Fakataukei Fakatokāteline: Sione 3:5

Fanauʻi ʻi he vaí pea mo e Laumālie kae hū ki he Puleʻanga ʻo e ʻOtuá

‘I he lēsoni kimuʻa, naʻá ke ako ai ‘a e folofola ʻa e Fakamoʻuí kia Nikotīmasí fekauʻaki mo e fanauʻi foʻou fakalaumālié ʻi he ouau ʻo e papitaisó mo e hilifakinimá. Te ke lava ʻo akoako fakahoko ʻi he lēsoni ko ʻení hono fakaʻaongaʻi ʻo e ngaahi tefitoʻi moʻoni ki hono maʻu ʻo e ʻilo fakalaumālié ʻo fakaʻaongaʻi ʻa e tokāteline ko ia kuopau ke fanauʻi kitautolu ʻi he vaí mo e Laumālié kae lava ke tau hū ki he puleʻanga ʻo e ʻOtuá.

Fakaʻilongaʻi e ngaahi potufolofola fakataukei fakatokāteliné. Fakaafeʻi e kau akó ke fakaʻilongaʻi e ngaahi potufolofola fakataukei fakatokāteliné ʻi ha founga ʻoku makehe mei heʻenau ngaahi fakaʻilonga kehé, koeʻuhí ke nau lava ʻo manatuʻi mo maʻu ngofua ange ʻa e ngaahi potu folofola ko ʻení. ʻE lava foki ke faʻu ʻe he kau ako ʻoku nau fakaʻaongaʻi ʻa e app Laipeli Kosipeli, ha fakaʻilonga ki he ngaahi potu folofola ko ʻení.

Teuteu ʻa e tokotaha akó: Fakaafeʻi e kau akó ke nau haʻu mateuteu ke vahevahe e meʻa te nau akoʻi ki ha kalasi Palaimeli fekauʻaki mo e Sione 3:5 .

Ngaahi ʻEkitivitī Ako ʻOku Ala Fakahokó

Ako maʻuloto mo fakamatalaʻi

ʻOku fakataumuʻa ʻa e lēsoni ko ʻení ke akoʻi hili ʻa e lēsoni ʻi he Sione 3:1–8, ko e lēsoni fakaʻuhinga ki he potu folofola fakataukei fakatokāteline ko ʻení. Kapau ʻoku fiemaʻu ke hiki e lēsoni fakataukei fakatokāteline ko ʻení ki ha uike kehe ke feau e taimi-tēpile ʻa e akó, fakapapauʻi ke akoʻi foki mo e lēsoni fekauʻaki mo iá lolotonga e uike ko iá.ʻOku fakataumuʻa ʻa e ʻekitivitī ko ʻení ke tokoni ke fakamatalaʻi ʻe he kau akó ʻi he lea pē ʻanautolu ʻa e tokāteline ʻoku akoʻi ʻi he Sione 3:5 ‘a ia kuopau ke fanauʻi kitautolu ʻi he vaí pea mo e Laumālié ke hū ki he puleʻanga ʻo e ʻOtuá. Fakapapauʻi ʻoku maʻu ʻe he tokotaha ako takitaha ha faingamālie ke fakamatalaʻi ʻa e tokāteline ko ʻení ki ha hoa pe kulupu tokosiʻi. Fakafanongo fakalelei ki heʻenau ngaahi talí, pea poupouʻi kinautolu ke nau fai ha ngaahi fehuʻi pe ʻoku ʻi ai haʻanau fehuʻi. Toe vakaiʻi e nāunau mei he lēsoni ʻi he Sione 3:1–8 ʻo ka fiemaʻu.Fakaafeʻi e kau akó ke fakaʻaongaʻi e ʻekitivitī teuteu ʻa e tokotaha akó ke tokoniʻi kinautolu ʻi heʻenau ngaahi talí lolotonga e konga ko ʻeni ʻo e lēsoní.

Fakakaukauloto kuo kole atu ke ke akoʻi ha kalasi Palaimeli fekauʻaki mo e moʻoni ko ʻeni naʻe akoʻi ʻi he Sione 3:5 : kuopau ke fanauʻi kitautolu ʻi he vai pea mo e Laumālie ke hū ki he puleʻanga ʻo e ʻOtuá.

• Te ke fakamatalaʻi fēfē ki he kalasi Palaimelí ʻa e ʻuhinga ʻo e tokāteline ko ʻení? Fakakau e ngaahi fakakaukau fekauʻaki mo e fatongia ʻo e Fakamoʻuí ʻi he foungá ni, ʻo hangē ko hono akoʻi ʻi he ʻAlamā 7:14 .

ʻE lava ke tokoni atu ʻa e ngāue ko ʻení ke ke manatuʻi ʻa e potufolofola fakataukei fakatokāteliné mo ako maʻuloto hono kupuʻi lea mahuʻingá. Te ke lava ʻo fakakakato ha ʻekitivitī tatau ʻi he app Fakataukei Fakatokāteliné kapau ʻokú ke lava ʻo maʻu ia.Tohiʻaki ha peni vahevahe ‘i ho tohinoa ako, “ Sione 3:5 : Kapau ʻe ʻikai fanauʻi ʻa e tangatá ʻi he vai pea mo e Laumālie, ʻe ʻikai ʻaupito faʻa hū ia ki he puleʻanga ʻo e ʻOtuá.” Toutou lau leʻolahi ʻa e kupuʻi leá pe ʻi ho ʻatamaí.Fili ha foʻi lea ʻe tolu pe fā pea tamateʻi kotoa ka ko e ʻuluaki mataʻitohi ʻo e ngaahi foʻi lea takitaha ko ʻení. Toutou lau ʻa e kupuʻi leá.Toutou fai ʻa e ngāue ko ʻení kae ʻoua kuo aʻu ki ha taimi ko e ʻuluaki mataʻitohi pē ʻo e foʻi lea takitaha, ʻo hangē ko ʻene hā atu ʻi hení: “S____ 3:_K_____ ʻe ʻi__ f_ ʻa e___ t_ ʻi he____ v__ p_ m__ L_____, ʻe ʻi_ ʻa_____ f____ h___ ia k__ p______ ʻo_ ʻO__.”Toutou lau ʻa e kupuʻi leá ʻo fakaʻaongaʻi ʻa e ngaahi mataʻitohi ʻuluakí, pea feinga leva ke lau maʻuloto ia ʻo ʻikai toe sio ki ai.

Ko hono fakaʻaongaʻi

Fakaʻaliʻali ʻa e ngaahi meʻa ko ʻeni ʻi he palakipoé. Tuku ke fakamatalaʻi nounou ʻe he kau akó ʻa e ngaahi tefitoʻi moʻoni ki hono maʻu ʻo e ʻilo fakalaumālié. Fakapapauʻi ʻoku feʻunga e maheni ʻa e kau akó mo e ngaahi tefitoʻi moʻoni ko iá kimuʻa pea nau toki hoko atu.

Fakakaukauloto ʻoku ʻi ai haʻo kaungāmeʻa ko Meghan ʻa ia ko ha mēmipa ʻo e Siasí, ka ʻoku ʻikai pehē ʻene faʻeé. ʻOku tui ʻene faʻeé kia Sīsū Kalaisi mo e Tohi Tapú, ka ʻoku ʻikai ke kau ki ha siasi pau. ʻOku fehuʻi atu ʻe Meghan, “ʻE lava nai ʻeku faʻeé ʻo ʻalu ki hēvani taʻe papitaiso kapau ʻokú ne moʻuiʻaki ha moʻui ‘oku lelei?”

• Ko e hā ha ngaahi ʻuhinga ʻe niʻihi ʻe ala ʻeke ai ʻe Meghan ʻa e fehuʻi ko ʻení?

• Ko e hā ʻoku mahuʻinga ai ke mahinoʻi ‘ene ngaahi ʻuhinga ki hono fai ʻo e fehuʻi ko ʻení, kimuʻa pea toki feinga ke tokoniʻi ia ke ne maʻu ha ngaahi talí?

Te ke lava ʻo fakaʻaongaʻi ʻa e ngaahi tefitoʻi moʻoni ki hono maʻu ʻo e ʻilo fakalaumālié, ke tokoni ke maʻu ʻe Meghan ha tali ki heʻene fehuʻi fekauʻaki mo e mahuʻinga ʻo e papitaisó.

Fakakaukau pe ʻe lelei taha ʻa e ʻekitivitī ko ʻení ke fai ʻe he kau akó ʻiate kinautolu pē, mo hanau hoa, pe ʻi ha fanga kiʻi kulupu iiki. ʻIloʻi honau tuʻunga iví mo e tokangá, pea fili ʻa e founga te ne feau lelei taha ʻenau ngaahi fiemaʻú.

Ngāue ʻi he tuí

Lau ʻa e palakalafi 5–7 ʻo e konga “Ko Hono Maʻu ʻo e ʻIlo Fakalaumālié” ʻi he Fakamatala ki he ʻElito ʻo e Fakataukei Fakatokāteliné (2022). Fakakaukau ke laineʻi ʻa e ngaahi foʻi lea pe kupuʻi lea ʻe ʻaonga ke fakaʻaongaʻi ʻi he tūkunga ko ʻení.

• Ko e hā e ngaahi foʻi lea pe ngaahi kupuʻi lea naʻá ke laine’i? Te ke fakaʻaongaʻi fēfē kinautolu ʻi he talanoa fakatātā ko ‘eni?

ʻE ala tokoni ke fai ha toe ngaahi fehuʻi vakaiʻi, hangē ko e “Ko e hā ha ngaahi meʻa pau te ke lava ʻo fakaafeʻi ʻa Meghan ke ne fai, ke ngāue ʻi he tuí?”

Vakaiʻi e ngaahi fakakaukaú mo e ngaahi fehuʻí, ʻaki ha fakakaukau ʻoku taʻengatá

Lau ʻa e palakalafi 8–10 ʻi he konga tatau ʻo e Fakamatala ki he ʻElito ʻo e Fakataukei Fakatokāteliné. Fakakaukau ke laineʻi ʻa e ngaahi foʻi lea pe kupuʻi lea ʻe ʻaonga ke fakaʻaongaʻi ʻi he tūkunga ko ʻení.

• Ko e hā e ngaahi foʻi lea pe ngaahi kupuʻi lea naʻá ke laineʻi? Te ke fakaʻaongaʻi fēfē kinautolu ʻi he talanoa fakatātā ko ‘eni?

Kapau ʻe fiemaʻu, fakakaukau ke fai ha ngaahi fehuʻi vakaiʻi kehe, hangē ko e “Ko e hā e fatongia ʻo e papitaisó mo e hilifakinimá ʻi he palani ʻo e fakamoʻuí?”

Fekumi ki ha Mahino Lahi Ange ʻo Fakafou ʻi he Ngaahi Maʻuʻanga Tala Kuo Fokotuʻu Fakalangí

Lau ʻa e palakalafi 11–12 ʻi he konga tatau ‘o e “Ko Hono Maʻu ʻo e ʻIlo Fakalaumālie” he Fakamatala ki he ʻElito ʻo e Fakataukei Fakatokāteliné. Fakakaukau ke laineʻi ʻa e ngaahi foʻi lea pe kupuʻi lea ʻe ʻaonga ke fakaʻaongaʻi ʻi he tūkunga ko ʻení.

• Ko e hā e ngaahi foʻi lea pe ngaahi kupuʻi lea naʻá ke laineʻi? Te ke fakaʻaongaʻi fēfē kinautolu ʻi he talanoa fakatātā ko ‘eni?

Kapau ʻe tokoni ki he kau akó, fakakaukau ke fai ha ngaahi fehuʻi vakaiʻi, hangē ko e “Te ke fakaʻaongaʻi fēfē ʻa e tokāteline ʻoku akoʻi ʻi he Sione 3:5 ke tokoni kia Meghan?” pe “Ko e hā mo ha toe ngaahi maʻuʻanga tokoni kuo fokotuʻu fakalangi te ke lava ʻo fakahinohinoʻi ʻa Meghan ki ai? ʻE tokoniʻi fēfē ia ʻe he ngaahi maʻuʻanga fakamatala ko iá?”Fakaafeʻi e kau akó ke nau fakamatalaʻi e founga te nau fakaʻaongaʻi ai e ngaahi tefitoʻi moʻoni ʻo hono maʻu ʻo e ʻilo fakalaumālié ke tokoni ke mahino lelei ange kia Meghan ʻa e mahuʻinga ʻo e papitaisó. Fakakaukau ke kole ki he kau akó ke nau fakatātaaʻi tautau toko ua ʻa e tūkunga ko ʻení, pea taufetongi ʻa e kau akó ʻi hono fakatātaaʻi ʻo Meghan. ʻO ka fiemaʻu, tokoniʻi e kau akó ke nau fakamatalaʻi ʻa e tokāteliné mo fakaʻaongaʻi ʻa e ngaahi tefitoʻi moʻoni ki hono maʻu ʻo e ʻilo fakalaumālié.

Vakaiʻi ʻo e Fakataukei Fakatokāteliné

‘I ha kalasi kimui ange, toe vakaiʻi ʻa e fakamoʻoni fakafolofola ʻo e fakataukei fakatokāteliné mo e kupuʻi lea mahuʻingá, ʻaki hono fakaafeʻi ‘a e kau akó ke nau toe lau ʻa e ʻekitivitī mataʻitohi ʻuluaki ʻoku fakamatalaʻi ʻi he lēsoni ko ʻení.