Fakataukei Fakatokāteline: ‘Efesō 2:19–20
ʻOku Fokotuʻu ʻa e Siasí ʻia Sīsū Kalaisi mo ʻEne Kau ʻAposetoló mo e Kau Palōfitá
ʻI hoʻo ako ʻa e ʻEfesō 2, naʻá ke ʻilo ai ʻoku langa ʻa e Siasi ʻo Sīsū Kalaisí ʻi ha fakavaʻe ʻo e kau ʻaposetolo mo e kau palōfita pea ko Sīsū Kalaisi ʻa e fungani makatulikí. Ko e taumuʻa ʻo e lēsoni ko ʻení ke tokoniʻi koe ke fakatupulaki hoʻo taukei ʻi he ngaahi akonaki ko ʻení, ʻi hoʻo ako maʻuloto ʻa e fakamoʻoni fakafolofolá mo e kupuʻi lea mahuʻinga ʻi he ‘Efesō 2:19–20, fakamatalaʻi ʻa e tokāteliné, pea fakaʻaongaʻi ʻa e ngaahi tefitoʻi moʻoni ʻo hono maʻu ʻo e ʻilo fakalaumālié ki ha tūkunga moʻoni ʻo e moʻuí.
Teuteu ʻa e tokotaha akó:Fakakaukau ke talaange ki he kau akó ʻa e talanoa fakatātā ke fakaʻaongaʻi mei he lēsoni ko ʻení pea fakaafeʻi ke nau fakalaulauloto ki he founga te nau lava ai ʻo fakaʻaongaʻi ʻa e ngaahi tefitoʻi moʻoni ʻo hono maʻu ʻo e ʻilo fakalaumālié ke tokoni ki honau kaungāmeʻá.
Ngaahi ʻEkitivitī Ako ʻOku Ala Fakahokó
ʻOku fokotuʻutuʻu ʻa e lēsoni fakataukei fakatokāteline ko ʻení ke akoʻi ia ʻi he hili ʻa e “Efesō 2,” ʻa ia ko e lēsoni fakaʻuhinga ia ki he potufolofola fakataukei fakatokāteline ʻo e Efesō 2:19–20. Kapau ʻoku fiemaʻu ke ʻunuakiʻi e lēsoni fakataukei fakatokāteline ko ʻení ki ha uike kehe, fakapapauʻi ke akoʻi foki mo e lēsoni puipuituʻa fekauʻaki mo iá ʻi he lolotonga e uike ko iá.
Ako maʻuloto pea fakamatalaʻi
Ke tokoni atu ke ke ako maʻuloto ʻa e potufolofola fakataukei fakatokāteline ko ʻení mo e kupuʻi lea mahuʻinga mei he folofolá, hiki tuʻo tolu ʻeni, pe tuʻo lahi ange, ʻi hoʻo tohinoa akó: “ʻEfesō 2:19–20. ʻOku fokotuʻu ʻa e Siasí ‘ki he tuʻunga ʻa e kau ʻaposetolo mo e kau palōfita, ko hono fuʻu maka tulikí ʻa Sīsū Kalaisi pē.’”
Te ke lava ʻo hiki ʻa e kupuʻi leá ʻi ha founga ʻokú ne fakatātaaʻi foki ʻa e moʻoni ko ʻení. Hangē ko ʻení, te ke lava ʻo tā ha tapafā lahi ʻi he kupuʻi leá ke fakataipe ha fakavaʻe pea tā ha falelotu ʻi ʻolunga ai. Pe, kapau naʻá ke tā ha sīpinga ʻo e fakavaʻe ko ʻení ki he lēsoni kimuʻá, te ke lava ʻo hiki ʻa e kupuʻi lea mahuʻingá ʻi ʻolunga he fakatātā ko iá pe ofi ki ai.
ʻE lava ke ʻaonga ke fakaʻaliʻali ʻa e fakaʻilonga ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní pea fehuʻi ki he kau akó pe ʻoku fekauʻaki fēfē ia mo e ʻEfesō 2:19–20. Fakakaukau ke huluʻi ʻa e vitiō “Ko Hono Fakaava ʻo e Ngaahi Langí ki ha Tokoní” mei he taimi 4:09 ki he 5:08, ʻa ia ʻoku fakamatalaʻi ai ʻe Palesiteni Lāsolo M. Nalesoni ʻa e fakaʻilongá. ‘Oku maʻu ‘a e vitiō ko ‘ení ‘i he ChurchofJesusChrist.org.
ʻOange ha faingamālie ki he kau akó ke nau fakamatalaʻi ʻa e tokāteline ko ʻeni naʻe akoʻi ʻi he ʻEfesō 2:19–20 : Ko e Siasí ʻoku “fokotuʻu ki he tuʻunga ʻa e kau ʻaposetolo mo e kau palōfita, ko hono fuʻu maka tulikí ʻa Sīsū Kalaisi pē.” Ko e ʻekitivitī ko ʻení ko ha fakakaukau ia ʻe taha. ʻE lava ke fakahoko fakafoʻituitui pe tauhoa ʻe he kau akó ʻa e ngaahi sitepu ʻe tolu ko ʻení.
A. Lau ʻa e ʻEfesō 2:19–20, pea fakalaulauloto ki he pōpoaki ʻoku ʻi aí.
E. Fakakaukau ki ha fehuʻi ʻe ala maʻu ʻe ha taha fekauʻaki mo e kau palōfitá mo e kau ʻaposetoló ʻe lava ke tokoni ʻa e ʻEfesō 2:19–20 ki hono talí. Ko ha ngaahi sīpinga ʻe niʻihi ko e “Ko e hā ʻoku maʻu ai ʻe homou siasí ha kau palōfita mo ha kau ʻaposetoló?” “Ko e hā ʻoku akoʻi mai ʻe he folofolá fekauʻaki mo e kau palōfitá mo e kau ʻaposetoló?” pe “Ko e hā e fekauʻaki ʻa e Fakamoʻuí mo e kau palōfitá mo e kau ʻaposetoló?” Hiki hoʻo fehuʻí.
F. Fakaʻaongaʻi e ʻEfesō 2:19–20, hiki e meʻa te ke lea ʻaki ke tali e fehuʻí.
Fakakaukau ke kole ange ke nau ngāue tauhoa pea fetaliʻaki ʻenau ngaahi fehuʻí, kae ʻoua ʻe fakaafeʻi e kau akó ke hiki ʻenau ngaahi talí ʻi he sitepu F. Fakafanongo ki heʻenau ngaahi talí pea siviʻi e founga ʻoku mahino lelei ai ki he kau akó. Kapau ʻe fiemaʻu, toe vakaiʻi mo e kau akó ʻa e ʻEfesō 2:19–20 pea mo ha faʻahinga naunau pē ʻoku fiemaʻu mei he lēsoni “ʻEfesō 2”.
Akoako hono fakaʻaongaʻí
Lolotonga e ʻekitivitī ko ʻení, fakafuofuaʻi e ʻilo ʻa e kau akó ki he ngaahi tefitoʻi moʻoni ki hono maʻu ʻo e ʻilo fakalaumālié, pea tokoniʻi kinautolu ʻo ka fiemaʻu.
‘E ala tokoni atu ‘a e ‘ekitivití ko ‘ení ki hono toe vakaiʻi ʻa e ngaahi tefitoʻi moʻoni ki hono maʻu ʻo e ʻilo fakalaumālié. Fakatauhoa e sētesí ki he tefitoʻi moʻoni totonu ki hono maʻu ʻo e ʻilo fakalaumālié. ‘O ka fiemaʻu, ngāueʻaki ʻa e palakalafi 5–12 ʻi he konga “Ko Hono Maʻu ʻo e ʻIlo Fakalaumālié” ʻi he Fakamatala ki he ʻElito ʻo e Fakataukei Fakatokāteliné2022) ke tokoni kiate koe.
|
1. ‘Oku totonu ke tokanga ʻa e kau fekumi fakamātoato ki he moʻoní telia ʻa e ngaahi maʻuʻanga fakamatala taʻefalalaʻangá. 2. ʻI heʻetau tauhi faivelenga ki he moʻoní mo e maama kuo tau maʻú, te tau maʻu ʻo lahi ange. 3. ʻI heʻetau nofo maʻu ki heʻetau falala ki heʻetau Tamai Hēvaní mo ʻEne palani ʻo e fakamoʻuí, ʻoku tau lava ʻo vakai lelei ange ki he ngaahi meʻa ʻoku fai ki ai ʻa e hohaʻá. |
a. Ngāue ʻi he tui. e. Vakaiʻi e ngaahi fakakaukaú mo e ngaahi fehuʻí ʻaki ha fakakaukau ʻoku taʻengatá. f. Fekumi ki ha mahino ʻoku lahi angé ʻo fakafou ʻi he ngaahi maʻuʻanga tokoni kuo fokotuʻu fakalangí. |
Fakaafeʻi ha niʻihi ʻo e kau akó ke vahevahe ha taha ʻo e ngaahi hoa naʻa nau fakatauhoá pea fakamatalaʻi e ʻuhinga ʻe lava ke tokoniʻi ai kinautolu ʻe he fakamatala pau ne nau filí ke nau maʻu ʻa e ʻilo fakalaumālié.
Fakakaukauloto ʻoku ongoʻi ʻe hoʻo kaungāmeʻa ofi ko ʻEsitelá ʻoku faingataʻaʻia. ʻOkú ne maʻu ha fakamoʻoni ki he kau palōfitá mo e kau ʻaposetoló, ka ʻokú ne fakafepakiʻi ha akonaki lolotonga ʻa e Siasí. Ko hono moʻoní, ʻokú ne maʻu ha ngaahi ongo mālohi ʻokú ne fakafepakiʻi ia. ʻOkú ne kole tokoni atu ke ne ʻiloʻi e meʻa ke faí. ʻOku ʻikai ke ke ʻilo ʻi he mōmeniti ko iá ʻa e meʻa ke ke lea ʻakí, ka ʻokú ke fili ke muimui ʻi he ngaahi tefitoʻi moʻoni ʻo hono maʻu ʻo e ʻilo fakalaumālie kuó ke fakaʻaongaʻi ʻi he seminelí ke teuteu ai ke tokoni ki ho kaungāmeʻá.
Fakaʻaongaʻi ʻa e saati ko ʻení ke ke fakakaukauloto ai ki hoʻo ngaahi fakakaukau mo e ngaahi ongo fekauʻaki mo e kau palōfitá mo e kau ʻaposetoló pea mo e founga te ke lava ʻo tokoni ai kia ʻEsitelá.
Fakakaukau ke hiki ʻa e fakamatala ko ʻení ʻi he palakipoé pe teuteuʻi ʻa e ngaahi fehuʻí ʻi ha laʻipepa ke fakaʻaongaʻi ʻe he kau akó.
|
Kuó u ako fēfē ke falala mo muimui ki he kau ʻaposetoló mo e kau palōfitá? |
ʻE founga fēfē haʻaku tokoni ki hoku kaungāmeʻá? |
|
Ko e hā ha ngaahi aʻusia kuó u maʻu ʻi heʻeku ngāue ʻi he tui kia Sīsū Kalaisí ke muimui ki Heʻene kau ʻaposetoló mo e kau palōfitá? Ko e fē ʻa e aʻusia ʻe ala tokoni ke u vahevahe mo ʻEsitelá? |
Ko e hā ha ngaahi fehuʻi te u lava ʻo ʻeke kia ʻEsitela ke tokoniʻi ia ke ne fakakaukau ki he founga ʻe ala finangalo ai e ʻEikí ke ne ngāue ʻi he tuí? |
|
Ko e hā kuó u ʻosi ʻilo fekauʻaki mo e Tamai Hēvaní, ko ʻEne palaní, mo e founga ʻo ʻEne fengāueʻaki mo ʻEne fānaú ʻa ia ʻe ala tokoni kia ʻEsitela ʻi he tūkunga ko ʻení? |
Ko e hā ha ngaahi fehuʻi te u lava ʻo ʻeke kia ‘Esitela ke tokoniʻi ia ke sio ki heʻene loto-hohaʻá ʻaki ha fakakaukau ʻoku taʻengatá? |
|
Ko e hā ha ngaahi maʻuʻanga tokoni kuo fokotuʻu fakalangi kuó ne tokoniʻi au ke u falala ki he kau ʻaposetoló mo e kau palōfitá? Kuo nau tokoniʻi fēfē au? |
Ko e hā ha ngaahi maʻuʻanga tokoni kuo fokotuʻu fakalangi te u fokotuʻu atu ke fekumi ki ai ʻa ʻEsitelá? |
Kapau ʻe fiemaʻu tokoni ʻa e kau akó ʻi he ngaahi fehuʻi ke tokoniʻi ʻa ʻEsitela ke sio ki heʻene hohaʻá ʻaki ha fakakaukau ʻoku taʻengatá, fakakaukau ke fakaʻaongaʻi e ngaahi sīpinga ko ʻení:
-
Ko e hā ʻokú ke ‘osi ʻilo fekauʻaki mo e fatongia ʻo e kau palōfitá mo e kau ʻaposetoló ʻi he palani ʻa e Tamai Hēvaní ki he fakamoʻuí?
-
Ko e hā e meʻa ʻokú ke hohaʻa ki ai fekauʻaki mo e akonaki ko ʻení? Ko e hā ha ngaahi tefitoʻi moʻoni ʻi he ongoongolelei ʻo Sīsū Kalaisí ʻe ala tokoni ke mahino lelei ange ai kiate koé?
-
ʻE tokoni fēfē nai kiate koe ʻa hoʻo fili ke muimui, pe ʻikai muimui, ki he kau palōfitá mo e kau ʻaposetoló? Te ne liliu fēfē hoʻo vā fetuʻutaki mo hoʻo Tamai Hēvaní?
Kapau ʻe fiemaʻu tokoni ʻa e kau akó ki hono fokotuʻu atu ha ngaahi maʻuʻanga tokoni kuo fokotuʻu fakalangi maʻa ʻEsitela ke ne akó, fakakaukau ke fakaafeʻi ke nau lau ʻa e Tokāteline mo e Ngaahi Fuakava 21:4–6 mo e 1 Nīfai 2:11, 16, 19. ʻE lava foki ke fakaafeʻi kinautolu ke lau e meʻa naʻe lea ʻaki ʻe Palesiteni Henelī B. ʻAealingi fekauʻaki mo e muimui ki he faleʻi ʻa e kau palōfitá mo e kau ʻaposetoló ʻi heʻene lea “Finding Safety in Counsel” (Ensign, May 1997, 25), ʻoku maʻu ʻi he ChurchofJesusChrist.org.
Fakaafeʻi e kau akó ke nau fakatātaaʻi e meʻa te nau ala lea ʻaki kia ʻĒsitelá mo hanau hoa pe ʻi ha kiʻi kulupu tokosiʻi. ʻE lava foki ke tā ʻe he kau akó ha fakatātā faingofua ʻo ha fepōtalanoaʻaki nounou.
Fakakaukau ke fai ha ngaahi fehuʻi vakaiʻi hangē ko e “Ko e hā ha ngaahi founga ʻokú ke ongoʻi loto-falala ai ki hono fakaʻaongaʻi e ngaahi tefitoʻi moʻoni ki hono maʻu ʻo e ʻiló ke tokoniʻi e niʻihi kehé? Ko e hā hono ʻuhingá?” “Ko e hā ha ngaahi tafaʻaki ʻokú ke fiemaʻu tokoni ai pe fiemaʻu ke ke akoako lahi angé?”
Fakamālōʻiaʻi ʻa e kau akó ʻi he ngaahi founga ʻoku nau fakaʻaongaʻi lelei ai e ngaahi tefitoʻi moʻoni ki hono maʻu ʻo e ʻilo fakalaumālié mo e ngaahi founga ʻoku nau fakalakalaka aí.
Fakakaukau ke vahevahe ha aʻusia pe fakamoʻoni fakataautaha ke fakalotolahiʻi ‘aki ‘a e kau akó.
Toe vakaiʻi ʻo e fakataukei fakatokāteliné
Fakaʻaongaʻi ha ʻekitivitī hangē ko ʻení ke toe vakaiʻi ʻa e potufolofola fakataukei fakatokāteline ko ʻení ʻi ha lēsoni ka hoko mai.
Tā ʻi he palakipoé ha fokotuʻutuʻu faingofua ʻo ha falelotu ʻoku ʻi ai ha tapafā lahi ʻi lalo ke ne fakafofongaʻi ʻa e fakavaʻé. ʻI loto ʻi he tapafā lahi ko ʻení, tohiʻi ʻeni: ʻEfesō _:19–20, ʻOkuKo e Siasí ʻoku “fokotuʻu ki he __________________ ‘o e _____________ mo e ____________, ko hono fuʻu ___________ ________ ʻa Sīsū Kalaisi pē.” Fakaafeʻi e kalasí ke nau fakafonu ʻa e ngaahi konga ʻoku ʻataá. Fakaʻosi e fakamanatu ko ʻení ʻaki hano fakaafeʻi e kau akó ke lau maʻuloto tuʻo lahi e fakamoʻoni fakafolofolá mo e kupuʻi lea mahuʻinga mei he folofolá, ʻo tamateʻi ha ngaahi foʻi lea ʻe niʻihi ʻi he taimi kotoa pē.
ʻEkitivitī Fakalahi ki he Akó
Tūkunga ʻe tahá
Fakakaukau ke fakaʻaongaʻi ʻa e fakatātā ko ʻení ko ha fetongi ʻo e fakatātā ʻi he lēsoní:
Fakakaukauloto ʻoku kei tui pē ho kaungāmeʻa ofi ko ʻEsitelá mo hono fāmilí kia Sīsū Kalaisi pea mo e Tohi Tapú ka ʻoku nau fakakaukau ke mavahe mei he Siasí koeʻuhí ʻoku ʻikai ke nau poupou ki ha ngaahi meʻa ʻoku lolotonga akoʻi ʻe he palōfitá mo e kau ʻaposetoló. ʻOkú ne kole tokoni atu ke ne ʻiloʻi e meʻa ke faí.