Mga Taga-Galacia 6

“Bisan Unsay Igapugas sa Tawo, Mao Usab Kana ang Iyang Pagaanihon”

Naghunahuna ka ba sukad kon ang imong mga paningkamot sa pagpuyo sa ebanghelyo ni Jesukristo magdala kanimo ngadto sa mahangtorong mga tumong? Si Pablo misulat sa mga Santos sa Galacia aron tabangan sila nga maila kon giunsa nato pagpuyo ang atong kinabuhi sa matag adlaw nakaimpluwensiya kon ang Manluluwas mopanalangin kanato og “kinabuhing dayon” ( Mga Taga-Galacia 6:8). Kini nga leksiyon mahimong makatabang kanimo nga maila ang mga lihok nga imong kinahanglang buhaton aron makab-ot ang imong mahangtorong mga tumong.

Pag-awhag sa paggamit. Ang katuyoan sa pagtudlo sa ebanghelyo mao ang pagtabang sa mga estudyante sa paggamit sa doktrina ug mga baroganan nga anaa sa mga kasulatan. Ang mga pangutana ug mga kalihokan nga nag-awhag og paggamit makatabang sa mga estudyante nga makita kon unsaon sa paggamit sa doktrina ug mga baroganan diha sa ilang kaugalingong mga kinabuhi.

Pagpangandam sa estudyante: Dapita ang mga estudyante nga mobasa sa Mga Taga-Galacia 6:7–9 ug aron motambong nga andam mopaambit sa unsang paagi sila mibati nga ang mga pagtulun-an niini nga mga bersikulo mahimong makaapekto sa ilang adlaw-adlaw nga mga desisyon.

Posible nga mga Kalihokan sa Pagkat-on

Mahangtorong mga tumong

Ang mosunod nga pamahayag ni Elder Quentin L. Cook mahimong gamiton aron tabangan ang mga estudyante nga magsugod og hunahuna mahitungod sa epekto sa atong inadlaw-adlaw nga mga desisyon diha sa mga resulta nga atong madawat. Usa ka alternatibong ideya kon unsaon pagsugod ang leksiyon anaa makita sa kalihokan sa “Mga Taga-Galacia 6:7–8. Pagtanom og pag-ani og mga liso,” anaa sa “Dugang nga mga Kalihokan sa Pagkat-on” nga bahin.

Si Elder Quentin L. Cook sa Korum sa Napulog Duha ka Apostoles mipaambit og usa ka halandumon nga panagsultihanay nga sa makausa iyang nasinati kauban ang usa ka batan-ong lalaki.

Tan-awa ang bidyo nga “Maalamong Mopili,” anaa sa ChurchofJesusChrist.org, gikan sa time code 3:03 hangtod 4:52, o basaha ang mosunod nga pamahayag. Pangita og unsa ang mga tumong nianang batan-ong lalaki ug unsa ang lagmit iyang mga nasaypan og sabot mahitungod sa pagkab-ot niana.

Bag-o lang nakahimamat ko og usa ka batan-ong lalaki. Tumong niya nga makamisyon, makaeskwela, magminyo sa templo, ug dunay malipayong pamilya. Nalipay kaayo ko sa iyang mga tumong. Apan sa among pag-istoryahay, naklaro nga ang iyang lihok ug mga pagpili dili haum sa iyang mga tumong. Nakita nakong tinuod siyang gusto nga magmisyon ug gilikayan ang seryusong mga sala nga makapugong niini, apan ang inadlaw niyang buhat wala mag-andam niya alang sa pisikal, emosyonal, sosyal, intelektwal, ug sa espirituhanong hagit nga iyang atubangon. Wala siya maningkamot. Wala niya seryusoha ang pag-eskwela o ang seminary. Mosimba tuod siya, apan wala niya mabasa ang Basahon ni Mormon. Migahin siyag dakong panahon sa video games ug social media. Nagtuo siya nga ang pag-adto sa misyon igo na.

(Quentin L. Cook, “Maalamong Mopili,” Liahona, Nob. 2014, 47)

• Unsa kaha ang sayop nga nasabtan niining batan-ong lalaki mahitungod sa pagkab-ot sa iyang mga tumong?

Sa imong journal sa pagtuon, paghimo og mubo nga listahan sa imong mga tumong nga imong gikonsiderar nga importante sa kahangtoran. Paghunahuna kon nganong gusto man nimong makab-ot kini nga mga tumong. Pamalandong kon sa unsang paagi malagmit ang imong inadlaw-adlaw nga kinaiya magdala kanimo ngadto o palayo niining importante mahangtorong mga tumong. Samtang nagtuon ka, pangita og mga kamatuoran nga mahimong makatabang kanimo aron mas malinya ang imong inadlaw-adlaw nga mga lihok ngadto sa importante mahangtorong mga resulta nga imong gitinguha.

Ang balaod sa ting-ani

Ang mga Santos sa Galacia nadayag sa bakak nga mga pagtulun-an nga maoy hinungdan sa pagkahisalaag sa daghan (tan-awa ang Mga Taga-Galacia 1:6–9). Pipila ang nituo ug nitudlo sa bakak nga doktrina nga ang mga kinabig nga Hentil kinahanglang tulion aron maluwas (tan-awa ang Mga Taga-Galacia 6:12 ; Mga Buhat 15:1). Ang uban sayop nga nituo nga ang grasya ni Kristo naghatag kanila og kagawasan aron sa pagpakasala (tan-awa ang Taga-Galacia 5:13). Human hisgoti kining sayop nga mga pagtuo ug pagdasig sa mga Santos nga tabangan ang kadtong espirituhanong nahisalaag, si Pablo nagtudlo og usa ka importanteng kamatuoran aron tabangan ang mga tawo nga makasabot sa epekto sa ilang mga lihok.

Basaha ang Mga Taga-Galacia 6:7–8 . Pangita og usa ka kamatuoran nga gitudlo ni Pablo nga makaimpluwensiya sa atong adlaw-adlaw nga mga lihok. Timan-i nga ang pagpugas nagpasabot sa pagtanom ug nga ang pag-ani nagpasabot og pag-ani.

• Unsaon nimo sa pagpasabot sa mga pagtulun-an ni Pablo gamit ang imong kaugalingong mga pulong?

Usa ka kamatuoran nga atong makat-onan gikan sa Mga Taga-Galacia 6:7 mao nga bisan unsa nga ipugas sa tawo mao usab ang iyang anihon. Kini nga ideya usahay gipasabot isip ang balaod sa pag-ani.

• Unsang mga pananglitan ang inyong nakita niini nga kamatuoran sa imong kinabuhi o sa kinabuhi sa uban?

• Sa unsang paagi nga ang pagsabot niini nga kamatuoran nakaapekto sa mga desisyon nga imong buhaton sa imong kinabuhi?

Isip usa ka alternatibo sa pagtuon sa mosunod nga mga bersikulo, mahimong ipakita ang bidyo nga “Si Alma Nagtudlo ni Corianton mahitungod sa Pagkabanhaw ug Paghukom | Alma 39–41” gikan sa time code 1:27 hangtod 2:35. Kini nga bidyo anaa sa ChurchofJesusChrist.org.

Ang mga pagtulun-an ni Alma ngadto sa iyang anak nga si Corianton sa Basahon ni Mormon mahimong makatabang kanato nga mas makasabot sa mahangtorong implikasyon sa balaod sa pag-ani, o unsa ang gipasabot ni Alma nga ang “plano sa pagpasig-uli.” Basaha ang Alma 41:3–6, 10–15 , nga mangita sa mga kamatuoran nga nagpalambo sa imong pagsabot sa mga pagtulun-an ni Pablo.

• Unsa nga mga pulong o mga hugpong sa mga pulong ang imong nakita nga importante gikan niining mga bersikulo? Ngano man?

• Human marebyo ang gitudlo ni Alma kang Corianton, sa unsang paagi nga kining pagtulun-an magamit sa mga pulong ni Pablo nga “bisan unsay ipugas sa tawo [lalaki o babaye], mao usab kana ang iyang pagaanihon”? ( Mga Taga-Galacia 6:7).

• Unsa ang natabang sa mga pagtulun-an nga imong natun-an karon diha sa imong pagsabot mahitungod sa Langitnong Amahan ug kang Jesukristo?

Ang pagdapit ni Pablo ngadto sa mga Taga-Galacia

Gitapos ni Pablo ang iyang panudlo mahitungod sa balaod sa pag-ani sa usa ka pagdapit. Basaha ang Mga Taga-Galacia 6:9–10 , nga mangita kon unsay gidapit ni Pablo nga buhaton sa mga Santos.

Ikonsiderar ang pagpakita sa mosunod nga mga pangutana ug sa pagdapit sa mga estudyante sa paghisgot niini nga managpares o sa ginagmay nga grupo. Dayon dapita ang pipila ka boluntaryo sa pagpaambit sa ilang mga tubag ngadto sa klase.

• Unsa kaha ang ipasabot sa “dili magtinapolan sa pagbuhat [o]g maayo”? ( Mga Taga-Galacia 6:9).

• Sa unsang paagi nga si Jesukristo ang hingpit nga ehemplo niini?

• Unsa sa imong hunahuna ang buot ipasabot ni Pablo dihang siya miingon nga kita mag-ani “sa [pag-abot] sa panahon” ( Mga Taga-Galacia 6:9) diha sa atong paningkamot nga mohimo og maayo sa uban? Nganong importante man kining masabtan?

Paggamit sa imong nakat-onan

Si Presidente Dallin H. Oaks sa Unang Kapangulohan nagdasig kanato aron maghunahuna kon asa kita dalhon sa atong mga gipili (tan-awa ang “Unsa Ang Sangpotanan Niini?,” Liahona, Mayo 2019, 60–62).

Aron magamit kini nga tambag gikan kang Presidente Oaks, buhata ang mosunod nga kalihokan.

Paghimo og usa ka tsart nga parehas sa mosunod:

Unsa ang imong gipugas (mga lihok nga permanente nimong buhaton)

Unsa ang imong giani o gihandom nga anihon sa umaabot (asa kining mga lihok mosangpot)

Sa walang kilid, paghimo og usa ka listahan sa pipila ka mga butang nga permanente nimong buhaton o gustong sugdan pagbuhat.

Sa tuo nga kilid, isulat unsa ang imong gibati nga mga resulta sa umaabot sa pagbuhat niadtong mga butanga sa kanunay. Paghunahuna mahitungod sa mga resulta nga imong madahom kon imong sublion kini nga mga buhat sa kanunay sulod sa usa ka semana, usa ka bulan, usa ka tuig, lima ka tuig, o bisan sa tibuok nimong kinabuhi.

Pamalandong sa bisan unsang mga pag-aghat nga imong nadawat gikan sa Espiritu Santo diha sa imong pagtuon karon. Sa ubos sa imong tsart, pagsulat og bisan unsang mga pagpahiangay nga naaghat kang himoon sa imong kinabuhi nga makatabang kanimo aron mas mahimong angayan nga makadawat sa mga panalangin nga imong gitinguha. Ang Dios magtabang kanimo diha sa imong paghatag sa imong labing maayong paningkamot (tan-awa sa Doktrina ug mga Pakigsaad 123:17).

Komentaryo ug Background nga Impormasyon

Mga Taga-Galacia 6:8 . Unsa ang buot ipasabot kon ang usa ka tawo “magapugas alang sa Espiritu” o “magapugas alang sa iyang kaugalingong unod”?

Si Elder Ulisses Soares sa Korum sa Napulog Duha ka Apostoles mitudlo:

Ang pagpugas alang sa Espiritu nagpasabot nga tanan natong hunahuna, pulong, ug buhat kinahanglang mobayaw kanato sa balaanon nga kahimtang sa atong langitnong mga ginikanan. Bisan pa, ang mga kasulatan, nagpasabot sa unod isip pisikal o kalibotanong kinaiya sa kinaiyanhon nga tawo, nga nagtugot sa mga tawo nga maimpluwensiyahan sa kahinam, tinguha, gana, ug lawasnong tinguha kay sa mag-agad sa inspirasyon sa Espiritu Santo. Kon dili kita magmatngon, kana nga mga impluwensiya uban sa pag-aghat sa dautan niining kalibotan maghimo sa atong linihokan nga bastos ug mapasagaron nga mamahimong bahin sa atong kinaiya. Aron malikay sa dautang mga impluwensiya, sundon nato ang gitudlo ni Propeta Joseph Smith mahitungod sa padayon nga pagpugas alang sa Espiritu: “Busa, ayaw pagluya diha sa maayo nga buhat, kay kamo nagpahimutang sa tukuranan sa usa ka mahinungdanon nga buhat. Ug gikan sa gagmay nga mga butang magagikan ang mga dagko” ( Doktrina ug mga Pakigsaad 64:33).

(Ulisses Soares, “Magpabilin diha sa Teritoryo sa Ginoo!,” Liahona, Mayo 2012, 39)

Si Presidente Dallin H. Oaks sa Unang Kapangulohan mitudlo:

Kon mag-apil-apil kita sa drugas o pornograpiya o ubang mga yawan-ong buhat nga gitawag ni Apostol [Pablo] nga nagpugas og kahugawan, ang mahangtorong balaod nagmando nga moani kita og kalaglagan inay unta kinabuhing dayon. Mao kana ang hustiya sa Dios, ang kaluoy dili makahikaw sa hustisya. Kon ang mahangtorong balaod masupak, ang silot nga gipauban niadto nga balaod kinahanglan pagaantoson. Ang uban niini mahimong malukat pinaagi sa Pag-ula sa Manluluwas, apan ang paghugas pinaagi sa kaluoy niadtong nagkahugaw nga makasasala moabot lamang human sa tinuod nga paghinulsol (tan-awa sa Alma 42:22–25), kay ang ubang mga sala molungtad og dugay ug masakit nga proseso.

(Dallin H. Oaks, “Ayaw Kamo Pagpalimbong,” Ensign o Liahona, Nob. 2004, 45)

Sa unsang paagi nga ang gagmayng mga paningkamot makausab sa akong kinabuhi ug sa kinabuhi sa uban?

Kini nga bidyo anaa sa ChurchofJesusChrist.org.

Dugang nga mga Kalihokan sa Pagkat-on

Mga Taga-Galacia 6:1–2 . Pagpasig-uli sa uban ngadto kang Kristo

Dapita ang mga estudyante sa paghunahuna giunsa pagtubag sa Manluluwas kadto sila kinsa mga nagpuyo sa sala. Hangyoa ang mga estudyante nga mobasa sa Mga Taga-Galacia 6:1–2 ug nga mangita giunsa ni Pablo pagdapit kanato nga mosunod sa ehemplo sa Manluluwas diha sa atong pagtubag sa mga makasasala. Mahimong maghatag sa mosunod nga mga pagkahulugan alang sa mga estudyante samtang sila nagtuon:

• “Mahiligas ngadto sa kalapasan”: kini nagpasabot nga nakit-an nga nagpakasala.

• “Iuli”: ang orihinal nga pulong Griyego katartizete “nagpasabot sa pagtarong sa lutahan, ingon sa usa ka nadislocate nga bukog; busa kita kinahanglan nga maningkamot sa paghiusa kanila pag-usab,” o, sa laing pagkasulti, ang “pagbalik [kanila] ngadto sa ilang katungdanan” (Matthew Henry’s Commentary on the Whole Bible: Volume VI–II—First Corinthians–Second Timothy [2018], 168).

• “Palandonga ang imong kaugalingon”: kini nagpasabot nga mahimong masayod ug magbantay sa kaugalingon.

Dapita ang mga estudyante sa pagpaambit unsa ang ilang nabati nga gusto ni Pablo nga masabtan sa mga Taga-Galacia. Ikonsiderar ang pagpangutana sama sa mosunod:

• Unsaon man nato pagpahiuli sa uban ngadto kang Kristo nga dili mahulog sa tintasyon kauban nila?

• Sa unsang paagi nga ang pagpas-an sa palas-anon sa uban makatabang pagpahiuli kanila ngadto kang Kristo?

• Sa unsang paagi nga ang pagsunod sa tambag ni Pablo makatabang kanato aron mas mahimong susama sa Manluluwas? (tan-awa ang Mosiah 18:8–10).

Mga Taga-Galacia 6:7–8 . Pagtanom ug pag-ani og mga liso

I-display ang pipila ka mga binhi sa usa ka bunga o utanon nga dali rang mailhan sa mga estudyante. Hangyoa sila sa pag-ila kon unsa nga matang sa mga binhi o liso kana.

Unsay inyong mapaabot kon itanom ninyo kini nga mga binhi o liso? Dapita ang usa ka estudyante sa pagbasa og kusog sa Mga Taga-Galacia 6:7–8 . Hangyoa ang klase sa pagsunod, nga mangita sa unsay gitudlo ni Pablo kon unsay atong mapaabot kon itanom nato ang mga binhi o liso.