Fakataukei Fakatokāteliné: Sione 3:16

Ko e Fakalelei ʻa Sīsū Kalaisí

ʻI he lēsoni kuo ʻosí, naʻá ke ako ai fekauʻaki mo e ʻofa lahi naʻe fakahā mai ʻe he Tamai Hēvaní kiate kitautolu ʻi Hono fekauʻi mai Hono ʻAló ke hoko ko hotau Fakamoʻui mo e Huhuʻí. ʻE ʻoatu ʻe he lēsoni ko ʻení ʻa e faingamālie ke fakatupulaki hoʻo taukei ʻi he tokāteline ko ʻení ʻaki hono ako maʻuloto ʻa e fakamoʻoni fakafolofolá mo e kupuʻi lea mahuʻingá, fakamatalaʻi ʻo e tokāteliné, mo hono fakaʻaongaʻi ʻo e ngaahi tefitoʻi moʻoni ki hono maʻu ʻo e ʻilo fakalaumālié ʻi ha tūkunga moʻoni ʻo e moʻuí.

Teuteu ʻa e tokotaha akó: Fakaafeʻi e kau akó ke nau fakakaukau ki he founga te nau akoʻi ai ha taha fekauʻaki mo Sīsū Kalaisi mo ʻEne Fakaleleí kapau te nau hoko ko ha kau faifekau taimi kakato.

Ngaahi ʻEkitivitī Ako ʻE Ala Fakahokó

ʻOku fakataumuʻa ʻa e lēsoni ko ʻení ke akoʻi ʻi he ʻosi ʻa e lēsoni ki he potufolofola fakataukei fakatokāteline ko ʻení (“Sione 3:14–17”). Kapau ʻoku fie maʻu ke hiki ʻa e lēsoni fakataukei fakatokāteline ko ʻení ki ha uike kehe ke feau e taimi-tēpile ʻa e akó, fakapapauʻi ke akoʻi ʻa e lēsoni “Sione 3:14–17” ki he potufolofola ko ʻení lolotonga e uike tatau pē.

Ako maʻuloto mo fakamatalaʻi

Kimuʻa pea kamata e kalasí, hiki ʻa e ngaahi foʻi lea ki he kupuʻi lea fakafolofola mahuʻinga ki he Sione 3:16 ʻi ha fakahokohoko movetevete ʻi he palakipoé, ʻo tatau pē mo e ngaahi fakamatala movetevete ko ʻení. Tuku ke fokotuʻutuʻu lelei ʻe he kau akó ʻa e vēsí ʻi heʻenau tohinoa akó, pe kole ki ha tokotaha tokoni ke haʻu ki he palakipoé ʻo hiki e ngaahi foʻi leá ʻi hono hokohoko totonú fakataha mo e potufolofola totonú. Kapau ʻe fie maʻu, fakaafeʻi e kau mēmipa ʻo e kalasí ke nau tokoni.

Ko ha tatau movetevete ʻeni ʻo e fakamoʻoni fakafolofolá mo e kupuʻi lea fakafolofola mahuʻinga ki he Sione 3:16 . Fakatonutonu ‘a e ngaahi foʻi leá ʻaki hono hiki e fakamoʻoni fakafolofola totonú mo e kupuʻi lea fakafolofola mahuʻinga ʻi hoʻo tohinoa akó.

ʻa e ʻOtuá ʻAlo foaki naʻe ʻofa ki pē taha 16 He naʻá hono naʻe fakatupú Sione ne māmani pehē 3

Hili hoʻo fokotuʻutuʻu lelei ʻa e kupuʻi leá, toʻo ha kiʻi taimi ke ako maʻuloto ʻa e fakamoʻoni fakafolofolá mo e kupuʻi lea mahuʻinga ʻi he folofolá.

ʻOange ha faingamālie ki he kau akó ke nau fakamatalaʻi ʻa e tokāteline ʻoku akoʻi ʻi he potufolofola fakataukei fakatokāteliné. Ko ha sīpinga ʻeni ʻo e founga hono fakahoko ʻení.

Tau pehē pē ‘i ha kiʻi momeniti siʻi ko ha faifekau taimi kakato koe. Kuo fakaafeʻi koe ki ha ʻapi ʻe ha ongomeʻa mali anga fakakaumeʻa kuo teʻeki ai ke na fanongo fekauʻaki mo e Fakalelei ʻa Sīsū Kalaisí. Fakaʻaongaʻi e meʻa kuó ke ako mei he lēsoni kimuʻá fekauʻaki mo e ʻofa ʻa e ʻOtuá ʻi hono fekauʻi mai Hono ʻAló, ko e hā te ke vahevahe mo e ongomeʻa mali ko ʻení?

Fakakaukau ke fakaafeʻi e kau akó ke nau fakatātaaʻi ʻa e tūkunga ko ʻení ʻi he ngaahi hoá, pe fakaafeʻi ha niʻihi ʻo e kau akó ke nau fai ʻa e kiʻi lēsoni fakatātā ʻi muʻa ʻi he kalasí.

Ko hono fakaʻaongaʻi

Fakaʻaongaʻi ha kiʻi taimi ke toe vakaiʻi ʻa e ngaahi tefitoʻi moʻoni ʻo hono maʻu ʻo e ʻilo fakalaumālié mo e ʻEkitivitī ko ʻení.

Fakakaukau ke hiki ʻa e ngaahi fakamatala ko ʻení ʻi he palakipoé pea kole ki he kau akó ke nau haʻu ʻo tohi ʻa e ngaahi foʻi lea ʻoku puliá.

Fakafonu ʻa e ngaahi meʻa ʻoku fakaʻatā atu ki he ngaahi kupuʻi lea takitaha ko ʻení.

Ngāue ʻi he t__.

Vakaiʻi e ngaahi fakakaukaú mo e ngaahi f___ ʻaki ha f____ ʻoku t_____.

Fekumi ki ha mahino lahi ange ʻo fakafou ʻi he ngaahi maʻuʻanga tokoni kuo f_______ f______.

ʻI he ngaahi tefitoʻi moʻoni takitaha ko ʻení, fakaafeʻi ha tokotaha tokoni ke ne ʻomi ha fakamatala sekoni ʻe 30 ki he ʻuhinga ʻo e tefitoʻi moʻoni ko iá.

Fakakaukau ki he tūkunga ko ʻení.

Hili ʻene foki tōmui tuʻo ua hokohoko ki ʻapí, naʻe faingataʻa kia Sēlai ha fepōtalanoaʻaki mo ʻene ongomātuʻá. ʻOkú ne ʻiloʻi ʻoku fakaʻau ke faingataʻa ki heʻene ongomātuʻá ke na falala kiate ia. ʻOkú ne ʻiloʻi foki kuó ne fai ha ngaahi fili, kapau naʻe ʻilo ʻe heʻene ongomātuʻá fekauʻaki mo kinautolu, ‘e iku ke toe siʻisiʻi ange ‘ena falala kiate iá. ʻOku ongoʻi halaia ʻa Sēlai, ka ʻoku ngali faingofua ange he taimí ni ke tukunoaʻi e ngaahi palopalema ko ʻení. Pea toe tānaki atu, ʻokú ne fakatokangaʻi ʻoku faingataʻa ange ke ne fakahoko mo ongoʻi e ngaahi meʻa fakalaumālié, ʻa ia ʻokú ne pehē ai ʻoku ʻikai moʻoni ʻa e Tamai Hēvaní pe kuó Ne tafoki meiate ia koeʻuhí ko ʻene ngaahi filí. ʻI he taimí ni, ʻoku ʻikai ʻilo ʻe Sēlai ʻa e meʻa ke faí pe feituʻu ke tafoki ki aí.”

• Ko e hā ʻokú ne fakatupu ʻeni ke hoko ko ha tūkunga faingataʻa kia Sēlaí?

• Kapau naʻá ke ʻi he tuʻunga ʻo Sēlaí, ko e hā ha niʻihi ʻo hoʻo ngaahi fehuʻi pe hohaʻa lahi tahá?

Fakakaukau ki he founga ʻe lava ke tokoni ai ʻa e ngaahi tefitoʻi moʻoni ʻo hono maʻu ʻo e ʻilo fakalaumālié ke tali ʻe Sēlai ʻa e tūkunga naʻá ne ʻi aí. ‘O ka fie maʻu, tuku ha kiʻi taimi ke toe vakaiʻi e ngaahi palakalafi 5–12 ʻi he konga “Ko Hono Maʻu ʻo e ʻIlo Fakalaumālié” ʻo e Fakamatala ki he ʻElito ʻo e Fakataukei Fakatokāteliné (2022) ke ako lahi ange fekauʻaki mo e ngaahi tefitoʻi moʻoni ko ʻení.

Ngāue ʻi he tuí

Fakapapauʻi pe ʻe lelei taha ke fakahoko ʻe he kau akó ʻa e ngaahi ʻekitivitī ko ʻení mo hanau hoa, ʻi ha fanga kiʻi kulupu iiki, pe fakakalasi.

• Ko e hā ʻe lava ke fai ʻe Sēlai ke ngāue ai ʻi he tuí ʻi he tūkunga ko ʻení?

• Ko e hā te ke talaange ke tokoniʻi ia kapau naʻá ne ongoʻi ʻoku fuʻu faingataʻa ʻa e ngāue ʻi he tuí?

Vakaiʻi e ngaahi fakakaukaú mo e ngaahi fehuʻí ʻaki ha fakakaukau ʻoku taʻengatá.

Kuo ʻosi ongoʻi ʻe Sēlai ʻoku hangē kuo uesia hono vā mo ʻene ongomātuʻá pea mo e ʻOtuá koeʻuhí ko e ngaahi fili kuó ne faí. Hangē ʻe toe kovi ange e meʻa kotoa kapau ‘e talanoa tauʻatāina ki heʻene ongomātuʻá mo e ʻOtuá.

• Ko e hā ha ngaahi founga ʻoku hala pe taʻekakato ai e fakakaukau ʻa Sēlaí?

• Ko e hā ʻokú ke ʻilo fekauʻaki mo e Tamai Hēvaní, Sīsū Kalaisi, pe ko e palani ʻo e fakamoʻuí ʻe ʻaonga ke manatuʻi ʻe Sēlaí?

• Kapau ko e faʻē pe tamai koe ʻa Sēlaí, ko e hā ha faʻahinga ongo te ke maʻu kiate ia? Ko e hā te ke fie maʻu ke mahino ki ho ʻofefine faingataʻaʻiá fekauʻaki mo e ongo ʻokú ke maʻú?

Fekumi ki ha mahino lahi ange ʻo fakafou ʻi he ngaahi maʻuʻanga tokoni kuo fokotuʻu fakalangí.

Fakaʻaongaʻi ha ngaahi miniti siʻi ke kumi ha ngaahi potufolofola pe fakamatala mei he kau taki ʻo e Siasí ʻe ala tokoni kia Sēlai. Kapau ʻe fie maʻu, fakakaukau ke fakaʻaongaʻi ʻa e ngaahi maʻuʻanga tokoni hangē ko e Fakahinohino ki he Ngaahi Folofolá pe Ngaahi Tefito ʻo e Ongoongoleleí ke tokoniʻi koe (vakai ki he, ChurchofJesusChrist.org). ʻE lava foki ke ʻaonga hono ngāue ʻaki ha niʻihi ʻo e ngaahi folofola naʻá ke ako ʻi he lēsoni kimuʻá, hangē ko e Sione 3:14–17 pe Tokāteline mo e Ngaahi Fuakava 18:10–11 .

Kapau ʻe fie maʻu, tokoni ke ʻilo ʻe he kau akó ʻa e feituʻu ke maʻu ai e ngaahi potufolofola ʻoku fekauʻaki mo e tūkunga ko ʻení. Mahalo naʻa ʻaonga ke fakaʻaliʻali ʻa e lisi ʻo e ngaahi potufolofola mei he laʻipepa tufa ʻo e lēsoni kuo ʻosí.

ʻI he ʻosi ʻa e kau akó, fakaafeʻi ha kau ngāue tokoni ke nau vahevahe ʻa e meʻa naʻa nau maʻú. Fakakaukau ke fakaʻaongaʻi e ngaahi fehuʻi hangē ko ʻení ke fakatupulaki ʻaki e fealeaʻaki fakakalasí.

• Ko e hā haʻo meʻa naʻe ako fekauʻaki mo Sīsū Kalaisi mei hoʻo akó ʻe tokoni kia Sēlaí?

• Ko e hā ha kupuʻi lea pau ʻe ua mei hoʻo akó ʻe ʻaonga kia Sēlaí? Ko e hā hono ʻuhingá?

Fakakaukau ke fakaafeʻi e kau akó ke vahevahe e meʻa kuo nau ako ʻi he lēsoni ko ʻení ʻe tokoni kiate kinautolu ʻi heʻenau moʻui fakatāutahá. Fakamoʻoni ki he ngaahi moʻoni kuo mou aleaʻí.

Fakamanatu

ʻOku totonu ke fakaʻaongaʻi ʻa e ʻekitivitī fakamanatu ko ʻení lolotonga ha lēsoni hoko mai.

Ko e kupuʻi folofola mahuʻinga ki he Sione 3:16 ko e “He naʻe ʻofa pehē ʻa e ʻOtuá ki māmani, naʻá ne foaki hono ʻAlo pē taha naʻe fakatupú.”Tokoni ke toe vakaiʻi ʻe he kau akó ʻa e fakamoʻoni fakafolofola mo e kupuʻi lea mahuʻinga ko ʻení ʻaki hono fakaafeʻi kinautolu ke nau toutou lau fakataha mo e kalasí fakatouʻosi. Hili hono toutou fai ʻení, ʻe lava foki ʻe he kau akó ʻo toe lau ʻa e fakamoʻoni fakafolofolá mo e kupuʻi lea mahuʻinga ki he ngaahi potufolofola fakataukei fakatokāteline kehe kuo nau akó.