ចំណេះចំណានខាងគោលលទ្ធិ ៖ យ៉ាកុប ២:១៧–១៨

« សេចក្ដីជំនឿ បើគ្មានការប្រព្រឹត្តតាមទេ នោះក៏ស្លាប់ »

នៅក្នុងមេរៀនមុន អ្នកបានរៀនថា យើងបង្ហាញជំនឿលើព្រះយេស៊ូវគ្រីស្ទ តាមរយៈទង្វើដ៏សុចរិតរបស់យើង ។ មេរៀននេះអាចជួយអ្នកឲ្យទន្ទេញសេចក្ដីយោងចំណេះចំណានខាងគោលលទ្ធិ និងឃ្លាបទគម្ពីរគន្លឹះសម្រាប់ យ៉ាកុប ២:១៧–១៨ ពន្យល់គោលលទ្ធិ និងអនុវត្តតាមគោលការណ៍នៃការទទួលបានចំណេះដឹងខាងវិញ្ញាណនៅក្នុងស្ថានភាពជីវិតជាក់ស្តែង ។

សូមប្រាប់សិស្សថា ការរួមចំណែករបស់ពួកគេមានតម្លៃ និងសំខាន់ ។ សូមរកមើលវិធីនានា ដើម្បីជួយសិស្សម្នាក់ៗឲ្យទទួលអារម្មណ៍ថា ពួកគេមានតម្លៃ និងទទួលយក ហើយការរួមចំណែករបស់ពួកគេផ្តល់ពរដល់ថ្នាក់ ។ សូមកុំភ្លេចអរគុណសិស្សសម្រាប់ការចូលរួមរបស់ពួកគេ ហើយប្រាប់ពួកគេថា អ្នកមានអំណរគុណចំពោះឆន្ទៈ ក្នុងការរួមចំណែករបស់ពួកគេ ។

ការរៀបចំសិស្ស ៖ សូមអញ្ជើញសិស្សឲ្យគិតអំពីគោលការណ៍នៃដំណឹងល្អដែលពួកគេជឿ ប៉ុន្តែអាចពិបាកអនុវត្តតាម ។ សូមឲ្យសិស្សសញ្ជឹងគិតអំពីអ្វីដែលអាចរារាំងពួកគេមិនឲ្យអនុវត្តតាមគោលការណ៍នោះ ។

សកម្មភាពរៀនសូត្រដែលអាចមាន

វគ្គបទគម្ពីរចំណេះចំណានខាងគោលលទ្ធិនេះត្រូវបានរៀបចំឡើង ដើម្បីបង្រៀនបន្ទាប់ពីមេរៀន « យ៉ាកុប ២ » ដែលជាមេរៀនបរិបទសម្រាប់វគ្គបទគម្ពីរចំណេះចំណានខាងគោលលទ្ធិ យ៉ាកុប ២:១៧–១៨ ។ ប្រសិនបើមេរៀនវគ្គបទគម្ពីរចំណេះចំណានខាងគោលលទ្ធិនេះត្រូវប្តូរទៅសប្តាហ៍ផ្សេង សូមប្រាកដថា បង្រៀនមេរៀនបរិបទដែលត្រូវគ្នានៅអំឡុងសប្តាហ៍នោះផងដែរ ។

ទន្ទេញ និងពន្យល់

សូមជួយសិស្សឲ្យទន្ទេញ និងពន្យល់សេចក្ដីយោងបទគម្ពីរ និងឃ្លាបទគម្ពីរគន្លឹះសម្រាប់ យ៉ាកុប ២:១៧–១៨ ។ សកម្មភាពខាងក្រោមគឺជាវិធីមួយដើម្បីធ្វើកិច្ចការនេះ ។

សូមសរសេរ យ៉ាកុប ២:១៧–១៨ សេចក្ដីជំនឿ បើគ្មានការប្រព្រឹត្តតាមទេ នោះក៏ស្លាប់ នៅលើក្រដាសមួយសន្លឹក ដោយទុកចន្លោះខ្លះរវាងពាក្យនីមួយៗ ។ សូមសូត្រសេចក្ដីយោងបទគម្ពីរនេះ និងឃ្លាបទគម្ពីរគន្លឹះឲ្យឮៗ ។ បន្ទាប់មកកាត់ពាក្យ និងលេខនីមួយៗឲ្យដាច់ពីគ្នា ច្របល់វាចូលគ្នា ហើយដាក់វាតាមលំដាប់វិញ ។ សូមថាបទគម្ពីរ និងសេចក្ដីយោងនោះម្តងទៀត ។ សូមធ្វើបែបនេះម្ដងទៀតរហូតដល់អ្នកអាចនិយាយសេចក្ដីយោងបទគម្ពីរ និងឃ្លាបទគម្ពីរគន្លឹះតាមការចងចាំ ដោយគ្មានជំនួយពីក្រដាសណាមួយឡើយ ។

ប្រសិនបើវាដំណើរការប្រសើរជាងមុនសម្រាប់ថ្នាក់របស់អ្នក សូមពិចារណាកាត់ក្រដាសទាំងនេះឲ្យបានច្រើនឈុតមុនចូលរៀន ហើយដាក់ឈុតនីមួយៗនៅក្នុងស្រោមសំបុត្រដែលសិស្សអាចប្រើរៀងៗខ្លួន ជាក្រុម ឬជាគូ ។

នៅពេលអ្នកអាន យ៉ាកុប ២:១៧–១៨ សូមរំឭកពីមេរៀនមុនអំពីគោលការណ៍ដែលថា សេចក្ដីជំនឿពិតលើព្រះយេស៊ូវគ្រីស្ទតម្រូវឲ្យមានកិច្ចការសុចរិត ។

• តើអ្នកអាចពន្យល់សេចក្ដីពិតនេះតាមវិធីមួយដែលអាចជំរុញចិត្តអ្នកដទៃឲ្យធ្វើសកម្មភាពដោយសេចក្ដីជំនឿរបស់គាត់ដោយរបៀបណា ?

រៀនអនុវត្ត

សូមពិនិត្យគោលការណ៍ទាំងបីនៃការទទួលបានចំណេះដឹងខាងវិញ្ញាណ ។ បន្ទាប់មកសម្រាប់គោលការណ៍នីមួយៗ សូមសរសេរប្រយោគមួយដែលសង្ខេបអត្ថន័យរបស់វាជាពាក្យសម្តីផ្ទាល់ខ្លួនរបស់អ្នក ។ ប្រសិនបើមានប្រយោជន៍ សូមរំឭក កថាខណ្ឌទី ៥–១២ នៃផ្នែក « ការទទួលបានចំណេះដឹងខាងវិញ្ញាណ » ឡើងវិញនៅក្នុង ឯកសារគោលនៃចំណេះចំណានខាងគោលលទ្ធិ ( ឆ្នាំ ២០២២ ) ។

1. ធ្វើសកម្មភាពដោយសេចក្ដីជំនឿ ។

2. ពិនិត្យមើលគោលគំនិត និងសំណួរទាំងឡាយដោយទស្សនវិស័យដ៏នៅអស់កល្បជានិច្ច ។

3. ស្វែងរកការយល់ដឹងបន្ថែមតាមរយៈប្រភពដែលបានតែងតាំងដ៏ទេវភាព ។

ការធ្វើសកម្មភាពតាមជំនឿរបស់យើងអាចជាការពិបាក ។ អែលឌើរ ដេវីឌ អេ បែដណា ក្នុងកូរ៉ុមនៃពួកសាវកដប់ពីរនាក់បានថ្លែងថា « អ្វីដែលយើងដឹងមិនតែងតែឆ្លុះបញ្ចាំងពីអ្វីដែលយើងធ្វើនោះទេ » ( « More Diligent and Concerned at Home » Ensign ឬ Liahona ខែ វិច្ឆិកា ឆ្នាំ ២០០៩ ទំព័រ ១៧ ) ។ នៅពេលអ្នកអានស្ថានភាពខាងក្រោម សូមគិតអំពីហេតុផលដែលយើងប្រហែលជាមិនតែងតែធ្វើតាមគោលការណ៍នៃដំណឹងល្អដែលយើងដឹង ។

• យុវនារីម្នាក់ចង់អានបទគម្ពីររបស់នាងរាល់ថ្ងៃ ។ ជួនកាលនាងបាត់បង់ការជំរុញចិត្ត នៅពេលនាងមិនយល់ ឬរកឃើញអត្ថន័យនៅក្នុងអ្វីដែលនាងកំពុងអាននោះ ។

• យុវនារីម្នាក់បានថ្វាយដង្វាយមួយភាគក្នុងដប់ដោយស្មោះត្រង់ កាលពីកុមារភាព ។ ពេលនេះនាងធំហើយ ហើយមានការងារជាប់លាប់ នោះចំនួនប្រាក់ដង្វាយមួយភាគក្នុងដប់ដែលបានរំពឹងទុកពីនាង គឺច្រើនជាងចំនួនដែលនាងធ្លាប់បានថ្វាយ ហើយកាន់តែពិបាកក្នុងការថ្វាយ ។

• យុវជនម្នាក់បានរៀនអំពីព្រះយេស៊ូវគ្រីស្ទ និងដង្វាយធួនរបស់ទ្រង់ជាច្រើនឆ្នាំមកហើយ ។ គាត់ជឿថា ព្រះយេស៊ូវបានរងទុក្ខជំនួសអំពើបាបរបស់មនុស្សជាតិ ហើយថាអំពើបាបរបស់គាត់អាចត្រូវបានអភ័យទោស ។ គាត់មានបទពិសោធន៍ដ៏មានអត្ថន័យជាមួយនឹងការប្រែចិត្តកាលពីអតីតកាល ។ ទោះជាយ៉ាងណាក៏ដោយ គាត់បានឃើញថា ខ្លួនគាត់ចំណាយពេលយូរដោយមិនគិតពីការប្រែចិត្ត ។

សូមជ្រើសរើសស្ថានភាពមួយក្នុងចំណោមស្ថានភាពខាងលើ ឬគិតពីគោលការណ៍នៃដំណឹងល្អមួយទៀតដែលអ្នកជឿ ប៉ុន្តែមានការលំបាកក្នុងការធ្វើតាម ។ សូមសរសេរពីរបៀបដែលអ្នក ឬមនុស្សនៅក្នុងស្ថានភាពដែលអ្នកបានជ្រើសរើស អាចប្រើគោលការណ៍បីនៃការទទួលបានចំណេះដឹងខាងវិញ្ញាណ ដើម្បីដោះស្រាយស្ថានភាពនោះ ។

ប្រសិនបើអ្នកចង់បានជំនួយខ្លះក្នុងការអនុវត្តគោលការណ៍ទាំងនេះ ទៅនឹងស្ថានភាពដែលអ្នកបានជ្រើសរើស សូមពិចារណាឆ្លើយសំណួរមួយចំនួន ឬទាំងអស់ខាងក្រោមនេះ ។

គោលការណ៍ទី ១ ៖ ធ្វើសកម្មភាពដោយសេចក្ដីជំនឿ

• កាលពីអតីតកាល តើអ្នកបានធ្វើសកម្មភាពដោយសេចក្តីជំនឿលើគោលការណ៍នៃដំណឹងល្អអ្វីខ្លះ ?

• តើអ្នកបានរៀនអ្វីខ្លះអំពីព្រះយេស៊ូវគ្រីស្ទចេញពីបទពិសោធន៍នោះ ដែលអាចជួយអ្នកក្នុងស្ថានភាពនេះ ?

គោលការណ៍ទី ២ ៖ ពិនិត្យមើលគោលគំនិត និងសំណួរទាំងឡាយដោយទស្សនវិស័យដ៏នៅអស់កល្បជានិច្ច

• តើអ្នកគិតថា ព្រះវរបិតាសួគ៌មានព្រះតម្រិះបែបណាចំពោះស្ថានភាពនេះ ? តើទ្រង់អាចជួយតាមវិធីណាខ្លះ ?

• តើការធ្វើតាមគោលការណ៍នេះអាចនាំទៅរកពរជ័យក្នុងពេលបច្ចុប្បន្ននេះ និងដ៏នៅអស់កល្បយ៉ាងដូចម្តេច ?

គោលការណ៍ទី ៣ ៖ ស្វែងរកការយល់ដឹងបន្ថែមតាមរយៈប្រភពដែលបានតែងតាំងដ៏ទេវភាព

• តើ យ៉ាកុប ២:១៧–១៨ អាចជួយក្នុងស្ថានភាពនេះដោយរបៀបណា ? តើមានបទគម្ពីរ ឬសុន្ទរកថាសន្និសីទទូទៅអ្វីផ្សេងទៀត ដែលអាចជួយឲ្យអ្នកយល់កាន់តែច្បាស់ និងមានអារម្មណ៍ជំរុញចិត្ត ដើម្បីរស់នៅតាមគោលការណ៍នេះ ? ( ឧទាហរណ៍ សូមមើល អាលម៉ា ៣២:២៧–២៨ ) ។

• ជាញឹកញាប់ វាអាចមានប្រយោជន៍ដើម្បីពិភាក្សាបញ្ហាទាំងនេះជាមួយមិត្តភក្តិសមាជិកគ្រួសារ ឬអ្នកដឹកនាំសាសនាចក្រដែលទុកចិត្ត ។ តើព្រះអម្ចាស់អាចនឹងចង់ឲ្យអ្នកពិភាក្សាអំពីស្ថានភាពនេះជាមួយនរណា ?

សូមខិតខំបង្កើតបរិយាកាសមួយ ដែលសិស្សមានអារម្មណ៍សុវត្ថិភាពក្នុងការពិភាក្សាអំពីគំនិត និងកង្វល់របស់ពួកគេ ។ សូមអញ្ជើញសិស្សបីបួននាក់ឲ្យចែកចាយវិធីមួយ ឬច្រើនដែលពួកគេនឹងប្រើគោលការណ៍នៃការទទួលបានចំណេះដឹងខាងវិញ្ញាណ ដើម្បីជួយក្នុងស្ថានភាពរបស់ពួកគេ ដោយមិនចាំបាច់ចែកចាយអ្វីផ្ទាល់ខ្លួនពេកនោះទេ ។ ប្រសិនបើមានប្រយោជន៍ សូមសួរសំណួរតាមដានដូចជា « ហេតុអ្វីបានជាគោលការណ៍នោះមានប្រយោជន៍ ? » ហើយ « តើមាននរណាម្នាក់ផ្សេងទៀតនៅក្នុងថ្នាក់មានការយល់ដឹង ឬបទពិសោធន៍ដែលអាចមានប្រយោជន៍ក្នុងស្ថានភាពនេះដែរឬទេ ? »

សូមចំណាយពេលបន្តិចដើម្បីពិចារណាអំពីអ្វីដែលអ្នកបានរៀនតាមរយៈមេរៀននេះ ។ ប្រសិនបើអ្នកបានរកឃើញសេចក្ដីពិតនៃដំណឹងល្អដែលអ្នកផ្ទាល់លំបាកធ្វើតាម សូមវាយតម្លៃដោយស្មោះត្រង់ ប្រសិនបើអ្នកមានគម្រោងធ្វើវាឥឡូវនេះ ។ ប្រសិនបើអ្នកគ្មានគម្រោងធ្វើវាឥឡូវនេះទេ សូមគិតអំពីឧបសគ្គដែលមានលើផ្លូវរបស់អ្នក និងរបៀបដែលព្រះអម្ចាស់អាចជួយអ្នកបាន ។

វាអាចមានប្រយោជន៍ក្នុងការពិភាក្សាសំណួរនៅក្នុងកថាខណ្ឌខាងលើជាថ្នាក់រៀន ។ សូមថ្លែងទីបន្ទាល់អំពីព្រះឆន្ទៈរបស់ព្រះអម្ចាស់ក្នុងការជួយ និងពរជ័យដែលកើតមាន នៅពេលយើងធ្វើសកម្មភាពដោយសេចក្តីជំនឿទៅលើព្រះយេស៊ូវគ្រីស្ទ ។

ការរំឭកចំណេះចំណានខាងគោលលទ្ធិ

ក្នុងអំឡុងមេរៀនខាងមុខ សូមជួយសិស្សឲ្យរំឭកវគ្គបទគម្ពីរចំណេះចំណានខាងគោលលទ្ធិ និងឃ្លាបទគម្ពីរគន្លឹះនេះ ។ សូមពិចារណាដាក់សិស្សជាគូ ហើយឲ្យពួកគេមើលសេចក្ដីយោងបទគម្ពី និងឃ្លាបទគម្ពីរគន្លឹះដោយសង្ខេប ៖ « យ៉ាកុប ២:១៧–១៨ សេចក្ដីជំនឿ បើគ្មានការប្រព្រឹត្តតាមទេ នោះក៏ស្លាប់ » ។ បន្ទាប់មកអញ្ជើញពួកគេឲ្យប្ដូរវេនគ្នានិយាយមួយពាក្យម្ដង ឬមួយលេខម្ដង ។ ឧទាហរណ៍ សិស្សដំបូងនឹងនិយាយថា « យ៉ាកុប » សិស្សទីពីរនឹងនិយាយថា « ទីពីរ » ហើយនិយាយបន្តបន្ទាប់ទៀត ។ ពួកគេនឹងបន្តវេនរហូតដល់ពួកគេបាននិយាយសេចក្ដីយោង និងឃ្លាបទគម្ពីរគន្លឹះនូវពាក្យទាំងអស់ ។ បន្ទាប់មកពួកគេអាចប្តូរថា អ្នកណាត្រូវនិយាយពាក្យដំបូង ហើយធ្វើលំហាត់នេះឡើងវិញម្តងទៀត ។

សកម្មភាពរៀនសូត្របន្ថែម 

បន្ថែមពីលើសំណួរពីរដែលមានបន្ទាប់ពី « គោលការណ៍ទី ៣ ៖ ការស្វែងរកការយល់ដឹងបន្ថែមតាមរយៈប្រភពដែលបានតែងតាំងដ៏ទេវភាព » សូមពិចារណាអញ្ជើញសិស្សឲ្យចំណាយពេលពីរបីនាទី ដើម្បីរកមើលប្រធានបទនៅក្នុងបណ្ណាល័យដំណឹងល្អនៅលើគេហទំព័រ ChurchofJesusChrist.org ( ដូចជា ការសិក្សាព្រះគម្ពីរ ដង្វាយមួយភាគក្នុងដប់ ឬការប្រែចិត្ត ) ទាក់ទងនឹងស្ថានភាពដែលពួកគេបានជ្រើសរើសដើម្បីឆ្លើយតប ។ សិស្សអាចប្រើអ្វីដែលពួកគេរៀនដើម្បីឆ្លើយតបទៅនឹងស្ថានភាពដែលពួកគេបានជ្រើសរើស ។