Kristo ngadto sa laing tawo.
Posible nga mga Kalihokan sa Pagkat-on
Ang mosunod nga mga pangutana lagmit makatabang sa mga estudyante nga maghunahuna mahitungod sa papel nga mabuhat sa pagpasaylo sa ilang kinabuhi. Ang hilisgotan nga pagpasaylo lagmit mahimong sensitibo alang sa pipila ka mga estudyante. Pangandam sa pagsunod sa mga pag-aghat gikan sa Espiritu Santo aron sa pagtudlo niini nga mga baroganan nga anaay gugma ug pagsabot.
Unsa kahay inyong reaksiyon?
Handurawa unsaon nimo ug sa uban sa imong palibot pagtubag sa mosunod nga mga sitwasyon:
-
Nahimong ilado nga ang usa ka miyembro sa imong ward o branch nakahimo og usa ka seryoso nga sala, sama sa pagsupak sa balaod sa kaputli.
-
Usa ka tawo sa imong ward o branch ang dayag nga misupak sa mga lider sa Simbahan.
Tubaga ang mosunod nga mga pangutana:
-
Bisan tuod kon ang mga tawo niini nga mga senaryo nakigkita sa mga lider sa Simbahan ug nanglimbasog sa paghinulsol, unsaon kaha sa ubang mga tawo paghisgot ug pagtratar kanila?
-
Nganong lagmit malisod alang sa pipila ka mga tawo ang pagtagad kanila nga adunay gugma ug pagpasaylo?
Sa 2 Mga Taga-Corinto 2 , si Pablo misulat og susama nga sitwasyon sa Corinto sa dihang ang usa ka tawo nakalapas ug gidisiplina sa mga miyembro sa Simbahan.
Pamalandong unsaon nimo pagtagad ang kadtong anaa sa imong palibot kinsa nakalapas. Ikonsiderar ang mga mosunod nga mga pangutana nga gipakita ni Elder Jeffrey R. Holland sa Korum sa Napulog Duha ka Apostoles:
Aduna bay usa ka tawo sa inyong kinabuhi nga nagkinahanglan sa pasaylo? Aduna bay tawo sa inyong panimalay, sa inyong pamilya, sa inyong kasilinganan kinsa nakabuhat og dili makiangayon o dili mabination o usa ka dili kristiyano nga butang? Kitang tanan sad-an sa mao nga kalapasan, mao nga sigurado nga adunay tawo gayod kinsa nagkinahanglan sa inyong pagpasaylo.
(Jeffrey R. Holland, “I Stand All Amazed,” Ensign, Ago. 1986, 72)
Sa imong pagtuon niini nga leksiyon, pangita og tabang sa Espiritu Santo aron madugangan ang imong pagsabot sa importansiya sa pagpasaylo sama kang Kristo ug unsaon nimo pagpasaylo sa uban.
Si Pablo nagtudlo mahitungod sa pagpasaylo
Ang mga estudyante mahimong magbuhat sa mosunod nga mga kalihokan diha sa gagmayng mga grupo, magkapares, o sa ilang kaugalingon.
Basaha ang 2 Mga Taga-Corinto 2:5–11 , ug tan-awa unsa nga mga kamatuoran ang imong maila ubos sa mosunod nga mga kategorya:
|
Unsaon nato pagtratar sa usa ka tawo nga maoy hinungdan sa atong pagbangotan? |
Nganong kinahanglan natong tagdon ang mga tawo niini nga paagi? |
-
Unsay imong nakat-onan gikan sa pagtuon niini nga tudling?
Samtang ang mga estudyante mopaambit sa unsa ang ilang nakat-onan, isulat sa pisara ang bisan unsang mga kamatuoran nga ilang gisaysay.
Duha ka baroganan nga lagmit imong naila mao nga pinaagi sa Manluluwas nga si Jesukristo, kita makapasaylo ug motabang sa uban diha sa gugma ug kon kita dili makapasaylo sa uban, mabuntog kita ni Satanas.
-
Unsa nga mga pananglitan kon unsaon nimo pagpasaylo, paghupay, o pagmatuod sa imong gugma ngadto sa usa ka tawo nga nakalapas o kaha dili mabination?
-
Base sa unsa ang imong nasayran mahitungod sa Manluluwas nga si Jesukristo, ngano kaha nga gusto Siya nga kita mopasaylo ug magpakita og gugma sa usag usa? Sa unsang paagi Siya makatabang kanato sa pagbuhat niini?
Si Elder Massimo De Feo sa Seventy nitudlo:
Ang tinuod nga mga disipulo ganahan nga mopasaylo. Nasayod sila nga ang Pag-ula sa Manluluwas motabon sa tanang sala ug kasaypanan sa matag usa kanato. Nasayod sila nga ang bugti nga Iyang gibayad “presyong naglakip sa tanan.” Espirituhanong mga buhis, balayranan, galastohan ug bayad nga konektado sa mga sala, kasaypanan, o mga sipyat giapil tanan. Ang tinuod nga disipulo dali nga mopasaylo ug dali nga mangayo’g pasaylo.
Minahal kong kaigsoonan, kon naglisod kamo sa pagpangita og kalig-on sa pagpasaylo, ayaw hunahunaa kon unsay nabuhat sa uban kaninyo, apan hunahunaa unsay nahimo sa Ginoo kaninyo, ug makaplagan ninyo ang kalinaw diha sa makatubos nga mga panalangin sa Pag-ula.
(Massimo De Feo, “Tiunay nga Gugma: Ang Tinuod nga Timaan sa Matag Tinuod nga Disipulo ni Jesukristo,” Liahona, Mayo 2018, 82)
Kon ang mga estudyante nagbuhat sa pagpangandam sa estudyante nga kalihokan, mahimong ipangutana ang mosunod nga mga pangutana ug dapita sila nga mopaambit unsa ang ilang giandam. Pahinumdomi ang mga estudyante nga dili magpaambit og mga kasinatian nga personal kaayo.
-
Kanus-a ka nakakita og ehemplo sa usa ka tawo nga mipasaylo sa uban ug dayon mipakita og gugma alang nianang tawhana?
-
Sa unsang paagi nga ang dili pagpasaylo makahimo nga “kita mabuntog ni… Satanas”? ( 2 Mga Taga-Corinto 2:11).
Tabangi ang mga estudyante nga makasabot sa panalangin nga moabot sa nagpasaylo ug sa usa nga gipasaylo pinaagi sa pagbuhat sa mosunod nga kalihokan.
Ipakita ang mosunod nga mga instruksiyon alang sa kalihokan o ihatag kini sa mga estudyante isip usa ka handout.
Handurawa nga, sama sa mga Taga-Corinto, ang mga tawo sa imong ward nagkinahanglang madugangan ang ilang gugma ug pagpasaylo ngadto sa mga nakasala. Tungod niini, ang imong bishop nagdapit kanimo sa pagpaambit og usa ka mubo nga panghunahuha kabahin sa pagpasaylo diha sa sinugdanan sa imong klase o sa korum nga miting. Paggahin og pipila ka minuto ug pagmugna og usa ka outline sa unsa ang mahimo nimong isulti. Ilakip ang mosunod:
-
Labing menos sa usa ka bersikulo o hugpong sa mga pulong gikan sa 2 Mga Taga-Corinto 2:7–11 .
-
Lain pang kasulatan o usa ka pamahayag sa usa ka lider sa Simbahan. (Mahimo nimong gamiton ang pamahayag ni Elder Kevin R. Duncan sa ubos, usa sa mga kasulatan nga iyang nasulti, o usa sa mga tudling sa kasulatan nga nagsunod niini nga pamahayag.)
-
Imong kaugalingong mga hunahuna ug pagpamatuod mahitungod sa paghatag og gugma ug pagpasaylo sa uban ug unsaon niini pagtabang kanato nga mahiduol sa Manluluwas.
Mga pagtulun-an mahitungod sa pagpasaylo
Si Elder Kevin R. Duncan sa Seventy miingon:
Kombinsido ako nga kadaghanan nato gusto nga mopasaylo, apan maglisod kaayo kita sa pagbuhat niini. Kon makasinati kita og inhustisya, mahimong dali kita nga moingon, “Nakasala kanang tawhana. Angayan silang silotan. Asa ang hustisya?” Nasayop kita sa paghunahuna nga kon kita mopasaylo, ang hustisya dili mapahigayon ug ang mga silot malikayan.
Dili gayod kini mao. Ang Dios mopahamtang og silot nga makiangayon, kay ang kalooy dili makahikaw sa hustisya [kaangayan] (tan-awa sa Alma 42:25). Ang Dios mahigugmaong nagsiguro diha kaninyo ug kanako: “Itugyan ang paghukom ngari kanako, kay kini akò ug Ako ang mobayad. [Apan tugoti nga] ang kalinaw mag-uban kaninyo” [ Doktrina ug mga Pakigsaad 82:23 ].
(Kevin R. Duncan, “Ang Makaalim nga Haplas sa Pagpasaylo,” Liahona, Mayo 2016, 33–34)
Ikonsiderar ang pagtugot sa mga estudyante nga mopaambit sa ilang mga outline nga magkapares o sa ginagmayng grupo.
-
Unsa ang imong nakat-onan nga mahimong makatabang sa mga miyembro sa imong ward aron mas makasabot ug makahatag og pagpasaylo?
-
Sa unsang paagi nga ang pagpasaylo sa uban magdala kanila nga mas mahiduol kang Jesukristo?
Pamalandongi kon giunsa nimo pagtratar ang kadtong mga nakalapas.Pangita og inspirasyon gikan sa Langitnong Amahan mahitungod sa unsa ang imong mahimo aron “[makapasaylo … ug … magpaila sa imong pagmahal alang]” kanila ( 2 Mga Taga-Corinto 2:7–8). Mahimong isulat ang imong mga impresyon ug mga hunahuna sa imong journal sa pagtuon, lakip na ang bisan unsang mga buhat nga pamati nimo makadasig nga buhaton.
Dasiga ang mga estudyante sa pagbuhat sa mga impresyon nga anaa nila panahon sa leksiyon. Mahimong magpamatuod sa mga panalangin sa pagpasaylo ug unsaon nga ang pagpasaylo makadala sa parehas nga mipasaylo ug gipasaylo paduol ngadto kang Jesukristo.
Komentaryo ug Background nga Impormasyon
Sa unsang paagi nga ang pagpasaylo makapanalangin nimo sa personal?
Si Presidente James E. Faust (1920–2007) sa Unang Kapangulohan mitudlo:
Kon kita makapasaylo diha sa atong mga kasingkasing alang niadtong nakamugna og kasakit ug kadaot, kita mosaka ngadto sa mas taas nga ang-ang sa pagtamod sa kaugalingon ug pagkatawo.
(James E. Faust, “Ang Makaalim nga Gahom sa Pagpasaylo,” Liahona, Mayo 2007, 68)
Si Elder Jeffrey R. Holland sa Korum sa Napulog Duha ka Apostoles mitudlo:
Uban sa apostolikanhong awtoridad nga gihatag ngari nako pinaagi sa Manluluwas sa kalibotan, ako mopamatuod sa kalinaw ngadto nianang diwa nga sa pagpasig-uli ngadto sa Dios ug sa usag usa kon kita maaghop ug igo ang kaisug sa pagkab-ot niini.
(Jeffrey R.Holland, “Ang Pangalagad sa Pagpasig-uli (Reconciliation),” Liahona, Nob. 2018, 79)
Sa unsang paagi si Jesukristo makatabang kanimo nga mopasaylo?
Si Elder Kevin R. Duncan sa Seventy mitudlo:
Ang pagpasaylo mao gayod ang hinungdan nga ang Dios mipadala sa Iyang Anak, busa magmaya kita sa Iyang halad sa pag-ayo kanatong tanan. Ang Pag-ula sa Manluluwas dili lamang alang niadtong kinahanglan nga maghinulsol; alang usab kini niadtong nagkinahanglan nga mopasaylo. Kon naglisod kamo sa pagpasaylo sa laing tawo, o gani sa inyong kaugalingon, hangyoa ang Dios sa pagtabang kaninyo. Ang pagpasaylo usa ka mahimayaon, makaayo nga baroganan. Dili kinahanglan nga kaduha kitang mabiktima. Makapasaylo kita.
(Kevin R. Duncan, “Ang Makaalim nga Haplas sa Pagpasaylo,” Liahona, Mayo 2016, 35)
Unsaon nako aron ako mas makasabot kon unsa ang pagpasaylo?
Si Elder Jeffrey R. Holland sa Korum sa Napulog Duha ka Apostoles mitudlo:
Wala Siya [Jesukristo] nag-ingon nga, “Kamo wala tugoti nga mobati og tinuod nga kasakit gikan sa napusgay nga kasinatian nga naangkon gikan sa uban.” Wala usab Siya nag-ingon, “Aron makapasaylo sa hingpit ipadayon ang makadaot nga relasyon o balik ngadto sa abusado, makadaot nga kahimtang.” Apan bisan pa man [sa] labing makaguol nga [mga] kalapasan nga tingali moabot kanato, molampos lang kita batok sa atong kasakit kon motunob kita sa dalan sa tinuod nga pagkaalim.
(Jeffrey R.Holland, “Ang Pangalagad sa Pagpasig-uli (Reconciliation),” Liahona, Nob. 2018, 79)
Dugang nga mga Kalihokan sa Pagkat-on
Pagpanton gumikan sa gugma
Sa ubang nahaunang sulat ni Apostol Pablo ngadto sa mga taga-Corinto, siya mipanton kanila tungod sa ilang pagkamasinupakon ug kakulang sa pagtuo. Ikonsiderar ang pagdapit sa mga estudyante nga mobasa sa 2 Mga Taga-Corinto 2:1–4 ug tan-awon unsa ang gilaoman ni Pablo nga ilang masabtan mahitungod sa iyang mga motibo sa pagpanton kanila. Sa unsang paagi nga ang pagkastigo o pagtul-id mahimong ebidensiya sa gugma sa usa ka lider o sa ginikanan alang kanimo?
Gisulat diha sa kasingkasing
Tungod kay ang materyal diha sa 2 Mga Taga-Corinto 3 wala gitudlo sa kurikulum, ang mosunod naghatag og usa ka ideya sa pagtudlo alang niini nga kapitulo.
Ipasabot nga sa panahon nga wala si Pablo sa Corinto, pipila ka mini nga mga magtutudlo misugod sa pagsupak sa mga pagtulun-an ni Pablo ug misulay sa pagdaot ni Pablo pinaagi sa pagsulti sa mga kinabig nga nagkinahanglan gihapon sila nga magsunod sa balaod ni Moises. Ipa-mubo ang 2 Mga Taga-Corinto 3:1 pinaagi sa pagpasabot nga agig tubag niadtong misulay sa pagdaot kaniya, nangutana og balik si Pablo sa mga miyembro sa Corinto kon kinahanglan ba siya nga mohatag kanila og usa ka “[sulat] sa pagpaila” nga nagpamatuod sa iyang kinaiya ug sa iyang ka lihitimo isip tinuod nga Apostol ni Jesukristo.
Ang mga estudyante mahimong mobasa sa 2 Mga Taga-Corinto 3:2–3 , nga mangita kon unsa ang nagsilbing sulat sa pagpaila ni Pablo (ang mga pagbag-o sa kinabuhi sa mga Santos). Unsa sa imong hunahuna ang gipasabot niini nga ang mga pulong ni Kristo gisulat “dili sa mga papan nga bato, kon dili diha sa unod nga mga papan sa kasingkasing”? Unsaon sa usa ka tawo pagtugot sa ebanghelyo sa pagsulod sa iyang kasingkasing? Sa unsang paagi kita mas makapuyo sa ebanghelyo gikan sa atong mga kasingkasing?