Mga Taga-Efeso 1

“Paghiusa diha kang Kristo sa Tanang mga Butang”

Nakahunahuna ka na ba sukad mahitungod kon sama sa unsa kaha ang imong kinabuhi kon wala ang gipahiuli nga Simbahan ni Jesukristo? Isip kabahin sa iyang epistola ngadto sa mga Taga-Efeso, si Pablo mitudlo nga ang usa ka Pagpahiuli sa ebanghelyo ni Jesukristo mahitabo sa dili pa ang Ikaduhang Pagbalik sa Manluluwas. Kini nga leksiyon gituyo aron pagtabang kanimo nga makaila sa mga panalangin nga anaa tungod kay gipahiuli ni Jesukristo ang Iyang ebanghelyo ngadto sa kalibotan sa kataposang mga adlaw.

Paggamit sa mga pulong sa mga propeta sa bag-ong panahon aron masabtan ang doktrina. Dapita ang mga estudyante sa pagpangita og mga pulong sa mga propeta sa bag-ong panahon aron mas masabtan ang doktrina sa Bag-ong Tugon ug aron makakita og mga paagi nga magamit ang doktrina sa ilang mga kinabuhi. Ang pagtuon sa mga pagtulun-an sa mga propeta sa bag-ong panahon mahimong magdapit sa Espiritu Santo nga mopamatuod sa mga estudyante niini nga doktrinal nga mga kamatuoran ug magtabang sa mga estudyante nga mobati nga mas nakonektar ngadto sa mga propeta karon.

Pagpangandam sa estudyante: Dapita ang mga estudyante sa paglista og mga paagi nga paminaw nila ang Pagpahiuli sa ebanghelyo ni Jesukristo nakaapekto sa ilang kinabuhi. Hangyoa sila sa pagdala sa ilang mga lista ngadto sa klase.

Posible nga mga Kalihokan sa Pagkat-on

Paglig-on sa bag-ong mga kinabig

Ikonsiderar ang pagbahin sa mga estudyante nga managpares o diha sa gagmay nga mga grupo aron hisgotan ang mosunod nga sitwasyon.

Handurawa nga aduna kay usa ka higala nga bag-o lang miapil sa Simbahan.

• Unsa kaha ang pipila sa imong mga hunahuna ug mga kabalaka alang kanila?

• Unsa ang imong mabuhat aron matabangan ang imong higala nga motubo sa iyang kahibalo sa ebanghelyo ug magpabiling matinud-anon sa iyang mga pakigsaad?

Kon adunay bisan kinsa sa mga estudyante sa klase ang bag-o lang nabunyagan o adunay laing mga kasinatian nga nalambigit niini nga senaryo, mahimong dapiton sila sa pagpaambit unsa ang pipila sa ilang mga kabalaka o unsa ang nakatabang kanila.

Dayon ipaambit o ipamubo ang mosunod nga parapo aron tabangan ang mga estudyante nga makasabot sa konteksto sa epistola ni Pablo ngadto sa mga Taga-Efeso.

Sa iyang sulat ngadto sa Mga Taga-Efeso, namulong si Apostol Pablo ngadto sa mga Santos sa Efeso ug sa naglibot nga mga dapit. Ang iyang tumong mao ang paglig-on niadtong mga daan nang mga miyembro sa Simbahan ug pagtabang sa bag-ong mga kinabig aron molambo ang ilang espirituhanong kahibalo ug magpabiling matinud-anon sa ilang mga pakigsaad. Pipila sa mga doktrina nga iyang gitudlo niini nga sulat naglakip sa pagka-orden nang daan [foreordination] (tan-awa sa Mga Taga Efeso 1:4–6); ang gahom sa pagselyo sa Espiritu Santo (tan-awa sa Mga Taga Efeso 1:13–14); ang kaimportante sa mga propeta ug apostoles (tan-awa sa Mga Taga Efeso 2:19–22); ang ideya sa usa ug nagkahiusa nga Simbahan (tan-awa sa Mga Taga Efeso 4:1–7); ug ang nagkalain-laing mga katungdanan, mga calling, ug gimbuhaton sa sulod sa organisasyon sa Simbahan (tan-awa sa Mga Taga Efeso 4:11–14).

Lain pang doktrina nga gitudlo ni Pablo aron paglig-on sa mga miyembro sa iyang panahon mao ang mahitungod sa Pagpahiuli sa ebanghelyo sa ulahing mga adlaw.

• Nganong sa imong hunahuna nga ang pagkat-on mahitungod sa Pagpahiuli sa ebanghelyo sa ulahing adlaw mipalig-on sa mga Santos sa panahon ni Pablo?

Diha sa imong pagtuon sa tibuok niini nga leksiyon sa unsa ang gitudlo ni Pablo ug sa uban mahitungod sa Pagpahiuli, paghunahuna mahitungod sa unsaon niini nga doktrina paglig-on sa imong hugot nga pagtuo kang Jesukristo.

Ang dispensasyon sa kahingpitan sa mga panahon

Ang dispensasyon mao ang kapanahonan diin gipadayag sa Ginoo ang Iyang mga kamatuoran, awtoridad sa priesthood, ug mga ordinansa ngadto sa katawhan sa kalibotan. Adunay daghang mga dispensasyon sa ebanghelyo sa tibuok kasaysayan sa kalibotan.

Sa epistola ni Pablo ngadto sa mga Taga-Efeso, nanagna si Pablo og usa ka pihong dispensasyon. Basaha ang Mga Taga Efeso 1:10, nga mangita sa pihong dispensasyon nga gitagna ni Pablo ug sa mga hitabo nga moabot nianang panahona.

Ang Mga Taga-Efeso 1:10 usa ka tudling sa doktrinal nga kahanas. Ikonsiderar ang pagmarka sa mga tudling sa doktrinal nga kahanas sa lahi nga paagi aron mas dali ra nimo kining makit-an.

Mahimong makatabang ang paggahin og panahon sa pagtabang sa mga estudyante nga makasabot sa kahulogan sa pipila sa mahinungdanong mga pulong ug mga hugpong sa mga pulong gikan sa Mga Taga-Efeso 1:10. Kini mahimong buhaton pinaagi sa pagtudlo kanila ngadto sa “Pagtulon-an human sa usa ka Pagtulon-an [Line upon line]” nga bahin sa Septyembre 2023 nga isyu sa Alang sa Kalig-on sa mga Kabatan-onan nga magasin. Ang kalihokan nga “Mga Taga-Efeso 1:10: Ang Dios ‘maghiusa sa tanang mga butang diha kang Kristo’” nga anaa makita sa Oktubre 2–8 nga outline sa Dali, Sunod Kanako—Alang sa mga Indibidwal ug mga Pamilya: Bag-ong Tugon 2023 mahimong laing kapanguhaan nga makatabang.

Lain pang kapilian mao ang paghangyo sa mga estudyante nga mopaambit kon hain nga mga pulong o mga hugpong sa mga pulong gikan sa Mga Taga-Efeso 1:10 nga nagkinahanglan pa sila og dugang tabang sa pagsabot. Kini mahimong ilista diha sa pisara. Mahimo dayong dapiton ang mga estudyante sa pagtan-aw kon sila makakita ba og mga tubag gamit ang mga kapanguhaan sama sa mga footnote sa kasulatan o ang Gospel Library nga app.

• Unsa nga umaabot nga panahon ang gipasabot ni Pablo diha sa Mga Taga-Efeso 1:10?

• Unsa ang gipanagna ni Pablo nga mahitabo atol sa “dispensasyon sa kahingpitan sa mga panahon”?

Pagpuyo sa kahingpitan sa mga panahon

Sa miaging mga dispensasyon, ang Ginoo nagpadayag ngadto sa Iyang mga propeta og daghang mga kamatuoran, mga kasulatan, mga pakigsaad, ug mga gahom. Usa ka kamatuoran nga atong makat-onan gikan sa Mga Taga-Efeso 1:10 mao nga sa panahon sa dispensasyon sa kahingpitan sa mga panahon, ang tanang mga butang gikan sa miaging mga dispensasyon mapahiuli.

Mahimong magdrowing og usa ka hulagway ngadto sa pisara nga parehas sa mosunod.

Handurawa nga ang kada sapa sa mosunod nga paghulagway nagrepresentar sa usa ka dispensasyon sa ebanghelyo.

• Sa unsang paagi kaha ikapahisama ang dispensasyon sa kahingpitan sa panahon ngadto sa usa ka dakong lanaw sa tubig diin anaa ang mga sapa nga nag-agos padulong niini?

Si Elder B.H. Roberts (1857–1933) sa Kapitoan nagpamatuod kon unsa ang mahitabo isip kabahin sa dispensasyon sa kahingpitan sa mga panahon.

“Kini ang dispensasyon sa kahingpitan sa mga panahon, ug atong makita nga nag-agos padulong niini, sama sa nagbul-og nga mga sapa nga nag-agos padulong sa dagat, ang tanang nangagi nga dispensasyon, nagtabang nato nga masabtan sila, nga sila makasabot kanato; ug atong makita nga ang Dios dunay usa lang ka tuyo sukad sa sinugdanan, ug mao kana ang kaluwasan sa Iyang mga anak. Ug karon miabot ang kataposang adlaw, ang kataposang dispensasyon, nga ang kamatuoran ug ang kahayag ug ang pagkamatarong molukop sa yuta.

(B. H. Roberts, sa Conference Report, Okt. 1904, 73)

• Unsa nga mga kamatuoran, mga kasulatan, ug mga gahom gikan sa miaging mga dispensasyon ang napahiuli o gidala ngadto sa dispensasyon sa kahingpitan sa mga panahon?

Dapita ang mga estudyante sa pag-adto sa pisara ug butangan og label ang mga drowing nga mga sapa og mga kamatuoran, mga kasulatan, mga pakigsaad, ug mga gahom gikan sa nangaging mga dispensasyon nga gipahiuli o gidala diha sa dispensasyon sa kahingpitan sa mga panahon. (Ang mga label tingali maglakip sa gahom sa pag-silyo, makaluwas nga mga ordinansa, ang Basahon ni Mormon, ug uban pa; mahimong dugangan og drowing sa mga estudyante og mga sapa kon gikinahanglan.)

Ang pamahayag sa Pagpahiuli

Sa makasaysayanong kinatibuk-ang komperensiya niadtong Abril 2020 nga nagsaulog sa ika-200 nga anibersaryo sa pagsugod sa Pagpahiuli sa ebanghelyo ni Jesukristo sa ulahing mga adlaw, si Presidente Russell M. Nelson mipaila sa “Ang Pagpahiuli sa Kahingpitan sa Ebanghelyo ni Jesukristo: Usa ka Pamahayag ngadto sa Kalibotan sa Ikaduhang Siglo nga Kasaulogan” (ChurchofJesusChrist.org). Paggahin og pipila ka minuto sa pagbasa niini nga pamahayag, nga maghunahuna mahitungod sa mga paagi nga ang imong kinabuhi gipanalanginan tungod sa gipahiuli nga ebanghelyo ni Jesukristo.

Mahimong makatabang ang pag-andam og mga kopya sa pamahayag sa Pagpahiuli alang sa mga estudyante nga dili maka-access niini gikan sa usa ka digital nga device.

• Unsang mga bahin sa pamahayag sa Pagpahiuli ang mipatigbabaw kanimo?

• Unsa kaha ang imong ipaambit sa usa ka miyembro sa Simbahan kinsa dili segurado kon siya nagtuo sa Pagpahiuli o kinsa wala mibati nga kini importante alang kaniya?

Paggahin og higayon sa pagkonsiderar sa tanang mga paagi nga si Jesukristo nagpanalangin sa imong kinabuhi pinaagi sa Iyang gipahiuli nga ebanghelyo.

Kon ang mga estudyante nakakompleto sa pagpangandam sa estudyante nga kalihokan sa dili pa ang klase, dapita sila sa pagtan-aw sa lista nga ilang gihimo og sa pagkonsiderar unsa lagmit ang ilang madugang niini human sa ilang kasinatian sa pagtuon sa Mga Taga-Efeso 1.

• Unsang mga pihong aspeto sa Pagpahiuli nga labing mapasalamaton ka? Sa unsa nga paagi kini nakaimpluwensiya sa imong kinabuhi?

• Unsa ang imong nabati nga gusto sa Ginoo nga imong buhaton aron mosalmot sa Iyang nagpadayong Pagpahiuli aron tabangan nga mahiusa ang uban ngadto Kaniya?

Komentaryo ug Background nga Impormasyon

Nganong ang buhat sa Pagpahiuli importante kaayo?

Si Propeta Joseph Smith (1805–1844) mitudlo:

[Naara nato (sa ulahing adlaw) ang pagtan-aw, pag-apil ug pagtabang] sa pagpadayon sa Ulahing adlaw nga himaya, ‘ang dispensasyon sa kahingpitan sa [mga] panahon, sa higayon nga ang Dios mohiusa sa tanang mga butang, mga butang diha sa langit, ug mga butang dinhi sa yuta’ [tan-awa sa Mga Taga-Efeso 1:10 ]. … “[Kini mao ang] usa ka buluhaton nga gihunahuna sa Dios ug sa mga anghel uban sa kahimuot alang sa milabay nga mga henerasyon; nga midasig sa mga kalag niadtong karaan nga mga patriarch ug mga propeta; usa ka buluhaton nga gitagana aron mapahinabo ang kalaglagan sa mga gahom sa kangitngit, ang pagbag-o sa yuta, ang himaya sa Dios, ug ang kaluwasan sa tawhanon nga pamilya.”

(Joseph Smith, Mga Pagtulun-an sa mga Presidente sa Simbahan: Joseph Smith [2007], 622–23)

Unsa ang dispensasyon?

Si Elder David A. Bednar sa Korum sa Napulog Duha ka Apostoles mipasabot sa mga dispensasyon sa ebanghelyo ug nganong lahi kining kataposan nga dispensasyon.

Unsa man gayod ang Pagpahiuli?

Usa ka pagpasabot sa papahiuli sa ebanghelyo.

Sa unsang paagi man makaapekto sa akong kinabuhi ang pagkaadunay pagpamatuod sa Pagpahiuli?

Bahin 2: Kabatan-on mipakigbahin sa ilang mga pagpamatuod sa Pagpahiuli ug sa unsang paagi kini nakaapekto sa ilang kinabuhi. Sumala sa pakigpulong nga gihatag ni Elder Craig C. Christensen sa Oktubre 2016.

Mga batan-ong lalaki ug mga batan-ong babaye mipakigbahin kon sa unsang paagi nga ang mga panghitabo nga naglibot sa Pagpahiuli adunay tinuod kaayo nga epekto sa ilang matag adlaw nga kinabuhi.

Sa kinatibuk-ang komperensiya kaniadtong Oktubre 2019, si Presidente Russell M. Nelson mipaambit sa mga pangutana sa interbyo alang sa temple rekomend, nga naglakip sa pangutana nga “Ikaw ba adunay pagpamatuod sa Pagpahiuli sa ebanghelyo ni Jesukristo?” (tan-awa sa “Panapos nga Pakigpulong,” Liahona, Nob. 2019, 121).

Pamalandongi nganong kini nga pangutana nalakip isip usa ka gikinahanglan aron makasulod sa balay sa Ginoo. Sa unsang paagi nga ang pagsabot, pagtuo, ug pagsalmot sa nagpadayong Pagpahiuli makaimpluwensiya sa imong relasyon sa Langitnong Amahan ug ni Jesukristo?

Unsa ang ipasabot niini nga ang Pagpahiuli kay padayon gihapong nahitabo?

Si Presidente Dieter F. Uchtdorf, kanhi anaa sa Unang Kapangulohan, namulong sa nagpadayong kinaiyanhon sa Pagpahiuli.

Usahay maghunahuna kita sa Pagpahiuli sa ebanghelyo ingon nga kompleto, butang nga nahitabo na—si Joseph Smith mihubad sa Basahon ni Mormon, nadawat niya ang mga yawe sa priesthood, ang Simbahan naorganisar. Apan sa tinuod lang, ang Pagpahiuli usa ka nagpadayon nga proseso; nagpuyo kita niini karon mismo. Naglakip kini sa “tanan nga gipadayag sa Dios, sa tanan nga gipadayag Niya karon,” ug sa “daghan nga dagko ug mahinungdanon nga mga butang” nga “Siya mopadayag pa” ( Mga Artikulo sa Hugot nga Pagtuo 1:9). Mga kaigsoonan, ang makapahinam nga mga kalamboan karon kabahin nianang dugay nang gipanagna nga panahon sa pagpangandam nga matapos sa mahimayaong Ikaduhang Pag-anhi sa atong Manluluwas, si Jesukristo.

(Dieter F. Uchtdorf, “Wala Ba Kamo Nalambigit sa Buhat sa Pagpahiuli?” Liahona, Mayo 2014, 59)

Dugang nga Kalihokan sa Pagkat-on

Unsa ang kahulogan sa Pagpahiuli diha kaninyo?

Isip usa ka alternatibo nga paagi sa pagsugod sa leksiyon, mahimong hangyoon ang mga estudyante sa pagpaambit og usa ka butang nga ilang gilaoman sa umaabot ug sa pagpasabot kon ngano. Mahimo usab hangyoon ang mga estudyante nga mopaambit unsa sa ilang hunahuna ang gilaoman sa uban mahitungod sa umaabot.

Ang mosunod nga pamahayag ni Elder Ronald A. Rasband sa Korum sa Napulog Duha ka Apostoles mahimo dayon nga ipaambit:

Pinaagi sa balaanong plano, ang karaang mga propeta sa Dios, dihang giaghat sa Espiritu Santo, nanagna bahin sa Pagpahiuli ug sa unsay moabot sa atong panahon, ang kataposang dispensasyon ug ang kahingpitan sa panahon. Ang mismong buhat “nga midasig sa mga kalag” sa nag-unang mga manalagna [Mga Pagtulun-an sa Mga Presidente sa Simbahan: Joseph Smith (2007), 623]. Sulod sa mga henerasyon sa panahon, sila nagtagna, nagdamgo, naglantaw, ug nanagna bahin sa umaabot nga gingharian sa Dios dinhi sa yuta, sa unsay gitawag ni Isaias nga “usa ka katingalahang buhat ug usa ka kahibulongan.” [ Isaias 29:14 ].

(Ronald A. Rasband, “Katumanan sa Panagna,” Liahona Mayo 2020, 75)

Human mapaambit kini nga pamahayag, dapita ang mga estudyante sa pagpaambit nganong sa ilang hunahuna ang karaang mga propeta naglantaw sa unahan sa atong adlaw nga adunay dakong pagpaabot. Mahimo usab nga dapiton ang mga estudyante sa pagpaambit sa ilang mga hunahuna mahitungod sa pagpuyo sa panahon diin ang napahiuli nga Simbahan ni Jesukristo anaa sa kalibotan.

Dapita ang mga estudyante sa pagpangita og mga kamatuoran diha sa ilang pagtuon sa Mga Taga-Efeso 1 nga makatabang kanila nga mobati og mas dakong pasalamat ngadto sa Dios alang sa Pagpahiuli sa Iyang Simbahan sa ulahing mga adlaw.