Jakob [Bibël] 2

“Besimi; në Qoftë se S’ka Vepra, Është i Vdekur”

Youth doing a service project in Australia

A mund të ketë një ndryshim ndërmjet një personi i cili thotë se beson te Jezu Krishti dhe një personi që e ushtron besimin e tij te Jezu Krishti? Jakobi ofroi një dallim të rëndësishëm që besimi i vërtetë te Jezu Krishti pasqyrohet jo thjesht në atë që një person mendon ose thotë, por gjithashtu në atë që ai bën. Ky mësim do të të lejojë të shqyrtosh se si mund ta ushtrosh në mënyrë më të plotë besimin te Jezu Krishti nëpërmjet veprimeve të drejta.

Ndihmesa që nxënësit të jenë pjesëmarrës aktivë. Ndërkohë që përgatiteni të jepni mësim, përqendrohuni tek ajo që nxënësit do të bëjnë. Nxitini nxënësit të bëjnë përpjekje për të mësuar nga shkrimet e shenjta dhe nga njëri-tjetri. Ndërsa nxënësit e bëjnë këtë, vetëbesimi në aftësinë e tyre për të mësuar nga shkrimet e shenjta do të rritet. Gjithashtu, ka më tepër të ngjarë që nxënësit ta zbatojnë atë që mësojnë.

Përgatitja e nxënësve: Ftojini nxënësit të mendojnë për dikë të afërt për ta i cili ka besim të fortë te Jezu Krishti. Nëse është e mundur, ftojini nxënësit t’i bëjnë këtij personi pyetje si ajo në vijim: “Si ndikon besimi yt te Jezu Krishti në veprimet dhe sjelljen tënde? Çfarë bën ndryshe për shkak të besimit tënd te Jezu Krishti?” Ftojini nxënësit të vijnë të përgatitur për të treguar atë që mësojnë.

Veprimtari të Mundshme të të Mësuarit

Marrja e bekimeve – si ndezja e një zjarri

Merreni parasysh të vizatoni figurën e një zjarri në tabelë.

A po kërkon nga Ati Qiellor një bekim ose një përgjigje ndaj lutjes? Mund të të ndihmojë ta krahasosh procesin e kërkimit të këtyre bekimeve me ndezjen e një zjarri me qëllim që të marrësh dritë dhe nxehtësi prej tij.

Çfarë hapash do të ndërmerrje për të bërë një zjarr?
Sa i rëndësishëm është veprimi i ndezjes së shkrepëses?

Lexoje thënien vijuese nga Plaku Dejll G. Renland, i Kuorumit të Dymbëdhjetë Apostujve, për të mësuar se të marrësh bekime është si të ndezësh një zjarr. Mund të shikosh gjithashtu materialin filmik “Të Mbushur me Bekime”, në dispozicion në ChurchofJesusChrist.org, nga kodi kohor 01:02 deri në 03:27.

“Le t’i krahasojmë bekimet qiellore me një grumbull të madh drurësh. … Kjo turrë drush përmban një sasi të madhe lënde djegëse, në gjendje të prodhojë dritë dhe nxehtësi për ditë të tëra. …

Që energjia në turrën e drurëve të çlirohet, shkrepësja duhet të ndizet dhe shkarpat të marrin flakë. Shkarpat me të shpejtë do të marrin flakë dhe do të shkaktojnë djegien e copave më të mëdha të drurit. …

Ndezja e shkrepëses dhe vënia flakë e shkarpave janë veprime të vogla që bëjnë të mundur çlirimin e energjisë së mundshme të drurëve. Derisa shkrepësja të ndizet, nuk ndodh asgjë, pavarësisht nga madhësia e turrës së drurëve. …

Në mënyrë të ngjashme, shumica e bekimeve që Perëndia dëshiron të na i japë, kërkojnë veprim nga ana jonë – veprim që bazohet në besimin tonë te Jezu Krishti. … Veprimi që na kërkohet, megjithatë, është përherë fare i vogël kur krahasohet me bekimet që marrim përfundimisht.”

(Dejll G. Renland, “Të Mbushur me Bekime”, Ensign ose Liahona, maj 2019, f. 70)

Çfarë idesh fiton nga analogjia e Plakut Renland?
Si mendon, çfarë do të thotë të veprojmë “baz[uar] në besimin tonë te Jezu Krishti”?

Merreni parasysh t’i lejoni nxënësit të reflektojnë dhe të përgjigjen për pyetjet e radhës në ditarin e tyre të studimit.

Përsiati pyetjet vijuese:

Në ç’mënyra ke besim te Jezu Krishti? Çfarë veprimesh ndërmerr për shkak të këtij besimi?
Çfarë përgjigjesh dhe bekimesh të tjera ke marrë nga Perëndia teksa ke ushtruar besim te Jezu Krishti? A ka mënyra të tjera që e ndien se Zoti do të donte që ti të veproje me besim? Përse?

Lutu që Ati Qiellor të të udhërrëfejë teksa kërkon përgjigje për këto pyetje gjatë studimit tënd.

Besimi te Jezu Krishti

Jakobi përdori një analogji tjetër për të na dhënë mësim për rëndësinë e të vepruarit me besim te Jezu Krishti.

Lexo te Jakob [Bibël] 2:14–16 dhe përpiqu të përfytyrosh atë që do të mendoje po ta dëshmoje këtë situatë. (Fjala “zhveshur” te vargu 15 do të thotë i veshur keq.)

Merreni parasysh të ftoni dy nxënës të dalin përpara klasës. Kërkojini njërit prej nxënësve të sillet si lypës dhe nxënësit tjetër të sillet si një person që mund ta ndihmojë lypësin. Ftojeni një nxënës të tretë që të lexojë me zë të lartë te Jakob [Bibël] 2:15–16 , ndërkohë që dy nxënësit e tjerë e interpretojnë me role atë që përshkruhet në këto vargje.

Çfarë mëson nga analogjia e Jakobit?

Lexo te Jakob [Bibël] 2:17–18, 26 (shih edhe te Jakob [Bibël] 1:22) dhe kërko një të vërtetë që Jakobi e ilustroi përmes kësaj analogjie.

Si do ta përmblidhje atë që Jakobi dha mësim?

Një mënyrë për ta thënë të vërtetën që Jakobi dha mësim është se besimi i vërtetë te Jezu Krishti kërkon veprim të drejtë.

Si mendon, përse Jezu Krishti dëshiron që ne ta vëmë në veprim besimin tonë?

Mund të jetë e dobishme të vini në dukje se një nga mësimet e përsëritura te letra e Jakobit është që ne duhet të kujdesemi për të varfrit, të sëmurët dhe nevojtarët (shih te Jakob [Bibël] 1:27 ; 2:1–9 ; 5:14–15). Veprime të tilla tregojnë besim te Jezu Krishti.

Si mund të na japë shtysë të kujtuarit e Shpëtimtarit Jezu Krisht dhe mirësisë së Tij që të veprojmë sipas bindjeve tona?

Shembuj të të vepruarit me besim

Mund të jetë frymëzuese të mendosh për shembujt e atyre që veprojnë sipas besimit të tyre te Jezu Krishti. Lexo te Jakob [Bibël] 2:21–25 dhe përcakto shembuj në Dhiatën e Vjetër të atyre që vepruan me besim.

Nëse është e dobishme, merrni parasysh të bëni pyetje si në vijim:

Si u quajt Abrahami për shkak të veprave të tij? (Shih te Jakob [Bibël] 2:23 .) Si mendoni, përse veprimet e tij besnike çuan në këtë titull?
Si mendoni se veprat tona mund të ndihmojnë në forcimin dhe përsosjen e besimit tonë? (Shih te Jakob [Bibël] 2:22 .)

Mund t’ju ndihmojë gjithashtu të shpjegoni se Rahabi e ushtroi besimin e saj duke rrezikuar jetën e vet për të mbrojtur shërbëtorët e Perëndisë (shih te Jozueut 2:1, 3 ; 6:17, 23, 25 ; Hebrenjve 11:31).

Merreni parasysh t’i ftoni nxënësit t’i shkruajnë përgjigjet e tyre për pyetjet vijuese në dy copa letre. Nxënësit mund të përdorin përgatitjen e tyre si nxënës në këtë veprimtari.

Kush të vjen ndërmend, qoftë nga jeta jote ose nga shkrimet e shenjta, që ilustron vënien në veprim të besimit te Jezu Krishti? Çfarë mëson nga ky shembull?
Cila është një mënyrë se si Jezu Krishti është një shembull i veprave të drejta? Si na ndihmojnë veprimet tona të drejta të bëhemi më të ngjashëm me Të?

Pasi nxënësit t’i kenë shkruar përgjigjet e tyre, ftojini ata t’i palosin të dy copat e letrës dhe të mbajnë një në secilën dorë. Më pas nxënësit mund të lëvizin nëpër klasë dhe të zgjedhin një person me të cilin të flasin. Çdo nxënës mund të zgjedhë më pas dorën e djathtë ose të majtë të nxënësit tjetër për të dëgjuar përgjigjet e tij. Nxënësit mund ta përsëritin këtë veprimtari me nxënësit e tjerë.

Shkyçja e bekimeve nëpërmjet veprimeve të frymëzuara nga besimi

Presidenti Rasëll M. Nelson dha sfidën vijuese lidhur me besimin tonë dhe veprimet tona:

“Për të bërë mirë cilëndo gjë, duhet përpjekje. Bërja një dishepull i vërtetë i Jezu Krishtit nuk është një përjashtim i kësaj. Rritja e besimit dhe e mirëbesimit tuaj tek Ai, kërkon përpjekje. …

…Çfarë do të bënit nëse do të kishit më shumë besim? Mendoni për të. Shkruani për të. Më pas merrni më shumë besim duke bërë diçka që kërkon më shumë besim.”

(Rasëll M. Nelson, “Krishti u Ringjall; Besimi tek Ai do të Zhvendosë Malet”, Liahona, 2021, f. 102, 103)

Përsiati pyetjet vijuese:

Çfarë do të bëje po të kishe më shumë besim?
Cilat janë hapat që mund të ndërmarrësh për të vepruar sipas përshtypjeve të tua?

Gjej një minutë për të filluar të veprosh sipas përshtypjeve të tua. Për shembull, në varësi të asaj që e ndien se duhet të bësh, ti mund të dërgosh një mesazh, të ofrosh një lutje, të vendosësh një kujtues në kalendarin tënd ose të planifikosh atë që do të bësh më pas.

Pyetni nëse ndonjë nxënës ndihet mirë të flasë për atë që ka filluar të bëjë ose planifikon të bëjë. Dhënia e ideve mund t’i frymëzojë nxënësit e tjerë.

Merreni parasysh të jepni dëshminë ose një përvojë vetjake rreth arsyes përse besimi te Jezu Krishti duhet t’i japë formë veprimeve tona.

Komente dhe Informacion për Rrethanat

A i kundërshtonin mësimet e Jakobit rreth besimit dhe veprave mësimet e Palit?

Në kontekstin e vargut te Jakob [Bibël] 2:14 , Jakobi e përdori termin vepra ndryshe nga mënyra se si e kishte përdorur Apostulli Pal. Kur Pali përdori termin vepra, ai iu referua fillimisht veprave të ligjit të Moisiut (shih te Romakëve 3:27–31 dhe Galatasve 2:15–16). Kur Jakobi përdori termin vepra, ai iu referua veprave të përkushtimit ose veprave të drejtësisë.

Besimi pa vepra është i vdekur, po veprat pa besim?

Plaku Dejvid A. Bednar, i Kuorumit të Dymbëdhjetë Apostujve, dha mësim:

“Besimi i vërtetë përqendrohet te dhe mbi Zotin Jezu Krisht dhe gjithnjë çon në veprim të drejtë. … Vetëm veprimi nuk është besim tek Shpëtimtari, por veprimi në përputhje me parimet e drejta është një pjesë qendrore e besimit.”

(Dejvid A. Bednar, “Kërkoni me Besim”, Ensign ose Liahona, maj 2008, f. 94)

Veprimtari Plotësuese të të Mësuarit

Jakob [Bibël] 1:22 . “Bëhuni bërës të fjalës dhe jo vetëm dëgjues”

Ftojini nxënësit të kërkojnë mësime që mund t’i ndihmojnë ata të kuptojnë rëndësinë e të vepruarit me besim te Jezu Krishti.

Jakob [Bibël] 2:9 . “Në qoftë se bëni preferenca personale, ju kryeni mëkat”

Ky parim mund të jepet mësim si një shembull i mënyrës se si ne mund ta tregojmë besimin tonë nëpërmjet veprave tona. Përzgjidhni në mënyrë rastësore një nxënës dhe jepini atij një karamele të vogël. Thuajini klasës se i dhatë këtij nxënësi një karamele për njëfarë arsye arbitrare (siç është ngjyra që kishte veshur). Bëni pyetje si: “Si ju bëri të ndiheni ju të tjerëve mënyra se si e trajtova këtë nxënës? Përse ndonjëherë tregojmë favorizim ndaj të tjerëve?” Ftojeni një nxënës të lexojë me zë të lartë vargjet te Jakob [Bibël] 2:1–4 . Vëreni klasën ta ndjekë, duke kërkuar atë për të cilën Jakobi i paralajmëroi shenjtorët. Çfarë panë ata? Si mund ta shmangim favorizimin ndaj disa njerëzve para të tjerëve?

Ftojini nxënësit të lexojnë në heshtje vargun te Jakob [Bibël] 2:8 , duke kërkuar atë që Jakobi u kujtoi shenjtorëve të bënin që do t’i ndihmonte ata ta zhduknin favorizimin. Kërkojuni nxënësve të mendojnë për dikë që njohin i cili ilustron dashurinë në mënyrë të barabartë për njerëz me rrethana të ndryshme. Ftojini nxënësit të tregojnë se kë menduan dhe përse. Si e ilustroi Jezu Krishti dashurinë për të tjerët në mënyrë të barabartë? Ftojini nxënësit të mendojnë për mënyrën se si ata mund ta ndjekin më mirë shembullin e Shpëtimtarit në mënyrën se si ata i shohin të tjerët dhe kujdesen për ta.

Jakob [Bibël] 2:19–20 . Të kesh besim te Perëndia është ndryshe nga të pranosh thjesht se Ai ekziston

Kjo veprimtari mund të jepet mësim pas thënies së Plakut Renland ose materialit filmik dhe pyetjeve që e pasojnë. Si mund ta kuptojnë nxënësit më mirë marrëdhënien ndërmjet besimit dhe veprave? Ftojini ata të lexojnë te Jakob [Bibël] 2:19–20 , duke kërkuar shembullin që Jakobi jep për të treguar se njerëzit mund të besojnë te Perëndia pa pasur besim në Të. Çfarë panë nxënësit? Si do ta përshkruanin ata ndryshimin ndërmjet të pasurit besim te Perëndia dhe të besuarit te Perëndia?