Seminelí
Sione 2–4

Sione 2–4

Vakai Fakalūkufuá

Naʻe fakahoko ʻe Sīsū Kalaisi ha mana ʻo Ne liliu ʻa e vaí ko e uaine ʻi ha kātoanga mali. Naʻá ne akoʻi ha taki Siu ko Nikotīmasi fekauʻaki mo e fānauʻi foʻoú, pea fekauʻaki mo e ʻofa naʻe fakahaaʻi ʻe he Tamai Hēvaní ʻaki hono fekauʻi Mai Hono ʻAló ke Ne fai ha fakalelei maʻa ʻetau ngaahi angahalá. Naʻe akoʻi leva ʻe Sīsū ha fefine Samēlia fekauʻaki mo e vai moʻui ʻokú Ne foaki kiate kinautolu ʻoku tui kiate Iá.

Teuteu ke Akoʻi

ʻOku ʻoatu ʻe he fakamatala ko ʻení ki he kau faiakó ha ngaahi fakakaukau ki he meʻa ʻe ala fie maʻu ke teuteuʻi kimuʻa ki he lēsoni takitaha.

Sione 2

Taumuʻa ʻo e lēsoní:ʻOku fakataumuʻa ʻa e lēsoni ko ʻení ke tokoniʻi e kau akó ke fakatupulaki ʻenau tui kia Sīsū Kalaisí mo ʻiloʻi ʻa e ngaahi moʻoni fekauʻaki mo e mālohi mo e ʻulungaanga ʻo e Fakamoʻuí.

  • Teuteu ʻa e tokotaha akó: Fakaafeʻi e kau akó ke nau fakakaukauloto naʻe kole ange ke nau fai ha lea ʻi he houalotu sākalamēnití fekauʻaki mo e mālohi ʻo Sīsū Kalaisí. Kole ange ke nau haʻu mateuteu ki he kalasí ke vahevahe ha fakamatala fakafolofola ʻe taha pe ua te nau ala fakaʻaongaʻi ke fakatātaaʻi ʻaki Hono mālohí.

  • Fokotuʻu ki hono fulihi ʻo e kanotohí ʻi he ʻinitanetí: Hili hono ako ʻe he kau akó hono liliu ʻe Sīsū ʻa e vaí ki he uainé, fakakaukau ke fakakau ʻa e ngaahi fakakaukau ʻoku maʻu ʻi he konga “Ngaahi ʻEkitivitī Tokoni Ki he Akó” ʻi he konga ʻo e lēsoní ʻoku ui ko e “ʻE lava ʻe Sīsū Kalaisi ʻo liliu au.” ʻE lava ke tokoni ʻa e ngaahi fakakaukau ko ʻení ke ʻilo ʻe he kau akó ʻe lava ʻe Sīsū Kalaisi ʻo liliu ʻetau moʻuí mo hotau natulá neongo naʻá Ne liliu ʻa e vaí ko e uaine.

Sione 3:14–17

Taumuʻa ʻo e lēsoní: ʻE ʻoange ʻe he lēsoni ko ʻení ha ngaahi faingamālie ki he kau akó ke fakamālohia ʻenau tui kia Sīsū Kalaisí ʻi heʻenau ako lahi ange fekauʻaki mo ʻEne Fakaleleí.

  • Teuteu ʻa e tokotaha akó: Fakaafeʻi e kau akó ke kumi ha potufolofola pe fakamatala mei he konifelenisi lahí ʻokú ne akoʻi kiate kinautolu ha meʻa ʻoku mahuʻingamālie fekauʻaki mo e Fakalelei ʻa Sīsū Kalaisí.

  • Fokotuʻu ki hono akoʻi ʻo e konifelenisi vitioó: ʻE lava ke fakahū ʻa e kau akó ki ha ngaahi loki ngāue ke vahevahe mo aleaʻi ʻa e fehuʻi fakaʻosi ʻi he laʻipepa tufá ʻi ha fanga kiʻi kulupu iiki.

Fakataukei Fakatokāteliné: Sione 3:16

Taumuʻa ʻo e lēsoní: ʻE ʻoange ʻe he lēsoni ko ʻení ha faingamālie ki he kau akó ke fakatupulaki ʻenau taukei ʻi he tokāteline ʻo e Fakalelei ʻa Sīsū Kalaisí ʻaki hono ako maʻuloto e fakamoʻoni fakafolofola Sione 3:16 mo hono kupuʻi lea fakafolofola mahuʻingá, fakamatalaʻi e tokāteline ʻo e folofolá, mo hono fakaʻaongaʻi e ngaahi tefitoʻi moʻoni ʻo hono maʻu e ʻilo fakalaumālié ʻi ha tūkunga moʻoni ʻo e moʻuí.

  • Teuteu ʻa e tokotaha akó: Fakaafeʻi e kau akó ke nau fakakaukau ki he founga te nau akoʻi ai ha taha fekauʻaki mo Sīsū Kalaisi mo ʻEne Fakaleleí kapau ko ha kau faifekau taimi kakato kinautolu.

  • ʻEkitivitī fakamanatú: Fakapapauʻi ke fakahoko ʻa e ʻekitivitī fakamanatu ʻi he fakaʻosinga ʻo e lēsoní ʻi ha lēsoni he kahaʻú ʻa ia ʻe akoʻi hili ha taimi nounou mei he lēsoni ko ʻení.

  • Fokotuʻu ki hono akoʻi ʻo e konifelenisi vitioó: Fakaafeʻi ʻa e kau akó ke nau fakaʻaongaʻi ʻa e fetalanoaʻakí ke fokotuʻu ʻa e ngaahi fakamoʻoni fakafolofola pe fakamatala mei he kau taki ʻo e Siasí naʻa nau maʻu ʻe ala tokoni ki he tūkunga ʻoku ʻomí. ʻOange ki he kau akó ha ngaahi miniti siʻi ke nau lau ha niʻihi ʻo e ngaahi fakamoʻoni fakafolofola pe fakamatala ʻoku ʻoatu ʻi he fetalanoaʻakí, pea fakaafeʻi leva kinautolu ke nau fakamatala ki ha faʻahinga meʻa naʻe makehe kiate kinautolu.

Sione 4, Konga 1

Taumuʻa ʻo e lēsoní:ʻOku fakataumuʻa ʻa e lēsoni ko ʻení ke tokoniʻi e kau akó ke nau ʻiloʻi ʻenau fiemaʻu ʻa e Fakamoʻuí mo ongoʻi ʻEne ʻofa kiate kinautolú.

  • Teuteu ʻa e tokotaha akó: Tataki e kau akó ki he ʻekitivitī ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí ki he Sione 2–4 ʻa ia ʻokú ne fakaafeʻi kinautolu ke kumi e ngaahi meʻa fakaʻaho ʻi honau ʻapí ʻe lava ke fakaʻaongaʻi ke akoʻi ʻaki e ngaahi moʻoni fakalaumālié. Fakaafeʻi e kau akó ke nau ʻomi ha ngaahi meʻa ʻoku nau maʻú ki he kalasí, kapau ʻe lava, pea teuteu ke fakamatalaʻi ʻa e ngaahi moʻoni fakalaumālie ʻe lava ke akoʻi ʻo fakaʻaongaʻi kinautolú.

  •  

  • Fokotuʻu ki hono akoʻi ʻo e konifelenisi vitioó: Fakakaukau ke fakaafeʻi e kau akó ke nau kumi ha ngaahi meʻa ʻi honau ʻapí ʻe lava ke fakaʻaongaʻi ke akoʻi ʻaki ha moʻoni fakalaumālie.

Sione 4, Konga 2

Taumuʻa ʻo e lēsoní:ʻOku fakataumuʻa ʻa e lēsoni ko ʻení ke tokoni ke mahino lahi ange ki he kau akó ʻa e vai moʻui ʻoku foaki mai ʻe he Fakamoʻuí: ko e hā ia, ʻuhinga ʻoku nau fie maʻu ai iá, mo e founga te nau lava ʻo maʻu ai iá.

  • Teuteu ʻa e tokotaha akó: Fakaafeʻi e kau akó ke nau fakafehoanaki e ngaahi taimi ne nau ongoʻi ai ʻoku ʻikai ha meʻa fakalaumālie ʻoku nau ongoʻí mo e ngaahi taimi kuo nau ongoʻi fiemālie fakalaumālie aí. Ko e hā e meʻa ne kehekehé?

  • Laʻipepa Tufa: “Vai ʻo e Moʻuí”

  • Fokotuʻu ki hono akoʻi ʻo e konifelenisi vitioó: Fakakaukau ke ʻoange ki he kau akó ʻa e ngaahi fakahinohino ki hono faʻu ʻo e leá kimuʻa he kalasí pea fakaafeʻi ha kau ngāue tokoni ʻe niʻihi ke nau vahevahe ʻenau malangá ʻi he kamataʻanga ʻo e lēsoní.

Paaki