ʻEfesō

Vakai Fakalūkufuá

ʻI he tohi ʻa Paula ki he kakai ʻEfesoó, naʻá ne lea ai ki he kāingalotu Senitaile ʻo e Siasí (vakai, ʻEfesō 2:11) ʻa ia mahalo ko ha kau toki papi ului (vakai, ʻEfesō 1:15). Naʻá ne akoʻi ha ngaahi tefitoʻi moʻoni faifakamoʻui kehekehe, kau ai e founga ʻoku fakatahaʻi ai kitautolu ʻe he Fakamoʻuí, ko hono mahuʻinga ʻo e kau palōfitá mo e kau ʻaposetoló, ko hono faʻifaʻitaki hotau ngaahi vā fetuʻutakí ki he Fakamoʻuí, pea mo hono matuʻuaki ʻa e ngaahi mālohi ʻo e faikoví.

Teuteu ke Akoʻi

ʻOku ʻoatu ʻe he fakamatala ko ʻení ki he kau faiakó ha ngaahi fakakaukau ki he meʻa ʻe ala fiemaʻu ke teuteuʻi kimuʻa ʻi he lēsoni takitaha:

ʻEfesō 2–5

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoniʻi e kau akó ke nau ako ʻa e founga ke maʻu ai ʻa e ngaahi moʻoni mei he folofolá te ne tokoniʻi kinautolu ʻi heʻenau moʻuí pea ʻomi kinautolu ke nau ofi ange ki he Fakamoʻuí.

Teuteu ʻa e tokotaha akó: Fakaafeʻi e kau akó ke nau ako e folofolá ʻi he vahaʻa ʻo e taimí ni mo e kalasi hokó, ʻo kumi e ngaahi moʻoni ʻoku akoʻi ʻe he folofolá. Fakaafeʻi ke nau fakalaulauloto ki he ngaahi founga kehekehe ʻe lava ke nau ʻiloʻi ai e ngaahi moʻoni ko ʻení.

Fokotuʻu ki hono akoʻi ʻi he konifelenisi vitioó: Hili hono faʻu ʻe he kau akó ʻenau pousitaá, fakaafeʻi ke nau fili ʻa e gallery view koeʻuhí ke nau lava ai ʻo sio ki honau kaungā-akó kotoa. Fakaafeʻi e kau akó kotoa ke fakaʻaliʻali ʻenau ʻū pousitaá koeʻuhí ke lava kotoa e kalasí ʻo sio kiate kinautolu. Kole ki ha tokotaha ako ke ne fili ha pousitā ʻokú ne ngali saiʻia aí, pea fakaafeʻi leva ʻa e tokotaha ako naʻá ne faʻu ʻa e pousitaá ke ne fakamatalaʻi ia. Lolotonga hono fakamatalaʻi ʻe he tokotaha akó, mahalo ʻe tokoni ke fili ʻe he kau akó ʻa e speaker view koeʻuhí ke nau lava ʻo sio lelei ai ki he pousitaá. Fakaafeʻi leva ʻa e tokotaha ako naʻá ne toki fai e vahevahé ke fili ha pousitā ʻe taha ʻoku saiʻia ai pea tuku ki he tokotaha ako naʻá ne faʻu iá ke ne hoko atu ʻa e vahevahé. Toutou fakahoko ia ʻo ka fiemaʻu.

ʻEfesō 2

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoniʻi e kau akó ke nau ʻiloʻi mo fekumi ki he ngaahi tāpuaki ʻoku lava ke maʻu koeʻuhí ʻoku tataki ʻe Sīsū Kalaisi Hono Siasí he ʻahó ni ʻo fakafou ʻi he kau palōfitá mo e kau ʻaposetoló.       

Teuteu ʻa e tokotaha akó: Fakaafeʻi e kau akó ke fakalaulauloto ki he fehuʻi “Naʻe mei fēfē nai ʻeku moʻuí taʻe ʻi ai ha kau palōfita mo ha kau ʻaposetolo kuo ui ʻe Sīsū Kalaisi ke tataki Hono Siasí?”

ʻŪ naunau ki he kalasí: Ki he ʻekitivitī H, ʻai ha ngaahi tatau ʻo e kiʻi tohi Ki Hono Fakamālohia ʻo e Toʻu Tupú (2011) maʻá e kau ako ʻoku ʻikai ke nau lava ʻo maʻu ʻa e tatau fakaʻilekitulōniká ʻi he Gospel Library.
Vitiō: “ʻOkú Ne Moʻui: Ngaahi Fakamoʻoni kia Sīsū Kalaisi” (2:10)

Fokotuʻu ki hono akoʻi ʻi he konifelenisi vitioó: ʻE lava ke fakaʻaongaʻi ʻe he kau akó ha app pe polokalama kuo ʻosi maʻu ʻi heʻenau telefoní pe komipiutá ke faʻu ʻaki ha fakatātā ʻo e ʻEfesō 2:19–21 . Hili iá te nau lava ʻo vahevahe ʻenau screen ke fakaʻaliʻali mo fakamatalaʻi e meʻa ne nau faʻú pea vahevahe e meʻa ʻoku tokoni ʻenau fakatātaá ke mahino kiate kinautolu fekauʻaki mo Sīsū Kalaisi mo Hono Siasí.

Fakataukei Fakatokāteline: ‘Efesō 2:19–20

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke fakatupulaki e taukei ʻa e kau akó ki he ngaahi akonaki ʻi he ʻEfesō 2 ʻi heʻenau ako maʻuloto ʻa e fakamoʻoni fakafolofolá mo e kupuʻi lea mahuʻinga ki he ʻEfesō 2:19–20 , fakamatalaʻi ʻa e tokāteliné, pea fakaʻaongaʻi ʻa e tokāteliné mo e ngaahi tefitoʻi moʻoni ki hono maʻu ʻo e ʻilo fakalaumālié ʻi ha tūkunga moʻoni ʻo e moʻuí.

Teuteu ʻa e tokotaha akó: Fakakaukau ke talaange ki he kau akó ʻa e talanoa fakatātā ke fakaʻaongaʻi mei he lēsoni ko ʻení pea fakaafeʻi ke nau fakalaulauloto ki he founga te nau lava ai ʻo fakaʻaongaʻi ʻa e ngaahi tefitoʻi moʻoni ʻo hono maʻu ʻo e ʻilo fakalaumālié ke tokoni ki honau kaungāmeʻá.

Meʻa ke fakaʻaliʻalí: Ko e saati ʻi he meʻa ke akoako hono fakaʻaongaʻí, pe ʻoange ha laʻipepa ki he kau akó ʻoku ʻi ai e ngaahi fehuʻi mei he sātí.

Fokotuʻu ki hono akoʻi ʻi he konifelenisi vitioó: Ke tokoni ke fakamatalaʻi ʻe he kau akó ʻa e ʻEfesō 2:19–20 , muimui ʻi he ongo sitepu A mo e E mei he lēsoní. Kapau he ʻikai hiki ʻe he kau akó ʻa e ngaahi talí ʻi he sitepu F, fakakaukau ke vahevahe ʻa e kalasí ki ha fanga kiʻi kulupu iiki pea vahe ki he kulupu takitaha ha fehuʻi pau mei he sitepu F. Fakaafeʻi ʻa e kulupu takitaha ke nau aleaʻi ʻa e founga te nau lava ʻo tali ʻaki ʻa e fehuʻí mo teuteuʻi ha fakatātā ʻo e talanoá ke fakamatalaʻi ki he kalasí kotoa. Fakalotolahiʻi e ngaahi kulupú ke fakakau ʻa e tokotaha ako takitaha ʻi hono fakatātāʻí.

‘Efesō 5:21–33; 6:1–4

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoniʻi e kau akó ke nau muimui ʻi he sīpinga ʻa e Fakamoʻuí ke fakatupulaki ʻenau vā fetuʻutaki mo e niʻihi kehé.

Teuteu ʻa e tokotaha akó: Fakaafeʻi e kau akó ke nau fakakaukau ki he kau mēmipa honau fāmilí pea feinga ke ʻiloʻi ha meʻa ʻe taha ʻoku nau ʻofa ai fekauʻaki ʻiate kinautolu takitaha.

Meʻa ke fakaʻaliʻalí: Ngaahi ʻīmisi ʻo e Fakamoʻuí ʻoku fakahaaʻi ai ʻEne ʻofa mo e fakaʻapaʻapa ki he kau mēmipa hono fāmilí.

Fokotuʻu ki hono akoʻi ʻi he konifelenisi vitioó: Ke tokoni ke fakakakato ʻe he kau akó ʻa e ʻekitivitī teuteu ʻa e tokotaha akó, ʻe lava ke fakaafeʻi ke nau ʻomi ha mēmipa ʻo e fāmilí ki he konifelenisi vitioó pe fakaʻaliʻali ha ʻīmisi ʻo e mēmipa honau fāmilí lolotonga e vitioó pea vahevahe ha meʻa ʻe taha ʻoku nau ʻofa ai ʻi he mēmipa ko ia ʻo e fāmilí.

ʻEfesō 6:10–24

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoni ke mahino ki he kau akó ʻa e meʻa kuo ʻomi ʻe he ʻOtuá ke maluʻi kinautolu mei he ngaahi kovi ʻo e māmaní, vakaiʻi ʻenau teuteu fakalaumālie lolotongá, pea faʻu ha palani ke fakaleleiʻi ʻaki honau maluʻi fakalaumālié.

Teuteu ʻa e tokotaha akó: Fakaafeʻi e kau akó ke nau toe vakaiʻi mo fakakakato e ʻekitivitī ʻoku ui ko e “ʻE tokoni e teunga tau ʻo e ʻOtuá ke maluʻi au mei he koví” ʻi he Haʻu ʻo Muimui ʻIate Au—Maʻá e Fakafoʻituituí mo e Ngaahi Fāmilí pea haʻu mateuteu ke vahevahe e meʻa ne nau ako fekauʻaki mo e teunga tau ʻo e ʻOtuá (vakai ki he “2–8 ʻOkatopá. ʻEfesō: ‘Ko Hono Fakahaohaoa ʻo e Kakai Māʻoniʻoní,’” Haʻu ʻo Muimui ʻIate Au—Maʻá e Fakafoʻituituí mo e Ngaahi Fāmilí: Fuakava Foʻoú 2023).

Laʻipepa tufa: ʻĪmisi ʻo ha tangata ʻoku tui ha teunga tau

Fokotuʻu ki hono akoʻi ʻi he konifelenisi vitioó: Fakakaukau ke tomuʻa ʻave ha tatau ʻo e laʻipepa tufá ki he kau akó ʻi ha pōpoaki pe ʻīmeili. Kapau ʻokú ke ʻiloʻi ʻi ai ha tokotaha ako ʻi he kalasí ʻokú ne saiʻia he tā fakatātaá, fakakaukau ke ke tomuʻa kole kiate ia ke ne tā e teunga taú. Hili iá pea ʻai ʻenau fakatātaá ko ha laʻipepa tufa maʻá e kalasí. Pe, fakakaukau ke fakaʻaliʻali ʻa e laʻipepa tufá ʻi he screen. Hili hono lau ʻe he kau akó ʻa e ʻEfesō 6:14–18 , fakaafeʻi ke nau fakaʻaongaʻi e meʻangāue fakahingoá (annotate feature) ke nau fakahaaʻi ʻaki e ʻū konga kehekehe ʻo e teunga taú.