Zotërimi Doktrinor: Mateu 11:28–30
“Ejani tek Unë … dhe Unë do t’ju Jap Çlodhje”
Jezu Krishti dha mësim se nëse vijmë tek Ai, Ai do t’i lehtësojë barrët tona dhe do të na japë çlodhje.Ky mësim do të të japë mundësinë për të shpjeguar kuptimin tënd për këtë doktrinë duke i zbatuar parimet e marrjes së njohurisë shpirtërore në një skenar të ngjashëm me përvojat që mund të kesh pasur në jetën tënde.
Zotërimi doktrinor përmes zbulesës. Plaku Kim B. Klark, i Të Shtatëdhjetëve, tregoi sa vijon në lidhje me zotërimin doktrinor: “Dua që ju ta dini dhe ndieni në zemrat tuaja se ai ka ardhur me anë të zbulesës nga Zoti; është një mrekulli. Kam reflektuar shpesh për mënyrën se si erdhi, kur erdhi dhe përse erdhi. Kam arritur ta shoh Zotërimin Doktrinor në kontekstin më të gjerë të arsimimit në Kishë dhe punës së madhërishme të Zotit në tokë” (Kim B. Klark, “Zotërimi Doktrinor dhe Mësimi në Thellësi” [mbrëmje me një Autoritet të Përgjithshëm, 17 shkurt 2017], broadcasts.ChurchofJesusChrist.org).
Përgatitja e nxënësve: Ftojini nxënësit të ushtrohen duke mësuar përmendsh referencën e zotërimit doktrinor dhe frazën kyç të shkrimit të shenjtë për vargjet te Mateu 11:28–30 (ose të gjithë fragmentin nëse nxënësit janë në gjendje). Kërkojuni të mendojnë mbi mënyrën se si mund ta zbatojnë atë që kanë mësuar për aftësinë e Jezu Krishtit për t’ua hequr barrët nëse vijnë tek Ai.
Veprimtari të Mundshme të të Mësuarit
Ky fragment i zotërimit doktrinor është hartuar për t’u dhënë pas mësimit “Mateu 11:28–30”, që është mësimi kontekstual për fragmentin e zotërimit doktrinor Mateu 11:28–30 . Nëse ky mësim për fragmentin e zotërimit doktrinor duhet të zhvendoset në një javë tjetër, sigurohuni që gjithashtu të jepni mësimin përkatës kontekstual gjatë asaj jave.
Mëso përmendsh dhe shpjego
Jepuni nxënësve mundësinë për të mësuar përmendsh referencën dhe frazën kyç të shkrimit të shenjtë për librin Mateu 11:28–30 . (Nxënësit mund t’i ftoni për ta mësuar përmendsh tërë fragmentin nëse janë në gjendje.)
Një mundësi është ta shkruani atë sa vijon në tabelë dhe pastaj t’i ftoni nxënësit të ushtrohen duke e thënë tekstin ose si klasë, ose më vete.
“Mateu __:28–__: Ejani tek u__, o ju të gj____ të m______ dh_ të r______, dhe unë do t’ju j__ ç______.”
Programi Doctrinal Mastery [Zotërimi Doktrinor] mund t’ju ndihmojë gjithashtu që ta mësoni përmendsh këtë frazë kyç të shkrimit të shenjtë.
Shpjegimi i së vërtetës
Jepuni nxënësve mundësinë për ta shpjeguar doktrinën e dhënë në mësimin e mëparshëm se nëse vijmë te Jezu Krishti, Ai do t’i lehtësojë barrët tona dhe do të na japë çlodhje.
Një mënyrë për ta bërë këtë është të paraqitni fotografinë e mëposhtme dhe t’i ftoni nxënësit të kujtojnë se çfarë është zgjedha ose të shpjegojnë përdorimin e zgjedhës.
Kujto se çfarë është zgjedha (shih fotografinë e mëposhtme). Shqyrtoji vargjet te Mateu 11:28–30 , duke kërkuar të vërtetat që dha mësim Shpëtimtari.
Duke iu referuar fotografisë së një zgjedhe, shpjego se si mund të na ndihmojë Shpëtimtari me barrët tona. Sigurohu të përfshish se cili është roli ynë teksa bashkëpunojmë me Krishtin.
Ushtroje vënien në zbatim
Nëse nxënësit duhet t’i shqyrtojnë parimet e marrjes së njohurisë shpirtërore, merrni parasysh t’i ftoni të punojnë në grupe me nga tre persona. Në grupet me tre persona, secili anëtar i grupit mund të kërkojë një parim të ndryshëm. Çdo person më pas mund të përdorë fjalët e veta për të shpjeguar parimin e grupit të vet. Pastaj shfaqeni ose shpërndajeni veprimtarinë e mëposhtme dhe kërkoni nga nxënësit që të përputhin parimin me shpjegimin e tij. (Përgjigjet e sakta janë: 1. C; 2. A; 3. B.)
Nëse është e nevojshme, shqyrtoji parimet e marrjes së njohurisë shpirtërore duke studiuar paragrafët 5–12 të pjesës “Marrja e Njohurisë Shpirtërore” te Dokumenti Bazë i Zotërimit Doktrinor (2020). Pastaj lidhe secilën nga fjalitë e mëposhtme me parimin e duhur të marrjes së njohurisë shpirtërore.
1. Kur mësojmë t’i dallojmë burimet e pasigurta dhe t’i shmangim ato, kjo mund të na mbrojë nga keqinformimi dhe nga ata që përpiqen ta shkatërrojnë besimin.
2. Kur kërkojmë ta zhvillojmë kuptueshmërinë tonë dhe t’u japim zgjidhje shqetësimeve, është e rëndësishme që ne të mbështetemi te dëshmia që kemi tashmë për Jezu Krishtin, Rivendosjen e ungjillit të Tij dhe mësimet e profetëve të Tij të shuguruar.
3. Ne kërkojmë ndihmën e Frymës së Shenjtë me qëllim që t’i shohim gjërat ashtu sikurse i sheh Zoti.
A. Vepro me besim
B. Shqyrtoji konceptet dhe pyetjet me një këndvështrim të përjetshëm
C. Kërko kuptueshmëri të mëtejshme nëpërmjet burimeve të caktuara në mënyrë hyjnore
Skenari
Mund të jetë e dobishme t’i ftoni nxënësit të kujtojnë barrët për të cilat menduan në mësimin e mëparshëm.
Në dy ose tri fjali, krijo një skenar hipotetik të një personi imagjinar të moshës sate mbi të cilin/cilën aktualisht rëndon një barrë. Përmend një emër, barrën konkrete dhe një ose dy hollësi se si ndihet personi.
Merrni parasysh t’i ftoni nxënësit të shkëmbejnë skenarët e tyre me njëri-tjetrin. Nxënësit pastaj mund të shkruajnë një përgjigje për skenarin që morën duke përdorur parimet e marrjes së njohurisë shpirtërore ose, për më shumë larmi, nxënësit mund të përgjigjen duke përdorur vetëm një parim të marrjes së njohurisë shpirtërore përpara se t’i shkëmbejnë skenarët me një nxënës tjetër. Ai nxënës mund të përgjigjet duke përdorur një parim tjetër përpara se të shkëmbejë skenarë përsëri. Nxënësit mund t’i shkëmbejnë skenarët për herë të tretë në mënyrë që t’i përdorin të trija parimet. Pastaj ftojini nxënësit t’i marrin skenarët që shkruan dhe t’i shqyrtojnë përgjigjet me shkrim të shokëve të tyre.
Marrja e njohurisë shpirtërore
Mendo se si mund t’i përdorësh parimet e marrjes së njohurisë shpirtërore për të ndihmuar personin në skenar. Përgjigju për pyetjet vijuese që të të ndihmojnë.
Vepro me besim
-
Çfarë ke bërë për t’i besuar Perëndisë dhe për t’u kthyer nga Ai teksa je përballur me sfida?
-
Çfarë mësimesh ke marrë nga ushtrimi i besimit te Jezu Krishti në të kaluarën që mund të ndihmojnë në këtë situatë? Si?
Shqyrtoji konceptet dhe pyetjet me një këndvështrim të përjetshëm
-
Çfarë di për Jezu Krishtin që e bën Atë të aftë të ndihmojë për të hequr barrët?
-
Si është një pjesë e rëndësishme e planit të Atit tënd Qiellor përballja me barrë dhe sfida në jetën tonë?
Kërko kuptueshmëri të mëtejshme nëpërmjet burimeve të caktuara në mënyrë hyjnore
-
Si mund të ndihmojë të diturit e doktrinës që gjendet te Mateu 11:28–30 me këtë barrë apo sfidë?
-
Çfarë ka ndonjë tjetër shkrim të shenjtë apo thënie tjetër profetike që mund të ndihmojë? Si?
Heqja e barrëve
Duke përdorur atë që ke përcaktuar, shkruaji një letër personit në skenarin tënd. Përfshiji të vërtetat nga Mateu 11:28–30 dhe burime të tjera për të dhënë ngushëllim dhe inkurajim.
Nëse nxënësit i ndërruan skenarët, ftojini t’ia lexojnë letrën e tyre shokut të klasës që shkroi skenarin të cilit po i përgjigjen.
-
Cili parim i marrjes së njohurisë shpirtërore mendon se ishte më i dobishëm në përgatitjen tënde për t’iu përgjigjur këtij skenari? Përse?
Shqyrto
Ndihmojini nxënësit të shqyrtojnë referencën dhe frazën kyç të shkrimit të shenjtë për librin Mateu 11:28–30 .
Një mënyrë për t’i ndihmuar nxënësit që të shqyrtojnë është ta shkruajnë atë sa vijon në tabelë. Nëse është në dispozicion, merrni parasysh përdorimin e programit Doctrinal Mastery [Zotërimi Doktrinor]. Mund të jetë e dobishme për nxënësit të punojnë me një shok klase, duke e bërë me radhë përsëritjen e referencës dhe frazës kyç të shkrimit të shenjtë.
“Mateu __:28–__: Ejani tek u__, o ju të gj____ të m______ dh_ të r______, dhe unë do t’ju j__ ç______.”
Veprimtari Plotësuese e të Mësuarit
Skenari i mundshëm
Merrni parasysh të lexoni skenarin në vijim nëse nxënësit nuk mendojnë për një të tillë gjatë veprimtarisë së skenarit në mësim.
“Jam shumë i stresuar tani. Po përpiqem të qëndroj pranë Zotit, por gjërat thjesht vazhdojnë e grumbullohen. Shkolla është e vështirë, gjërat nuk më shkojnë mirë me familjen për momentin dhe nuk jam i sigurt se si t’u bëj ballë gjërave. Madje as nuk duket sikur do të përmirësohet ndonjë gjë. Jam i shqetësuar për të gjithë këtë situatë dhe nuk di se çfarë të bëj.”