Mahimong mahagiton ang pagkahibalo kon kita hingpit ba nga naghinulsol. Nakasulay na ba ka nga nanlimbasog nga mahibalo kon hingpit ka ba nga naghinulsol sa usa ka butang? Sa iyang unang sulat ngadto sa mga taga-Corinto, si Apostol Pablo nagpanton sa pipila sa mga Santos nga taga-Corinto tungod sa ilang pagkamakasasala. Sa iyang kalipay ug katagbawan, si Pablo human niana nakadawat og pulong nga ang mga Santos nga taga-Corinto nakasinati og tinud-anay nga paghinulsol. Kini nga leksiyon makatabang nimo nga makasabot sa usa ka importanteng sangkap sa tinud-anay nga paghinulsol ug makatabang nimo nga mas mahiduol kang Jesukristo.
Pagpangandam sa estudyante: Dapita ang mga estudyante sa paghunahuna mahitungod sa unsaon nila pagkahibalo kon sila nakasinati ba og tinud-anay nga paghinulsol. Mahimo usab silang awhagon sa pagtuon sa seksiyon nga “Ang Diosnong kasubo modangat ngadto sa paghinulsol.” gikan sa Dali, Sunod Kanako nga outline (“Septyembre 11–17. 2 Mga Taga-Corinto 1–7: ‘Magpakig-uli Kami sa Dios,’” Dali, Sunod Kanako—Alang sa mga Indibidwal ug mga Pamilya: Bag-ong Tugon 2023).
Posible nga mga Kalihokan sa Pagkat-on
Diosnon nga Kasubo
Ang mosunod nga senaryo mahimong basahon sa makusog ug hisgotan isip usa ka klase. Mahimo usab kining i-printa ug ihatag sa mga estudyante aron basahon ug hisgotan diha sa paresan o gagmayng mga grupo.
Basaha ang mosunod nga senaryo.Sa usa ka interbyo alang sa usa ka rekomend sa templo alang sa kaminyoon, usa ka batan-ong babaye mikompisal sa iyang bishop sa pipila ka mga sala nga nangagi. Human sa dugang nga panaghisgot, nasabtan sa bishop nga ang batan-ong babaye wala makahinulsol sa iyang mga sala sa tinud-anay nga paagi ug ang iyang mga sala bug-at nga makapahimo niyang dili takos sa usa ka rekomend sa templo. Ang bishop mipasabot nga ang batan-ong babaye kinahanglan nga maghulat aron makadawat og usa ka rekomend hangtod hingpit na siya nga makahinulsol. Nakalitan siya, miingon nga siya naghinulsol na tungod kay wala na kini niya buhata og usab sulod sa dugayng panahon. Ang bishop mipasabot nga ang paghunong lamang sa sala dili usa ka kompleto nga paghinulsol, ug midapit kaniya sa tinuoray nga pagsugod sa proseso sa matuod nga paghinulsol.
Ang batan-ong babaye mipasabot sa iyang bishop nga siya nasagmuyo pag-ayo tungod kay iya nang gisultihan ang ubang tawo mahitungod sa kasal ug naghimog mga plano sa pagsaulog. Siya nabalaka mahitungod sa kaulaw sa pagkalangan sa iyang mga plano sa kasal ug mahitungod sa unsaon niya pagsulti sa iyang pamanhunon ug mga ginikanan. Mihangyo siya kon aduna bay paagi alang niya aron mapadayon ang kasal sama sa giplanohan ug mopadayon lang sa proseso sa paghinulsol inigka human.
Base sa tubag sa batan-ong babaye ngadto sa bishop, unsa ang iyang gikabalak-an pag-ayo?
Ngano kaha nga ang iyang gitutokan makapalisod sa tinud-anay nga paghinulsol?
Pamalandongi unsa ang wala kaayo masabti niining batan-ong babaye mahitungod sa paghinulsol. Sa imong pagpadayon niini nga leksiyon, pangita og usa ka baroganan nga mahimong makatabang niining batan-ong babaye. Mamalandong usab kon ikaw nanginahanglan niini nga baroganan sa imong kaugalingong paghinulsol.
Diosnon nga kasubo
Usa sa mga tumong ni Pablo sa pagsulat sa iyang naunang sulat ngadto sa mga taga-Corinto mao ang pagdasig sa piho nga mga indibidwal sa paghinulsol. Sa iyang sunod nga sulat, si Pablo nidayeg niadtong iyang gikorehian sa ilang sinsero nga paghinulsol ug nagtudlo mahitungod sa usa ka importanteng bahin sa paghinulsol.
Basaha ang 2 Mga Taga-Corinto 7:8–11 , pangitaa ang mga panabot nga gihatag ni Pablo mahitungod sa paghinulsol nga mahimong makatabang sa babaye sa maong senaryo.
Alang sa mga panabot gikan sa Basahon ni Mormon mahitungod sa diosnong kasubo, basaha ang Alma 36:12–13 ; 42:29 .
Unsa nga mga panabot ang imong nakutlo nga mahimong makatabang sa babaye sa maong senaryo?
Sa unsa nga paagi nga kana nga kamatuoran makatabang kanimo?
Usa ka kamatuoran nga mahimo nimong madiskobrehan mao nga ang diosnong kasubo magdala ngadto sa sinsero nga paghinulsol.
Unsa ang lain pang matang sa kasubo ang gihisgotan ni Pablo sa bersikulo 10 ?
Unsa ang imong nakita sa senaryo nga nagsugyot sa klase sa kasubo nga nabati sa batan-ong babaye?
Paghimo og duha ka mga kolum sa imong journal sa pagtuon pinaagi sa pagbadlis og usa ka linya paubos sa tunga sa panid. Isulat ang Diosnong Kasubo sa ibabaw sa usa ka kolum ug ang Kalibotanong Kasubo sa ibabaw sa laing kolum.
Idugang ang imong mga hunahuna sa mosunod nga mga pangutana ubos sa matag ulohan.
Unsa ang gitudlo ni Pablo sa mga bersikulo 8–10 mahitungod sa kalahian tali sa Diosnon ug kalibotanong kasubo?
Unsa kaha ang dugang pang mga kalahian ang anaa tali sa duha ka klase nga kasubo?
Basaha ang mosunod nga mga pamahayag, ug pangita og dugang nga mga panabot mahitungod sa diosnong kasubo ug kalibotanong kasubo. Idugang kining mga panabot sa imong tsart.
Mahimong ipakita ang mosunod nga mga kinutlo aron mabasa sa mga estudyante o bahina ang klase ngadto sa matag paresan ug hatagan ang matag pares og usa ka set sa mga kinutlo. Mahimo nilang basahon ug markahan ang kinutlo, dayon ibaylo sa ilang pares, basahon ang ikaduhang kinutlo, ug tan-awon unsa ang gimarkahan sa ilang pares.
Si Elder Neil L. Andersen sa Korum sa Napulog Duha ka Apostoles naghatag niining kahulogan sa diosnong kasubo:
Imahe
Official portrait of Elder Neil L. Andersen of the Quorum of the Twelve Apostles, 2010, August.
[Ang diosnong kasubo nagpasabot] nga mobati og lawom nga kasubo ug pagbasol sa kinaiya nga nakadugang sa kasakit ug pag-antos sa Manluluwas, samtang ang atong kalag motangtang sa bisan unsang pagdumili o pasangil. …
Lagmit ang pinakadakong pagkahigmata niining kinabuhia sa espirituhanong sensitibo nga anak nga lalaki o babaye sa Dios mao ang talagsaong personal nga pagkaamgo nga ang pagbayad ni Jesukristo sa sala tinuod kaayo ug nga ang Iyang pag-antos dili lamang alang sa tanan—apan alang usab kanimo ug kanako! … Samtang atong espirituhanong masabtan nga Siya nag-antos alang sa atong mga sala, kita mobati og kaguol sa atong bahin sa Iyang kasakit. Kita makaamgo nga kini kabahin sa plano sa Amahan, apan makabati kita og naghingapin nga pagbati sa gasa nga Iyang gitanyag kanato. Kini nga katingalahan, kini nga pasalamat, kini nga pagdayeg sa Manluluwas kinsa mihimo niini alang kanato, nagdala kanato ngadto sa atong mga tuhod samtang ang atong espiritu napuno sa diosnong kasubo.
(Neil L. Andersen, The Divine Gift of Forgiveness [2019], 149, 150)
Si Presidente Dieter F. Uchtdorf, kanhi sakop sa Unang Kapangulohan, nagsulti sa mosunod mahitungod sa diosnong kasubo:
Imahe
Official portrait of Elder Dieter F. Uchtdorf of the Quorum of the Twelve Apostles, 2006. Called as Second Counselor in the First Presidency, 3 February 2008. Made official portrait in 2008 replacing portrait taken in 2004.
Ang diosnong kasubo modasig og kausaban ug paglaom pinaagi sa Pag-ula ni Jesukristo. Ang kasubo nga kalibotanon mobira kanato, mowagtang sa paglaom, ug moagni kanato sa pagtugyan ngadto sa tintasyon.
Ang diosnong kasubo mosangpot sa pagkakabig ug kausaban sa kasingkasing. Tungod niini masilag kita sa sala ug mahigugma sa kamaayo. Kini modasig kanato sa pagbarog ug paglakaw diha sa kahayag sa gugma ni Kristo. Ang tinuod nga paghinulsol nagpasabot nga pag-usab, dili pagpanakit o pagpaantos. Oo, ang kinasingkasing nga pagmahay ug tinuod nga pagbasol sa pagkamasinupakon sagad sakit ug importante kaayo nga lakang sa sagradong proseso sa paghinulsol. Apan kon ang kahasol sa tanlag mosangpot sa kasilag sa kaugalingon o mopugong sa atong pagbangon og balik, kini makababag imbis makadasig sa atong paghinulsol.
Unsa nga mga panabot ang labing nakatabang kanimo? Ngano man kaha?
Sa unsang paagi nga ang pagkabati nga ang Manluluwas personal nga niantos alang sa imong mga sala makatabang kanimo sa proseso sa imong paghinulsol?
Pamalandong og balik sa senaryo tali sa batan-ong babaye ug sa iyang bishop.
Unsa ang imong mapaambit sa batan-ong babaye mahitungod kang Jesukristo ug sa diosnong kasubo nga mahimong makatabang niya sa pagdapit og mga panalangin sa paghinulsol?
Pamalandong sa makadali mahitungod sa imong kaugalingong mga paningkamot sa paghinulsol. Hunahunaa unsa ang nabati ug nasinati sa Manluluwas sa pag-antos alang sa imong mga sala. Unsa ang imong mahimo aron mas hingpit nga maablihan ang imong kasingkasing nga mobati og diosnong kasubo ug dapiton ang makaayong gahom sa Manluluwas diha sa imong kinabuhi? Mahimong isulat ang imong tubag alang niini nga pangutana sa usa ka personal nga journal o kuwaderno.
Kon dili kaayo personal, dapita ang mga estudyante sa pagpaambit unsa ang ilang nakat-onan mahitungod sa diosnong kasubo niini nga leksiyon ug unsaon niini pagtabang kanila. Dugangi og personal nga pagpamatuod sa kamahinungdanon sa diosnong kasubo sa proseso sa paghinulsol. Dapita sila sa pagpamalandong kon aduna bay panginahanglan alang sa mas dakong diosnong kasubo diha sa ilang kinabuhi.
Komentaryo ug Background nga Impormasyon
Unsaon nako aron ako mas makasabot sa kalahian tali sa diosnong kasubo ug kalibotanong kasubo?
Samtang nangalagad isip Area Seventy, si Elder D. Chad Richardson miingon:
Imahe
Final offiicial portrait of Elder D. Chad Richardson of the Sixth Quorum of the Seventy, 2002. Released at the April 2010 general conference, effective May 1, 2010.
Usa ka nag-unang kalahian tali sa [diosnong kasubo ug kalibotanong kasubo] mao ang ilang tinubdan. Ang kalibotanong kasubo gipasiugdahan ni Sanatas. Mao kini ang kasubo nga nadakpan, sa wala pagpadayon sa pagpakasala, o sa paglantaw batok sa kaugalingon nga anaay pagdumot o pagtamay.
Ang diosnong kasubo, sa laing bahin, mao ang kasubo nga gihatag isip usa ka gasa gikan sa Dios alang sa kadtong andam modawat niini. Ang diosnong kasubo nagdala kanato sa usa ka hingpit nga pag-ila sa kadako sa atong mga sala apan adunay pagkasayod nga kita mahimong gawasnon niana.
(D. Chad Richardson, “Forgiving Oneself,”Ensign, Mar. 2007, 32)
Sa Septyember 2019, ang New Era nga magasin nagprinta og usa ka biswal nga impormasyon nga gibase sa mga pagtulun-an ni Elder Dieter F. Uchtdorf sa Korum sa Napulog Duha ka Apostoles nga lagmit makatabang nimo aron mas makaila tali sa diosnon ug kalibotanong kasubo.
Ang mosunod nga sugyot mahimong gamiton isip usa ka alternatibong ideya sa leksiyon. Dapita ang mga estudyante nga mobasa sa 2 Mga Taga-Corinto 6:14–7:1 ug mangita sa tambag ni Pablo sa mga Santos ug ang mga saad gikan sa Ginoo. (Timan-i nga ang mga pulong nga “Belial” ug “dili magtutuo” [ 2 Mga Taga-Corinto 6:15 ] kay mga pulong nga nagpasabot sa daotan.) Ang mosunod nga mga hisgotanan nga pangutana tingali makatabang:
Unsa ang pipila ka mga pananglitan sa mga mahugaw nga butang sa atong panahon?
Unsa sa imong hunahuna ang pasabot nga ang Dios modawat kanimo ug mahimong Amahan alang kanimo?
Unsaon nato pagpuyo sa kalibotan samtang nagpahimulag sa atong kaugalingon gikan sa mga mahugaw nga butang?
