A group of youth walking towards the St. George Utah Temple.
Nabati ba nimo ang kalibog taliwala sa pagtinguha nga magpadala sa tintasyon ug sa pagtinguha sa pagsunod sa mga pag-aghat sa Espiritu Santo aron magpuyo nga matarong? Si Apostol Pablo naghulagway sa gubat nga nahitabo taliwala sa mga tinguha sa atong mortal, dili hingpit nga mga lawas ug sa Espiritu sa Dios, kinsa nagdani kanato aron mobuhat og maayo. Kini nga leksiyon gituyo aron matabangan ka nga mahimong mas susama ni Jesukristo pinaagi sa paghatag kanimo og mga kahigayonan sa pag-ila og mga paagi nga ikaw mas hingpit nga “[managgawi] diha sa Espiritu” ( Mga Taga-Galacia 5:16).
Pagmugna og usa ka luwas nga palibot sa pagkat-on. Paghimo og hiniusang mga paningkamot aron pag-ugmad og usa ka palibot sa gugma, respeto, ug tumong. Ang imong mga paningkamot aron matabangan ang mga estudyante nga mobati nga luwas, girespeto, ug gihatagan og bili diha sa seminary mahimong makatabang kanila nga mas makabati sa Espiritu Santo ug makabaton og mahinungdanong mga kasinatian.
Pagpangandam sa estudyante: Dapita ang mga estudyante sa pagtuon sa Mosiah 3:19 ug sa pag-ila sa mga pagtulun-an nga mahimong makatabang kanila nga makadawat sa panabang sa Manluluwas aron mabuntog ang atong napukan nga kinaiya, o “kinaiyanhon nga tawo.” Makaayo usab ang pagdapit sa mga estudyante sa pagsag-ulo niining tudling sa kasulatan sa doktrinal nga kahanas.
Posible nga mga Kalihokan sa Pagkat-on
Biray-biray nga dula
Ipakita ang mosunod nga hulagway, o drowinga kini diha sa pisara. Mahimo usab nga dapiton ang mga estudyante aron kopyahon og kadiyot ang usa ka parehas nga hulagway diha sa ilang mga journal sa pagtuon.
Imahe
Four men pulling a rope in a tug-of-war.
Sa unsa nga mga paagi nga ang imong kinabuhi sama sa biray-biray [tug-of-war]?
Sa iyang epistola ngadto sa mga Taga-Galacia, ang Apostol Pablo naghulagway sa duha ka nagkompetensiyang mga pwersa nga mobira kanato sa lainlaing mga direksiyon. Basaha ang Mga Taga-Galacia 5:16–17 , nga mangita sa tambag ni Pablo mahitungod niining mga pwersa.
Unsa nga mga nagkompetensiyang mga pwersa ang imong naila gikan niini nga mga bersikulo?
Ikonsiderar ang pagdrowing og usa ka pinabarog nga linya sa tunga-tunga sa hulagway sa biray-biray [tug-of-war]. Dayon isulat ang Panaggawi diha sa Espiritu sa ibabaw sa unang bahin sa biray-biray, ug isulat ang Pagtuman sa mga pangibog sa unod sa ibabaw sa laing bahin. Dasiga ang mga estudyante kinsa mikopya sa hulagway sa ilang journal sa pagtuon sa pagdugang usab niining mga gidugang.
Ang “ [mga] pangibog sa unod” ( bersikulo 16) mao ang mga tintasyon nga atong nasinati.
Unsa ang pipila sa mga pisikal nga mga tintasyon (mga pangibog sa unod) nga nasinati sa mga batan-on?
Unsa nga mga pulong, kon anaa, ang dili pamilyar nganha kanimo?
Pag-andam sa pagtabang sa mga estudyante nga makasabot sa bisan unsang dili pamilyar nga mga pulong sa mga bersikulo 19–21 pinaagi sa paggamit og mga kapanguhaan nga anaa sa mga footnote sa Bibliya o usa ka diksyonaryo.
Paggahin og higayon aron ikonsiderar sa hilom unsaon niining biray-biray [tug-of-war] sa Espiritu batok sa mga pangibog sa unod lagmit mahitabo sa imong kinabuhi. Sa unsang mga paagi lagmit manglimbasog ka batok sa pangibog sa unod? Sa unsang paagi napanalanginan ka diha sa imong pagsunod sa giya sa Espiritu? Sa imong pagpadayon sa pagtuon, hatagig pagtagad ang espirituhanong mga pag-aghat nga mahimong makatabang kanimo nga mahibalo sa bisan unsang mga pagpahiangay nga imong mahimo nga makatabang nimo sa pagbuntog sa mga tintasyon nga imong giatubang.
Paglikay sa mga buhat sa unod
Ang mosunod nga mga sugyot sa pagtudlo maghatag og usa ka paagi nga mahimong gamiton aron matabangan ang mga estudyante nga mas makasabot ug magamit ang mga pagtulun-an ni Pablo sa Mga Taga-Galacia 5 .
Kon ang mga estudyante makabenepisyo gikan sa dili kaayo kuti nga paagi, mahimong hatagan sila og indibidwal nga oras sa pagtuon sa Mga Taga-Galacia 5:16–23 , Mosiah 3:19 , ug Doktrina ug mga Pakigsaad 11:12 , kauban sa Abril 2013 nga pakigpulong sa kinatibuk-ang komperensiya ni Elder David A. Bednar nga giulohan og “Kita Nagtuo sa Pagkaputli” (Liahona, Mayo 2013, 41–44). Lain pang may kalabotan nga mga kapanguhaan ang mahimo usab nga mahatag sa mga estudyante aron tun-an. Mahimo silang dapiton sa pagreport sa ilang mga panabot ug pagrekord sa bisan unsang espirituhanong mga pag-aghat nga ilang nadawat gikan sa ilang pagtuon ug sa mosunod nga panaghisgot.
Sunda ang mga pag-aghat sa Espiritu Santo aron mahibalo sa labing maayong paagi sa pagtabang sa mga estudyante nga makabaton og usa ka mahinungdanong kasinatian.
Basaha ang Mga Taga-Galacia 5:21 , nga mangita nganong importante nga likayan ang pangibog sa unod.
Unsa ang imong nakat-onan kon nganong kinahanglan kitang maglikay niini nga mga buhat?
Unsa ang nakapahimo niini nga malisod sa paglikay sa pangibog sa unod, bisan kon kita nasayod nga sila dili maayo?
Si Elder David A. Bednar sa Korum sa Napulog Duha ka Apostoles mitudlo:
Imahe
Elder David A. Bednar, Quorum of the Twelve Apostles official portrait. 2020.
Isip mga anak sa Dios, kita nakapanunod og balaang mga kapasidad gikan Kaniya. Apan kita nagpuyo karon sa usa ka napukan nga kalibotan. Ang mga elemento diin gilalang ang atong lawas sa kinaiyanhon napukan ug kanunay nga maimpluwensiyahan sa sala, kadaot, ug kamatayon. Mao nga, ang Pagkapukan ni Adan ug ang espiritwal ug temporal nga mga sangpotanan niini nakaapekto kaayo kanato pinaagi sa atong pisikal nga mga lawas. …
Kay ang pisikal nga lawas mahinungdanon sa plano sa Amahan sa kalipay ug sa atong espiritwal nga kalamboan, si Lucifer nagtinguha sa pagpugong sa atong pag-uswag pinaagi sa pagtintal nato sa sayop nga paggamit sa atong lawas. Usa sa dakong mga nagkasukwahi sa kahangtoran mao nga ang kaaway, kinsa nauyamot tungod kay wala siyay pisikal nga lawas, nanglingla nato aron kita mauyamot sama niya pinaagi sa sayop nga paggamit sa atong mga lawas. Ang butang nga wala kaniya mao ang iyang nag-unang target sa iyang pagtintal nato ngadto sa espiritwal nga kalaglagan.
Unsa nga mga pulong o mga hugpong sa mga pulong ang nagpatigbabaw diha kanimo gikan niini nga pamahayag? Ngano man?
Pagpili sa pakiggawi diha sa Espiritu
Basaha ang Mga Taga-Galacia 5:16 og balik, nga mangita sa mga pagtulun-an ni Pablo kon unsaon nato pagbuntog ang mga tintasyon sa unod.
Usa ka baroganan nga atong makat-onan gikan sa Mga Taga-Galacia 5:16 mao nga diha sa atong panaggawi sa Espiritu, kita mas mahimong makabuntog sa mga tintasyon sa unod.
Unsa kaha ang tan-aw nimo ang buot ipasabot sa “panaggawi diha sa Espiritu”?
Kon gikinahanglan, tabangi ang mga estudyante nga makasabot nga ang panaggawi diha sa Espiritu naglangkob sa pagtinguha ug pagsunod sa giya sa Espiritu Santo.
Sa unsang paagi sa imong hunahuna nga ang panaggawi diha sa Espiritu mahimong makatabang kanimo sa pagbuntog sa mga tintasyon sa unod?
Basaha ang Mosiah 3:19 ug Doktrina ug mga Pakigsaad 11:12 , nga mangita sa mga pagtulun-an nga mahimong makatabang nimo nga mas makasabot sa importansiya sa panaggawi diha sa Espiritu.
Unsa nga mga hunahuna, o mga impresyon ang miabot kanimo samtang nagtuon ka niini nga mga bersikulo?
Unsa ang imong nakat-onan mahitungod sa giunsa ni Jesukristo pagtabang kanimo nga mabuntog ang mga tintasyon nga imong giatubang?
Unsa ang pipila sa mga pihong butang nga imong mabuhat aron maseguro nga ang Espiritu mas labing hingpit nga anaa uban kanimo?
Mahimong magpaambit og usa ka personal nga ehemplo nga may kalabotan sa mosunod nga pangutana sa dili pa ipangutana kini ngadto sa klase.
Unsa nga mga kasinatian ang imong nasinati diin ang pagsunod sa Espiritu nakatabang kanimo sa pagbuntog sa tintasyon? (Seguroha nga dili mopaambit og mga detalye nga hilabihan ka personal.)
Mga bunga sa Espiritu
Imahe
Drawing of a tree bearing good fruit
Si Pablo nag-ila og daghang mga panalangin nga mahimong mahitabo sa atong mga kinabuhi samtang kita mamati ug magsunod sa Espiritu Santo. Siya nagpasabot niining mga panalangin isip “bunga sa Espiritu” ( Mga Taga-Galacia 5:22).
Hain man niining mga panalangin o mga pagbati gikan sa Espiritu ang imong nasinati sa imong kinabuhi?
Unsa ang natabang niini nga mga panalangin aron makasabot ka mahitungod sa Langitnong Amahan ug ni Jesukristo? (Kon gikinahanglan, tan-awa ang Salmo 25:8–10 ; Mosiah 2:41 .)
Gamita ang imong nakat-onan
Si Jesukristo, kinsa kanunayng nagbuhat sa kabubut-on sa Langitnong Amahan (tan-awa ang 3 Nephi 27:13), mao ang hingpit nga ehemplo sa pagkinabuhi sa paagi nga makabuntog sa tintasyon sa sala. Bisan tuod og Siya nag-antos sa tanang matang sa mga tintasyon sa unod (tan-awa ang Mga Hebreohanon 4:15 ; Alma 7:11), Siya “wala manumbaling kanila” ( Doktrina ug mga Pakigsaad 20:22).
Hunahunaa sa makadiyot unsaon nimo pagpaningkamot sa pagsunod sa ehemplo ni Jesukristo ug paggamit sa mga kamatuoran nga imong nakat-onan karon. Paghunahuna mahitungod sa bisan unsang mga pag-aghat nga imo nang nadawat, ug paghimo og plano kon unsa ang imong buhaton aron mas hingpit nga makalakaw diha sa Espiritu ug makabuntog sa tintasyon. Irekord ang imong mga plano diha sa imong journal sa pagtuon.
Komentaryo ug Background nga Impormasyon
Sa unsang paagi nga ang pagsunod sa Espiritu Santo makatabang kanako nga makasukol ug makabuntog sa tintasyon?
Si Presidente Boyd K. Packer (1924–2015) sa Korum sa Napulog Duha ka Apostoles mitudlo:
Imahe
Final official portrait of Elder Boyd K. Packer, President of the Quorum of the Twelve Apostles, 2000. Passed away 3 July 2015.
Wala paabota nga moagi mo niining kinabuhia nga dili masayop, apan dili mo makahimo og dagkong sayop nga wala mapasidan-i daan pinaagi sa mga aghat sa Balaang Espiritu. Kini nga saad magamit sa tanang mga miyembro sa Simbahan. …
Kon nakahimo mo og mga butang nga dili unta angay, o kon nakigkauban mo sa mga tawo nga nagganoy ninyo sa sayop nga padulngan, mao kana ang panahon sa pagpakita sa inyong pagka-gawasnon, sa inyong kabubut-on. Paminawa ang tingog sa Espiritu, ug dili kamo mahisalaag.
Moingon ko pag-usab nga ang kabatan-onan karon gipadako diha sa teritoryo sa kaaway nga adunay nagkakunhod nga sumbanan sa moralidad. Apan isip sulugoon sa Ginoo, ako mosaad nga kamo mapanalipdan ug maprotektahan gikan sa pagpangataki sa kaaway kon mopatalinghog mo sa mga pag-aghat nga gikan sa Balaang Espiritu.
Sa Mga Taga-Galacia 5:16–23 , si Pablo nagtandi sa mga panalangin sa panaggawi diha sa Espiritu ngadto sa mga sangpotanan sa pagtuman sa mga pangibog sa unod. Mahimong makatabang alang sa mga estudyante ang paghanduraw niini nga panagsukwahi pinaagi sa paghunahuna kon giunsa kini pagrepresenta sa panan-awon ni Lehi sa kahoy sa kinabuhi.
Imahe
Lehi’s tree of life vision with bright gold tree, people holding on to the iron rod, and the great and spacious building.
Mahimong ipakita ang kauban nga hulagway ug pangutan-on ang mga estudyante hain sa mga bahin sa hulagway ang mahimong magrepresentar sa mga pagtulun-an ni Pablo mahitungod sa panaggawi diha sa Espiritu ug hain ang makarepresentar sa iyang mga pagtulun-an mahitungod sa pagpatuman sa mga pangibog sa unod. Mahimo usab nga makatabang ang pagdapit sa mga estudyante sa pagsiksik sa mosunod nga mga bersikulo aron makita giunsa niining nagkalainlaing mga aspeto sa pagtulun-an ni Pablo nga girepresentar sa damgo ni Lehi: 1 Nephi 8:10–12 , 19–34 .
Mahimong maghisgot og usa ka mas detalyadong panaghisgot mahitungod sa mga bunga sa Espiritu nga nalista diha sa Mga Taga-Galacia 5:22–23 . Usa ka paagi sa paghimo niini mao ang pagdrowing sa pisara og usa ka kahoy nga adunay bunga o sa paggunting og mga piraso sa papel nga nagrepresentar sa bunga. Ang mga estudyante mahimo dayong mangita diha sa Mga Taga-Galacia 5:22–23 ug sulatan ang matag piraso sa bunga og usa sa mga bunga sa Espiritu. Dayon ikonsiderar ang paghisgot mahitungod sa kahulugan niining mga hugpong sa mga pulong, mga kasinatian sa mga estudyante nga anaa niining mga pagbati gikan sa Espiritu, ug ilang mga kaila kinsang mga kinabuhi nag-ehemplo og usa ka partikular nga bunga sa Espiritu (gipahiangay gikan sa “Septyembre 25-Oktubre 1. Mga Galacia: ‘Panaggawi Kamo diha sa Espiritu,’” Dali, Sunod Kanako—Alang sa mga Indibidwal ug mga Pamilya: Bag-ong Tugon 2023).
