Mātiu 4; Luke 4–5

Vakai Fakalūkufuá

‘I he hili hono papitaiso ‘o e Fakamoʻui, naʻe ʻalu ʻa Sīsū Kalaisi ki he toafá ke Ne feʻao ai mo e ʻOtuá (vakai ki he Liliu ʻa Siosefa Sāmitá, Mātiu 4:1 [‘i he Mātiu 4:1, futinouti b]). Naʻe ʻahiʻahiʻi Ia ʻe Sētane, ka naʻá Ne tekeʻi ʻa e ngaahi ʻahiʻahí. ʻI he taimi naʻe maʻu ai ʻe Saimone Pita, ʻAnitelū, Sēmisi, mo Sione ha “ngaahi ika lahi” hili hono fakaafeʻi kinautolu ʻe he Fakamoʻuí ke nau “tuku hifo [ʻenau] kupengá” (Luke 5:4, 6), naʻa nau maʻu ha kihiʻi ʻata ʻo e meʻa te nau lava ʻo fakahoko ʻaki e tokoni ʻa e Fakamoʻuí. Naʻe fili leva ʻa e kau toutai ko ʻení ke nau tuku ʻa e meʻa kotoa pē ka nau muimui ʻia Sīsū Kalaisi. Naʻe haʻu ʻa Nikotīmasi, ko ha Fālesi mo ha “pule ʻo e kau Siú” (Sione 3:1), ki he Fakamoʻuí ʻi he poʻulí ke fai ha ngaahi fehuʻi mahuʻinga fekauʻaki mo e fakamoʻuí.

Teuteu ke Akoʻi

ʻOku ʻoatu ʻe he fakamatala ko ʻení ki he kau faiakó ha ngaahi fakakaukau ki he meʻa ʻe ala fiemaʻu ke teuteuʻi kimuʻa ki he lēsoni takitaha.

Mātiu 4:1–11, Konga 1

Taumuʻa ʻo e lēsoní: ʻE tokoni ʻa e lēsoni ko ʻení ki he kau akó ke nau ʻiloʻi ʻa e ngaahi tefitoʻi moʻoni ke tokoniʻi kinautolu ke muimui ʻi he sīpinga ʻa e Fakamoʻuí ʻi hono tekeʻi ʻa e ngaahi ʻahiʻahi ʻa Sētané.

Teuteu ʻa e tokotaha akó: Fakaafeʻi e kau akó ke nau fakakaukau ki he ngaahi ʻahiʻahi ʻoku nau fehangahangai mo iá mo e founga ʻe lava ke tokoniʻi ai kinautolu ʻe he Fakamoʻuí ke tekeʻi e ʻahiʻahí.

Fokotuʻu ki hono akoʻí ʻi he konifelenisi vitioó: Toe faʻu ʻi ha fakamatala fakapepa ʻa e sātí ʻi he fakaʻosinga ʻo e lēsoní, vahevahe hoʻo screen ke lava hoʻo kau akó ʻo sio ki ai, pea fakafonu fakataha ia.

Mātiu 4:1–11, Konga 2

Taumuʻa ʻo e lēsoní: ʻE tokoni ʻa e lēsoni ko ʻení ki he kau akó ke nau muimui ʻi he sīpinga ʻa Sīsū Kalaisí mo fakamanatu ʻa e ngaahi moʻoni mei he folofolá ke tokoni ke nau tekeʻi ʻa e ʻahiʻahí ʻi heʻenau moʻuí.

Teuteu ʻa e tokotaha akó: Fakaafeʻi e kau akó ke nau haʻu mateuteu ke vahevahe ha potufolofola ʻe taha pe ua ʻoku nau ongoʻi te nau lava ʻo fakaʻaongaʻi ke tokoniʻi kinautolu ke tekeʻi e ʻahiʻahí. Kapau ‘e ʻikai ke nau maʻu ha meʻa, fakaʻaiʻai kinautolu ke nau kole ki he mātuʻá, kau mēmipa kehe ʻo e fāmilí, pe kau taki ʻo e Siasí.
App Fakataukei Fakatokāteliné: Fakaafeʻi e kau ako ʻoku nau lava ʻo hū ki he polokalama telefoni toʻotoʻo ko ʻení ke fakaʻaongaʻi ia ʻi he lēsoní.

Fokotuʻu ki hono akoʻí ʻi he konifelenisi vitioó: Fakaʻaongaʻi ʻa e chat feature ke fakaʻatā ʻa e kau akó ke nau vahevahe ʻa e ngaahi potufolofola ʻoku nau ongoʻi te ne tokoniʻi kinautolu ke tekeʻi ʻa e ʻahiʻahí. Fakakaukau ke seivi ʻa e fepōtalanoaʻakí pea ʻave ʻa e lisi kakato ʻo e ngaahi folofolá ki he kau akó ʻamui ange.

Luke 5:1–11

Taumuʻa ʻo e lēsoní: ʻE tokoni ʻa e lēsoni ko ʻení ke ongoʻi ʻe he kau akó ha holi ke muimui ʻia Sīsū Kalaisi koeʻuhí ke Ne lava ʻo tokoniʻi kinautolu ke nau lavaʻi ha meʻa lahi ange ʻi he meʻa te nau lava ʻo aʻusia taʻe kau ai Iá.

Teuteu ʻa e tokotaha akó: Fakaafeʻi ‘a e kau akó ke nau lotu ke ʻiloʻi e taumuʻa ʻa e ʻOtuá ki heʻenau moʻuí. ʻE lava ke lau ia ʻe he kau ako ʻoku ʻi ai honau tāpuaki fakapēteliaké ʻo kumi e meʻa kuo fakahā ʻe he ʻOtuá fekauʻaki mo e ngaahi taumuʻa ʻo ʻenau moʻuí. ʻE ala ʻaonga ki he niʻihi kehé ʻenau talanoa mo ʻenau mātuʻá pe fekumi ki ha ngaahi fakakaukau ʻi he folofolá.

Ngaahi ʻAtá: Teuteu ke fakaʻaliʻali ha ngaahi fakatātā ʻo ha niʻihi fakafoʻituitui ne nau aʻusia ha ngaahi meʻa maʻongoʻonga ʻi he moʻuí koeʻuhí he naʻe tokoniʻi kinautolu ʻe he ʻOtuá ke mahino ʻenau taumuʻá (hangē ko ʻení, Lepeka, Mele, pe Siosefa Sāmita).

Fokotuʻu ki hono akoʻí ʻi he konifelenisi vitioó: Fakakaukau ke fakaʻaliʻali ha fakatātā ʻo hono ui ʻe he Fakamoʻuí ʻa Pita ko ha ākonga lolotonga hono aleaʻi ‘a e Luke 5:1–11.

Sione 3:1–8

Taumuʻa ʻo e lēsoní: ʻE tokoni ʻa e lēsoni ko ʻení ke mahino mo ongoʻi ʻe he kau akó ʻa e mahuʻinga ʻo e fanauʻi foʻou “ʻi he vai pea mo e Laumālie” ( Sione 3:5) ke hū ai ki he puleʻanga ʻo e ʻOtuá.

Teuteu ʻa e tokotaha akó: Fakaafeʻi ‘a e kau akó ke nau haʻu mateuteu ke aleaʻi ha ngaahi liliu ne nau fai pe ko ha niʻihi kehe ʻoku nau ʻiloʻi, ke nau hoko ʻo hangē ange ko Sīsū Kalaisí.

Vitiō: “Ko ha Liliu ʻo e Lotó” (4:39; sio mei he taimi 0:40 ki he 4:09), pe ko ha vitiō pe talanoa kehe ʻokú ne fakatātaaʻi e founga ʻe lava ke tokoniʻi ai kitautolu ʻe he Fakamoʻuí ke tau liliu ʻi he taimi ʻoku tau tali ai e ngaahi ouau ʻo e papitaisó mo e hilifakinimá

Fokotuʻu ki hono akoʻí ʻi he konifelenisi vitioó: Fakakaukau ke fakaafeʻi e kau akó ke ʻomi ha mēmipa ʻo e fāmilí pe kaungāmeʻa kuo liliu ʻe he Fakamoʻuí ʻi hono tali ʻo e papitaisó mo e hilifakinimá. Kapau he ʻikai lava ke ʻi ai ʻa e tokotaha naʻa nau filí, ʻe lava ke fakaʻaliʻali ʻe he kau akó hanau laʻitā pea fai ʻenau talanoá.

Fakataukei Fakatokāteline: Sione 3:5

Taumuʻa ʻo e lēsoní: ʻE ʻoange ʻe he lēsoni ko ʻení ha faingamālie ki he kau akó ke nau ʻahiʻahi fakahoko hono fakaʻaongaʻi ʻo e ngaahi tefitoʻi moʻoni ki hono maʻu ʻo e ʻilo fakalaumālié ʻo fakaʻaongaʻi ʻa e tokāteline kuo pau ke fanauʻi kitautolu ʻi he vaí pea mo e Laumālié kae lava ke tau hū ki he puleʻanga ʻo e ʻOtuá.

Teuteu ʻa e tokotaha akó: Fakaafeʻi e kau akó ke nau haʻu mateuteu ke vahevahe e meʻa te nau akoʻi ki ha kalasi Palaimeli fekauʻaki mo e Sione 3:5 .

Ngaahi Nāunaú: Ko hono hiki ʻo e ngaahi nāunau ki he ʻekitivitī ako maʻulotó (kapau ʻe lava) pe ko ha meʻangāue fakaʻilekitulōnika ʻoku ʻi ai ʻa e app Fakataukei Fakatokāteliné