Zotërimi Doktrinor: Jakob [Bibël] 1:5–6

“Le të Kërkojë nga Perëndia”

Në një mësim të mëparshëm, “Jakob [Bibël] 1”, ti mësove se Perëndia na bekon me urtësi nëse ia kërkojmë Atij me besim. Ky mësim mund të të ndihmojë të mësosh përmendsh referencën e zotërimit doktrinor dhe frazën kyç të shkrimit të shenjtë për vargjet te Jakob [Bibël] 1:5–6, të shpjegosh doktrinën dhe të zbatosh parimet e marrjes së njohurisë shpirtërore në situata nga jeta reale.

Të drejtuarit te Perëndia për përgjigje. Plaku Nil L. Andersen, i Kuorumit të Dymbëdhjetë Apostujve, dha mësim: “Pyetjet shpirtërore meritojnë përgjigje shpirtërore nga Perëndia” (“Jozef Smithi”, Ensign ose Liahona, nëntor 2014, f. 28). Mësojini nxënësit të drejtohen te Perëndia për urtësi kur kanë pyetje.

Përgatitja e nxënësve: Ftojini nxënësit të lexojnë te Joseph Smith – Historia 1:10–14 , duke kërkuar mënyrën se si Jozef Smithi i zbatoi parimet e marrjes së njohurisë shpirtërore në jetën e tij.

Veprimtari të Mundshme të të Mësuarit

Ky mësim për fragmentin e zotërimit doktrinor është hartuar për t’u dhënë pas mësimit “Jakob [Bibël] 1”, që është mësimi kontekstual për fragmentin e zotërimit doktrinor të vargjeve te Jakob [Bibël] 1:5–6 . Nëse ky mësim për fragmentin e zotërimit doktrinor duhet të zhvendoset në një javë tjetër, sigurohuni që të jepni gjithashtu mësimin përkatës kontekstual gjatë asaj jave.

Mëso përmendsh dhe shpjego

Ndihmojini nxënësit t’i mësojnë përmendsh dhe t’i shpjegojnë referencën e shkrimit të shenjtë dhe frazën kyç të shkrimit të shenjtë për vargjet te Jakob [Bibël] 1:5–6 . Veprimtaritë vijuese janë sugjerime për përmbushjen e këtij synimi.

Përfytyro një shok ose shoqe që po has vështirësi për të marrë një vendim të rëndësishëm në jetën e vet. Ti e di se ky shok ose kjo shoqe nuk është rritur me besimin se ne mund t’i flasim Perëndisë drejtpërdrejt në lutje.

Kujto që në mësimin e mëparshëm ti studiove të vërtetën vijuese nga Jakob [Bibël] 1:5–6 : Perëndia do të na bekojë me urtësi nëse ia kërkojmë me besim.

• Si mund t’i përdorësh vargjet te Jakob [Bibël] 1:5–6 për të shpjeguar marrëdhënien që Ati Qiellor na fton të kemi me Të? (Mund të jetë e dobishme të përfshish shembuj të pyetjeve që dikush mund të bëjë ose të urtësisë që mund të kërkojë nga Perëndia në lutje, si edhe përvoja vetjake apo shembuj nga shkrimet e shenjta.)

Pasi t’u jepni nxënësve kohë të përsiatin se si do t’i përgjigjeshin pyetjes së mëparshme, merreni parasysh t’i ftoni ata t’ia tregojnë përgjigjet e tyre një partneri në mënyrë që të gjithë të kenë mundësinë t’i shprehin përgjigjet e tyre me zë. Dëgjojini përgjigjet e nxënësve dhe, nëse nevojitet, përsëritni ndonjë material nga mësimi i mëparshëm për t’i ndihmuar nxënësit ta kuptojnë më mirë këtë fragment.

Merreni parasysh ta paraqitni figurën që gjendet në fillim të mësimit ndërkohë që nxënësit plotësojnë veprimtarinë vijuese.

Mundësia për ta gjetur dhe shpjeguar këtë fragment të zotërimit doktrinor mund të të ndihmojë teksa ua shpërndan ungjillin të tjerëve gjatë gjithë jetës sate. Për të të ndihmuar ta mësosh përmendsh këtë fragment, shiko figurën e Vegimit të Parë të Jozef Smithit në fillim të mësimit ndërkohë që përsërit frazën kyç dhe referencën e shkrimit të shenjtë në vijim sa herë të mundesh brenda një minute: “Në qoftë se ndonjërit nga ju i mungon urtia, le të kërkojë nga Perëndia” ( Jakob [Bibël] 1:5–6).

Për t’i ndihmuar nxënësit ta mësojnë më mirë përmendsh frazën kyç dhe referencën e shkrimit të shenjtë, merreni parasysh të ndaloni disa herë gjatë mësimit për ta ngritur lart figurën e Vegimit të Parë dhe për t’i ftuar nxënësit ta thonë përsëri frazën kyç dhe referencën e shkrimit të shenjtë.

Ushtroje vënien në zbatim

Merreni parasysh ta paraqitni këtë figurë ose një figurë të ngjashme të Jozef Smithit gjatë pjesës vijuese të mësimit.

Jozef Smithi është një nga shembujt e shumtë në shkrimet e shenjta të njerëzve që janë bekuar nga ndjekja e parimeve të marrjes së njohurisë shpirtërore. Për ushtrimin vijues të vënies në zbatim, ti do të studiosh një shembull të mënyrës se si ai i zbatoi këto parime në jetën e tij. Para se të fillosh, gjej pak kohë për t’i shqyrtuar shkurtimisht këto parime në paragrafët 5–12 të pjesës “Marrja e Njohurisë Shpirtërore” te Dokumenti Bazë i Zotërimit Doktrinor (2022).

Merreni parasysh t’i ndani nxënësit në tri grupe, ku çdo grup përqendrohet në një parim të ndryshëm të marrjes së njohurisë shpirtërore për pjesën tjetër të mësimit. Nëse është e nevojshme, ftojeni çdo grup t’i shqyrtojë paragrafët që i përkasin parimit të tyre te Dokumenti Bazë i Zotërimit Doktrinor.

• Mendo për atë që ti di tashmë për përvojën e Jozef Smithit. Çfarë pyetjesh pati Jozefi? (Shih Joseph Smith – Historia 1:8–10 .)

• Përse është e rëndësishme që ne të kërkojmë përgjigje nga Perëndia për pyetjet tona ashtu siç bëri Jozef Smithi?

Mendo për çdo pyetje që ke ose për urtësinë që po kërkon. Teksa e plotëson veprimtarinë vijuese, mendo se si shembulli i Jozefit për zbatimin e parimeve të marrjes së njohurisë shpirtërore mund të të ndihmojë në situata që kërkojnë urtësi nga Perëndia.

Në të kundërt, ky ushtrim i vënies në zbatim mund të përshtatet për një pyetje që nxënësit kanë ose për urtësinë që kërkojnë.

Ftojeni secilin grup t’i studiojë vargjet vijuese së bashku. Jepuni atyre kohë të përshtatshme për të folur rreth asaj që zbulojnë brenda grupit të tyre, duke përfshirë atë që mësuan nga veprimtaria e përgatitjes së nxënësve. Më pas ftojeni çdo grup t’i raportojë klasës për mënyrën se si e vunë re që Jozefi e vuri në zbatim parimin tek i cili ata u përqendruan.

Studio vargjet te Joseph Smith – Historia 1:8, 11–17 dhe merre parasysh ta shenjosh çdo frazë që tregon se si Jozefi i ndoqi parimet e marrjes së njohurisë shpirtërore si adoleshent. Ndonëse mund të kesh tashmë njohuri për historinë e tij, kërko në këto vargje hollësi që zbulojnë dëshirat, qëndrimet dhe besimin e Jozefit përtej asaj që mund të kesh vënë re më parë.

• Çfarë shembujsh të Jozefit gjete që vepron me besim, duke mbajtur një këndvështrim të përjetshëm dhe duke përdorur burimet e caktuara në mënyrë hyjnore?

Pyetjet vijuese kanë për qëllim t’i ndihmojnë nxënësit të diskutojnë se si Jozefi i zbatoi parimet e marrjes së njohurisë shpirtërore, të mësojnë se si këto parime mund të jenë të dobishme për jetën e tyre dhe të drejtohen te Perëndia për të mësuar të vërtetën. Zgjidhni pyetjet që janë më të rëndësishme për nxënësit.

Kërko kuptueshmëri të mëtejshme nëpërmjet burimeve të caktuara në mënyrë hyjnore

• Si mendon, përse ishte e rëndësishme për Jozef Smithin që të kërkonte përgjigje për pyetjet e tij drejtpërdrejt nga Perëndia?

• Çfarë besonte Jozefi se do të ndodhte nëse ai nuk do të drejtohej te Perëndia për të gjetur përgjigje? (Shih Joseph Smith – Historia 1:13 .)

• Krahas lutjes, në ç’mënyrë tjetër mund të kërkosh përgjigje nga Perëndia?

Shqyrtoji konceptet dhe pyetjet me një këndvështrim të përjetshëm

• Çfarë mendon se dinte Jozefi për Perëndinë që i dha atij siguri për t’ia kërkuar përgjigjet Atij drejtpërdrejt?

• Kur përgjigjet për pyetjet e tua nuk vijnë shpejt, në ç’mënyrë është e dobishme të kuptosh se si Ati Qiellor ua zbulon të vërtetën fëmijëve të Tij?

• Përse do të donte Satani që ta pengonte Jozefin, dhe ty, t’i lutesh Perëndisë për përgjigje?

Vepro me besim

• Si e demonstroi Jozef Smithi të “kër[uarit] me besim, pa dyshuar” ( Jakob [Bibël] 1:6), edhe kur Satani u përpoq ta pengonte atë të lutej? (Shih Joseph Smith – Historia 1:15–16 .)

• Si mund të të ndihmojë shembulli i Jozefit me pyetjet dhe shqetësimet e tua vetjake? Merre parasysh të bësh një plan specifik për mënyrën se si do të veprosh me besim.

Jepni dëshmi për Atin tonë të dashur Qiellor, i cili është i gatshëm të na bekojë me urtësi nëse ia kërkojmë Atij me besim. Merreni parasysh të tregoni një përvojë vetjake që demonstron udhërrëfimin e Tij me dashuri pasi e kërkojmë Atë me besim.

Përsëritja e zotërimit doktrinor

Gjatë një mësimi të ardhshëm, kaloni jo më shumë se tri deri në pesë minuta duke shqyrtuar referencën e shkrimit të shenjtë dhe frazën kyç të shkrimit të shenjtë për vargjet te Jakob [Bibël] 1:5–6 . Një mënyrë për ta bërë këtë është të ngrini lart të njëjtën figurë që u përdor në këtë mësim ndërsa nxënësit mësuan përmendsh frazën kyç të shkrimit të shenjtë. Shihni nëse nxënësit mund ta kujtojnë ende frazën. Jepuni atyre kohë për ta përsëritur atë dhe provojeni përsëri sipas nevojës.

Një mënyrë tjetër është të ngrini lart figurën e Vegimit të Parë dhe t’i ftoni nxënësit ta thonë frazën kyç të shkrimit të shenjtë dy ose tri herë në fillim të disa mësimeve të ardhshme.

Veprimtari Plotësuese të të Mësuarit

Ndihmesë për nxënësit që mësojnë nëpërmjet imazheve përmes materialit filmik “Rivendosja”

Në vend që t’i ftoni nxënësit të lexojnë te Joseph Smith – Historia 1:8, 11–17 në grupet e tyre, merreni parasysh të shfaqni materialin filmik “Rivendosja” (nga kodi kohor 02:53 deri në 15:28), në dispozicion në ChurchofJesusChrist.org. Ndalojeni materialin filmik disa herë në vende të përshtatshme për t’i lejuar nxënësit të mbajnë shënim se si e panë Jozef Smithin ta demonstronte parimin e marrjes së njohurisë shpirtërore që ju caktua atyre. Pasi nxënësit ta shikojnë materialin filmik, ftojini t’i tregojnë grupit të tyre atë që zbuluan. Më pas ftojeni secilin grup t’i tregojë klasës atë që mësuan.